मंगलवार 7 मार्च 2023 की दैनिक मुरली

07-03-2023 praatahmurli om shanti "baapdaada"' madhuban

“meethe bachche - vijayi ratna banne ke liye jeete ji markar dehi-abhimaani ban baap ke gale ka haar banne ka purushaartha karo''

prashn:- svadarshan chakra ka raaz spashta hote hue bhi bachchon mein dhaarna nambarvaar hoti hai - kyon?

uttar:- kyonki yeh drama bahut kaayde anusaar bana hua hai। brahman hi 84 janmon ko samajhkar yaad kar sakte hain lekin maaya braahmanon ko hi yaad mein vighna daalti hai, ghadi-ghadi yog tod deti hai। agar ek samaan dhaarna ho jaae, sab sahaj paas ho jaaen to laakhon ki maala ban jaaye isliye raajdhaani sthaapan hone ke kaaran nambarvaar dhaarna hoti hai।

geet:- marna teri gali mein…

om shanti। bachchon ne geet suna। yeh hai marjeevaapne ka janma। manushya jab shareer chhodte hain to duniya mit jaati hai, aatma alag ho jaati hai to na maama, na chaacha kuchh bhi nahin rehte। kaha jaata hai - yeh mar gaya arthaat aatma jaakar paramatma se mili। vaastav mein koi jaate nahin hain। parantu manushya samajhte hain aatma vaapis gai ya jyoti jyot mein samaai। ab baap baith samjhaate hain - yeh to bachche jaante hain aatma ko punarjanma lena hi hota hai। punarjanma ko hi janma-maran kaha jaata hai। pichhaadi mein jo aatmaayen aati hain, ho sakta hai ek janma lena pade। bas, woh chhod phir vaapas chali jaayegi। punarjanma lene ka bhi bada bhaari hisaab-kitaab hai। karodon manushya hain ek-ek ka vistaar to nahin bata sakenge। ab tum bachche kehte ho - he baba, hamaari deh ke jo bhi sambandh hain ve sab tyaag ab ham tumhaare gale ka haar banne aaye hain arthaat jeete ji aapka hone aaye hain। purushaartha to shareer ke saath karna padega। akeli aatma to purushaartha kar na sake। baap baith samjhaate hain - jab roodra yagya rachte hain to vahaan shiv ka chitra bada mitti ka banaate hain aur anek saaligraam ke chitra mitti ke banaate hain। ab woh kaun se saaligraam hain jo banaakar aur phir unki pooja karte hain? shiv ko to samjhenge ki yeh parampita paramatma hai। shiv ko mukhya rakhte hain। aatmaayen to dher hain। to ve bhi saaligraam bahut banaate hain। 10 hajaar athva 1 laakh bhi saaligraam banaate hain। roz banaaya aur toda phir banaaya। badi mehnat lagti hai। ab woh na pujaari, na yagya rachvaane vaale hi jaante hain ki yeh kaun hai। kya itni sab aatmaayen poojyaneey laayak hain? nahin। achha, samjho bhaaratvaasiyon ke 33 karod saaligraam banaayen, woh bhi ho nahin sakta kyonki sabhi to baap ko madad dete nahin। yeh badi guhya baaten hain samajhne ki। chaar paanch laakh roopaya kharcha karte hain roodra yagya rachne mein। achha, ab shiv to parampita paramatma theek hai baaki saaligraam itne sab kaun se bachche hain, jo pooje jaate hain? is samay tum bachche hi baap ko jaante ho aur madadgaar bante ho। praja bhi to madad karti hai na। shivbaaba ko jo yaad karte hain, woh svarga mein to aa jaayenge। bhal gyaan kisko na bhi den to bhi svarga mein aa jaayenge। woh to kitne dher honge! parantu mukhya 108 hain। mama bhi dekho kitni jabardasta ratna hai! kitni pooji jaati hai! ab tum bachchon ko dehi-abhimaani zaroor banna hai। janma-janmaantar tum deh-abhimaani rahe ho। koi bhi manushya aise nahin kahega ki main aatma parampita paramatma ki santaan hoon। santaan hain to unki poori biography maaloom honi chaahiye। paarlaukik baap ki biography badi jabardasta hai। to bachche kehte hain ab jeete ji markar baba ham aapke gale ka haar zaroor banenge। aatmaon ki bhi badi-badi maala hai। vaise hi phir manushya srishti ki bade te badi maala hai। prajaapita brahma hai mukhya। inko Adam, aadi dev, mahaaveer bhi kehte hain। ab yeh badi guhya baaten hain।

