मंगलवार 28 मार्च 2023 की दैनिक मुरली

28-03-2023 praatahmurli om shanti "baapdaada"' madhuban

“meethe bachche - abhi yeh puraani duniya badal rahi hai isliye isse preet nahin rakhni hai, naye ghar svarga ko yaad karna hai''

prashn:- sada sukhi banne ki kaun si vidhi baap sabhi bachchon ko sunaate hain?

uttar:- sada sukhi banna hai to dil se ek baap ka ban jaao। baap ko hi yaad karo। baap kabhi bhi kisi bachche ko duhkh nahin de sakte। svarga mein kabhi kiska pati, kiska bachcha marta nahin। vahaan yeh akaale maut ka dhandha nahin hota hai। yahaan to maaya raavan duhkhi banaati rehti hai। baba hai duhkh harta, sukh karta।

geet:- duhkhiyon par kuchh raham karo maa baap hamaare…

om shanti। yeh vahi maat-pita phir se sada sukhi banaane ke liye raajayog sikhla rahe hain। jaise koi barrister baith barrister banne ki knowledge dete hain। abhi yeh hai behad ke maat-pita, svarga ke rachayita। woh baith bachchon ko svarga ka maalik banaane liye shiksha dete hain। aisa to koi college nahin hoga jismen svayan bhagwan baith padhaaye। yahaan khud bhagwan baith padhaate hain bhagwan-bhagavti banaane। satayug mein shri lakshmi-naaraayan ko bhagwan-bhagavti kaha jaata hai। nai duniya ka maalik kisne banaaya? woh satayug ke maalik the। bhaarat mein satayug aadi mein devi-devtaaon ka raajya tha। abhi hai kaliyug, devtaaon ka raajya hi nahin। devtaaon se sab badal kangaal manushya ban gaye hain। devtaayen to bahut dhanvaan sukhi the। abhi kaliyug ka ant hone ke kaaran sab manushya bade duhkhi hain। ladaai lagegi, manushya badi traahi-traahi karenge। bahut dar-badar honge। manushya bilkul nidhan ke hain kyonki svarga ke sukh dene vaale maa-baap ko jaante hi nahin। tum us maat-pita ke bane ho। tumko maat-pita se athaah sukh milte hain। manushya jo bhakti karte hain woh koi bhagwan ko yaad nahin karte, bhagwan ko to patthar-thikkar, kutte-billi mein thok phir apne ko bhagwan samajh baithe hain। kah dete hain sabmen bhagwan viraajmaan hai। patiton mein bhagwan ko viraajmaan samajhna to glaani hui na। parantu yeh bhi drama mein manushyon ko bhool karni hi hai aur baap ko aakar abhul banaana hai। manushyon ko pata hi nahin padta। bhagwan to ek hota hai, hajaaron thode hi honge। laukik baap to bahut hain। woh to jaanavron ke bhi hote hain। parantu sabka sadgati daata, patit-paavan ek hai। to woh baap aakar bachchon ko padhaate hain bhavishya ke liye। bhagwan-bhagavti banaate hain। ab sivaae parampita paramatma ke bhagwan-bhagavti kaun bana sakte! jabki woh baap hai to maata bigar srishti kaise rachenge! bhaaratvaasi gaate hain, tum bhi bhakti maarga mein chillaate the - tum maat-pita... tumhari kripa se sukh ghanere milte hain isliye ham bhakti karte hain। kiski bhi bhakti karte hain to samajhte hain ham bhagwan ko yaad karte hain। sannyaasi bhi saadhna karte hain parantu kiski saadhna karte woh nahin jaante। raavan mat par sab bhool gaye hain। to phir baap kya kare। itna duhkhi kangaal hona, yeh bhi drama mein hai।

