सोमवार 3 जुलाई 2023 की दैनिक मुरली

03-07-2023 praatahmurli om shanti "baapdaada"' madhuban

“meethe bachche - service ki nai-nai invention nikaalo, seva ka vistaar karo, seva ke kshetra mein maataaon ko aage karna hi saphalta ka saadhan hai''

prashn:- kis manners ke saath baat karo to authority ke bol tum siddha kar sakte ho?

uttar:- jab bhi kisi bade se baat karte ho to ‘aap-aap' kahkar baat karni chaahiye। tu-tu kahkar nahin। yeh bhi manners hai। tum apni authority se bolo lekin respect zaroor do। school mein yeh bhi manners sikhlaaye jaate hain। 2- kabhi bhi ahankaar se baat nahin karni chaahiye। gyaan ke nashe mein sada harshitmukh raho। harshit chehra bhi bahut seva karta hai।

geet:- aaj ke is insaan ko…

om shanti। meethe-meethe bachchon ko yeh to samjhaaya gaya hai ki bahut paap aatmaayen ban gai hain। achhe bachche pukaarte hain ki paap bahut ho gaya hai। paap se hi manushya patit bante hain। yaad bhi karte hain ki paap aatmaon ko punya aatma banaane ke liye he patit-paavan aao। yeh patit duniya hai to zaroor koi paavan duniya bhi hai। niraakaari duniya ko paavan duniya nahin kaha jaata। woh shantidham hai। patit aur paavan duniya manushyon ke liye hai। kaliyugi duniya mein patit hain। satayugi duniya mein paavan hain। patit-paavan baap hi paavan duniya sthaapan karte hain। viddhaan-panditon ne shaastra banaaye hain, naam rakh diya hai vyaas ka। vyaakhyaan karne vaale ka naam to chaahiye na। manushya to jaante hi nahin ki shaastra banaaye kab hain? yeh tum bachche jaante ho satayug-treta mein shaastra aadi hote nahin। bhakti maarga ka vahaan koi nishaan nahin। baap gyaan se jindaabaad karte hain। gyaan se 21 janma jindaabaad hote ho phir maaya aakar murda banaati hai। yeh hai murdon ki duniya, jisko kabristaan kaha jaata hai। is samay ghor kabristaan kahenge। buddhi to sabki chalti hogi। mahaabhaari ladaai mein poora kabristaan banta hai। aur ladaaiyon mein aisa nahin hota। bhaagvat mein likha hua hai - gyaan saagar ke sabhi bachche kabradaakhil ho jaate hain। maaya ne kaam chita par bithaae sabko bhasmeebhoot kar diya hai। sab kabradaakhil hain। musalmaanon ki kuraan aadi mein bhi hai - kabradaakhil ho jaate hain। jab kayaamat ka samay hota hai to unhon ko jagaane allaah aata hai। kabristaan ko phir paristaan banaate hain। baba ne bataaya tha ki birla mandir mein bhi likha hua hai ki dehli ko paristaan banaaya tha। to zaroor kabristaan ko paristaan banaaya hoga। pralay to nahin hogi, parantu marte bahut hain। satayug mein hote hi thode manushya hain। ek hi aadi sanaatan devi-devta dharma rehta hai। vahaan aisi haalat nahin hogi jiska yeh geet suna। svarga mein koi kisi ko duhkh nahin deta। yahaan to kitna duhkh dete hain। ek-do ka khoon kar dete hain। baba ke paas samaachaar to aate hain na। koi doosre ki stri par phida hote hain to apni stri ko khatma kar dete hain। jahar aadi de dete hain। yeh hai hi patit duniya, tab to gaate hain - he patit-paavan aao। parantu apne ko patit samajhte nahin। koi ko kaho tum patit ho to bigad pade। abhi tum jaante ho ki ham bhi patit the। baap paavan bana rahe hain। ab yeh phir duniya ko bataana hai ki patit duniya ko paavan banaane vaala shivbaaba hai। jiski jayanti bhi tum manaate ho, woh aa gaya hai। asul mein kaayda tha - koi nai invention nikalti thi to raaja ko batlaate the। woh haath mein uthaate the। abhi raaja to hai nahin। yeh invention sabko batlaani hai। aapas mein milkar resolution paas kar hajaaron ki sahi lekar government ko soochna deni chaahiye। invention ka phailaav karne ke liye highest authority ko bataaya jaata hai। phir woh prabandha karti hai। to tumko bhi aisa karna chaahiye। jiska janma din aaye unke liye samjhaao। jis din jiska utsav ho usi din us par samjhaayenge to sab samjhenge। baat to barobar theek lagti hai। aaj se 5 hajaar varsha pahle baap aaya tha। bhaarat jo oonch te oonch tha, sone ki chidiya tha woh bilkul kaudi tulya ban gaya hai। unko phir parampita paramatma heere tulya banaate hain। brahma dvaara yeh gyaan de rahe hain।

