सोमवार 3 अप्रैल 2023 की दैनिक मुरली

03-04-2023 praatahmurli om shanti "baapdaada"' madhuban

“meethe bachche - baap aaye hain tumhein gyaan ka teesra netra dene, jisse tum srishti ke aadi, madhya, ant ko jaan buddhivaan bane ho''

prashn:- aatma aur shareer donon ko pavitra banaane tatha raajaai pad ka adhikaar lene ki sahaj vidhi kya hai?

uttar:- tumhaare paas deh sahit jo bhi puraana kakhpan hai use exchange karo। baap ke havaale kar do। poora bali chadho, baap ko trustee banaao। shreemat par chalte raho to aatma aur shareer donon pavitra ban jaayenge। raajaai pad praapta ho jaayega। janak bhi bali chadha to unko jeevanmukti mili, tum bachche bhi baap ko vaaris banaao to 21 janmon ka adhikaar mil jaayega।

geet:- nayanheen ko raah dikhaao prabhu…

om shanti। bachchon ne geet suna। yeh bhakta bhagwan ko pukaarte hain। bhagwan ko poora na jaanne ke kaaran manushya kitna duhkhi hain। kitna maatha maarte rehte hain, bhakti maarga mein। sirf is janma ki baat nahin। jab se bhakti maarga shuru hua hai tab se dhakke khaate rehte hain। bhaarat mein hi poojya devi-devtaaon ka raajya tha, jisko svarga sachkhanda kaha jaata tha। ab bhaarat jhooth khanda hai। bhaarat ki mahima badi jabardasta hai kyonki bhaarat parampita paramatma ka birthplace hai। uska asul naam shiv hi hai। shiv jayanti manaate hain। roodra va somnaath jayanti nahin kaha jaata hai। shiv jayanti va shivraatri kaha jaata hai। ab sabhi nayanheen, buddhiheen hain kyonki sabmen 5 vikaar pravesh hain। raavan ne nayanheen aur buddhiheen banaaya hai, ek do ko duhkh dete rehte hain। bhaarat jab svarga tha to duhkh ka naam nahin tha। svarga ki sthaapna karne vaala hai heavenly god father। abhi sab bhakton ka bhagwan to zaroor ek hona chaahiye na। sabhi nayanheen hain arthaat gyaan ke chakshu va divine insight nahin hai। bhagvaanuvaach main tumko raajayog sikhaata hoon। shreemat bhagvat geeta hai mukhya। shri arthaat shreshtha mat se ab tumko buddhivaan banaaya jaata hai। divya chakshu arthaat gyaan ka teesra netra dete hain। vaastav mein gyaan ka teesra netra tum braahmanon ko milta hai, jisse tum baap ko aur baap ki rachna ke aadi, madhya, ant ko jaan jaate ho।

is samay sarvavyaapi hain - deh ahankaar va 5 vikaar, isliye sabhi ghor andhiyaare mein hain। tum bachchon ke paas roshni hai। tumhaari aatma saare world ki history-geography ko jaan gai hai। aage tum sab agyaan mein the, gyaan anjan satguru diya, agyaan andher vinaash.. jo poojya the vahi phir pujaari ban pade hain। poojya hain roshni mein, pujaari hain andhere mein। paramatma ko aapehi poojya, aapehi pujaari nahin kah sakte। woh to hai hi parampoojya, sabko poojya banaane vaala। unko kaha jaata hai param poojya parampita paramatma। krishna ko thode hi aise kahenge। unko sab god father nahin kahenge। niraakaar god ko hi sab god father kehte hain। hai woh bhi aatma, parantu param hai isliye unko parampita paramatma kaha jaata hai। aatma aur paramatma ka roop ek hi hai। zaroor ham aatma hain, woh param aatma sadaiv paramdham mein rahne vaala hai। angreji mein unko supreme soul kaha jaata hai। baap kehte hain tum gaate bhi ho aatma paramatma alag rahe bahukaal.. aise nahin paramatma, paramatma se alag rahe bahukaal। nahin। pahle number ka agyaan hai aatma so paramatma, paramatma so aatma kehna। aatma to janma-maran mein aati hai। paramatma thode hi punarjanma mein aate hain। baap baith samjhaate hain tum bhaaratvaasi svargavaasi, poojya the। yeh saari eeshvareey family ho gai na। achha, bhala yeh to bataao tum maat-pita kisko kehte ho? yeh kaun kehte hain? aatma kehti hai tum maat-pita... tumhari kripa se svarga ke sukh ghanere.. hamko svarga mein mile hue the। tum maat-pita aakar svarga ki sthaapna karte ho, to ham aapke bachche bante hain। baap kehte hain main sangam par hi aakar raajayog sikhlaata hoon nai duniya ke liye।