baap aakar bachchon ko phir se svarga ka maalik banaate hain। svarga ka maalik banaane vaala hai paarlaukik maat-pita, narka ka maalik banaane vaala hai raavan। to us raavan par ab jeet paani hai। abhi tum maayaajeet jagatjeet bante ho। tumko koi puraani duniya mein thode hi raajya karna hai। maaya par jeet paakar phir svarga mein raajya karna hai। maaya se haarne se narka mein aa jaate ho। yeh baaten aur koi patit manushya samjha nahin sakte। na woh kisko paavan bana sakte hain। saari duniya patit hai। vish se paida hote hain। devi-devta to sarvagun sampanna, 16 kala sampoorn hain। vahaan vish ka naam hi nahin। bhagwan ko koi bhi jaante nahin। to unko guru karne se kya phaayda? na khud bhagwan se mil sakte, na auron ko mila sakte। aatma paramatma alag rahe bahukaal.. to phir milaane vaala bhi woh parampita paramatma chaahiye। woh yeh bhi nahin samajhte ki naatak ab poora hota hai। yeh drama, jo satayug se lekar kaliyug tak chalta hai, unko repeat hona hai। is drama ki knowledge ko samajhne se tum chakravarti bante ho। tum jaante ho 84 janma ham kaise lete hain। yeh hai leap yug, purushottam yug। ismen yeh antim janma hai। ab baap ka banna hai। baap kehte hain - he bachche, tum mera bano। kehte bhi ho he parampita paramatma। laukik baap ko to aise nahin kah sakte। to ab paarlaukik baap kehte hain main aaya hua hoon। baaki yeh kaake chaache aadi sab tumhaare khatma hone hain। yeh puraani duniya badal rahi hai। saamne mahaabhaari mahaabhaarat ladaai bhi khadi hai। yeh anek dharma vinaash hone hain। yeh hai puraani duniya, jismen anekaanek dharma hai। satayug mein hota hai ek dharma। to ab yeh duniya badalni hai isliye inse preet nahin lagaani hai। laukik baap naya makaan banaate hain to bachchon ko dil mein naya makaan hi yaad padega na ki makaan taiyaar hoga, phir ham naye makaan mein baithenge। puraana tod khalaas kar denge। ab is saari duniya ka vinaash hona hai। bachchon ne saakshaatkaar bhi kiya hai - kaise aag lagti hai, moosaldhaar barsaat padti hai, samudra aadi kaise uchhalte hain। yeh sab saakshaatkaar kiye hain।

baba bambai mein jaate hain to samjhaate hain yeh bambai pahle thi nahin। ek chhota sa gaanv tha, ab samudra ko sukhaaya hai। history repeat hogi to phir yeh itni baambe nahin rahegi। satayug mein koi baambe gaanv hota nahin। yeh America aadi kya hai! ek hi bomb se sab khatma ho jaayenge। hiroshima mein jab bomb lagaaya, kya ho gaya? shahar ka shahar khalaas ho gaya। woh to ek bomb tha। abhi to dher bomb banaaye hain। kehte bhi hain baap aaye hain nai duniya sthaapan karne, inko puraana narka raavan banaate hain। yeh bhaaratvaasi nahin jaante। maaya ne sabko godrej ka taala aisa laga diya hai jo khulta nahin। manushya kitne duhkhi hain। bhale saahookaar sukhi hain parantu beemaar rogi to bante hain na। aaj bachcha janma, khushi hui, phir bachcha mara to duhkh hua। vidhva ban rote rehte hain। isko kaha jaata hai duhkhadhaam। bhaarat sukhdhaam tha, ab puraani duniya duhkhadhaam hai। phir baap sukhdhaam banaate hain। baap kehte hain ab varsa lo। to zaroor yaad bhi unko karna padega aur sabhi deh ke sambandh duhkh dene vaale hain। abhi tum samajhte ho ek baap bigar sukh dene vaala koi hai nahin। kehte hain - baba, ham aapke vahi bachche hain, jinko aapne svarga ka maalik banaaya tha। abhi ham duhkhi hain। aap to merciful ho। duhkhi hain tab to pukaarte hain। satayug mein sukhi ho jaayenge to vahaan koi bhi nahin pukaarenge। duhkh mein sab yaad karte hain parantu bhagwan kisko milta hi nahin। samjho bhakta hanoomaan ko yaad karte hain। achha, hanoomaan kahaan rehta hai? hanoomaan ke paas tumko kahaan jaana hai। manushya bhakti karte hain mukti va jeevanmukti dhaam mein jaane ke liye। hanoomaan va ganesh aadi ko yaad karne se tum kahaan jaayenge? unhon ka thikaana kahaan hai? unse tumko kya milna hai? kuchh pata nahin।