tum samjha sakte ho - vaastav mein har ek manushya brahmaakumaar-kumaari hai। surname yeh hai। brahma se hi rachna hoti hai brahman dharma ki। phir devta, kshatriy, vaishya, shoodra - yeh saara sijra ban jaata hai। to tum in tyohaaron par achhi reeti se samjha sakte ho। deepmaala aati hai। yeh to tum jaante ho ab ghar-ghar mein ghor andhiyaara hai। gyaan soorya pragta, agyaan andher vinaash। barobar ghor andhiyaara hai। koi bhi aatma apne baap ko nahin jaanti। baap ko jaanne se hi sabki jyoti jag jaati hai। unko shama bhi kaha jaata hai। to aise mukhya parva par tum bahut achhi reeti samjha sakte ho। tum government ko bhi samjhaao। tumhein abhi khaas aage badhna hai। maataaon ko aage karna hai। ismen purushon ko lajja nahin aani chaahiye। to baap samjhaate hain ki kaise tumko jagaana chaahiye। aapas mein milkar ke sahi (hastaakshar) lekar ke phir samjhaao। tum har ek vaastav mein shiv ke bachche ho। aise nahin ki sabhi shiv hain। baap to ek hai। woh hai rachayita patiton ko paavan banaane vaala। ek memorandum banaana chaahiye। mukhya jo bade hain unko bataana chaahiye। tum to manushyon ko jagaate ho, manushya samajhte hain ganga mein snaan karne se paavan bante hain। parantu ganga to patit-paavni nahin hai। patit-paavan ek hi niraakaar hai। gyaan ki varsha karne vaala gyaan saagar woh hai, baaki yeh sab hai andha-shradha। abhi tum bachchon ko authority mili hai। shaastron mein likha hai kumaariyon dvaara gyaan baan marvaaye hain। achhe-achhe bachche kaam kar sakte hain। bhaashan aadi kar sakte hain। sena mein nambarvaar to hote hain na। baatcheet karne mein bhi manners chaahiye। apne se bade ko hamesha ‘aap-aap' kaha jaata hai। parantu anapdhe bachche, ‘aap' ke badle ‘tu-tu' kar baat karte hain। padhaai se bhi buddhi mein manners aate hain। teachers phir bhi achhe hote hain jo padhaakar martaba paane laayak banaate hain। characters bhi register mein likhte hain। aajkal to itne character vaale hain nahin। duniya mein gand hi gand hai। geet mein bhi suna na ki kya haal hai। tum bachche jaante ho - aho bhaarat hamaara kaun kahlaaye। bhaarat svarga tha। sannyaasi log to kah dete hain yeh sab aapki kalpana hai। unhon ko kya pata svarga kya hota hai? haan, koi niklenge jo dekhkar bade khush honge। yeh chitra badi achhi cheez hain। paandavon ke bade-bade but banaate hain। itne bade koi the thode hi। raavan ko kitna bada 100 foot ka lamba banaate hain। din-pratidin lamba banaate jaate hain। raavan ki aayu badi ho gai hai। 2500 varsha aakar hue hain। to tum dashahre ke din par bhi achhi reeti samjha sakte ho। yeh raavan ki raajdhaani hai, isko devil world kaha jaata hai। akhbaar mein bhi koi ne daala tha - yeh raakshasi duniya hai। agar koi bole tum aasuri raajya kyon kehte ho? bolo - phalaane ne akhbaar mein bhi raavan raajya kaha hai। baap bhi jab aaye the to kaha tha yeh aasuri duniya hai। daivi raajya to satayug mein hota hai। aise-aise milkar raay nikaalni chaahiye।

em object clear hai। baahar board par bhi em-object likhi hai। koi bhi school mein andhashradha ki baat nahin hoti। satsang jo bhi hain vahaan ved aadi sab andhashradha se sunte hain। arth kuchh bhi nahin nikalta। ab baap kehte hain - he bhaaratvaasiyon, tum bade-bade ved-upnishad aadi kab se padhte aaye ho? satayug se to nahin kahenge। vahaan yeh bhakti maarga ka ansh nahin। inko bhakti cult kaha jaata hai। aadhaakalpa brahma ki raat bhakti maarga shuru hota hai। bhagwan zaroor aata hai tab to shiv jayanti manaai jaati hai। nahin to woh niraakaar kaise aaya? zaroor shareer ka aadhaar liya hoga। tum jaante ho baap brahma ke tan ka hi aadhaar lete hain। unko aana hi bhaarat mein hai। baap ka janma bhi bhaarat mein hi hai। brahma ka bhi bhaarat mein hi hai। baba ne viraat roop ke liye bhi samjhaaya hai। yeh brahman dharma hai choti। ab practical mein tum ho na। ham braahmanon ke oopar shivbaaba niraakaar hai phir brahma ka tan dikhaana pade। yeh sarasvati aur yeh brahman kul phir devta kul, kshatriy kul - itne-itne janma lete hain। bilkul clear accurate ban sakta hai। brahma ki raat, sarasvati ki raat, brahmaavanshiyon ki bhi raat। din mein phir sab brahman so devta bante hain। points to bachchon ko bahut di jaati hain, dhaaran karni hain। aisa nahin, ek kaan se suna aur baahar nikle, khalaas। jaise aur satsangon mein kathaayen aadi sunkar chale jaate hain। yahaan to tumko pratyakshaphal milta hai। jaante ho is padhaai se hamko manushya se devta banna hai। vahaan kuchh em object nahin।