baap aakar samjhaate hain tum mujhe bhool gaye ho। meri to shivjayanti bhi bhaarat mein manaate ho na। gaaya bhi jaata hai shivraatri। kaun si raatri? yeh brahma ki behad ki raat hai। sangam par aakar raat se din arthaat narka se svarga banaate hain। shivraatri ke arth ka bhi koi ko pata nahin hai। bhagwan hai niraakaar। manushyon ke to janma by janma shareer ke naam badalte hain। paramatma kehte hain mera shaareerik naam hi nahin hai। mera naam shiv hi hai। main sirf boodhe vaanaprastha tan ka aadhaar leta hoon। yeh poojya tha, ab pujaari bana hai। shivbaaba aakar svarga rachte hain। ham unke bachche hain to zaroor ham svarga ke maalik hone chaahiye na। woh shivbaaba hai oonche te ooncha। brahma, vishnu, shankar ka part apna-apna hai। harek actor ka part apna hai। har ek aatma mein apna sukh ka part noondha hua hai। baap kalpa-kalpa aakar bhaaratvaasiyon ko svargavaasi banaate hain, usko bhool gaye hain। kehte hain phalaana svargavaasi hua। are ab to narka hai to punarjanma zaroor narka mein hi lenge na। to phir tum unko narka ka bhojan kyon khilaate ho! svarga mein to athaah vaibhav hain। phir unki aatma ko mangaakar narka ka bhojan kyon khilaate ho! patit brahman ko khilaate ho, pyaaz aadi khilaate ho। vahaan thode hi yeh hota hai। to dekho bhaarat ki kya haalat ho gai hai! bhagvaanuvaach - ab main tumko gyaan ka teesra netra deta hoon। tum phir se raajaaon ka raaja banenge। devi-devtaayen 84 janma bhog poojya se pujaari ban gaye hain। tum jaante ho ham shiv-baba ke vaaris bane the। shivbaaba ne svargavaasi banaaya tha tab unko sab yaad karte hain। O god father raham karo। saadhu bhi saadhna karte hain kyonki yahaan duhkh hai to nirvaandhaam jaana chaahte hain। aatma paramatma mein leen to hoti nahin। yeh samajhna bhool hai। ab tum kehte ho ham aatma paramdham mein rahne vaali hain। ham aatma so devi-devta kul mein aayengi, phir 84 janma bhogengi। ham so aatma phir daivi kul, kshatriy kul se vaishya, shoodra kul mein aayenge। shivbaaba janma-maran mein nahin aate, sirf aakar bhaarat ko svarga banaate hain। gaaya bhi jaata hai satayug mein sooryavanshi shri lakshmi-naaraayan ki dynasty thi। jaise Christian gharaane mein Edward di first, Edward di second, third chalta hai। vaise hi vahaan bhi lakshmi-naaraayan di first, lakshmi-naaraayan di second, third aise 8 dynasty chalti hain। abhi tum braahmanon ka teesra netra khula hai। baap baith aatmaon se baat karte hain। tum aise 84 ka chakra lagaakar itne-itne janma lete aaye ho। varnon ka bhi ek chitra banaate hain jismen devta, kshatriy, vaishya, shoodra banaate hain। ab tum jaante ho ham so brahman choti hain। is samay ham hain eeshvareey aulaad practical mein। is samay raajayog aur gyaan se hamko sukh ghanere milte hain। koi to sooryavanshi raaja raani ka varsa lete hain, koi chandravanshi ka। saari kingdom sthaapan ho rahi hai। har ek apne purushaartha se woh pad paayenge। koi agar poochhe ki abhi padhte-padhte hamaara shareer chhoot jaaye to kya pad milega? to baba batla sakte hain। yog se hi aayu badhti hai, vikarma vinaash hote hain। aur koi upaay patit se paavan banne ka hai nahin। patit-paavan kahne se hi bhagwan yaad aata hai। bhagwan hai kaun - yeh nahin jaante। baap kehte hain main aata hi bhaarat mein hoon, yeh mera birth-place hai। somnaath ka mandir kitna aaleeshaan tha! yeh baap hi bachchon ko samjhaate hain, jiske phir baad mein shaastra bante hain। bhakti maarga mein hi yeh yaadgaar banna shuru hote hain। jab pujaari bante hain to pahle-pahle somnaath ka mandir banaate hain। bhaarat to satayug treta mein bahut saahookaar tha। mandiron mein athaah dhan tha। bhaarat heere tulya tha, ab to kangaal kaudi tulya hai। phir baap aakar bhaarat ko heere tulya banaate hain। saara jhaad jadajdeebhoot avastha ko paaya hua hai। baap kehte hain apni shakla to dekho, lakshmi-naaraayan ko varne laayak ho। naarad ki kahaani hai na। patit aatma pavitra lakshmi athva naaraayan ko kaise var sakegi? vikaar mein gaye to phir passport cancel ho jaata hai। apne aap ko dekha jaata hai, ki ham aisa purushaartha karte hain jo baba mama ke gaddi-nasheen ban sake। yeh hai hi patit duniya। pavitrata hai mukhya। ab to no health, no wealth, no happiness। yeh roonya ke paani misal (mrigtrishna) raajya hai। is par bhi duryodhan ki kahaani shaastron mein hai। duryodhan vikaari ko kaha jaata hai। dropdi kehti hai hamaari laaz rakho। yeh dropdiyaan hain na। baap kitna achhi reeti samjhaate hain, jitna buddhi yog poora laga hua hoga to dhaarna bhi hogi। knowledge brahmacharya mein hi padhi jaati hai। baap kehte hain grihastha vyavhaar mein rehte kamalphool samaan rehna hai। donon taraph nibhaana hai, marna bhi zaroor hai। marne samay manushyon ko mantra dete hain। baap kehte hain tum sab marne vaale ho। main kaalon ka kaal sabko vaapis le jaane vaala hoon, to khushi honi chaahiye na। phir jo achhi reeti padhenge woh svarga ke maalik banenge। nahin padhenge to praja pad paayenge। yahaan tum aaye ho raajya pad paane। yeh padhaai hai, ismen andhashraddha ki baat nahin। yeh padhaai hai raajaai ke liye। jaise us padhaai ki em object hai, barrister banega to yog zaroor padhaane vaale teacher se rakhna pade। yahaan tumko bhagwan padhaate hain to unse yog lagaana hai।

