सोमवार 28 अगस्त 2023 की दैनिक मुरली

28-08-2023 praatahmurli om shanti "baapdaada"' madhuban

meethe bachche - nishchaybuddhi vijayanti, nishchay ke aadhaar par hi svarga ki raajaai ke laayak ban sakte, pahla nishchay chaahiye ki bhagwan teacher bankar humein padha rahe hain।

prashn:- baap sarvashaktimaan hote bhi sab kaarya prerna se kyon nahin karte?

uttar:- baba kehte - main gyaan ka saagar hoon, mujhe gyaan sunaane ke liye aana hi padega। professor agar ghar mein baith jaae to padha kaise sakega? mujhe to tum bachchon ko padhaakar laayak banaana hai, svarga ka varsa dena hai isliye main shareer ka aadhaar lekar aata hoon। ismen bachchon ko jara bhi sanshay nahin aana chaahiye।

geet:- jo piya ke saath hai…

om shanti। baap ko piya kaha jaata hai। baap paani ki barsaat to nahin barsaayenge। yeh to samajhne ki baat hai। jab koi baat nahin samajhte hain to kaha jaata hai tum to jaise pattharbuddhi ho। ab paarasnaath to naameegraami hai। paarasnaath paaras banaate hain। patthar kaun banaate hain? pattharnaath banaane vaala raavan ko kaha jaata hai। tum ho raam sampradaay, tum nambarvaar pattharbuddhi se paarasnaath bante jaate ho। yatha raaja-raani tatha praja paarasbuddhi kaise banen? zaroor koi banaane vaala hai, jisne paarasbuddhi to banaaya parantu ismen koi sooryavanshi gharaane mein, koi chandravanshi gharaane mein, koi daas-daasi banenge, koi phir praja mein saahookaar banenge। hai saara purushaartha par। zaroor parampita paramatma ko hi paarasnaath kahenge। koi manushya ko gyaan saagar nahin kahenge। niraakaar baap ki hi mahima hai। gyaan saagar hai to gyaan sunaane ke liye unko shareer zaroor chaahiye। jo sanskaar le jaate hain us anusaar karma karne liye shareer to chaahiye na। woh to hai niraakaar parampita paramatma। unki badi bhaari mahima hai। sabka baap ek niraakaar parantu woh bhi to aatma hai na। aatma hi organs dvaara kehti hai yeh mere bachche hain।

baap ne samjhaaya hai manushya braahmanon ko khilaate hain, unmein aatma ko bulaate hain phir unse poochhte hain। achha, na bhi poochhen, brahman to khilaate hain na। samjho kiska pati mar jaata hai to kehte hain main pati ka shraaddha khilaati hoon। achha, tumhaara pati to mar gaya phir kisko bulaayengi? aatma ko va shareer ko? samajh ki baat hai na। zaroor aatma ko bulaayengi na। shareer to khatma ho gaya। brahman ko khilaate hain, goya brahman mein pravesh kar aatma khaati hai। ab kya saboot hai jo mar gaya uski aatma aati hai? aati to zaroor hai। aatma aakar bolti hai, unse poochhte hain phalaani cheej kahaan rakhi hai to batlaati bhi hai। to zaroor samajhte hain ki ham pati ki aatma ko khilaati hoon, pati ki aatma ko maatha tekti hoon। brahman ko nahin dekhte। jaise ki pati ke naam-roop ko dekhkar maatha tekte hain। woh naam-roop to bhasma ho gaya to woh shareer bhi yaad aata hai। braahmanon mein aatma aati hai। doosre ki aatma aai hai, yeh mahsoos hota hai। ab aatma aai to zaroor vishvaas rakhna padta hai na। tum bachchon ko bhi samjhaaya jaata hai ki parampita paramatma hai niraakaar, unko apna shareer nahin hai to varsa kaise deven? to zaroor shareer ka aadhaar lena pade। pahle to barobar nishchay chaahiye ki parampita paramatma hai, woh in dvaara varsa dene aaya hai। prerna se to nahin denge। unko to aakar padhaana hai, gyaan saagar hai na। yeh samajhne ki baaten hain। jiski takdeer mein bhavishya oonch praalabdha nahin hai to woh samajh nahin sakenge। inki aatma kehti hai ki main gyaan saagar nahin hoon। woh parampita paramatma kehte hain main gyaan ka saagar hoon, parantu main niraakaar oopar se baith prerna se kaise padhaaoon? aise to kabhi padhaai hoti nahin। professor ghar baith jaae to prerna se padha sakenge kya? zaroor school mein aana pade na। parampita paramatma bhi ghar mein rahkar to nahin padhaayenge na। prerna se chitra thode hi samjhaaya jaata hai। yeh chitra bhi shivbaaba ne nikalvaaya hai। phir khud hi aakar samjhaate hain ki mainne hi nikalvaaye hain। yeh (brahma) to jaanta hi nahin tha। mainne bachchon ko divya drishti dekar banvaaye hain। karnakraavanhaar baap hai। pahle baap samjhaate hain ki main hoon tum aatmaon ka baap। nahin to tum bachchon ko varsa kaise mile? mandir bhi barobar hain। inki aatma ka mandir hai। baaki sab jeev aatmaon ke mandir hain kyonki jeev aatma janma-maran mein aati hai, paramatma nahin aata hai। to unka roop niraakaar hi rakha hai। to baap kehte hain main tumhein raajayog sikhlaata hoon। yeh baba bhi kehte - main bhi seekh raha hoon। ab ismen prerna va shakti ki to baat nahin hai। agar koi kahe ki shakti aati hai to varsa kaise milega? yeh baap to kehte hain main tumhein raajayog sikhlaata hoon। bhagvaanuvaach hai to zaroor shareer mein aana pade। aise nahin ki inmen shakti hai। yahaan to padhaai ki baat hai। main tumhaara baap hoon phir mujhe teacher bhi banna pade। sabko prerna kaise doon? phir to sabko ek jaisa padhaana pade। yeh to raajdhaani sthaapan ho rahi hai। koi ko daas-daasi banna pade, koi ko praja banna pade। koi bhi agar poochhna chaahte hain to baba se poochh sakte hain - ham kahaan tak laayak bane hain? sooryavanshi va chandravanshi va daas-daasi banenge? agar ham is samay shareer chhoden to kya pad paayenge? baba se aakar padhen to baba padhaai ke anusaar bata sakte hain। school mein bachche master ko kahenge ki master ji ham kitne marks se paas honge? master about bata dega ki tum poora padhte nahin ho isliye itne marks kaise milenge? khud bhi samjhenge ki barobar ham poora padhta nahin hoon। harek ki dil bolegi। behad ka baap bhi bata sakte hain koi ko to baba kehte hain tum bahut achha phool ho, vijay maala mein tum itne number mein aa sakte ho, is samay ke anusaar kyonki chalte-chalte gir bhi padte hain na। baba ke bahut bachche dekho aaj hain nahin kyonki shreemat par na chale aur kaam ke vash va deh-abhimaan ke vash ho gaye, koi lobh-moh ke vash ho gaye। maaya aisi hai jo chori bhi kara deti hai। yeh sab maaya karaati hai। kehte hain na ki kakh ka chor so lakh ka chor।

