रविवार 26 मार्च 2023 की दैनिक मुरली

26-03-23 praatahmurli om shanti ''avyakt-baapdaada'' revise 01-02-94 madhuban

trikaaldarshi sthiti ke shreshtha aasan dvaara sada vijayi bano aur doosron ko shakti ka sahayog do

aaj trikaaldarshi baapdaada apne sarva master trikaaldarshi bachchon ko dekh rahe hain। trikaaldarshi banne ka saadhan baapdaada ne har bachche ko divya buddhi ka vardaan va brahman janma ki vishesh saugaat di hai kyonki divya buddhi dvaara hi baap ko, apne aapko aur teenon kaalon ko spashta jaan sakte ho। divya buddhi tatha yaad dvaara hi sarva shaktiyon ko dhaaran kar sakte ho। isliye pahla vardaan divya buddhi hai। ye vardaan baapdaada ne sarva bachchon ko diya hai। lekin is vardaan ko pratyaksha jeevan mein nambarvaar kaarya mein lagaate ho। divya buddhi trikaaldarshi sthiti ka anubhav karaati hai। chaaron hi subject dhaaran karne ka aadhaar divya buddhi hai। chaaron hi subject ko sabhi bachche achhi tarah se jaante hain, varnan bhi karte hain lekin jaanna, varnan karna yeh sabhi ko aata hai। chaahe naye hain, chaahe puraane hain, ismen sabhi hoshiyaar hain lekin dhaaran karna ismen number ban jaate hain। divya buddhi ki visheshtaayen, divya buddhi vaali aatmaayen koi bhi sankalp ko karma va vaani mein laane samay har bol aur har karma ko teenon kaal se jaan kar phir practical mein aati hain। saadhaaran buddhi vaali aatmaayen bahut karke vartamaan ko spashta jaanti hain lekin bhavishya aur bhootkaal ko spashta nahin jaanti। divya buddhi vaali aatma ko past aur future bhi itna hi spashta hota hai jaise present spashta hai। teenon hi kaal saath-saath spashta anubhav hota hai। vaise sabhi kehte bhi hain ki jo socho, jo karo, jo bolo, aage-peechhe ko soch-samajh karke karo। karma ke pahle parinaam ko saamne rakho, parinaam hua bhavishya। to number one hai trikaaldarshi buddhi। trikaaldarshi buddhi kabhi asphalta ka anubhav nahin karegi। lekin bachchon mein teen prakaar ki buddhi vaale hain। pahla number sunaaya sada trikaaldarshi buddhi। doosra number kabhi trikaaldarshi aur kabhi ek kaaldarshi। teesra number albeli buddhi, jo sada vartamaan ko dekhte, sada yahi sochte ki jo abhi ho raha hai ya mil raha hai va chal raha hai ismen theek rahen, bhavishya kya hoga isko kya sochen। lekin albeli buddhi aadi-madhya-ant ko na sochne ke kaaran sada saphalta praapta karne mein dhokha kha leti hai। to banna hai trikaaldarshi buddhi।

