बुधवार 9 अगस्त 2023 की दैनिक मुरली

09-08-2023 praatahmurli om shanti "baapdaada"' madhuban

“meethe bachche - gyaan ki dhaarna tab hogi jab dehi-abhimaani banenge, dehi-abhimaani banne vaale bachchon ko hi baap ki yaad rahegi।''

prashn:- kis ek bhool ke kaaran manushyon ne aatma ko nirlep kah diya hai?

uttar:- manushyon ne aatma so paramatma kaha, isi bhool ke kaaran aatma ko nirlep maan liya lekin nirlep to ek shivbaaba hai, jise duhkh-sukh, meethe-kaduve ka anubhav nahin। aatma to kehti hai phalaani cheez khatti hai। baap kehte hain mere par kisi bhi cheez ka asar nahin hota hai, main in lep-chhep se nirlep hoon, gyaan ka saagar hoon, vahi gyaan tumhein sunaata hoon।

geet:- takdeer jagaakar aai hoon…

om shanti। yeh kisne kaha? aatmaon ne kaha in organs dvaara। aatma shant swaroop hai। mujh aatma ko yeh shareer milta hai, tab talkie banti hoon। shareer dvaara anek prakaar ka karma karti hoon। pahle-pahle yeh nishchay karna hai। aur satsang mein manushya, manushya ko sunaate hain, dehdhaari bolte hain। kahenge phalaana mahaatma baitha hai। yahaan yeh baaten nahin hain। tum samajhte ho ham to aatma hain, yeh shareer roopi organs hain। aatma parampita paramatma dvaara sun rahi hai, jiska ek hi naam hai shiv। is samay bachche baithe hain sunne liye। kaun sunaate hain? behad ka baap। jab parampita paramatma kaha jaata hai to buddhiyog oopar chala jaata hai। shiv maana bindi। aatma bhi bindi hai, paramatma bhi bindi hai। parantu unko parampita paramatma kaha jaata hai। woh baap hua aur aatmaayen bachche thahre। samajhna hai ki ham aatma is shareer dvaara apne paarlaukik baap ki santaan bani hoon। tum bachchon ko dehi-abhimaani banna pade। aur sab jagah manushya, manushya ko samjhaate hain। koi geeta paathi hote hain woh bhi geeta ko yaad kar kahenge geeta mein bhagwan ne aise-aise kaha hai। samajhte hain bhagwan ne saakaar mein yeh geeta sunaai thi। koi baith ved-shaastra sunaate hain। ved to manushyon ne rache hain। niraakaar bhagwan ved nahin banaayenge। vyaas to manushya tha। vyaas ko paramatma nahin kahenge। parampita paramatma to bindi hai। bachche saakaar mein hain, saakaari roop hai। baap to hai niraakaar।

baap kehte hain mujhe to kabhi chhota-bada nahin banna hai। tum chhote-bade hote ho। mujhe to kehte hi hain parampita। manushya pahle baalak ban phir bade ho baap bante hain, phir baalak bante hain। main to hamesha pita hi hoon, main baalak nahin banta hoon। mera ek hi naam shiv hai। tumhaare 84 naam padte hain kyonki 84 janma lete ho। main parampita to bindi roop hoon। sirf pooja ke liye bhakti maarga vaalon ne bada roop banaakar rakha hai। jaise koi ka bada chitra banaate hain na। buddha ka bahut bada chitra banaate hain। itna lamba manushya to hota nahin। yeh maan dete hain। samajhte hain bahut bada tha। baap to oonche te oonch hai, bade te bada parampita param aatma। baap apna parichay baith dete hain - mere ko shiv kehte hain। bachchon ko samjhaaya jaata hai - tumko samajhna hai ham niraakaar shivbaaba ke sammukh jaate hain। mujhe to hamesha parampita paramatma hi kahenge। manushya srishti ka beejroop hoon। param aatma baith samjhaate hain। aatma ko hi knowledge hai। gaate bhi hain parampita param aatma (paramatma), woh gyaan ka saagar hai। hamko gyaan suna rahe hain। pahle-pahle aatma-abhimaani hona chaahiye। deh-abhimaani nahin banna hai। parantu drama anusaar tumko deh-abhimaani banna hi hai। ab phir baap dehi-abhimaani banaate hain।

