सोमवार 7 अगस्त 2023 की दैनिक मुरली

07-08-2023 praatahmurli om shanti "baapdaada"' madhuban

“meethe bachche - yaad ki lambi seedhi par tab chadh sakenge jab ki baap se sachchi preet hogi, yaad ki daudi se hi vijay maala mein aayenge''

prashn:- ek baap se sachchi preet hai to uski nishaani kya dikhaai degi?

uttar:- agar sachchi preet ek baap se hai to puraani duniya, puraane shareer se pyaar khatma ho jaayega। jeete ji mar jaana hi preet ki nishaani hai। baap ke sivaae kisi se bhi pyaar na ho। buddhi mein rahe ab ghar jaana hai, yeh hamaara antim janma hai। baba kehte - bachche, tumne 84 janmon ka khel poora kiya, ab sab kuchh bhool mujhe yaad karo to main tumhein saath le jaaoonga।

geet:- banvaari re…

om shanti। meethe-meethe sikeeldhe bachchon ne yeh geet suna ki yeh hai jhoothi duniya। jhooth khanda bhaarat ke liye kaha jaata hai। har ek ko apne-apne birth place ka khyaal rehta hai। abhi bachche kehte hain hamaara is jhooth khanda se koi tailuk nahin kyonki ismen to bahut duhkh hain। abhi to sukh ka naam nishaan nahin hai। jhooth khanda ki aayu ab bahut thodi rahi hai। yeh antim janma hai isko jhooth khanda mrityulok kaha jaata hai। woh hai amarlok। mrityulok mein kaal kha jaata hai। phir punarjanma jhoothi duniya mein hi lete hain। bachche jaante hain ki ab hamne 84 janma poore kiye, ab hamaara is duniya se koi vaasta nahin। baba aaye hain lene liye to is puraani duniya se hamaara koi tailuk nahin। tumhaari baap se preet juti hai to varsa bhi tumko milta hai। baaki yaadav kaurvon ki hai vipreet buddhi arthaat baap ko jaante hi nahin। abhi tum bachchon ki ek baap ke saath hi preet buddhi hai। baap kehte hain ki grihastha vyavhaar mein bhal raho, baap ko yaad karo। abhi sab actors ka part poora hota hai। sabke shareer chhootne hain। sabko vaapis ghar le jaana hai। manushya marna nahin chaahte hain। tum to jeete ji mar chuke ho। is duniya mein koi se pyaar nahin। is shareer se bhi pyaar nahin। aatma ko roshni mili hai, ham baap ke bachche hain hamaare 84 janma ab poore hue। ab khel poora hua। ham so devta the phir kshatriy, vaishya, shoodra banen। ab ham phir brahman bane hain yeh chakra poora yaad rakhna hai। aatma kehti hai ki barobar punarjanma lete-lete abhi yeh antim janma hai। baap aaya hai lene liye। anek baar hamne 84 janmon ka chakra lagaaya hai। svadarshan chakradhaari bane ho na। samjhaaya jaata hai ki aise hamne 84 janmon ka chakra lagaaya hai। sabhi bhaaratvaasiyon ke poore 84 janma nahin kahenge। jo brahman bante hain vahi samajhte hain। 5 hajaar varsha pahle bhi samjhaaya tha - he bachche, tum apne janmon ko nahin jaante ho। 84 laakh janmon ka to koi varnan bhi na kar sake।