baap samjhaate hain srishti mein sukh dene vaala ek hi main hoon। aise nahin bhagwan hi sukh dete, bhagwan hi duhkh dete, vahi bachche dete hain to sukh hota hai, bachche chheen lete hain to duhkh hota hai। to baap kehte hain ham to sadaiv sukh dete hain। tumse sukh maaya chheenti hai। satayug mein aisa hota nahin jo bachcha mar jaae va kiska pati mar jaae। yahaan is maayaavi duniya mein kabhi kiska bachcha, kabhi kiska pati marte hi rehte hain। yeh dhandha svarga mein nahin hota hai। yahaan to narka hai। ab baap kehte hain agar sada sukhi banna chaahte ho to baap ke bano। abhi tumhaari aatma aur shareer donon hi tamopradhaan hain, aise nahin ki aatma nirlep hai। aatma mein hi khaad padti hai। is kaaran ab jevar bhi iron aged ban pade hain। ab phir tum golden aged banne liye knowledge le rahe ho। baap aakar amar banaae amarpuri mein le jaate hain। yahaan to mrityulok hai। geeta mein bhi akshar hai। amarpuri mein aadi-madhya-ant duhkh nahin hoga। mrityulok mein aadi-madhya-ant duhkh hai। aise duhkhadhaam ko bhoolna pade। sukhdhaam aur shantidham ko yaad karna hai। ham sukhdhaam ja rahe hain via shantidham। jahaan ke ham rahvaasi hain। yeh bhi svadarshan chakra hua na। apne baap aur sweet hom ko yaad karna hai। kanya baap ka ghar chhod sasurghar jaati hai to gaate hain na piyarghar se chale sasurghar.. to tumhaara yeh hai brahma ka piyarghar। ab tum svarga sasurghar jaayenge। vahaan sukh hi sukh hai। yahaan hai duhkh। kanya bhi ghar chhodti hai sukh ke liye। parantu vahaan unko patit banaae duhkhi banaaya jaata hai। abhi baap samjhaate hain main tumko ekdam naynon par bithaakar svarga le jaane liye aaya hua hoon। sirf mujhe yaad karo। vahaan tumko koi duhkh nahin hoga। bachchon ne dekha hai shreekrishna ka janma kaise hota hai। pahle se hi saakshaatkaar hota hai। jab shareer chhodna hota hai to usi samay saakshaatkaar hota hai। ham yeh shareer chhod jaakar prince banenge। bas aatma shareer se nikal jaakar garbha mahal mein baith jaati hai। bachcha paida hote samay koi takleeph nahin hoti। vahaan garbha mahal mein tumko sukh hi sukh rahega। yahaan to garbha jel bhi hai aur jo chori paap karte ve bhi government ki jel mein jaate hain। vahaan yeh donon jel nahin hoti। paap aadi koi karte nahin। usko kaha jaata hai punya aatmaon ki duniya। to baap svarga me le jaate hain। dekhte hain itne sabhi purushaartha kar rahe hain to kyon na ham bhi baap se varsa le sada sukhi banen। koi to praayashchit karte hain ki yeh karmabandhan kaise chhootega? bachche nahin hote to achha tha। koi shaadi kar phir gyaan mein aate hain to kehte pahle pata padta to shaadi nahin karte। aise bahut likhte hain। jinki takdeer jab khulni hai, tab aate hain। so bhi pasandi par hai। ek saptaah baap ke bachche bankar dekho। pasanda aaye to banna, nahin to jaakar laukik maa baap ka banna। fees to kuchh nahin hai। shivbaaba ka bhandaara hai। na koi kitaab aadi khareed karaate hain। sirf murli bheji jaati hai। baap ka khajaana hai, woh fees kya lenge! ho, achha lage to gareebon ke liye literature chhapa lena।

bhaarat jaisa aur koi daani desh nahin। baap bhi aakar bhaarat mein daan karte hain। tum bachche bhi tan-man-dhan baap ke havaale karte ho। mahaadaani bante ho। yeh baba mahaadaani bana na। aage to indirect daan karte the। ab khud direct aaya hai, return mein svarga ki baadshaahi dete hain। sasta sauda hai na। phir kehte hain ab aap samaan banaao, vikaaron ko jeeto, dehi-abhimaani bano, apne ko aatma samjho। gaate bhi hain nange aaye the, nange jaana hai। pahle number mein devi-devtaaon ki aatmaayen aai। unke peechhe doosre number vaale hain। head hain devi-devta dharma ki aatmaayen। jo pahle aate hain to jaana bhi pahle unko hi hai। all-round unhon ka part hai। yeh sabhi baaten samajhne ki hain, jinke bhaagya mein hai woh to jhat samajh lete hain na। bhaagya mein nahin hai to dil nahin lagti। baap kehte hain ab mujhe yaad karo, main hi tumhaara baap, god father hoon। kachchha-machchha koi god thode hi hain। yeh baaten baap bigar koi samjha nahin sakta। achha!

meethe-meethe sikeeldhe serviceable bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) tan-man-dhan sab baap havaale kar mahaadaani banna hai। aap samaan banaane ki seva bhi karni hai aur dehi-abhimaani hokar rehna hai।

2) is puraani duniya duhkhadhaam ko bhool shantidham aur sukhdhaam ko yaad karna hai। karmabandhan mein kabhi bhi phansana nahin hai।

vardaan:- aane aur jaane ke abhyaas dvaara bandhanmukta banne vaale nyaare, nirlipta bhav

saare padhaai athva gyaan ka saar hai - aana aur jaana। buddhi mein ghar jaane aur raajya mein aane ki khushi hai। lekin khushi se vahi jaayega jiska sada aane aur jaane ka abhyaas hoga। jab chaaho tab ashareeri sthiti mein sthit ho jaao aur jab chaaho tab karmaateet ban jaao - yeh abhyaas bahut pakka chaahiye। iske liye koi bhi bandhan apni taraph aakarshit na kare। bandhan hi aatma ko tight kar deta hai aur tight vastra ko utaarne mein khinchaavat hoti hai isliye sada sada nyaare, nirlipta rahne ka paath pakka karo।

slogan:- sukh ke khaate se sampanna raho to aapke har kadam se sabko sukh ki anubhooti hoti rahegi।