मंगलवार 11 अप्रैल 2023 की दैनिक मुरली

11-04-2023 praatahmurli om shanti "baapdaada"' madhuban

“meethe bachche - jeete ji marjeeva bano, ham ashareeri aatma hain, yahi pahla paath achhi tarah se roz pakka karte raho''

prashn:- sampoorn surrender kisko kaha jaayega?

uttar:- jo sampoorn surrender hain woh dehi-abhimaani honge। yeh deh bhi hamaari nahin, abhi ham nange bante hain arthaat tan-man-dhan jo kuchh hai, woh baba ko arpan karte hain। sab mera mera samaapta kar poore trustee hokar rehna hi sampoorn surrender hona hai। baba kehte - bachche, mera bankar sabse mamatva mita do। dhandha dhori karo, sambhaalo, maa baap ki paalna ka karja utaaro parantu baap ki shreemat par trustee hokar।

geet:- dar pay aaye hain kasam le…

om shanti। bachchon ne geet suna। zaroor geet mein rahasya bhara hua hai, jo baap baith inka arth samjhaate hain। isko kaha jaata hai jeete ji markar baap ka banna। baap ka banne ke baad phir teacher va guru karte hain। aise bhi nahin sabhi laukik guru karte hain। majority guru karte hain। Christian log bhi jab bachcha paida hota hai to Christianize karte hain। guru ki god mein jaakar dete hain। phir paadri ho ya koi bhi ho। paadri to Christ nahin hua। kahenge unke naam par ham Christian bante hain। abhi tum bachche jaante ho pahle-pahle to ham baap ke bante hain। apna tan, man, dhan jo kuchh hai, baba ko arpan karte hain। jeete ji marte hain arthaat ham aatma unka bante hain। yeh buddhi mein rehna chaahiye। jo bhi meri-meri vastu hai - mera shareer, mera dhan, daulat, sambandhi aadi jo kuchh hai, bhoolte hain। marne ke baad sab bhool jaata hai। kitni badi manzil hai! ham ashareeri aatma hain, yeh pakka karna hai। aise nahin ki tum shareer chhod aur mar padte ho। nahin, aatma complete pure thode hi bani hai। bhal baap ka bane ho parantu baba kehte hain tumhaari aatma apvitra hai। aatma ke pankh toote hue hain। abhi aatma ud nahin sakegi। tamopradhaan hone kaaran ek bhi aatma vaapis ja nahin sakti। maaya ne ekdam pankh tod diye hain। baba ne samjhaaya hai aatma hai flying squad। sabse teekhi jaati hai। usse teekhi cheez koi hoti nahin। aatma se koi pahunch nahin sakta। pichhaadi mein machchharon sadrishya sab aatmaayen bhaagti hain। kahaan jaati hain? bahut door-door soorya chaand se bhi paar। vahaan se phir lautna nahin hai। unhon ke rocket aadi to jaakar phir laut aate hain। soorya tak to pahunch nahin sakte। tumko to unse bahut door jaana hai। sookshm vatan se bhi oopar mool vatan mein jaana hai। jhat chale jaate hain। aatma ko pankh mil jaate hain। hisaab-kitaab chuktu kar aatma pavitra ban jaati hai। is kayaamat ke samay ki mahima bahut likhi hui hai। sab aatmaon ko hisaab-kitaab chuktu kar jaana hai। abhi to sab aatmaayen maili paap aatmaayen hain। yahaan hi punarjanma leti rehti hain।