tum sab bachche ho। yeh bhi bachcha hai। aatma parampita paramatma daade se varsa leti hai। laukik sambandh mein sirf bachchon ko hi varsa milta hai, kanya ko nahin milta hai। behad ka baap kehte hain tum sab aatmaayen ho, tum har ek ko hak hai। tum mujh parampita paramatma ke the aur ho। kehte hain na O god father, O parampita paramatma। mahima karte hain। kaun karte hain? aatma। woh laukik father to shareer ka hai, yeh hai aatmaon ka baap। aatma bulaati hai O parampita paramatma। avinaashi baap ko yaad karte hi aaye hain kyonki raavan raajya mein duhkh hi duhkh hai। jab se raavan raajya shuru hota hai tab se yaad karna shuru hota hai। yaad to baap ko hi karna hai kyonki varsa baap se hi milta hai। yahaan to manushyon ko bahuton ki yaad rehti hai। guru log ek ki yaad bhula dete hain। agar sarvavyaapi hai to phir god va father kisko kahen? baap ghadi-ghadi kehte hain - bachche, dehi-abhimaani bano, uthte-baithte mujh baap ko yaad karo। samjho, ham shreemat par chal rahe hain। main aatma kha rahi hoon baba ki yaad mein। yaad se vikarma vinaash honge। manzil hai badi bhaari। yog koi maasi ka ghar nahin hai। manushyon ne to baap ka naam hi praayahlop kar diya hai। shreekrishna to bachcha thahra। itni badi praalabdha zaroor baap ne hi di hai।

baap samjhaate hain - deh sahit deh ke sab dharma bhool jaao। yeh naam to sab baad mein rakhe gaye hain। to yeh samajhna hai ki parampita paramatma dvaara ham yeh knowledge padh rahe hain। aur koi aise school nahin hain jahaan samjhen ki ham aatma hain। tum jaante ho pahle satopradhaan the phir sato, rajo, tamo mein aate hain। khaad aatma mein padti hai। mere mein to kabhi khaad nahin padti। main ever sachcha sona hoon। tumhaari aatmaayen sab is samay iron aged ban gai hain। mama bhi kahegi - hamne shivbaaba se jo suna hai, vahi sunaate hain। shivbaaba to khud gyaan ka saagar hai। yeh badi samajh ki baaten hain। barobar ham baba ke bane hain, woh humein padhaate hain। baba se padhkar ham jeevanmukta bante hain। jeevanmukta maana is shareer mein to aana hai, parantu sukh bhogna hai। mukti sabko milti hai parantu jeevanmukti mein to nambarvaar aate hain। mukta to sab aatmaayen hoti hain। duhkh se aadhaakalpa ke liye mukta kar dete hain। kehte hain tumko liberate kar jeevanmukta banaata hoon। phir koi kitne janma lete, koi kitne janma lete hain। jeevanmukta to sab bante hain। sadgati daata hai hi ek। jo bhi dharma sthaapak hain, sab punarjanma lete-lete ab tamopradhaan bane hain। main aakar sabko in duhkhon se chhudaata hoon isliye mujhe liberator kehte hain, mukti-jeevanmukti daata kehte hain। mukti arthaat apne ghar silence dhaam mein jaana। baap bhi paramdham se aate hain, jisko parlok kaha jaata hai। tum nirvaandhaam aur svargadhaam donon ko yaad karte ho। svarga aur narka yahaan hi hota hai। is samay sab samajhte hain - yeh narka hai। kitna duhkh paate rehte hain। garood puraan mein to bahut rochak baaten likh di hain jisse manushyon ko dar ho aur paap karne se bach jaayen isliye aisi-aisi baaten baith banaai hain। dvaapar se yeh shaastra banaana shuru karte hain। baap kehte hain main aakar brahma dvaara brahman dharma rachta hoon। woh phir sooryavanshi-chandravanshi bante hain। do yug mein koi dharma sthaapan karne vaala nahin aata hai, phir ek-do ke peechhe sab nambarvaar aate hain aur apne-apne dharma ko jaante hain। yeh devi-devta dharma praayahlop ho jaayega phir apne ko devta kahla nahin sakenge। patit kaise shri shri athva shreshtha kahlaayenge? baap hi shreshtha banaate hain। devi-devtaaon ko shreshtha kaha jaata hai। unke chitra bhi hain parantu samajhte nahin ki devi-devta dharma kab tha, kisne sthaapan kiya? satayug ki aayu hi lambi kar di hai।

ab baba kehte hain - bachche, apne ko aatma samjho, baap ko yaad karo। ab khel poora hota hai। dekhte nahin ho ab mukti-jeevanmukti ke gates khul rahe hain? mukti-jeevanmukti daata to ek hi hai। yahaan to dekho jagat maata ka title bhi koi-koi ko dete rehte hain। vaastav mein jagat amba yeh hai na। aise koi bhi nahin hoga jo jagat pita bhi ho, shikshak bhi ho, jagat guru bhi ho। bhal manushya apne par naam bahut rakhaate hain, parantu hain nahin। kahaan woh lakshmi-naaraayan, kahaan yeh vikaari bhi apne oopar title rakh dete hain। manushya kitne buddhu ban gaye hain! aadi sanaatan devi-devta dharma ko bhool unhon ke title phir apne ko de dete hain। vaastav mein oonch te oonch martaba to ek ka hi hai, sadgati daata ek hi hai। raam kaho to bhi woh ek hi niraakaar thahra।