trikaaldarshi sthiti aisa shreshtha aasan hai jis aasan arthaat sthiti dvaara svayan bhi sada vijayi aur doosron ko bhi vijayi banne ki shakti va sahayog dene vaale hain। divya buddhi vishaal buddhi hai। divya buddhi behad ki buddhi hai। to check karo ki svayan ki buddhi kis number ki banaai hai? baapdaada ne bachchon ki result mein dekha ki gyaan, gun, shaktiyon ka khazaana jama sabhi bachchon ke paas hai lekin jama hote bhi nambarvaar kyon hain? aisa koi bhi nahin dikhaai diya jiske paas khazaane jama nahin hon। sabhi ke paas jama hain na! phir nambarvaar kyon? agar kisi se bhi poochhenge - svayan ka gyaan hai, baap ka gyaan hai, chakra ka gyaan hai, karmon ke gati ka gyaan hai? sabhi ke paas sarvashaktiyaan hain? ki koi hain, koi nahin hain? gyaan mein sabhi ne haan kiya aur shaktiyon mein haan kyon nahin kiya? achha, sabhi gun hain? sarva gun buddhi mein hain? buddhi mein gyaan bhi hai, shaktiyaan bhi hain phir nambarvaar kyon? farka kya hota hai? khazaane ko vidhipoorvak kaarya mein lagaana nahin aata hai samay beet jaata hai phir sochte hain ki aise karte the, is vidhi se chalte the to siddhi mil jaati thi। to samay ko jaanna aur samay pramaan shakti va gun va gyaan ko kaarya mein lagaana iske liye divya buddhi ki visheshta aavashyak hai। vaise gyaan ki points bahut sochte rehte hain, sunaate bhi rehte hain, copy mein bhi bhari hui rehti hain, sabke paas kitni diary ikatthi hui hongi, kaaphi stock ho gaya hai na, to jaise baap ke liye gaaya hua hai ki main jo hoon, jaisa hoon vaise mujhe jaanne vaale koton mein koi hain। jaante to sabhi hain lekin underline hai - jo hoon, jaisa hoon, usmein antar pad jaata hai। isi reeti jaisa samay aur jo gyaan ki point ya gun ya shakti aavashyak hai vaisa kaarya mein lagaana ismen antar pad jaata hai aur isi antar ke kaaran number ban jaate hain। to kaaran samjha? ek to samay pramaan vidhi ka antar pad jaata hai, doosra koi bhi karma va sankalp trikaaldarshi ban nahin karte, isliye number ban jaate hain। koi bhi sankalp buddhi mein aata hai to sankalp hai beej, vaacha aur karmana beej ka vistaar hai, agar sankalp arthaat beej ko trikaaldarshi sthiti mein sthit hokar check karo, shaktishaali banaao to vaani aur karma mein svatah hi sahaj saphalta hai hi hai। sankalp ko check nahin karte arthaat beej shaktishaali nahin hota to vaani aur karma mein bhi siddhi ki shakti nahin rehti। lakshya sabhi ka siddhi swaroop banne ka hai na, to sada siddhi swaroop banne ki vidhi jo sunaai, usko check karo। beech-beech mein buddhi albeli ban jaati hai isliye kabhi siddhi anubhav karte aur kabhi mehnat anubhav karte।

baapdaada ka sabhi bachchon se pyaar ki nishaani hai ki sab bachche sada sahaj siddhi swaroop ban jaayen। aapke jad chitron dvaara bhakta aatmaayen siddhi praapta karti rehti hain, to chaitanya mein siddhi swaroop bane ho tab to jad chitron dvaara bhi aur aatmaayen siddhi praapta karti rehti hain। jo trikaaldarshi sthiti mein sthit rehte hain to trikaaldarshi sthiti samartha sthiti hai। is samartha sthiti vaale vyartha ko aisa sahaj samaapta kar dete hain jo svapna maatra bhi vyartha samaapta ho jaata hai। agar trikaaldarshi buddhi dvaara karma nahin karte hain to vyartha ka bojh baar-baar oonche number mein adhikaari banne nahin deta। to divya buddhi ka vardaan sada har samay kaarya mein lagaao।