tum jaante ho yeh behad ka drama hai। sab actors ko part bajaane vahaan se aana zaroor hai। sabki aatmaayen stage par aani hain, jab vinaash ka samay hota hai to sab aa jaate hain। vahaan rahkar kya karenge। actor bigar part bajaane ghar mein thode hi baith jaayenge, naatak mein zaroor aana padega। vahaan se jab sab chale aate hain tab phir baap sabko le jaate hain। baap kehte hain main bhal yahaan hoon to bhi aatmaayen aati rehti hain। vriddhi ko paati rehti hain nambarvaar। phir tum jaayenge bhi nambarvaar। saara tumhaari avastha par madaar hai iseelie marjeeva banna hai। ham aatma hain yeh nishchay rakhna mehnat hai। bachche ghadi-ghadi deh-abhimaan mein aakar bhool jaate hain। dehi-abhimaani tab honge jab complete surrender honge। baba yeh sab aapka hai। main bhi aapka hoon। yeh deh jaise ki hamaari hai nahin। inko main chhod deta hoon। baba main aapka hoon। baba kehte hain mera ban aur sabse mamatva mita do। baaki aise nahin ki yahaan aakar baith jaana hai। tumko apna dhandha dhori karna hai। ghar sambhaalna hai। bachchon ka karja utaarna hai। maat-pita ki seva kar unka ujoora utaar dena hai। bachchon par maa baap ki paalna ka karja chadhta hai। ab yeh baap tumhaari paalna kar rahe hain to tumse pahle hi surrender karaate hain। sab kuchh de do। unse phir tumhaari paalna bhi hoti hai। yeh shivbaaba ka bhandaara hai। maat-pita tum bachchon ki paalna kar rahe hain। shuru mein jo bhi aaye the sabhi ne jhat surrender kar diya। apne paas kuchh nahin rakha। surrender kiya phir us dhan se bigar chhutti paisa aadi kisi ko de na sake। jaise shaastron mein harishchandra ki kahaani hai। parantu yathaartha to kuchh hai nahin। bhaarat bilkul pavitra tha। bhaaratvaasiyon jaisa pavitra sukhi koi hota nahin। bhaarat sabse bada teertha hai jahaan patit-paavan baap aakar saare srishti ko, tatvon ko bhi pavitra banaate hain। abhi yeh tatva aadi sab dushman hain। earthquake hogi, toofaan lagenge kyonki tamopradhaan hain। natural calamities aayengi, bahut duhkh dengi। is samay sab duhkh ki cheejen hain। satayug mein hain sab sukh ki cheezen। vahaan yeh toofaan va garam havaayen aadi kuchh nahin hoti। tumhaare mein bhi yeh bahut thode samajhte hain। aaj hain, kal nahin hain, to kahenge kuchh nahin samajhta tha। bhal yahaan aate hain parantu sab kaayam thode hi rehte hain। yahaan se gaye 10 din baad samaachaar likhenge ki baba phalaane ko maaya kha gai। aise hota rehta hai। chhote phool hain, bade phool ho to unmein phal bhi aave। phal aa jaata to doosron ko aap samaan banaane ki taakat rehti hai। unka phal nikalta hai। baap ke bane to phir praja bhi banaani hai। vaaris bhi banaane hain। aise nahin panda ban baba paas aaye bas ham pahunch gaye। nahin, manzil hai badi। kehte hain maaya ke toofaan bahut aate hain। are tum baap ke bachche ho toofaan to aayenge। kehte ho baba ham aapke the, aapse varsa liya tha phir punarjanma lete-lete 84 janma paas kiye phir aakar aapka bana hoon। main to aap se varsa lekar chhodoonga। to aise baap ko kitna yaad karna pade aur aap samaan banaae phal dena pade। nahin to maalik kaise banenge। apna vaaris kaise banaayenge। praja bhi chaahiye aur vaaris bhi chaahiye, to gaddi par baithe। baba ke paas to bahut aate hain phir phaarakti de dete hain। buddhi ka yog toota khel khatma।

kai bachche baba se aakar poochhte hain - baba, avastha ko kaise jamaayen? koi toofaan na lage। unhon ko to raasta batlaate hi rehte hain ki baap ko yaad karo। toofaan to lagenge hi। boxing mein aisa kab dekha jo ek hi thappad khaata rahe। zaroor donon mein himmat hogi, thappad ek woh lagaayenge to 10 thappad doosre bhi lagaate honge। yeh bhi boxing hai। baap ko yaad karte rahenge to maaya bhaagti jaayegi। parantu phat se to nahin hoga। maaya se kushti ladni hai। aise mat samjho maaya thappad nahin maaregi। bhal koi bhi ho badi boxing hai। bahut dar jaate hain। maaya ekdam naak mein dam kar deti hai। yuddhasthal hai na। buddhiyog lagaane mein maaya bahut vighna daalti hai। mehnat saari yog mein hai। bhal baba kehte hain gyaani tu aatma mujhe priy hain। parantu aisa nahin sirf gyaan dene vaala mujhe priy hai। pahle yog poora chaahiye। baap ko yaad karna hai। maaya ke vighnon se daro nahin। vishwa ka maalik bante ho। 16108 ki maala bahut badi hai। ant mein aakar poori hogi। treta ant tak itne prince-princess bante hain। kuchh to nishaani hai na। 8 ki bhi nishaani hai, 108 ki bhi nishaani hai। yeh bilkul right hai। treta ant tak itne 16108 prince-princess hote hain। shuru mein to nahin honge। pahle thode honge phir vriddhi paate jaate hain। woh sab bante yahaan hain, chance abhi bahut achha hai। parantu mehnat bahut hai। geet mein bhi kehte hain kab nahin chhodenge, mar jaayenge। baba phir kehte hain yeh sab tum bachchon ke liye hi hai। bachche kehte hain - hamaara sab kuchh aapka hi hai। kehte hain na ki yeh sab kuchh bhagwan ne diya hai। ab baap kehte hain yeh to sab khatma ho jaana hai। vinaash to hota hai na। tumhaare paas kya hai? yeh shareer bhi khatma ho jaayega। ab main phir tumko badli kar deta hoon। sirf exchange karte ho na। to baap kehte hain - bachche ashareeri bano। hamko yaad karo, sabhi surrender karo।

