बुधवार 25 जनवरी 2023 की दैनिक मुरली

25-01-2023 praatahmurli om shanti "baapdaada"' madhuban

“meethe bachche - baap ko yaad karne ki khoob mehnat karo, kyonki tumhein sachcha sona banna hai''

prashn:- achhe purushaarthiyon ki nishaani kya hogi?

uttar:- jo achhe purushaarthi honge woh kadam-kadam shreemat par chalenge। sada shreemat par chalne vaale hi oonch pad paate hain। baba bachchon ko sada shreemat par chalne ke liye kyon kehta? kyonki vahi ek sachcha-sachcha maashook hai। baaki sab unke aashik hain।

om shanti। om shanti ka arth to naye va puraane bachchon ne samjha hai। tum bachche jaan gaye ho ki ham sabhi aatmaayen paramatma ki santaan hain। paramatma hai oonche te oonch aur bahut pyaare te pyaara maashook sabhi ka। bachchon ko gyaan aur bhakti ka raaz to samjhaaya hai। gyaan maana din, satayug-treta, bhakti maana raat, dvaapar aur kaliyug। bhaarat ki hi baat hai। aur dharmon se tumhaara jaasti connection nahin hai, 84 janma bhi tum hi bhogte ho। pahle-pahle bhi tum bhaaratvaasi aaye ho। 84 janmon ka chakra tum bhaaratvaasiyon ke liye hai। aise koi nahin kahenge - islaami, bauddhi aadi 84 janma lete hain। nahin, bhaaratvaasi hi lete hain। bhaarat hi avinaashi khanda hai, yeh kab vinaash nahin hota aur sabhi khandon ka vinaash ho jaata hai। bhaarat hi sabse oonch te oonch hai। avinaashi hai। bhaarat khanda hi svarga banta hai aur koi khanda svarga nahin banta। bachchon ko samjhaaya gaya hai - nai duniya satayug mein bhaarat hi hota hai। bhaarat hi svarga kahlaata hai। vahi phir 84 janma lete hain। aakhreen narkavaasi bante hain, phir vahi bhaaratvaasi svargavaasi banenge। is samay sabhi narkavaasi hain। phir aur sab khanda vinaash honge, baaki bhaarat hi rahega। bhaarat khanda ki mahima aparmaapaar hai। vaise parampita paramatma ki mahima aur geeta ki mahima bhi aparmaapaar hai, parantu sachchi geeta ki। abhi baap tumko raajayog sikhlaate hain। yeh geeta ka purushottam sangamayug hai। bhaarat hi phir purushottam banne ka hai। abhi woh aadi sanaatan devi devta dharma nahin hai। raajya bhi nahin hai। to vo yug bhi nahin hai। baba ne samjhaaya hai - yeh bhool bhi drama mein hai। geeta par phir shreekrishna ka naam rakhenge। jab bhaktimaarga shuru hoga to pahle-pahle geeta hi hogi। abhi yeh geeta aadi sab shaastra khatma ho jaane hain। baaki sirf devi devta dharma hi rahega। aise nahin ki unke saath geeta bhaagvat aadi bhi rahenge। nahin। praalabdha mil gai, sadgati ho gai to phir koi shaastra aadi ki darkaar hi nahin। satayug mein koi bhi guru shaastra aadi nahin hote। is samay to anek guru hain bhakti sikhlaane vaale। sadgati dene vaala to ek hi roohaani baap hai, jiski aparmaapaar mahima hai। use hi world almighty authority kaha jaata hai। bhaaratvaasi bahut karke yeh bhool karte hain jo kehte hain woh antaryaami hai। sabke andar ko jaanta hai। baap kehte hain bachche main koi ke andar ko nahin jaanta hoon। mera to kaam hi hai patiton ko paavan banaana। baaki main antaryaami nahin hoon। yeh bhaktimaarga ki ulti mahima hai। mujhe bulaate hi hain patit duniya mein। aur main ek hi baar aata hoon, jabki puraani duniya ko naya banaana hai। manushyon ko yeh pata hi nahin ki yeh jo duniya hai woh nai se puraani, puraani se nai kab banti hai। har cheez sato, rajo, tamo mein zaroor aati hai। manushya bhi ek jaise hote hain। baalak pahle satopradhaan hai phir yuva, vriddha hote hain arthaat rajo, tamo mein aate hain। boodha shareer hota hai woh chhod jaakar bachcha bante hain। duniya bhi nai so puraani hoti hai। bachche jaante hain nai duniya mein bhaarat kitna oonch tha। bhaarat ki mahima aparmaapaar hai। itna dhanvaan, sukhi, pavitra aur koi khanda hai nahin। ab satopradhaan duniya sthaapan ho rahi hai। trimoorti mein bhi brahma, vishnu, shankar dikhaaya hai। unka arth koi samajhte nahin hain। vaastav mein kehna chaahiye trimoorti shiv na ki brahma। brahma vishnu shankar ko create kisne kiya… oonche te oonch shivbaaba hai। kehte hain brahma devtaae namah, vishnu devtaae namah, shankar devtaae namah, shiv parmaatmaae namah। to woh oonch hua na। woh hai rachayita। gaate