baapdaada ne pahle bhi ishaara diya hai ki gyaani-yogi aatmaayen bane ho, ab gyaan aur yog ke shakti ko prayog mein laane vaale prayogshaali aatmaayen bano। jaise science ki shakti ka prayog dikhaai deta hai na, lekin science ki shakti ke prayog ka bhi mool aadhaar kya hai? aaj jo bhi science ne prayog kar saadhan diye hain, un sab saadhnon ka aadhaar kya hai? science ke prayog ka aadhaar kya hai? majority dekhenge light hai। light dvaara hi prayog hota hai। agar computer bhi chalta hai to kiske aadhaar se? computer might hai lekin aadhaar light hai na। to aapke silence ki shakti ka bhi aadhaar kya hai? light hai na। jab woh prakriti ki light dvaara ek light anek prakaar ke prayog practical mein karke dikhaati hai to aapki avinaashi parmaatma light, aatmik light aur saath-saath practical sthiti light, to usse kya nahin prayog ho sakta! aapke paas sthiti bhi light hai aur mool swaroop bhi light hai। jab bhi koi prayog karna chaahte ho to pahle apne mool aadhaar ko check karo। jaise koi bhi science ke saadhan ko use karenge to pahle check karenge na ki light hai ya nahin hai। aise jab yog ka, shaktiyon ka, gunon ka prayog karte ho to pahle ye check karo ki mool aadhaar aatmik shakti, parmaatma shakti va light (halki) sthiti hai? agar sthiti aur swaroop double light hai to prayog ki saphalta bahut sahaj kar sakte ho, aur sabse pahle is abhyaas ko shaktishaali banaane ke liye pahle apne par prayog karke dekho। har maas va har 15 din ke liye koi na koi vishesh gun va koi na koi vishesh shakti ka sva prati prayog karke dekho kyonki sangathan mein va sambandh-samparka mein paper to aate hi hain to pahle apne oopar prayog mein check karo koi bhi paper aaya lekin jo shakti va jo gun ka prayog karne ka lakshya rakha, usmein kahaan tak saphalta mili? aur kitne samay mein saphalta mili? jaise science ka prayog din-pratidin thode samay mein pratyaksha roop ka anubhav karaane mein aage badh raha hai to samay bhi kam karte jaate hain। thode samay mein saphalta jyaada - yeh science vaalon ka bhi lakshya hai। aise jo bhi lakshya rakha usmein samay ko bhi check karo aur saphalta ko bhi check karo। jab sva ke prati prayog mein saphal ho jaayenge to doosri aatmaon ke prati prayog karna sahaj ho jaayega aur jab sva ke prati saphalta anubhav karenge to aapke dil mein auron ke prati prayog karne ka umang-utsaah svatah hi badhta jaayega। anya aatmaon ke sambandh-samparka mein sva ke prayog dvaara un aatmaon ko bhi aapke prayog ka prabhaav svatah hi padta rahega। jaise ek drishtaanta saamne rakho ki mujhe sahanshakti ka prayog karna hai to jab svayan mein sahanshakti ka prayog karenge to jo doosri aatmaayen aapki sahanshakti ko hilaane ke nimitta hain vo bhi bach jaayengi na, unka bhi to kinaara ho jaayega। aur jaise chhote-chhote sangathan mein rehte ho, centres hain to centres par chhote sangathan hain na to pahle sva ke prati trial karo phir apne chhote sangathan mein trial karo। sangathan roop mein koi bhi gun va shakti ke prayog ka programme banaao। usse kya hoga? sangathan ki shakti se usi gun va shakti ka vaayumandal ban jaayega, vibration phailega aur vaayumandal va vibration ka prabhaav anek aatmaon ke oopar padta hi hai। to aise prayogshaali aatmaayen bano। pahle svayan mein santushtata ka anubhav karo phir auron mein sahaj ho jaayega kyonki vidhi aa jaayegi। jaise science ke koi bhi saadhan ko pahle sample ke roop mein prayog karte hain phir vishaal roop mein prayog karte hain, aise aap pahle svayan ko sample ke reeti se use karo। jitna yeh prayog karne ki roochi badhti jaayegi, buddhi-man ismen busy rahega, to chhoti-chhoti baaton mein jo samay lagaate ho, shaktiyaan lagaate ho unki bachat ho jaayegi। sahaj hi antarmukhta ki sthiti apni taraph aakarshit karegi kyonki koi bhi cheez ka prayog aur prayog ki saphalta svatah hi aur sab taraph se kinaara kara deti hai। ye prayog to sabhi kar sakte ho na, ki mushkil hai? is varsha prayogshaali aatmaayen bano। samjha kya karna hai? aur har ek svayan ke prati prayog mein lag jaayenge to prayogshaali aatmaon ka sangathan kitna powerful ban jaayega! woh sangathan ki kirnen arthaat vibrations bahut kaarya karke dikhaayengi। ismen sirf dridhta chaahiye - ‘mujhe karna hi hai'। doosron ke albelepan ka prabhaav nahin padna chaahiye। aapki dridhta ka prabhaav auron par padna chaahiye kyonki dridhta ki shakti shreshtha hai ya albelepan ki shakti shreshtha hai? baapdaada ka vardaan hai jahaan dridhta hai vahaan saphalta hai hi। to kya banenge? prayogshaali, trikaaldarshi aasandhaari। aur teesra kya karenge? jaisa samay, vaisi vidhi se siddhi swaroop। to varsha ka ye homework hai। ye homework svatah hi baap ke sameep laayega। jaise brahma baap ko dekha - koi bhi karma karne ke pahle aadi-madhya-ant ko soch-samajh karma kiya aur karaaya। albelaapan nahin ki jaisa hua theek hai, chalo, chalaana hi hai। nahin। to follow brahma baap। follow karna to sahaj hai na! copy karna hai na, copy karne ka to akla hai na!

