मंगलवार 26 सितंबर 2023 की दैनिक मुरली

26-09-2023 praatahmurli om shanti "baapdaada"' madhuban

“meethe bachche - gyaan ki ek boond hai apne ko aatma samjho aur baap ko yaad karo, isi ek boond se mukti-jeevanmukti praapta ho sakti hai''

prashn:- kis purushaartha mein apni aur doosron ki unnati samaai hui hai?

uttar:- 1- yaad mein rahne ka purushaartha karo, ismen hi apni aur doosron ki unnati samaai hui hai। tum bachche jab yaad mein baithte ho to jaise doosron ko shanti ka daan dete ho। 2- aapas mein deh-abhimaan ki jismaani baaten chhod roohaani baaten karo to unnati hoti rahegi। tumhein baap ka show karna hai। jitna show karenge sabko shanti aur sukh ka maarga bataayenge, utna izaapha (inaam) milega।

geet:- tu pyaar ka saagar hai…

om shanti। yeh bhakti maarga mein gaate aaye hain। mahima karte aaye hain। mahima hai parampita paramatma ki। jaise bhakti maarga mein anek prakaar ke gaayan hote hain, utsav manaate hain woh bhi gaayan hai। koi bhi manushya saadhu-santa aadi ka gaayan nahin ho sakta। gaate hain woh gyaan ka saagar hai। ek bhi boond mile to ham yahaan se chale jaayenge। kahaan jaayenge? mukti va jeevanmuktidhaam। mahima hoti rehti hai parantu unki mahima ko jaante nahin hain। tum jaante ho so bhi nambarvaar purushaartha anusaar। do baap ka raaz bhi samjhaaya gaya hai - ek hai laukik baap, unki yaad aane se usko deh-abhimaan kaha jaayega। aatma ko deh dene vaala baap yaad aata hai। aatma apne roohaani baap ko bhool jaati hai। yahi bhool hai। yoon to koi bhoole hue nahin hain parantu kah dete hain aatma hi paramatma hai, yahi bhool hai। yeh bhi kehte hain ki ham jeev aatma hain। meri aatma ko tang nahin karo। tang to aatma hoti hai na। aatma ko garbhajel mein saja milti hai to unko shareer mein duhkh bhaasta hai। saakshaatkaar bhi sthool roop ka karaayenge, tab woh feel karte hain, hamko duhkh mil raha hai। bachchon ko samjhaaya hai pahle-pahle practice karo ham aatma hain। deh-abhimaani banne se sambandh yaad aata hai - yeh chaacha hai, maama hai.....। shareer nahin hai to koi bhi sambandh nahin hai। aatma ka hi gyaan hai। koi ko mahaan paramatma thode hi kaha jaata hai। koi mar jaata hai to unki aatma ko bulaaya jaata hai। aise nahin kahenge ki inke paramatma ko bulaaya jaata hai। koi bhi haalat mein unko paramatma nahin kaha jaata। na paramatma janma-maran mein aate hain। paramatma janma-maran rahit hai। aatma to punarjanma leti rehti hai। yeh bhi samajh gaye hain ki pahle-pahle aatma hai devi-devtaaon ki, 84 janma bhi bhaarat mein gaaye jaate hain। ab bachche jaante hain gyaan saagar sammukh baithe hain। patit-paavan ko hi gyaan saagar kahenge। baap ko hi kaha jaata hai gyaaneshvar। eeshvar mein gyaan hai srishti ke aadi-madhya-ant ka। eeshvar hi srishti ko rachte hain isliye unko rachna ka gyaan hai। rachta kehte hain to zaroor rachi hui srishti hai, tab to kehte hain na। rachta ko baap kaha jaata hai। behen-bhaai ko rachta nahin kahenge। rachta hamesha baap ko kaha jaata hai। bachche jaante hain hamaare sammukh baap baithe hain। bhal vilaayat mein koi baithe honge, kahenge baap se ham door hain parantu yaad to karenge na। tumko bhi yaad karna hai, parantu laukik sambandh ko dekh paarlaukik baap ko bhool jaate hain isliye baba kehte hain uthte-baithte baap ko yaad karne ki practice karo। main aatma is shareer se chalti hoon। aatma ka gyaan to tumko hai। yeh jaante ho aatmaayen aur paramatma alag rahe bahukaal। aise nahin kaha jaata parmaatmaayen aur paramatma alag rahe bahukaal.....। aatma aur paramatma kaha jaata hai।