bhi hain parampita paramatma brahma dvaara braahmanon ki sthaapna karte hain phir paramatma baap dvaara varsa bhi milta hai। phir khud baith braahmanon ko padhaate hain kyonki woh baap bhi hai, supreme teacher bhi hai। world ki history-geography kaise chakra lagaati hai, woh baith samjhaate hain। vahi knowledgeful hai। baaki aise nahin ki woh jaaneejaananhaar hai। yeh bhi bhool hai। bhaktimaarga mein koi biography, occupation ko nahin jaante। to yeh jaise gudiyon ki pooja ho jaati hai। kalkatte mein gudiyon ki pooja kitni hoti hai, phir unki pooja kar khila-pilaakar samudra mein dubo dete hain। shivbaaba most beloved hai। baap kehte hain mera bhi mitti ka ling banaakar pooja aadi kar phir todphod dete hain। savere banaate hain, shaam ko tod dete hain। yeh sab hai bhaktimaarga, andhashraddha ki pooja। manushya gaate bhi hain aapehi poojya aapehi pujaari। baap kehte hain main to sadaiv poojya hoon। main to aakar sirf patiton ko paavan banaata hoon। 21 janmon ke liye raajya bhaagya deta hoon। bhakti mein hai alpakaal ka sukh, jisko sannyaasi kaag vishta samaan sukh kehte hain। sannyaasi gharbaar chhod dete hain। woh hai had ka sannyaas, hathayogi hain na। bhagwan ko to jaante hi nahin। brahm ko yaad karte hain। brahm to bhagwan nahin। bhagwan to ek hi niraakaar shiv hai, jo sarva aatmaon ka baap hai। brahm hai ham aatmaon ke rahne ka sthaan। woh brahmaanda, sweet hom hai। vahaan se ham aatmaayen yahaan part bajaane aati hain। aatma kehti hai ham ek shareer chhod doosra shareer leta hoon, 84 janma bhi bhaaratvaasiyon ke hain। jinhon ne bahut bhakti ki hai, vahi phir gyaan bhi jaasti uthaayenge। baap kehte hain bachche grihastha vyavhaar mein bhal raho, parantu shreemat par chalo। tum sab aatmaayen aashik ho, ek paramatma maashook ke। dvaapar se lekar tum yaad karte aaye ho। duhkh mein aatma baap ko yaad karti hai। yeh hai hi duhkhadhaam। aatmaayen asli shanti-dhaam ki nivaasi hain। peechhe aai sukhdhaam mein। phir hamne 84 janma liye। “ham so, so ham'' ka arth bhi samjhaaya hai। woh kah dete aatma so paramatma, paramatma so aatma। ab baap samjhaate hain aatma so paramatma kaise ho sakta। paramatma to ek hai। unke sab bachche hain। saadhu santa aadi bhi ham so ka arth wrong karte hain। ab baap ne samjhaaya hai “ham so'' ka arth hi hai - ham aatma satayug mein so devi-devta thi, phir ham so kshatriy, ham so vaishya, ham so shoodra bani। ab phir ham so brahman bane hain, ham so devta banne ke liye। yeh hai yathaartha arth। woh hai bilkul wrong। baap kehte hain manushya raavan ki mat par chal kitne jhoothe ho gaye hain isliye kahaavat hai - jhoothi maaya, jhoothi kaaya...satayug mein aise nahin kahenge। woh hai sachkhanda। vahaan jhooth ka naam-nishaan nahin। yahaan phir sach ka naam nahin hai। phir bhi aate mein namak kaha jaata hai। satayug mein hain daiveegun vaale manushya। unhon ka hai devta dharma। peechhe aur-aur dharma hue hain। to dvet hua। dvaapar se aasuri raavanraajya shuru ho jaata hai। satayug mein raavan raajya bhi nahin to 5 vikaar bhi nahin ho sakte। woh hai sampoorn nirvikaari। raam seeta ko 14 kala sampoorn kaha jaata hai। raam ko baan kyon diya hai? yeh bhi koi nahi jaante। hinsa ki to baat nahin। tum ho godly student, to father bhi hua। student hain to woh teacher hua। phir tum bachchon ko sadgati de svarga mein le jaate hain to satguru hua। baap, teacher, guru teenon hi ho gaya। unke tum bachche bane ho to tumko kitni khushi honi chaahiye। tum bachche jaante ho abhi hai raavan raajya। raavan bhaarat ka sabse bada dushman hai। yeh knowledge bhi tum bachchon ko knowledgeful baap se mili hai। woh baap hi gyaan ka saagar, aananda ka saagar hai। gyaan saagar se tum baadal bharkar phir jaae varsha karte ho। gyaan gangaayen tum ho, tumhaari hi mahima hai। baaki paani ki ganga mein snaan karne se paavan to koi banta hi nahin। maile gande paani mein snaan karne se bhi samajhte hain ham paavan ban jaayenge। chashmen (jharne) ke paani ko bhi bahut mahatva dete hain। yeh sab hai bhakti maarga। satayug treta mein bhakti hoti nahin। woh hai sampoorn nirvikaari duniya।