baap kehte hain in sab shaastron aadi ka tumko saar samjhaata hoon। jo shaastra aadi padhe hue hain woh to samajhte hain। baap kehte hain main brahma mukh dvaara tumko yeh samjhaata hoon, mainne kalpa pahle bhi tumko raajayog sikhaakar raaja-raani banaaya tha phir ab banaata hoon। kabhi bhi manushya, manushya ko geeta sunaae, raajayog sikhlaae raaja-raani bana na sake। phir geeta sunne se kya phaayda! baap to kehte hain - main khud kalpa-kalpa aakar tumko svarga ka maalik banaata hoon। hamaare banenge tab to vaaris banenge na। to jitna tum yog mein rahenge utna shuddh bante jaayenge। baba yeh sab aapka hai। ham to trustee hain। aapke hukm bigar ham kuchh nahin karenge। shareer nirvaah kaise karna hai, woh bhi mat leni hai। aksar karke gareeb hi poora potaamel dete hain। saahookaar de na saken। surrender ho nahin sakte। koi virla nikalta hai। jaise ki janak ka naam hai। baal bachche hain, joint property hai to alag kaise ho। saahookaar log property nikaalen kaise, jo surrender hon। baap hai hi gareeb nivaaz। sabse gareeb maataayen hain, unse bhi jaasti kanyaayen gareeb hain। kanya ko kabhi varse ka nasha nahin hoga। bachche ko baap ki jaageer ka nasha rehta hai। to woh sab chhod phir vaikuntha ka varsa lena pade।

daan hamesha gareeb ko hi diya jaata hai। bhaarat hai sabse gareeb। America bahut saahookaar hai। unko varsa dete hain kya? bhaarat sabse saahookaar tha aur koi dharma nahin tha। sirf bhaaratvaasi hi the। ek bhaasha thi, god is one। main one sovereignty, one religion, one language sthaapan karta hoon। one almighty government sthaapan karte hain। one se phir two, three hogi। abhi kitne dharma hain phir zaroor one dharma aana chaahiye। 5 hazaar varsha ki baat hai। manushya samajhte hain phalaana mara svargavaasi hua, shaayad oopar chala gaya। delvaada mandir mein bhi svarga oopar chhat mein hai। to manushya moonjh jaate hain। vaastav mein svarga koi oopar nahin hai। tum ab jaante ho baba ke paas jaana hai, phir yahaan aakar raajya karenge। yeh gyaan buddhi mein rehna chaahiye jo koi ko samjha sako। kachche ko to maaya kachcha kha jaayegi। baba ke paas samaachaar aata hai - phalaane ne ek hi aisa teer maara jo bas, main baba ka ban gaya। shaastron mein likha hua hai ki kumaariyon dvaara baan marvaaye। isko gyaan baan kaha jaata hai। sirf baap ki yaad dilaani hai। baaki koi sthool baan ki baat nahin hai। jaante kuchh bhi nahin। manushyon ko jo aaya so likh diya hai। gandagi to bahut hai। riddhi siddhi vaale bhi bahut ho gaye hain। sach jab nikalta hai to jhooth saamna karta hai। ab tum samajhte ho ki shivbaaba hai niraakaar aur yeh brahma hai saakaar। baaki naabhi aadi ki koi baat hi nahin hai। jhooth ke kaaran sach ko manushya samajh nahin sakte। aajkal jhoothe javaahraat bhi aise first class nikle hain jo sach chhip gaya hai। tum kisko sach sunaate ho to jaise mirchi lagti hai। are most beloved baap se to varsa lena hai। woh phir sarvavyaapi kaise hoga। sarvavyaapi ka to koi arth hi nahin nikalta। god father svarga create karte hain to ham svarga ke maalik hone chaahiye na। phir itne kangaal kyon bane hain। ham baap ke bachche hain to svarga ke maalik kyon nahin hain! narka ke maalik kaise bane hain? god to rachayita hai hi nai duniya ka। aise nahin ki woh puraani duniya sthaapan karte hain। baap puraana ghar thode hi banaayenge। to aise-aise khyaal chalne chaahiye। achha!

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) maaya ke vighnon se darna nahin hai। baap ki yaad se sab vighnon ko hata dena hai।

2) buddhi se sab kuchh surrender kar ashareeri ban baap ko yaad karna hai। gyaani tu aatma ke saath-saath yogi bhi zaroor banna hai।

vardaan:- mere-pan ki smriti se sneh aur raham ki drishti praapta karne vaale samarthi sampanna bhav

jo bachche baap ko pahchaan kar dil se ek baar bhi “mera baba'' kehte hain to raham ke saagar baapdaada aise bachchon ko return mein padamguna usi roohaani pyaar se dekhte hain। raham aur sneh ki drishti unhein sada aage badhaati rehti hai। yahi roohaani mere pan ki smriti aise bachchon ke liye samarthi bharne ki aasheervaad ban jaati hai। baapdaada ko mukh se aasheervaad dene ki aavashyakta nahin padti hai lekin sookshm sneh ke sankalp se har bachche ki paalna hoti rehti hai।

slogan:- jo baap ke pyaare hain, unka anya kisi vyakti va vaibhav se pyaar ho nahin sakta।