abhi baap bachchon ke sammukh baithe hain। kehte hain aapki ek boond bhi bahut hai। parampita paramatma ham aatmaon ka baap hai। bas, isko gyaan kaha jaata hai। aise aur koi ko bhi kahne ki himmat nahin aayegi ki tum sab aatmaon ka main baap hoon, jisko hi gyaan saagar patit-paavan kehte hain। yeh kahne koi ko aayega nahin। baap hi kehte hain main tumhaara baap hoon। barobar, ab mahaabhaari ladaai bhi saamne khadi hai, yaadav, kaurav, paandav bhi hain। yeh saara samjhaane par madaar hai। chitra dekhne se koi samajh jaaye so mushkil hai, jab tak teacher na samjhaaye। school mein bhi teacher samjhaate hain na - yeh India hai, yeh London hai। bigar samjhaane buddhi mein aa na sake। agar nakshe mein naam padhe to bhi sirf naam kah sakenge। lekin kahaan hai, kaun raajya karte hain, kuchh bhi samajh nahin sakenge। yahaan bhi har baat samajhne ki hoti hai। aajkal to pahle bhabhka chaahiye, show dekhkar hi aayenge। ab vahaan samjhaane vaale bade achhe chaahiye। bachche hi samjhaayenge ki yeh jagat amba hai, sabki manokaamnaayen siddha karne vaali hai। jhaad ke neeche dikhaate hain - kaamdhenu baithi hai। to unse milne liye bhi aayenge। jagat pita hai to zaroor jagat ki maa bhi hogi, parantu jagat amba inko kehte hain kyonki kalash maataaon ko diya jaata hai। mukhya jagdamba gaai hui hai phir unki sena bhi hai।

tum bachche exhibition karte ho to usmein samjhaane ke liye bade achhe-achhe bachche chaahiye। baba ne samjhaaya hai mukhya baat hai baap ke parichay ki। pahle-pahle samjhaao do baap hain। ek hai tumhaara laukik baap, doosra hai paarlaukik baap। laukik baap se to janma-janmaantar had ka varsa lete aaye, ab behad ka varsa lo। bahut gai thodi rahi..... vikarmon ka bojha sir par bahut hai। yog se hi vikarma vinaash ho sakte hain। maasi ka ghar nahin। ajun kuchh na kuchh hisaab-kitaab raha hua hai tab to bhogna padta hai na। kitni mehnat lagti hai। agar deri se aayenge to kitna vikarma vinaash kar sakenge। mushkilaat hai na। yeh to tum dhindhora pitva do jo koi phir ulhana na deve। tum kah sakenge ham to dhindhora pitvaate, akhbaar mein dalvaate the। jitna ho sake nimantran to sabhi ko milna chaahiye। behad ke baap se behad ka varsa lene ka purushaartha karo। khoob nimantran patra baanto। sabse jaasti service dehli mein ho sakti hai। dehli hai saare bhaarat ki gaddi, vahaan sabhi akhbaaron ke agents rehte hain। akhbaar dvaara bhi itla karna hai। laukik baap se to janma-janmaantar varsa lete aaye, abhi phir paarlaukik baap se varsa lo। jis vaikuntha ko yaad karte ho uska varsa baap se aakar lo। sabhi akhbaaron mein daalte jaao - shivbaaba ka birth place hai bhaarat। sabhi ka uddhaar karne vaala ek hi baap hai। to sabse bada teertha parampita paramatma patit-paavan ka hua na, parantu yeh kisko pata nahin hai। Christ, ibraahim, buddha aadi sabhi punarjanma lete-lete abhi antim janma mein hain। Christian log khud bhi kehte hain Christ yahaan hi kisi janma mein hai। Christian log bhi jhaad ko maante hain। nahin to itni aatmaayen kahaan se aati hain। zaroor section hain jahaan se aate hain। history phir repeat zaroor hogi। yeh jhaad badi achhi cheez hai parantu inki value bachchon ke paas nambarvaar hai।