abhi tumko sabhi dharmo ke chakra ka bhi pata pad gaya hai। hisaab-kitaab mein jo hoshiyaar honge woh jhat samajh jaayenge। barobar phalaane dharma ko itne janma lene chaahiye। tumko bhi poora nishchay hai ki hamne 84 janma poore kiye, ab baap vaapis lene liye aaye hain jiske liye hi yeh mahaabhaari ladaai hai। un sabki hai vinaash kaale vipreet buddhi। vinaashkaal hai hi kaliyug ke ant aur satayug aadi ke sangam par। satayug aur treta ke sangam ko vinaashkaal nahin kahenge। vahaan to vriddhi ko paate rehte hain। abhi sabka vinaash hona hai isko vinaash kaal kaha jaata hai। abhi tumhaara antim janma hai। iske pahle baap aaye to kah na sake ki tumhaara yeh antim janma hai। jab khel poora hota hai tab hi main aata hoon। tum jaante ho barobar ham aatmaayen 84 janma leti hain। gaaya bhi jaata hai ki kumaari woh jo 21 kul ka uddhaar kare। ab woh to samajhte nahin ki 21 kul kisko kaha jaata hai। bhaarat mein kumaariyon ki bahut maanyata hai, poojte hain। jagdamba bhi kumaari hai na। kumaari ko phir jagdamba kehna iska bhi arth chaahiye na। jagat amba hai to jagat pita bhi chaahiye na। jagat pita ke saath maata bhi chaahiye। aise to bahut maataayen hain jinko jagat maata bhi kehte hain। akhbaar mein bhi pada tha - koi maata ko jagat maata likha tha। ab jagat maana saari srishti। to jagat ki maa ek hogi ya 10-20 hongi। rachta baap ek hai to maata bhi ek chaahiye na। itni maataayen sab jagat ke maalik hain। jagat ki maata to ek hai na jagat amba। to abhi tum bachchon ki preet hai ek shivbaaba se। tumhaare mein bhi nambarvaar purushaartha anusaar hain jinki poori preet hai। sajni ki ek saajan se, bachchon ki ek baap se preet honi chaahiye। aur sabse preet todni pade। nashtomoha banna hai। puraani duniya se moh nashta। jaise puraana ghar hota hai to baap naya banaate hain। jab naya ban jaata hai to usmein baith puraane ko khalaas kar dete hain। baap kehte hain main tumhaare liye svarga nai duniya rachta hoon। nai duniya mein nai dehli hai। yahi jamuna ka kantha hai jahaan tum raajya karte ho। tum jaante ho bhakti ka bahut bada vistaar hai। gyaan to bilkul thoda hai - ek second ka। beej ko jaanne se saara jhaad aa jaata hai। bhinna-bhinna variety dharmo ka jhaad hai, usmein mukhya foundation hai devi-devta dharma। aadhaakalpa mein sivaae ek dharma ke aur koi dharma hai nahin। baaki aadhaakalpa mein dekho kitne dharmon ki sthaapna hoti hai! kaha jaata hai ki parampita paramatma brahma mukh dvaara devta dharma aur kshatriy dharma ki sthaapna karte hain। so to dekhte ho brahman to tum ho hi। tumhaare mein bhi koi sooryavanshi, koi chandravanshi banne vaale hain। oonch te oonch hai brahman dharma। bhaaratvaasi apne dharma ko hi nahin jaante hain। kaha jaata hai ki religion is might। abhi baap dharma sthaapan karte hain to tum baap se kitni taakat lete ho baap ka banne se। goya sarvashaktimaan baap hi bachchon ko yog se shaktivaan banaate hain। baap hai kitna gupta! unko apna shareer hai nahin। sarvashaktimaan kaha jaata hai to zaroor shakti denge na। tumhaara naam hi hai shiv-shaktiyaan। shiv se shakti lene vaali ho। narka ko svarga banaati ho। yeh tumko bal milta hai। yogbal se tum raavan par jeet paati ho। to tumhaari ab sarvashaktimaan baap se preet hai nambarvaar purushaartha anusaar। bahut vipreet buddhi bhi hain kyonki yaad nahin karte hain। bahut preet unhon ki hai jo bahut yaad karte hain। thodi preet hai to samjho yaad nahin karte। kehte hain - kya karen...., ghadi-ghadi bhool jaate hain....। are, saajan ko tum yaad nahin kar sakte ho? baap, jisse svarga ka varsa milta hai, aise baap ko yaad nahin kar sakte ho? kaaran bataao? bachcha kahe baap ko yaad nahin kar sakta hoon! are, phir varsa kaise milega? jitna baap ko yaad karte ho utni shakti milti hai। aise nahin ki shivbaaba ko bhi yaad karo aur saath-saath kaala munh bhi karte raho phir raajya-bhaagya mil na sake। kehte hain - baba, ham bhool jaate hain, murjha jaate hain। baba kahe - are, tum eeshvar ki santaan bane ho, tumko to bahut nasha chadhna chaahiye। aise baap ko to nirantar yaad karna chaahiye। preet buddhi banna chaahiye। shivbaaba se preet nahin to brahma se bhi nahin hogi। woh aise hi sabse ladte-jhagadte rahenge। yog hi nahin to varsa kaise le sakte? godly bulbul nahin ban sakte। bulbul banna chaahiye na। baba ke paas godly bulbul hain, mainaayen bhi hain, tote bhi hain, koi kaabar bhi hain। sabse ladte-jhagadte hain। koi phir pigeon (kabootar) bhi hain। woh aavaaj nahin kar sakte hain। bageeche mein bhinna-bhinna prakaar ke phool hote hain। harek apne se poochhe ki main kaun-sa phool hoon? gulaab ka hoon va ruhe gulaab hoon? main mama-baba jaisi service karta hoon? kya ham shri naaraayan ko va shri lakshmi ko var sakta hoon? aisa apne se poochhna hai ki main kitna baap ko yaad karta hoon? kitni seva karta hoon? baap se to zaroor varsa milna hai। niraakaar parampita paramatma bhaarat mein aaye hain, zaroor bhaarat ko svarga banaaya hoga। zaroor shivbaaba aaye tab to satayug banaayenge na। shiv ki jayanti manaate hain। shiv ka bhi birth place hai, to shreekrishna ka bhi birth place hai। krishna ki jayanti to bade dhoomdhaam se manaate hain। abhi to shiv jayanti ki chhuttiyaan bhi nahin karte। andher nagri hai na। yahaan par hai hi praja ka praja par raajya। hona chaahiye raaja-raani ka raajya। woh to drama anusaar hai hi nahin।