koi-koi mein buri aadten hoti hain, koi mein kaam ki aadat hoti to yeh bhaaga। woh yahaan thahar na sake। lobh vash chori bhi kar lete hain। maaya chori karaati hai, maaya ki praveshta hai na। pahle number deh-abhimaan ko chhodte nahin। baba kehte hain apne ko aatma nishchay karo। aatma immortal hai, shareer mortal hai। tum dehi-abhimaani bano। koi to do-teen maas mein dehi-abhimaani ban jaate hain, koi phir 25 varsha mein bhi nahin bante। ek hi course bahut bada hai jo 50-60 varsha chalta hai। padhaai ke course aur padhaane vaale teacher ko na jaana to padhega kya? is baba ko jaanne se to shivbaaba ko bhi jaanen, jiske saath buddhiyog lagaana hai। humein vishwa ka maalik banna hai so koi manushya to nahin banaayenge। jab tak nishchay nahin hua hai tab tak goya kuchh bhi nahin samjha hai। 20-25 varsha vaalon ko bhi poora nishchay nahin baitha hai। hilte rehte hain। abhi-abhi nishchay, abhi-abhi sanshay। baba samjhaate hain tum god father kehte ho to tum aatmaayen unke bachche thahre। woh tumhaara baap hai। sab likho ki haan, hamaara ek vahi god father hai। father se varsa milta hai svarga ki raajdhaani ka, to zaroor raajayog sikhaaya hoga na। baap hi sikhlaayenge। jab tak baap par poora nishchay nahin hai to samjho woh svarga ke laayak nahin hain। baap ko hi nahin jaante to varsa kaise paayenge? baap to aate hain varsa dene, parantu lete nahin kyonki bhaagya mein nahin hain। nishchaybuddhi vijayanti, sanshaybuddhi vinshanti। pahle-pahle baap ko to jaano। niraakaar baap parampita paramatma hai na। woh aakar padhaate hain। varsa unse milta hai। unko raajayog sikhlaana hai, ismen prerna ki to koi baat hi nahin। teacher ghar mein baith padhaaye - yeh to impossible hai। baba kehte hain ki main aata hoon, mera mandir bhi hai। niraakaar to kuchh kar na sake isliye shareer lena padta hai। nahin to mere mein jo srishti chakra ka gyaan hai woh main sikhlaaoon kaise? zaroor tan mein aana pade। bachche vriddhi ko paate rehte hain। ek-do ko lekar aate rehte hain। jo devi-devta dharma ka hoga uska hi sapling lagega। jo aakar brahman bante hain, unhon ka hi kalam lagta hai। braahmanon ka pita hai brahma। brahma ka baap hai shivbaaba। to roohaani baap aur jismaani baap bhi hai। tum shivbaaba ke roohaani bachche ho aur brahma ki aatma bhi shivbaaba ka bachcha hai। phir jismaani bhi braahmanon ka baap hai, jisse yeh brahmaakumaar-kumaariyaan nikle। tum brahma ke bachche shivbaaba ke potre ho। varsa unse milta hai। yeh bhi samajh ki baat hai। baba se koi bhi bachcha poochhe ki main kis pad ko paaoonga to baba bata denge।

