शनिवार 14 जनवरी 2023 की दैनिक मुरली

14-01-2023 praatahmurli om shanti "baapdaada"' madhuban

meethe bachche - abhi tumhaari kaaya bilkul puraani ho gai hai , baap aaye hain tumhaari kaaya kalpa vriksha samaan banaane , tum aadhaakalpa ke liye amar bante ho

prashn:- is wonderful naatak mein kaun si baat bahut hi samajhne ki hai?

uttar:- is naatak mein jo bhi actors (paartadhaari) hain unka chitra keval ek baar hi dekh sakte phir vahi chitra 5 hajaar varsha ke baad dekhenge। 84 janmon ke 84 chitra banenge aur sabhi bhinna-bhinna honge। karma bhi kiske saath mil nahin sakte। jisne jo karma kiye woh phir 5 hajaar varsha baad vahi karma karenge, yeh bahut hi samajhne ki baaten hain। tum bachchon ki buddhi ka taala abhi khula hai। tum yeh raaz sabko samjha sakte ho।

geet:- bholenaath se niraala…

om shanti। bholaanaath sadaiv shivbaaba ko kaha jaata hai। shankar ko nahin kaha jaata। woh to vinaash karta hai aur shivbaaba sthaapna karte hain। yeh to zaroor hai sthaapna svarga ki aur vinaash narka ka karenge। to gyaan saagar bholaanaath shiv ko hi kahenge। ab tum bachche to anubhvi ho। zaroor kalpa pahle bhi shivbaaba aaya hoga aur ab aaya hai zaroor। unko aana zaroor hai kyonki nai manushya srishti ko rachna hai। is drama ke aadi madhya ant ka raaz bataana hai isliye zaroor yahaan aana hai। sookshm vatan mein to nahin bataayenge। sookshm vatan ki bhaasha alag hai, mool vatan mein to bhaasha hai nahin। yahaan hai talkie। shivbaaba hi bigdi ko banaane vaala hai। jab srishti tamopradhaan ho jaati hai to sabko sadgati dene vaala bhagwan kehte hain ki mujhe aana padta hai। yaadgaar bhi yahaan hain। is naatak mein jo-jo manushya ke chitra hain woh ek hi baar dekh sakte hain। aise nahin ki lakshmi-naaraayan ke chitra (chehre) satayug ke sivaae kabhi bhi kahaan dekh sakte hain। woh punarjanma lenge to naam roop bhinna ho jaayega। vahi lakshmi-naaraayan ka roop ek baar dekha phir 5 hajaar varsha ke baad hi dekhenge। jaise gaandhi ka hoobhu chitra phir 5 hajaar varsha ke baad dekhenge। athaah manushya hain jo bhi manushyon ke chitra ab dekhe hain woh phir 5 hajaar varsha ke baad dekhenge। 84 janmon ke liye 84 chitra banenge। aur sabhi bhinna-bhinna honge। karma bhi kiske saath nahin mil sakte। jisne jo karma kiya, vahi karma 5 hajaar varsha ke baad phir karenge। yeh bahut samajhne ki baaten hain। baba ka bhi chitra hai। ham samajhte hain zaroor pahle-pahle srishti rachne woh aaya hoga। tumhaari buddhi ka taala ab khula hai tab tum samajhte ho। ab phir auron ka bhi aise taala kholna hai। niraakaar baap zaroor paramdham mein rehte honge। jaise tum bhi sab mere saath rehte ho। pahle jab main aata hoon to mere saath brahma, vishnu, shankar hote hain। manushya srishti to pahle se hi hai phir woh kaise palta khaati hai, repeat kaise hoti hai। pahle-pahle zaroor sookshm vatan rachna pade phir sthoolavtan mein aana pade kyonki manushya jo devta the, woh ab shoodra bane hain। unhon ko phir brahman se devta banaana pade। to jo kalpa pahle mainne gyaan diya tha phir vahi repeat karoonga। is samay baith raajayog sikhaata hoon। phir aadhaakalpa ke baad bhakti aarambha hoti hai। baap khud baith samjhaate hain ki puraani srishti phir nai kaise banti hai। ant se phir aadi kaise hoti hai। manushya samajhte hain paramatma aaya tha parantu kab, kaise aaya। aadi-madhya-ant ka raaz kaise khola, yeh nahin jaante।