tum samajhte ho ham sab aatmaayen ek niraakaar baap ki santaan hain aur yeh manushya srishti ka saara sijra hai jisko genealogical tree kaha jaata hai। jaise surname hota hai na - agravaal, phir unke bachche potre agravaal hi honge। sijra banaate hain na। ek se phir badhte-badhte bada jhaad ho jaata hai। jo bhi aatmaayen hain woh shivbaaba ke gale ka haar hain। woh to avinaashi hai। prajaapita brahma bhi to hai। nai duniya kaise rachi jaati hai, kya pralay ho jaati hai? nahin। duniya to kaayam hai sirf jab puraani hoti hai to baap aakar unko naya banaate hain। abhi tum samajhte ho ham naye te naye the। hamaari aatma pavitra nai thi। pure sona thi, unse phir ham aatmaon ko jevar (shareer) bhi sona mila, usko kaaya kalpatru kehte hain। yahaan to manushyon ki average aayu 40-45 varsha rehti hai। koi-koi ki karke 100 varsha hoti hai। vahaan to tumhaari aayu average 125 varsha se kam hoti nahin। tumhaari aayu kalpa vriksha samaan banaate hain। kabhi akaale mrityu nahin hogi। tum aatmaayen shivbaaba ke bachche ho, brahma dvaara zaroor brahman paida honge, unse phir praja rachi jaati hai। pahle-pahle tum brahman bante ho brahma mukh vanshaavli। shivbaaba to ek hai phir maata kahaan? yeh bada guhya raaz hai। main in dvaara aakar tum bachchon ko adopt karta hoon। to tum puraani duniya se jeete ji marte ho। woh jo adopt karte hain woh dhan dene ke liye karte hain। baap adopt karte hain svarga ka varsa dene ke liye, laayak banaate hain। saath mein le jaayenge isliye is puraani duniya se jeete ji marna hai। grihastha vyavhaar mein rehte pavitra ban baap ka banna hai। ham vahaan ke rahne vaale hain phir satayug mein sukh ka part bajaaya। yeh baaten baap samjhaate hain। shaastron mein to hain nahin। ab baap baith tum aatmaon ko pavitra banaate hain। aatma ki mail nikaalte hain। tumko gyaan ka teesra netra milta hai। unhon ne phir teejri ki katha baith banaai hai। vaastav mein baat yahaan ki hai। tumko brahmaanda se lekar saare srishti ke aadi-madhya-ant ka saara samaachaar mil jaata hai। baap ek hi baar aakar samjhaate hain। sannyaasi to punarjanma lete rehte hain। yeh to aaya aur bachchon ko padhaaya। bas। yeh to nai baat ho jaati hai। shaastron mein yeh baaten hain nahin। yeh bahut bade te bada college hai। kaayda hai ek haphta to achhi reeti samajhna pade। bhatthi mein baithna pade। geeta ka paath athva bhaagvat ka paath bhi ek haphta rakhte hain na, to saat roz bhatthi mein baithna pade। vikaari to sabhi hain, bhale sannyaasi gharbaar chhod nirvikaari bante hain phir bhi janma vikaar se lekar phir nirvikaari banne liye sannyaas karte hain। kai punarjanma ko bhi maante hain kyonki misaal dekhte hain। koi bahut ved-shaastra padhte-padhte shareer chhodte hain to un sanskaaron anusaar phir janma lete hain, to chhotepan mein hi shaastra adhyayan ho jaate hain। janma le apne ko apvitra samajh phir pavitra banne ke liye sannyaas karte hain। tum to ek hi baar pavitra ban devta bante ho। tumko phir sannyaas nahin karna padega। to unka sannyaas adhoora hua na। yeh baaten khud bhi samjha nahin sakte hain। baba baith samjhaate hain। woh hai uttam te uttam baap, jiske tum bachche bane ho। yeh school bhi hai, rojaana nai-nai baaten nikalti hain। kehte hain aaj guhya te guhya sunaata hoon। nahin sunenge to dhaarna kaise hogi? ab baap baith samjhaate hain tum mere bane ho to shareer ka bhaan chhodo, main guide ban aaya hoon vaapis le jaane।