baap kehte hain bhaaratvaasiyon ko apne dharma ka pata nahin - kab aur kisne sthaapan kiya? koi kis devi ko yaad karte, koi shreekrishna ko, koi guru ko yaad karte। guru ka photo bhi laga dete hain। tumhaara chitra se kaam nahin। jiska koi chitra nahin, woh hai vichitra। aatma vichitra hai। jaise baap vichitra hai vaise bachche bhi vichitra hain। aatma hi sunti hai। baba ne yeh tan loan liya hai। kehte hain prakriti ke aadhaar bigar main gyaan kaise doon? raajayog kaise sikhlaaoon? bhagwan niraakaar ko hi kaha jaata hai। unko aana hi hai patit duniya mein। shreekrishna ko dikhaate hain ki peepal ke patte par saagar mein aaya, aisi koi baat nahin hai। shreekrishna to first prince hai vishwa ka। vahaan aur koi dharma nahin। advet raajya hai, phir dvet ho jaati hai, phir anek prakaar ke dharma sthaapan hote jaate hain। to bachchon ko yeh samajhna hai ki baba is shareer mein aakar hamko padhaate hain। baba kehte hain main ashareeri hoon, is shareer dvaara tumko gyaan deta hoon। main hoon gyaan ka saagar। yeh sab baaten baap baith samjhaate hain। sirf eeshvar va paramatma kahne se baap ka sambandh bhool jaata hai। paramatma baap hai, unse varsa milta hai - yeh bhool jaate hain। woh hamaara baap hai, creator hai, ham unki rachna hain। usne create kiya hai। koi to rachta hoga na। baba ne samjhaaya hai - purush had ka brahma hai। bachchon ko create karte hain। pahle stri ko adopt karte hain phir unke dvaara bachche create karte hain। baba bhi kehte hain main in dvaara create karta hoon। stri to zaroor chaahiye na। baba ko kehte hi hain tum maat-pita, to yeh (brahma) maata ho gai, in dvaara adopt karte hain। to tumko brahma mukh vanshaavli kahenge। tum baap ke bane ho in dvaara। yeh badi wonderful baaten hain। shaastron mein yeh nahin hai। mujhe kehte hain knowledgeful, jaaneejaananhaar। manushya samajhte hain paramatma sabke andar ki baaten jaante hain, thought reader hain। lekin itne sabka thought reader kaise banega? baap kehte hain main manushya srishti ka beejroop hoon। main chaitanya hoon, sat hoon। aatma bhi chaitanya hai। shareer asat hai, ghadi-ghadi badalta rehta hai। aatma to nahin marti। aatma yeh knowledge grahan karti hai।

baap samjhaate hain main parampita paramatma nirlep hoon arthaat duhkh-sukh ka athva kaduvi-meethi cheez ka mujhe koi asar nahin hota hai। main in lep-chhep se nirlep hoon। gyaan ka saagar hoon। manushya phir kehte hain ki aatma nirlep hai kyonki aatma so paramatma ek hai। ek ne kaha - bas, uske peechhe follow karte rehte। baap kehte hain main nirlep hoon। mujhe koi khatta khaara nahin lagta। yeh inki aatma kehti hai - phalaani cheez khatti hai। mere mein saare srishti ka gyaan hai jo aatmaon ko padhaata hoon। tum har ek ko samajhna hai - ham aatma parampita paramatma dvaara sun rahe hain। yahaan to barobar bhagvaanuvaach hai। nishchay karna chaahiye - god creator is one।

pahle-pahle mukhya baat hai bhaarat ki। bhaarat ko avinaashi khanda kaha jaata hai। yeh bhaarat hai birth place patit-paavan baap ka। yeh bahut oonch khanda hai। yahaan lakshmi-naaraayan ki raajdhaani hogi। yeh tum jaante ho ki baap phir se devi-devta dharma ki sapling laga rahe hain। jo is dharma ke honge vahi aakar varsa lenge, isko sapling kaha jaata hai। baba ne samjhaaya - dehi-abhimaani banna hai। baba hamko padha rahe hain। ham in kaanon se sunte hain, padhte hain, padhaate hain। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) chitra ko bhool vichitra ban vichitra baap ko yaad karna hai। deh sahit deh ke sab dharmon ko buddhi se bhoolna hai, dehi-abhimaani ho rahne ka abhyaas karna hai।

2) devi-devta dharma ka sapling lag raha hai, isliye paavan zaroor banna hai। daiveegun dhaaran karne hain।

vardaan:- alaukik jeevan ki smriti dvaara vritti, smriti aur drishti ka parivartan karne vaale marjeeva bhav

brahman jeevan ko alaukik jeevan kehte hain, alaukik ka arth hai is lok jaise nahin। drishti, smriti aur vritti sabmen parivartan ho। sada aatma bhaai-bhaai ki vritti va bhaai-behen ki vritti rahe। ham sab aapas mein ek parivaar ke hain - yeh vritti rahe aur drishti se bhi aatma ko dekho, shareer ko nahin - tab kahenge marjeeva। aisi shreshtha jeevan mil gai to puraani jeevan yaad aa nahin sakti।

slogan:- sada shuddh feeling mein raho to ashuddha feeling ka flu paas bhi nahin aa sakta।