koi naye-naye ko le aate hain, baat mat poochho। ek baar milne se hi teer lag jaata hai। kaise achhe-achhe patra likhte hain - baba phalaane ne aisi achhi baaten sunaai jo pakka nishchay ho gaya hai, ab aap aaye ho, aapse ham poora varsa lekar hi chhodenge। baba se kabhi mile bhi nahin hain to bhi aise-aise patra likhte hain to samjha jaata hai yeh sikeeldha bachcha hai। sapling achha hai, jhat samajh jaate hain। shreengar ka centre khula, vahaan ke naye-naye bachchon ne patra likha hai - bas, ab to milne liye attraction rehti hai। sirf yeh bandhan hai। kaaran bhi likh dete hain। jo devta dharma ke honge vahi aayenge। jo shreekrishna puri mein aane vaale honge vahi brahmaapuri mein aayenge। brahmapuri nahin। koi-koi brahmakumaari likhte hain। yeh to wrong hai। brahm to tatva hai। uski kumaari kaise hogi? prajaapita brahma to mashhoor hai। prajaapita to yahaan hi hoga na। prajaapita brahma ke bachche brahmaakumaar-kumaariyaan arthaat parampita paramatma shiv ki shaktiyaan। shakti milti hai shivbaaba se, inki (brahma ki) aatma se nahin। to yaad shivbaaba ko karna hai। isse hi ham patit se paavan honge। is samay to sabhi paap aatmaayen hain। sabhi ka janma vikaar se hota hai। yeh baaten koi jhat samajh jaate hain, koi to kuchh bhi samajhte nahin। yeh knowledge badi wonderful hai। bhagwan ko bhakti ka phal dene ke liye aana padta hai। bachchon ko padhaate hain, kehte hain main tumhaara baap bhi hoon, teacher bhi aur satguru bhi hoon। sabhi ko vaapis le jaane ke liye aaya hoon isliye liberator bhi kehte hain। so prerna se thode hi liberate karenge। school mein bhi vriddhi hoti hai। lekin puraani duniya ko yaad kiya to baap ko bhoole। aakhir bhoolte-bhoolte puraani duniya mein hi chale jaate hain। phir gyaan ka kuchh bhi nahin rehta hai। bas, sauda cancel। baap ko jo diya woh vaapis le lete hain। buddhi ka taala ekdam banda ho jaata hai। baap buddhivaanon ki buddhi hai na। kitna achhi reeti samjhaate hain। sunne vaalon ke nain-chain se hi maaloom pad jaata hai - inko kahaan tak dhaarna hoti hai? oonch pad pa sakenge va nahin? baba jhat samajh jaate hain ki yeh samajhne vaala hai ya nahin? ya buddhiyog kahaan bhatakta rehta hai? nabja dekhi jaati hai। nabja dekhne vaala bhi hoshiyaar chaahiye। manzil hai bahut bhaari। tum jhat samajh jaayenge - yeh uth sakega va nahin? nambarvaar to hain na।

bhal yeh brahma brahmaputra (badi nadi) hai, parantu apni mahima to nahin karenge। sarasvati bhi hoshiyaar hai। us padhaai mein to yahaan hi imtahaan ho jaata hai। is padhaai ka imtahaan abhi nahin hona hai। jab tak jiyenge tab tak gyaanaamrit piyenge। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) kisi bhi puraani aadat ke vasheebhoot ho ulta karma nahin karna hai। deh-abhimaan ki aadat ko chhod dehi-abhimaani rahne ka course poora karna hai।

2) nishchay mein kabhi bhi hilna nahin hai। jab tak jeena hai, padhaai padhni aur padhaani hai।

vardaan:- karaavanhaar ki smriti dvaara sada bephikra baadshaah banne vaale nishchaybuddhi nishchint bhav

brahman jeevan arthaat bephikra baadshaah। jaise brahma baap bephikra baadshaah bane to yahi geet gaate rahe - paana tha so pa liya, kaam kya baaki raha…seva ka kaam bhi jo baaki raha hua hai woh bhi karaavanhaar kara rahe hain aur karaate rahenge। sada smriti rahe baap karaavanhaar ban hamaare dvaara kara rahe hain to bephikra ho jaayenge। nishchay hai yeh kaarya hona hi hai, hua hi pada hai isliye nishchaybuddhi, nishchint, bephikar raho।

slogan:- apni sarva kamjoriyon se kinaara karna hai to behad ki vairaagya vritti ko dhaaran karo।