tum ho paandav sampradaay। woh jismaani pande hain, tum roohaani pande ho। woh jismaani yaatra par le jaate hain। tumhaari hai roohaani yaatra। unhonne to paandavon ko hathiyaar de, yuddha ke maidaan mein dikhaaya hai। abhi tum bachchon mein bhi taakat chaahiye। bahut hote jaayenge to phir taakat bhi badhti jaayegi। to baap baith samjhaate hain ki mainne tumko god mein liya hai is brahma dvaara isliye inko maat-pita kaha jaata hai। yeh to sab kehte hain tum maat-pita ham baalak tere। achha, unko to god father kaha jaata hai। god mother to nahin kaha jaata। to mother kaise kehte? manushya phir jagdamba ko mother samajh lete hain। parantu nahin, unke bhi maat-pita hain, unki maata bhala kaun si hai? yeh badi guhya baaten hain। gaayan to hai parantu siddha kar kaun samjhaaye? tum jaante ho yeh maat-pita hai। pahle hai maata। barobar tumko is brahma maata ke paas pahle aana pade। inmen pravesh kar tumko adopt karta hoon, isliye yeh maat-pita thahre। yeh baaten koi shaastra mein nahin hain। yeh baap baith samjhaate hain - kaise tum mukh vanshaavli bante ho। main brahma mukh se tumko rachta hoon। koi raaja hai, kahenge mukh se tumko kehta hoon tum mere ho। yeh aatma kehti hai। parantu unko phir bhi maat-pita nahin kahenge। yeh badi wonderful baat hai। tum jaante ho ham shivbaaba ke bane hain to yeh deh ka bhaan chhodna pade। apne ko aatma ashareeri samajhna mehnat ka kaam hai। isko kaha hi jaata hai raajayog aur gyaan। donon akshar aate hain। manushya jab marte hain to unko kehte hain raam-raam kaho ya guru log apna naam de dete hain। guru mar jaata to phir unke bachche ko guru kar dete hain। yahaan to baap jaayenge to sabhi ko jaana hai। yeh mrityulok ka antim janma hai। baba hamko amarlok mein le jaate hain, via mukti-dhaam jaana hai।

yeh bhi samjhaaya jaata hai jab vinaash hota hai to yeh kaliyug ka pur neeche chala jaata hai। satayug oopar aa jaata hai। baaki koi samudra ke andar nahin chale jaate hain। yahaan tum bachche saagar ke paas aate ho refresh hone। yahaan tum sammukh gyaan dance dekhte ho, dikhaate hain gop-gopiyon ne krishna ko dance karaai, yeh baat is samay ki hai। chaatrak bachchon ke saamne baap ki murli chalti hai। bachchon ko bhi seekhna pade। phir jo jitna seekhe। samjhaana hai behad ke baap se svarga ka varsa lo। he bhagwan kehte ho, woh to hai rachayita। zaroor svarga hi rachenge। yeh ek hi baap hai jo svarga rachte hain vo phir aadhaakalpa chalta hai। baba tumhein kitne raaz samjhaate hain। bachchon ko mehnat kar dhaarna karni hai। svadarshan chakra ka raaz bhi baba ne kitna saaph bataaya hai। 84 janmon ke chakra ko brahman hi yaad kar sakte hain। yeh hai buddhi ka yog lagaakar chakra ko yaad karna। parantu maaya ghadi-ghadi yog tod deti hai, vighna daalti hai। sahaj ho to phir sab paas kar len। laakhon ki maala ban jaaye। yeh to drama hi kaayde anusaar hai। mukhya hain 8, unmein farka nahin pad sakta। treta ke ant mein jitne prince-princess hain sabhi milkar zaroor yahaan hi padhte honge। praja bhi padhti hogi। yahaan hi kingdom sthaapan hoti hai। baap hi kingdom sthaapan karte hain aur koi preceptor kingdom nahin sthaapan karte। yahi bada wonderful raaz hai। satayug mein lakshmi-naaraayan ka raajya kahaan se aaya? kaliyug mein to raajaai hai nahin। anek dharma hain। bhaaratvaasi kangaal hain। kaliyug ki raat poori ho, din shuru hua aur baadshaahi chali। yeh kya hua! allaah avaldeen ka khel dikhaate hain na। to kaaroon ke khajaane nikal aate hain। tum second mein divya drishti se vaikuntha dekh aate ho। achha!

maat-pita, baapdaada, bachche saari family iktthi baithi hai। meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) baap samaan sabhi ko refresh karne ki seva karni hai। chaatrak ban gyaan dance karni aur karaani hai।

2) is shareer ka bhaan chhod puraani duniya se jeete ji marna hai। ashareeri rahne ka abhyaas karna hai। svayan ko svarga ke varse ka laayak bhi banaana hai।

vardaan:- holi ke arth swaroop mein sthit ho sachchi holi manaane vaale highest holiest bhav

“ho li'' arthaat jo kuchh hua woh ho gaya, ho liya। jo scene hui ho li arthaat beet gai, beeti ko beeti karne ke liye sada drama ki dhaal ko use karo। holi ka rang pakka tabhi lagta hai jab har vakta yaad rehta ki ho li, jo beeta ho gaya। woh kabhi drama ki koi bhi scene dekhte kyon, kya, kaise.. in prashnon mein ulajhte nahin। sada gyaan manthan kar apni holiest aur highest stage bana lete hain।

slogan:- sabse bade dhanvaan woh hain jinke paas pavitrata ka sarvashreshtha khajaana hai।