baap kehte hain bachche main tumko abhi paavan banaane aaya hoon। yeh ek janma mujhe yaad karo aur paavan bano to tum satopradhaan ban jaayenge। main hi patit-paavan hoon। jitna ho sake yaad ki yaatra ko badhaao। mukh se shivbaaba, shivbaaba kehna nahin hai। jaise aashik maashuk ko yaad karte hain। ek baar dekha bas, buddhi mein unki yaad rahegi। bhakti mein jo jisko yaad karte, jiski pooja karte hain unka saakshaatkaar ho jaata hai। parantu woh sab hai alpakaal ke liye। bhakti se neeche hi utarte aaye hain। ab to maut saamne khada hai। haay-haay ke baad hi jayjaykaar honi hai। bhaarat mein hi rakta ki nadiyo bahni hain। ab sab tamopradhaan ban gaye hain phir sabko satopradhaan banna hai। parantu banenge vahi jo kalpa pahle devta bane honge। vahi aakar baap se poora-poora varsa lenge। agar bhakti kam ki hogi to gyaan bhi poora nahin uthaayenge। phir praja mein nambarvaar pad paayenge। achhe purushaarthi kadam-kadam shreemat par chal achha pad paayenge। manners bhi achhe chaahiye। daivi gun bhi dhaaran karne hain। woh phir 21 janma chalenge। ab hain sabke aasuri gun kyonki patit duniya hai na। tum bachchon ko world ki history-geography bhi samjhaai gai hai। is samay baap kehte hain bachche yaad ki bahut mehnat karo to tum sachcha sona ban jaayenge। satayug hai golden ej, sachcha sona। phir treta mein chaandi ki alloy padti hai to kalaayen kam hoti jaati hain। ab to koi kala nahin hai। jab aisi haalat ho jaati hai tab baap aate hain। yeh bhi drama mein noondh hai। tum actors ho na। tum jaante ho ham yahaan part bajaane aaye hain। paartadhaari agar drama ke aadi-madhya-ant ko na jaane to unko besmajh kaha jaata hai। behad ka baap kehte hain sabhi kitna besmajh ban gaye hain। ab main tumko samajhdaar heere jaisa banaata hoon। phir raavan aakar kaudi jaisa banaate hain, ab is puraani duniya ka vinaash hona hai। sabko machchharon sadrishya le jaata hoon। tumhaari em object saamne khadi hai। aisa banna hai tab tum svargavaasi banege। tum bi.ke. yeh purushaartha kar rahe ho। parantu manushyon ki buddhi tamopradhaan hone kaaran yeh bhi samajhte nahin ki itne sab bi.ke. hain to zaroor prajaapita brahma bhi hoga। brahman hain choti। brahman phir devta, chitron mein braahmanon ko, shiv ko gum kar diya hai। brahman ab bhaarat ko svarga bana rahe hain। achha।

meethe-meethe sikeeldhe bachchon prati maat-pita baapdaada ka nambarvaar purushaartha anusaar yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) gyaan saagar se baadal bhar gyaan varsha karni hai। jitna ho sake yaad ki yaatra ko bhi badhaana hai। yaad se hi sachcha sona banna hai।

2) shreemat par chal achhe manners aur daiveegun dhaaran karne hain। sachkhanda mein chalne ke liye bahut-bahut sachcha banna hai।

vardaan:- visheshta dekhne ka chashma pahan sambandh-samparka mein aane vaale vishwa parivartak bhav

ek do ke saath sambandh va samparka mein aate har ek ki visheshta ko dekho। visheshta dekhne ki hi drishti dhaaran karo। jaise aajkal ka fashion aur majboori chashme ki hai। to visheshta dekhne vaala chashma pahno। doosra kuchh dikhaai hi na de। jaise laal chashma pahan lo to hara bhi laal dikhaai deta hai। to visheshta ke chashmen dvaara keechad ko na dekh kamal ko dekhne se vishwa parivartan ke vishesh kaarya ke nimitta ban jaayenge।

slogan:- parchintan aur pardarshan ki dhool se sada door raho to bedaag amoolya heera ban jaayenge।