tum jaante ho ki bhaarat pavitra raajasthaan ho jaayega, to unhon ko bhi jagaana hai। phir se daivi raajasthaan sthaapan hota hai। abhi aasuri raajasthaan ho gaya hai। pahle bhaaratvaasi pavitra the, abhi to apvitra bane hain tab to log unhon ki pooja karte hain। abhi to no raajasthaan। tum chitthi likh sakte ho athva akhbaar mein bhi daal sakte ho ki bhaarat 5 hajaar varsha pahle daivi raajasthaan tha, abhi nahin hai। tum ho eeshvareey behen-bhaai। tum ho bahut thode। gaaya bhi jaata hai - raam gayo, raavan gayo.......। samajhna chaahiye ki ham baaki bahut thoda samay hain। baap se varsa to lete rahen। saath-saath bhavishya ka bhi khyaal karo। yeh bhi dhandha karo, shareer nirvaah bhi karna hai। yeh hai bhavishya ke liye। ismen mehnat kuchh nahin, bilkul sahaj hai। second mein jeevanmukti 21 janma ke liye milti hai। baap ko aur chakra ko yaad karna hai। baap ko yaad karne se hi paavan banenge। patit koi ja na sake। bahut sajaayen khaani padengi। to vinaashkaal abhi hai। yaadav aur kaurav ki hai vipreet buddhi। paandavon ki preet buddhi thi, jinki hi vijay hui। abhi vahi samay hai। baap samjhaate hain - sirf yeh yaad karo ki ab vaapis jaana hai। baaki thoda samay hai, naatak poora hota hai। grihastha vyavhaar mein rehte sirf baba ko yaad karna hai। yaad ki hi lambi seedhi hai। rudra maala banni hai phir inaam milega। raajya bhaagya paana hai, uske liye vichaar saagar manthan karna hai। yeh hai buddhiyog ki yaatra। baap ke paas daudna hai। dekhna hai ki saare din mein baap ko kitna yaad kiya? kitne ko kaanton se phool banaaya। praja nahin banaayenge to kis par raajya karenge isliye pahle 8 mukhya bante hain, phir 108, phir 16108 ho jaate hain। vivek bhi kehta hai - yeh to zaroor hai, vriddhi to hoti rahegi। raajdhaani vriddhi ko paati rahegi। abhi bhi dher laakhon aayenge। buddhi mein yeh pakka yaad rakho - abhi hamko ghar jaana hai। is puraani duniya mein duhkh bahut hain। bas, ek baap ko yaad karte raho। badi lambi yaatra hai। pichhaadi mein aane vaale itna oonch pad pa na saken। kitni mehnat karni padti hai! karmabhog kitna chalta hai! phir pichhaadi mein aane vaale itni mehnat kaise kar sakte hain, jo vikarma vinaash ho jaaen? janak bhi treta mein chala gaya। sooryavanshi raaja ban na saka। raaja tha, surrender bhi hua, parantu toolate aaya to chandravanshi mein chala gaya। in baaton ko brahman hi samajh sakte hain, shoodra samajh na saken। haan, kaeeyon ko purity achhi lagti hai parantu purity mein rahkar bhi dikhaayen na? sannyaasiyon ke followers kahlaate hain, khud to pavitra bante nahin to followers kaise hue? yeh bhi jhooth hua na। koi bhi satsang mein em object hoti nahin। kitne dher satsang hain। yeh to baap hi aakar manushya se devta banaate hain। vishwa ka maalik tum bante ho ek shivbaaba ki yaad se। baap ko yaad hi nahin karenge to varsa kaise milega? yeh to tumhaara kaam hai - purushaartha kar nirantar yaad karna। nirantar yaad rahe, woh avastha ant mein hogi। abhi nahin hai। pichhaadi mein 8 hi win karte hain, yaad karte-karte sabse pahle jaate hain। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) vinaash kaal ka samay hai isliye dehdhaariyon se preet tod ek baap se sachchi preet rakhni hai। is puraane ghar se moh nashta kar dena hai।

2) gyaan ki bulbul ban aap samaan kaanton ko phool banaane ki seva karni hai। yaad ki daud lagaani hai।

vardaan:- sarva yogyataaon dvaara svayan ko valuable banaane vaale bephikar baadshaah bhav

baap svayan bachchon ko offer karte hain - bachche yogya right hand bano, yogya sevaadhaari bano। jo yogya hota hai woh bephikar baadshaah hota hai। chaahe sthool yogyata, chaahe gyaan ki yogyata manushya ko valuable banaati hai। yogyata nahin to value nahin rehti। roohaani seva ki yogyata sabse badi hai। aisi yogya aatma ko koi bhi baat rok nahin sakti। yogya banna maana mera to ek baba, bas aur koi baat buddhi mein na ho।

slogan:- ekras sthiti ka anubhav karna hai to ek baap dvaara sarva rason ki anubhooti karo।