शनिवार 29 जुलाई 2023 की दैनिक मुरली

29-07-2023 praatahmurli om shanti "baapdaada"' madhuban

“meethe bachche - kadam-kadam par shivbaaba ki shreemat leni hai, apna sab samaachaar brahma dvaara baap ko dena hai''

prashn:- ek baap ke bachche hote bhi koi preet buddhi hain, koi vipreet buddhi hain - kaise?

uttar:- jo bachche apna poora connection baapdaada se rakhte hain, kisi baat mein sanshaybuddhi nahin bante hain, sachcha-sachcha potaamel brahma ke through shivbaaba ko sunaate hain woh hain preet buddhi bachche। agar kisi bhi baat se brahma ya braahmani se rooth jaate, chitthi nahin dete aur sochte - hamaara brahma se koi connection nahin, shivbaaba ko hi yaad karna hai to unki buddhi ko maaya pakad leti hai। woh hain jaise vipreet buddhi।

geet:- mujhko sahaara dene vaale…

om shanti। baap bhi bachchon ka shukriya maante hain। jo madadgaar bachche hote hain to baap bhi shukriya maante hain aur bachchon ki mahima karte hain। ab to bachche jaan gaye hain ki behad ka baap aaya hai। baap aate hi hain patit duniya mein। gaate bhi hain - he patit-paavan aao। to patit-paavan aayega, zaroor paavan duniya svarga sthaapan karega, jismen manushya thode rehte hain। paavan duniya ki mahima gaai jaati hai। paavan duniya mein pukaarne vaala koi hota nahin hai। pukaarte is patit duniya mein hain। bhakta hi apne ko patit samajhte hain। barobar ek hi bhaarat hai jismen paavan devtaaon ki raajaai thi। bhaarat mein pavitrata thi। bade saahookaar the, bahut sukhi the, ab to duhkhi hain। shivbaaba hi brahma tan mein baith samjhaate hain। to brahma tan ko bhi yaad karna pade na। agar bachche door jaate hain, samjho tum apne nagron mein jaayenge to tumhaara jo behad ka baap hai, saajan bhi hai, unko chitthi to likhni chaahiye na। shivbaaba ko likhna pade through brahma। brahma ke sivaae to shivbaaba sun na saken। shivbaaba through brahma yaad karna pade na। kai aise bhi bachche hain jo samajhte hain ki ham to shivbaaba ko yaad karte rehte hain। saakaar se koi connection nahin parantu jabki shivbaaba yahaan hain to zaroor baba ko patra likhna pade। samaachaar dena pade - shivbaaba through brahma। gaaya jaata hai vinaash kaale vipreet buddhi aur vinaash kaale preet buddhi - kiske saath? shivbaaba ke saath brahma dvaara। aise bhi mand buddhi hain jo kehte hain - ham to shivbaaba ko hi yaad karte hain। shivbaaba kehte hain na mujhe yaad karne se tumhaara beda paar ho jaayega। parantu woh hai kahaan? zaroor yahaan is tan mein hain, is dvaara padhaate hain। niraakaar ko tum chitthi kaise likhenge? saajan sajniyon ko, sajniyaan saajan ko chitthi likhti hain na। satayug se lekar kaliyug ant tak to manushya, manushya ko patra aadi likhte aaye। ab aatmaayen paramatma ke saath milti hain, unko patra likhti hain। niraakaar parampita paramatma ke saath baat karti hain। to through brahma unse connection rakhna pade। brahma dvaara chitthi likhen tab shivbaaba samjhe barobar yaad karte hain। kiski buddhi ko maaya ekdam pakad leti hai ya deh-abhimaan aa jaata hai to phir patra bhi nahin likhte, bhool jaate hain। abhi hai vinaash kaale vipreet buddhi। paandavon ki hai preet buddhi। vo log phir samajhte hain ki geeta ka bhagwan shreekrishna tha। achha, samjho shreekrishna hai to bhi unko chitthi likhni pade। shivbaaba ko bhi likhni hai। shreemat zaroor leni pade। kehte hain ki shivbaaba ko yaad karte hain। parantu saakaar brahma ke sivaae to raay mil na sake। achhe-achhe first class bachche likhte hain ki hamaara yog shivbaaba se hai, ham unko madad karte rahenge। phir bhi through brahma, baap bigar daade ka varsa to le nahin sakte ho। kadam-kadam par raay leni pade। aise-aise baba ke paas samaachaar aate hain। rooth jaate hain brahma se va braahmani se। phir maaya ekdam munh pher deti hai। samajhna chaahiye ki kadam-kadam par hamko shivbaaba se shreemat leni hai - baba is haalat mein kya karna chaahiye।