baap kehte hain main paramdham bahut door door se aata hoon। paramdham kitna oonch hai। sookshm vatan se bhi oonch hai। vahaan se aane mein mujhe ek second lagta hai। unse teekha aur kuchh ho nahin sakta। second mein jeevanmukti deta hoon। janak ka misaal hai na। abhi to narka puraani duniya hai। nai duniya svarga ko kaha jaata hai। baap narka ka vinaash karaae svarga ki sthaapna karaate hain। baaki unko sarvavyaapi kahne se kya milega? kuchh bhi nahin। baap to aakar svarga ka maalik banaate hain। baaki sabhi aatmaayen shantidham chali jaayengi। aatma amar hai, usko part bhi amar mila hua hai। phir aatma chhoti-badi kaise ho sakti! aatma hai hi star। badi-chhoti ho na sake। ab tum ho god fatherly students, god father knowledgeful, blissful hai। woh tumko padha rahe hain। tum jaante ho is padhaai se ham so devi-devta banenge। tum bhaarat ki seva kar rahe ho। pahle-pahle to baap ka banna hai aur jagah to guru ke paas jaate hain, unke bante hain athva use apna guru banaate hain। yahaan to hai baap। to pahle baap ka bachcha banna pade। baap bachchon ko apni jaaydaad dete hain। baap kehte hain bachche tum exchange karo। tumhaara kakhpan hamaara, hamaara sab kuchh tumhaara। deh sahit jo kuchh hai woh sab kuchh mere ko do, main tumhaari aatma aur shareer donon ko pavitra bana doonga aur phir raajaai pad bhi doonga। tumhaare paas jo kuchh hai woh bali chadho। mujhe trustee banaao, meri shreemat par chalo। janak raajya-bhaagya sahit bali chadha to unko jeevanmukti mili। baba yeh sabhi kuchh aapka hai। baap kehte hain mujhe vaaris banaao, main 21 janma tumko vaaris banaata hoon। sirf meri mat par chalo। bhal dhandha karo, vilaayat jaao, kuchh bhi karo, sirf meri mat par chalo। khabardaar rehna hai। maaya ghadi-ghadi pachhaadegi। vikarma koi nahin karna hai। kadam-kadam shreemat par chalna hai to tum shreshtha banenge। baap to daata hai, sirf tumko trustee banaate hain। kehte bhi ho yeh bachche, dhan aadi sab bhagwan ka diya hua hai। ab bhagwan kehte hain mujhe do। main exchange karta hoon। main pratigya karta hoon - shreemat par chalne se tumko aisa shreshtha banaaoonga। yeh hai raajayog। yeh lakshmi-naaraayan bhi is raajayog se aise bane hain। bidla jisne lakshmi-naaraayan ka mandir banaaya hai, woh khud nahin jaante hain ki yeh lakshmi-naaraayan itne dhanvaan kaise banen! ab baap samjhaate hain - yahaan ke gareeb vahaan saahookaar banenge aur saahookaaron ka sab mitti mein mil jaayega। achha!

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) maat-pita ke gaddi nasheen banne ke liye pavitrata ki dhaarna karni hai। donon taraph nibhaate hue padhaai par poora dhyaan dena hai।

2) koi bhi vikarma nahin karna hai। bahut khabardaar ho shreemat par chalte rehna hai। trustee zaroor banna hai।

vardaan:- apne mastak beech sada baap ki smriti emerge rakhne vaale mastakamni bhav

mastakamni arthaat jiske mastak mein sada baap ki yaad rahe, isi ko hi oonchi stage kaha jaata hai। apne ko sada aisi oonchi stage par sthit rahne vaali shreshtha aatma samajh aage badhte raho। jo is oonchi stage par rehte hain woh neeche ki anek prakaar ki baaton ko sahaj paar kar lete hain। samasyaayen neeche rah jaati hain aur svayan oopar ho jaate। mastakamni ka sthaan hi ooncha mastak hai isliye neeche nahin aana, sada oopar raho।

slogan:- bephikra baadshaah ki sthiti ka anubhav karna hai to mere ko tere mein parivartan kar do।