baap kehte hain phir main sammukh aaya hoon - sabhi ko sadgati dene। maaya raavan ne sabhi ki kismat bigaad di hai to bigdi ko banaane vaala zaroor koi chaahiye। baap kehte hain 5 hajaar varsha pahle bhi brahma tan mein aaya tha। manushya srishti zaroor yahaan hi rachi hai। yahaan aakar srishti ko paltaae kaaya kalpa vriksha samaan banaate hain। ab tumhaari kaaya bilkul puraani ho gayi hai, isko phir aisa banaate hain jo aadhaakalpa ke liye tum amar ban jaate ho। bhal shareer badalte ho parantu khushi se। jaise puraana chola chhod naya lete hain। vahaan aise nahin kahenge ki phalaana mar gaya, unko marna nahin kaha jaata hai। jaise tumhaara yeh jeete ji marna hai to tum mare thode hi ho। tum to shivbaaba ke bane ho। baba kehte hain tum mere noore ratna, sikeeldhe bachche ho। shivbaaba bhi kehte to brahma baba bhi kehte hain। woh niraakaari baap, yeh saakaari baap। abhi tum kehte ho baba aap bhi vahi ho na। ham bhi vahi hain, jo phir aakar mile hain। baap kehte hain main aakar svarga sthaapan karta hoon। raajaai to zaroor chaahiye isliye raajayog sikhaata hoon। peechhe to tumko raajaai mil jaayegi phir is gyaan ki vahaan darkaar nahin rehti। phir yeh shaastra aadi sab bhakti mein kaam aate hain, padhte rehte hain। jaise koi bade aadmi history-geography likh jaate hain, woh peechhe padhte rehte hain। athaah kitaab hain। manushya padhte hi rehte hain। svarga mein to kuchh bhi nahin hoga। vahaan to bhaasha hi ek hogi। to baba kehte hain ab main aaya hoon srishti ko naya banaane। pahle nai thi, ab puraani ho gai hai। mere sab putron ko (bachchon ko) maaya ne jalaae raakh kar diya tha। woh dikhaate hain sagar ke bachche... gyaan saagar to barobar hai, unke tum bachche ho। bhal bachche to vaastav mein sabhi hain parantu tum bachche ab practical mein gaaye jaate ho। tumhaare kaaran hi baap aate hain। kehte hain main aaya hoon phir se tum bachchon ko surjeet karne। jo bilkul kaale, pattharbuddhi ho gaye hain unko phir se aakar paarasbuddhi banaata hoon। tum jaante ho is gyaan se ham paarasbuddhi kaise bante hain। jab tum paarasbuddhi ban jaayenge tab yeh duniya bhi pattharpuri se badal paaraspuri ban jaayegi, jiske liye baba purushaartha karaate rehte hain। to baba ko zaroor manushya srishti rachne ke liye yahaan hi aana padega na। jiske tan mein aate hain, un dvaara mukh vanshaavli banaate hain। to yeh ho gai maata। kitni guhya baat hai। hai to yeh mel, inmen baba aate hain to yeh maata kaise hui, ismen moonjhenge zaroor।

tum siddha kar bataate ho ki yeh maat-pita, brahma sarasvati donon kalpa vriksha ke neeche baithe hain, raajayog seekh rahe hain to zaroor unhon ka guru chaahiye। brahma sarasvati aur bachche sabhi ko raajarishi kehte hain। raajaai ke liye yog lagaate hain। baap aakar raajayog aur gyaan sikhaate hain jo aur koi bhi sikha na sake। na koi ka raajayog hai। woh to sirf kahenge yog seekho। hathayog to anek prakaar ke hote hain। raajayog koi bhi sikhla na sake। bhagwan ne aakar raajayog sikhaaya tha। kehte hain hamko kalpa-kalpa phir aana padta hai jabki manushya srishti nai rachni hai। pralay to hoti nahin। agar pralay ho jaae to phir ham aaven kismen? niraakaar kya aakar karenge? baap samjhaate hain srishti to pahle se hi hai। bhakta bhi hain, bhagwan ko bulaate bhi hain, isse siddha hai ki bhakta hain। bhagwan ko aana hi tab hai jab bhakta bahut duhkhi hain, kaliyug ka ant hai। raavan raajya khatma hona hai, tab hi mujhe aana padta hai। barobar is samay sabhi duhkhi hain। mahaabhaari ladaai saamne khadi hai।

yeh paathshaala hai। yahaan em object hai। tum jaante ho satayug mein lakshmi-naaraayan ka raajya tha phir single taaj vaalon ka raajya hua phir aur-aur dharma vriddhi ko paaye hain phir raajaai aadi badhaane ke liye yuddha aadi hue। tum jaante ho jo past ho gaya, woh phir repeat hoga। phir lakshmi-naaraayan ka raajya aarambha hoga। baba world ki history-geography ka raaz poora samjhaate hain। detail mein jaane ki darkaar nahin। jaante hain ki ham sooryavanshi hain to zaroor punarjanma bhi sooryavanshi mein hi lete honge। naam roop to badalte honge। maa baap bhi doosre milenge, yeh saara drama buddhi mein rakhna hai। baap kaise aata hai woh bhi samajh liya। manushyon ki buddhi mein vahi geeta ka gyaan hai। aage hamaari buddhi mein bhi vahi puraana geeta ka gyaan tha। abhi baap guhya baaten sunaate hain jo sunte-sunte saare raaz samajh gaye hain। manushya bhi kehte hain aage aapka gyaan aur tha, ab bahut achha hai। ab samajh gaye hain ki kaise grihastha vyavhaar mein rah kamal phool samaan banna hai। yeh sabka antim janma hai। marna bhi sabko hai। khud behad ka baap kehte hain tum pavitra banne ki pratigya karo to 21 janma ke liye svarga ke maalik banenge। yahaan to koi padmapti hain to bhi duhkhi hain। kaaya kalpatru hoti nahin। tumhaari kaaya kalpatru hoti hai। tum 21 janma marte nahin। baap kehte hain yahaan aayenge bhi vahi jo sooryavanshi, chandravanshi kaam chita par baith saanvare ho gaye hain isliye raadhe-krishna, shreenaaraayan sabko saanvara dikhaate hain। abhi to sabhi saanvare hain। kaam chita par baithne se saanvare ho gaye hain। ab tumko kaam chita se utarkar gyaan chita par baithna hai। vish ka hathiyaala cancel kar gyaan amrit ka hathiyaala baandhana hai। samjhaana aise hai jo woh kahe ki tum to shubh kaarya kar rahe ho। jab tak kumaar kumaari hai to unko mootapleeti nahin kahenge। baap kehte hain tumko ganda kabhi nahin banna hai। aage chalkar dher aayenge, kahenge yeh bahut achha hai - gyaan chita par baithne se to ham svarga ke maalik banenge। aksar brahman hi sagaai karaate hain। raajaaon ke paas bhi brahman rehte hain, unhon ko raajguru kehte hain। aajkal to sannyaasi bhi hathiyaala baandhate hain। tum jab yeh gyaan ki baaten sunaate ho to log bahut khush hote hain। jhat raakhi bhi bandhava lete hain। phir ghar mein jhagda bhi hota hai। kuchh sahan to zaroor karna pade।