baba hamesha poochhte rehte hain ki - bachche, khushraazi ho? ek hoti hai shaareerik beemaari, doosri phir hai roohaani beemaari। kabhi patra nahin likhte ki baba ham mauj mein hain, hamaare oopar maaya vaar nahin karti hai। achha, woh sab kuchh jaante hain parantu phir bhi unse mat to leni pade na - is baat mein bhi right hoon ya wrong hoon? yog poora nahin hai to ulte ho pade hain। vinaash kaale preet buddhi bachchon ko to baap ke paas aana hai। baap yahaan baithe hain na। bahut hain jinki vinaash kaale vipreet buddhi ho jaati hai to ulte-sulte kaam karne lag padte hain, moonjh padte hain। shreemat lene bigar to kaam chal na sake। bigar guide akela pahunch na sake। koi raasta jaante hi nahin to ja kaise sakte? guide ka zaroor haath chaahiye। tairne ke liye zaroor aadhaar chaahiye। bachchon ko baba saavdhaani dete rehte hain ki koi bhi baat mein sanshay uth pade to bhi kam se kam inse to connection rakhna pade। shivbaaba ki mat bhi to inse milti hai na। baba ne samjhaaya - akaalmoorta ka yeh rath athva takhta khaas mukrar hai। baba kehte hain - main inke rath athva takhta ka aadhaar leta hoon। baaki main kisi mein bhi kabhi bhi pravesh kar apni service kar leta hoon। baba ne samjhaaya hai ki koi hanoomaan ki bhakti karte hain to unko woh saakshaatkaar karaata hoon। uski bhaavna ka bhaada deta hoon। agar hanoomaan ka saakshaatkaar karaaya to vo hi bhaav baith jaayega। unke pichhaadi latak padenge। baba ne yeh rath to bahut anubhvi liya hai। tha bhi yeh javaahraat ka vyaapaari। yeh bhi avinaashi gyaan ratnon ka vyaapaar hai। kalpa-kalpa is rath mein aaoon tab to kaarya karoon। brahma dvaara brahman rachenge na। jaise Christ dvaara Christian rache jaate hain। raashi milti hai na। to mujhe aana pade brahma ke rath mein। inke hi janmon ki kahaani baith samjhaata hoon। pahla janma to hai shreekrishna ka। unke hi bahut janmon ke ant ke janma mein aata hoon। yeh accurate bataata hoon। koi poochhe to bolo - pahle to brahma zaroor chaahiye tab to un dvaara brahman rachen। vyakta prajaapita brahma chaahiye। sookshm vatan mein to prajaapita hota nahin hai। prajaapita brahma yahaan chaahiye aur main aata bhi bhaarat mein hoon। jabki ghor andhiyaara hota hai। aadhaakalpa bhakti ka poora hota hai।

gaate bhi hain - he patit-paavan aao। agar pralay ho phir to duniya paavan ho na sake। pralay akshar wrong hain। jab bahut duhkhi patit hote hain tab main aata hoon। paavan duniya hai satayug-treta, dvaapar-kaliyug hai patit duniya। yahaan kitne karodon manushya hain, satayug mein to itne nahin chaahiye। dikhaate hain pet se moosal nikle, jisse apne hi kul ka naash kiya... yeh sab kahaaniyaan baith banaai hain। pet se koi cheez nahin nikli hai, yeh to buddhi ka kaam hai। science se bhi abhi dekho kitna sukh ho gaya hai। aage yeh gas bijli aadi kuchh nahin tha। baba to anubhvi hai। kehte bhi hain ki main vriddha tan mein aata hoon, shreekrishna ka to vriddha tan nahin hai। shreekrishna patit thode hi hai। kehte hain ki patit-paavan aao to patit duniya, patit shareer mein aana pade। patit duniya mein paavan shareer hota hi nahin। yahaan aatmaayen bhi tamopradhaan to shareer bhi tamopradhaan hain। golden ej, silver ej kaha jaata hai na। pahle hai golden ej। vahaan aatma aur shareer donon paavan hain। phir aatma patit ban jaati hai। unhon ko aakar viceless (paavan) banaata hoon। maaya aisi hai jo achhe-achhe first class ka bhi kaan pakad leti hai। braahmani se ya brahma se naaraaz hua, sanshay pada, yeh gaya। maaya munh pher deti hai। preet buddhi se vipreet buddhi ban padte hain। phir shivbaaba se padhna chhod dete hain। koi padhte hain parantu poori dhaarna nahin hoti to baba kehte hain harja nahin। sirf do baaten majboot kar lo। baba ko yaad karna hai। abhi tumhaari buddhi yahaan aur vahaan (ghar mein) rahni chaahiye। ek jinna ka misaal hai na। usne kaha ki kaam do nahin to kha jaaoonga। baba bhi kehte hain ki main yeh yaad karne ka kaam deta hoon। agar yaad nahin karenge to maaya kachcha kha jaayegi। yaad ke liye kuchh samay to nikaalna chaahiye na। pahle thoda samay phir bahut practice hoti jaayegi। baba kehte hain ki chup raho, sirf yaad karte raho। tum jaante ho ki baba oopar mein bhi hai, yahaan bhi hai। hamko baba ke paas jaana hai। abhi tumko samajh hai baba is shareer mein aaya hua hai। yaad nahin karenge to maaya kachcha kha jaayegi। kahaaniyaan to bahut bana di hain।