achha, ye group chance lene vaala group hai। extra lottery mili hai। jo achaanak lottery milti hai to uski khushi jyaada hi hoti hai। to ye lucky group hua na, chance lene vaala lucky group। doosre sochte rehte kab jaayenge aur aap pahunch gaye। ab double videshiyon ka tarna shuru hone vaala hai। bhaaratvaasiyon ne apni lottery le li। chaaron or ke double videshi bachchon ne jo retreat ka programme banaaya hai usmein mehnat achhi ki। vishesh nimitta aatmaon ko sameep laane ki vidhi achhi hai। aur jitna himmat rakh aage badhte rahe hain utni saphalta har varsha shreshtha se shreshtha milti rahi hai। aise anubhav hota hai na! koi samay tha jo nimitta vishesh aatmaon se samparka karna bhi mushkil lagta tha aur abhi kya lagta hai? jitna sochte ho usse aur hi jyaada aate hain na! to ye himmat ka pratyakshaphal hai। bhaarat mein bhi samparka badhta jaata hai। pahle aap nimantran dene ki mehnat karte the aur abhi svayan aane ki offer karte hain। farka pad gaya hai na! vo kehte hain ham chalen aur aap kehte ho number nahin hai। ye hai ‘himmate bachche madde baap' ka pratyaksha swaroop। achha!

chaaron or ke master trikaaldarshi aatmaon ko, sada samay ke mahatva ko jaanne aur samay pramaan khazaane ko kaarya mein lagaane vaale divya buddhivaan aatmaon ko, sada antarmukhta ki prayogshaala mein prayog karne vaale prayogshaali aatmaon ko, sada himmat dvaara baap ke madad ka pratyaksha anubhav karne vaali aatmaon ko baapdaada ka yaad-pyaar aur namaste।

daadiyon se mulaakaat - aap nimitta aatmaayen kis prayogshaala mein rehte ho? saara din kaun-si prayogshaala chalti hai? nai-nai invention karte rehte ho na! naye-naye anubhav karte jaate ho aur nai-nai vidhi bhi touching hoti rehti hai kyonki jo nimitta hain unko vishesh nai-nai baaten touch hone ka vishesh vardaan hai। thoda samay bhi beetega to vichaar chalte hain na, touching aati hai na ki abhi ye ho, abhi ye ho, abhi ye hona chaahiye। to nimitta aatmaon ko vishesh umang-utsaah badhaane ke va parivartan shakti ko badhaane ke plan ki zaroorat hai। iske bina rah nahin sakte hain। buddhi chalti hai na। dekh-dekh aashcharyavat nahin hote lekin umang-utsaah mein aage badhaane ke liye planning buddhi bante hain। maaya sangathan ko hilaane ke naye-naye plan banaati hai, nai-nai baaten sunti ho na aur aap log sabhi ko himmat-umang mein laane ke plan banaate ho। kabhi aashcharya lagta hai? nahin lagta hai na। maaya bhi puraani vidhi se thode hi apna banaayegi। vo bhi to naveenta laayegi na। achha!

vardaan:- shuddh man aur divya buddhi ke vimaan dvaara second mein sweet hom ki yaatra karne vaale ma0 sarvashaktivaan bhav

science vaale fast gati ke yatra nikaalne ka prayatna karte hain, uske liye kitna kharcha karte hain, kitna samay aur energy lagaate hain, lekin aapke paas itni teevragti ka yatra hai jo bina kharcha ke socha aur pahuncha, aapko shubh sankalp ka yatra mila hai, divya buddhi mili hai। is shuddh man aur divya buddhi ke vimaan dvaara jab chaahe tab chale jaao aur jab chaahe tab laut aao। master sarvashaktivaan ko koi rok nahin sakta।

slogan:- dil sada sachchi ho to dilaaraam baap ki aasheervaad milti rahegi।