baap samjhaate to bahut hain parantu koi birle nikalte hain। koi-koi to traitor bhi nikal padte hain। samjhaana chaahiye - yeh yuddha ka maidaan hai। maaya badi prabal hai। koi fail ho jaate hain। yeh bhi drama ka khel hai। sab thode hi win kar sakte hain। bachche jaante hain ham maaya raavan se haare hue hain। haar aur jeet ka yeh khel hai। maaya se haare haar hai। tum jaante ho ham baba se vishwa ka maalik bante hain। yeh nasha sthaai rehna chaahiye। nasha tootta kyon hai? vishwa ke rachta baap se padh rahe hain! nar se naaraayan, naari se lakshmi ban rahe hain! aise thode hi hota hai ki student padhaai aur padhaane vaale ko bhool jaate hain। phir yahaan kyon bhoolte ho? ghar mein jaane se ekdam bhool jaate hain। yahaan bahut nishchaybuddhi ho jaate hain। kitne aansu bahaate, yahaan se ghar gaye phir chitthi bhi nahin likhte। ananya bachche jo panda bankar aate woh bhi bhool jaate hain। kam se kam service samaachaar to likhen - baba, ham aapki service par tatpar hain। nahin to baba samajh lete hain maaya ne kabradaakhil kar diya hai। buddhi bhi kehti hai aisa baba jo vishwa ka maalik banaane vaala hai unko to nirantar yaad karna chaahiye। parantu bachche maas-maas bhi yaad nahin karte, patra nahin likhte। maaya koi-koi ko to bilkul hi murda bana deti hai। jeete ji bhi chitthi nahin likhte, marne ke baad to baat hi nahin। baba bhi chitthi tab likhenge jab woh khud likhenge। jo baba ko yaad karenge vahi karmaateet ever healthy banenge। baba ka varsa to zaroor yaad aana chaahiye। sthaai nasha bhi chadhna chaahiye। is samay tum bachchon ka yaad se mukh meetha hota hai। jaante ho srishti ka raajya roopi makkhan hamko milta hai। shreekrishna ko mukh mein maakhan dikhaate hain arthaat vishwa ka raajya hai। maalikapne mein bhi status hain na। jo jitna karega, woh paayega। tum jaante ho baba hamko padhaate hain। parampita kaha jaata hai na। to pita se zaroor varsa milta hai। maat-pita chaahiye tab bachche paida hon, tab varsa mile। kehte bhi hain tum maat-pita ham baalak tere। tumhaare sahaj raajayog sikhlaane se ham svarga ke maalik bante hain। samjhaana chaahiye teen senaayen to barobar khadi hain। vinaash kaale vipreet buddhi - to khalaas hue the। baaki jinki preet thi bhagwan ke saath woh svarga ke maalik ban gaye। hamaara farja hai government ko itla karna। jo bhi bade-bade officers tumhaare saath milte hain unse bhi sahi le sakte ho to khush ho jaayenge। yeh to bahut achha kaarya karte hain। mehnat karo। ismen phursat bhi chaahiye, jo phir sambhaal sako। service badhaane ke liye to bahut yuktiyaan hain। parantu bachchon mein kahaan-kahaan ahankaar aa jaata hai ya familiarity mein aane se bahut nuksaan kar dete hain। gyaan ke nashe se chehra sada harshit mukh rehna chaahiye। achha!

meethe-meethe sikeeldhe bachchon prati maat-pita baapdaada ka yaad, pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) em object ko saamne rakh purushaartha karna hai। daivi manners dhaaran karne hain। ek kaan se sun doosre se nikaalna nahin hai।

2) vishwa rachayita baap humein padha rahe hain, unke ham student hain - is nashe mein rehna hai। service ki bhinna-bhinna yuktiyaan nikaal usmein busy rehna hai।

vardaan:- baap ke diye hue khajaane ko manan kar apna banaane vaale sada harshit, sada nishchint bhav

aap bachchon ke manan va simran karne ka chitra bhakti maarga mein vishnu ka dikhaaya hai। saamp ko shaiya bana diya arthaat vikaar adheen ho gaye। maaya se haar khaane ki, yuddha karne ki koi chinta nahin, sada maayaajeet arthaat nishchint। roz gyaan ki nai-nai point smriti mein rakh manan karo to bada maja aayega, sada harshit rahenge kyonki baap ka diya hua khajaana manan karne se apna anubhav hota hai।

slogan:- sva parivartak woh hai jiske andar sada yeh shubh bhaavna emerge rahe ki badla nahin lena hai badalkar dikhaana hai।