aage besmajh the abhi baba samjhaate hain ki main chala jaata hoon phir tum vishwa ke maalik bante ho। tumhaari aatmaon se baat karte hain। aatma hi imtahaan paas karti hai - shareer ke dvaara। abhi baap kehte hain ki dehi-abhimaani bano। grihastha vyavhaar mein rehte apne ko ashareeri aatma samjho। jitna baap ko yaad karenge utna faayda hai। isi ka naam yog rakh diya hai। nahin to yeh hai yaad, aatmaon ki baap se preet। yaad karte hain। aashik-maashook ka bhi ek-do ke shareer se pyaar hota hai। aashik-maashook donon hi dehdhaari hote hain। aashik ke saamne jaise ki maashook khada hai। maashook ko phir aashik dikhaai padega। abhi tum aashik ho parampita paramatma ke। ek hai maashook, baaki sab aatmaayen hain aashik। woh niraakaar baap tumko is saakaar dvaara baith mat dete hain। tum to na aatma ko, na paramatma ko dekh sakte ho। kabhi-kabhi koi ko aatma ka saakshaatkaar hota hai। manushya to kuchh samajh nahin sakte। baba light ka saakshaatkaar kara dete hain kyonki bhaavna baithi hui hai। kehte hain na bahut light tejomay hai, bas karo, ham sahan nahin kar sakte hain। laal-laal aankhe ho jaati hain। baba samjhaate hain ki main to star hoon। jaise jugnu hota hai na firefly। jaise unki light chamakti hai vaise star muaaphik aatma nikal jaati hai। (vivekaanand ka misaal) to jaise jiski bhaavna baithi hui hogi use vaisa hi saakshaatkaar ho jaayega। baba baith samjhaate hain ki yeh tumhaari bhaavna chali aati hai। to main usi roop mein saakshaatkaar karaata hoon। jaisi aatma hai vaisa paramatma। parantu woh gyaan ka saagar hai। aatma bhi chaitanya hai। sab sanskaar aatma mein hain। baap mein bhi sanskaar hain - sthaapna, vinaash, paalna ke kartavya karne ke। trimoorti hain na। shivbaaba ko bhi koi jaante nahin। to trimoorti ke oopar shiv rachta ko bhool gaye hain। vaastav mein geeta ka bhagwan hai trimoorti shiv parantu woh phir kah dete hain trimoorti brahma। are, brahma-vishnu-shankar ka bhi koi rachta hoga na? brahma ka naam alag, shivbaaba ka naam alag hai। nahin to kisko kehte ho ki woh rachta hai। kiski bhi samajh mein nahin aata hai।

baap aakar bachchon ko samjhaate hain। tumhaari hai preet buddhi। koi ki vipreet buddhi ho jaati hai to jaise kaurav ban jaate hain। bhal yahaan aate hain parantu pad kam ho jaata hai। jo kuchh jama hua vo na ho jaata hai। phir praja mein jaakar kam pad paayenge। is samay dekho - padhaai se kya-kya ban sakte hain। baba kehte hain ki - bachche, devta banna hai to is kharaab cheez ko (vish ko) chhodna hai। ek baap hi sachcha satguru hai jo mukti-jeevanmukti mein le jaane vaala hai। jaana to sabko ek hi samay hai। aise nahin koi beech se chala jaayega। har ek ko apna-apna poora part bajaana hai। zaroor phir ant mein machchharon sadrishya vaapis jaana hai। geeta mein bhi likha hua hai, parantu shreekrishna bhagvaanuvaach likhne se geeta ka mahatva hi chat ho gaya hai। baap na aaye to muktidhaam kaise jaayen? phir apne samay par aakar apna part bajaate hain। yeh hua vistaar se samjhaana। nutshell mein kehte hain ki mujhe yaad karo। bas, god is one। baaki sab hain bachche। abhi tum trikaaldarshi bane ho। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) sada khush raazi rahne ke liye kadam-kadam par baap se raay leni hai। shivbaaba ko brahma ke through yaad karna hai। apna samaachaar dete rehna hai।

2) kabhi bhi kisi baat mein sanshay nahin uthaana hai। braahmani se ya brahma baap se roothkar padhaai nahin chhodni hai। sada preet buddhi rehna hai।

vardaan:- sukh swaroop ban saare vishwa mein sukh ki kirnen phailaane vaale master gyaan soorya bhav

jaise baap gyaan ka saagar, sukh ka saagar hai vaise svayan bhi gyaan swaroop, sukh swaroop bano, har gun ka sirf varnan nahin lekin anubhav ho। jab sukh swaroop ke anubhvi banenge to aap sukh swaroop aatma dvaara sukh ki kirnen vishwa mein phailengi। jaise soorya ki kirnen saare vishwa mein jaati hain vaise aapke gyaan, sukh, aanand ki kirnen jab sarva aatmaon tak pahunchengi tab kahenge master gyaan soorya।

slogan:- divya janmadhaari brahman woh hai jo apne bol, sankalp aur karma se divyata ka anubhav karaaye।