tum ho gupta shiv shakti sena। tumhaare paas koi hathiyaar nahin, deviyon ko bahut hathiyaar dikhaate hain। yeh sab hain gyaan ki baaten। yahaan hai hi yogbal ki baaten। tum yogbal se vishwa ki baadshaahi lete ho। baahubal se had ki raajaai milti hai। behad ki raajaai to behad ka maalik hi denge। ladaai ki koi baat nahin। baap kehte hain main kaise ladaaoonga। main to ladaai jhagda mitaane ke liye aaya hoon phir inka naam-nishaan bhi nahin rehta, tab to paramatma ko sab yaad karte hain। kehte hain meri laaz rakho phir bhi ek mein nishchay nahin to aur-aur ko pakadte rehte hain। kehte hain hamaare mein bhi eeshvar hai phir apne mein bhi vishvaas nahin rakhte, guru karte hain। jab tumhaare mein bhagwan hai to guru kyon karte ho। yahaan to baat hi nyaari hai। baap kehte hain kalpa pahle bhi main aise hi aaya tha jaise ab aaya hoon। ab tum jaante ho ki rachta baap kaise baith rachna karte hain, yeh bhi drama hai। jab tak is chakra ko nahin jaana tab tak kaise jaanen ki aage kya hona hai। kehte hain yeh karmakshetra hai। ham niraakaari duniya se part bajaane aaye hain। to tumko saare drama ke creator, director ka maaloom hona chaahiye। ham sab actors to jaan gaye hain ki yeh drama kaise bana hua hai, yeh srishti kaise vriddhi ko paati hai, jabki ab kaliyug ka ant hai to zaroor satayug sthaapan hona chaahiye। is chakra ki samjhaani bilkul theek hai jo brahman kul ke honge woh samajh jaayenge। phir bhi yeh prajaapita hai to apna kul badhta hi jaayega। badhna to hai hi। kalpa pahle muaaphik sab purooshaartha karte hi rehte hain। ham saakshi hokar dekhte hain। har ek ko apna mukhda aaine mein dekhte rehna hai - kahaan tak ham laayak bane hain - satayug mein raajdhaani lene ke? yeh kalpa-kalpa ki baaji hai, jo jitni service karenge, tum ho behad ke roohaani social workers। tum supreme rooh ki mat par chalte ho। aise achhi-achhi points dhaaran karni hain। baap aakar kaal ke panje se chhudaate hain। vahaan mrityu ka naam nahin, yeh hai mrityulok, woh hai amarlok। yahaan aadi-madhya-ant duhkh hai, vahaan duhkh ka naam-nishaan nahin। achha!

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) ham niraakaari aur saakaari donon baap ke sikeeldhe noore ratna hain, ham shivbaaba ke jeete ji vaaris bane hain, isi nashe mein rehna hai।

2) yogbal se vishwa ki raajaai leni hai, pavitrata ki raakhi baandhi hai to sahan bhi karna hai। patit kabhi nahin banna hai।

vardaan:- sukh ke saagar baap ki smriti dvaara duhkh ki duniya mein rehte bhi sukh swaroop bhav

sada sukh ke saagar baap ki smriti mein raho to sukh swaroop ban jaayenge। chaahe duniya mein kitna bhi duhkh ashaanti ka prabhaav ho lekin aap nyaare aur pyaare ho, sukh ke saagar ke saath ho isliye sada sukhi, sada sukhon ke jhoole mein jhoolne vaale ho। master sukh ke saagar bachchon ko duhkh ka sankalp bhi nahin aa sakta kyonki duhkh ki duniya se kinaara kar sangam par pahunch gaye। sab rassiyaan toot gai to sukh ke saagar mein lahraate raho।

slogan:- man aur buddhi ko ek hi powerful sthiti mein sthit karna hi ekaantavaasi banna hai।