bachche doosron ko samjhaane ke liye pradarshani aadi karte hain। ismen koi art ka show nahin karna hai। art gallery mein to vyartha ke chitra rakhte hain। samajhte hain yeh art hai। devtaaon ki patli kamar aadi ke kisma-kisma ke chitra banaate hain। vahaan devtaaon ki to natural beauty rehti hai। is samay to 5 tatva bhi tamopradhaan hain। satayug mein 5 tatva bhi satopradhaan hote hain। shreekrishna gora aur shreekrishna saanvara gaaya hua hai। vahaan shareer ki marammat nahin hoti। yahaan to dekho kitni marammat karni padti hai। vahaan to bhal boodha ho jaae to bhi daant aadi sabhi saabut rehte hain। daant toot jaaen to disfigure ho jaaen। vahaan to ekdam first class 16 kala sampoorn rehte hain। loole-langade hote nahin। yahaan to dekho kaise loole-langade janma lete hain। to tum aise paristaan ke maalik ban rahe ho। ek hi musaaphir aakar paristaan mein le jaate hain। tum musaaphir yahaan part bajaate-bajaate patit ban jaate ho, aatma kaali ho jaati hai। baap to ever husain hai, unmein kabhi khaad nahin padti hai। main to sachcha sona hoon isliye mujhe bulaate hain। ever paavan ko hi bulaate hain - baba aao, hamko bhi aap samaan banaao। tum ever paavan to nahin banenge। baaki satopradhaan mein to sabko aana hai, parantu unmein bhi nambarvaar hain। naatak mein actors bhinna-bhinna hote hain na। koi hero-heroine hote hain to unko paise bhi bahut milte hain। abhi to government sabke paise pakadti rehti hai। kaha jaata hai - kinki dabi rahegi dhool mein, kinki raaja khaae, saphli hogi woh jo kharche naam dhani ke....... kyonki dhani aaya hua hai svarga ki sthaapna karne। jo baap ke madadgaar banenge unhon ka hi safe rahega। tumko to vahaan dher ki dher milkiyat hogi। kitna sona heere javaahar aadi honge! parantu tumko uski koi bhi parvaah nahin rehti hai। tumko koi lootenge thode hi। heere-sone aadi ki khaaniyaan sab tumko nai-nai milengi। pattharon muaaphik heere pade honge। sab tumko mil jaana hai। jaise eeton ke mahal bante hain vahaan sone ke mahal banaate rahenge। dhanvaan praja bhi sone ke mahal banaayegi। jo poore daani bante hain woh bhi sone ke banaate hain। baba sab baaten batlaate rehte hain। aise bhi nahin kehte tum bhookh maro। bachchon aadi ko bhi sambhaalna hai। rachta ka farja hai sambhaal karna, duhkhi nahin karna hai। bhookh nahin maarna hai। merciful banna hai। manushya kitne duhkhi hain, jaante ho famine padega to bahut duhkhi honge। traahi-traahi karenge, phir jayjaykaar hogi। sab aatmaon ko sukh mil jaayega। baap hai hi duhkh harta, sukh karta। sukh hain do - ek shantidham mein rehna aur doosra sukhdhaam mein rehna। sukhdhaam mein pavitrata, sukh, shanti sab hai। baap kehte hain main kalpa-kalpa aata hoon। jab manushya bahut duhkhi ho jaate hain, mera part hi us samay ka hai isliye mera naam hi hai duhkh harta, sukh karta, sarva ka shanti daata, sukhdaata।

tum jaante ho ham baba ke saath sabko shanti ka daan dete hain। jitna yaad mein rahenge utna auron ko daan dete rahenge। phir knowledge dete hain sukh ke liye। to bachchon ko maat-pita ka show karna hai। jitna show karenge, sukh shanti ka maarga bahuton ko bataayenge to izaapha milega। baba tumko kitna sab nai duniya ki nai-nai baaten sunaate hain। puraani duniya aur nai duniya donon ka saakshaatkaar karaate hain। aur hi jaasti tumko saakshaatkaar karaayenge, parantu unko jo baba ke pakke sachche bachche honge। sachche dil par saaheb raazi hota hai। tum bahut kuchh dekhenge jaise shuru mein bhi dikhaaya tha phir ant mein dikhaayenge। kitne programme aate the, saakshaatkaar karaate the। kitni sajaavat, taaj aadi pahnaate the phir se bhinna-bhinna prakaar ke dikhaayenge। mirooa maut malooka shikaar। usi samay partition mein bhi mirooa maut tha na। tumko koi parvaah nahin thi। tum to jaise jeete ji mar gaye। to baba kehte hain - bachche, poori mehnat karo, purushaartha karo, ham aatma hain। ek-do se bhi roohaani baaten karte raho। jismaani deh-abhimaan ki baaten khatma। jo aashcharyavat bhaaganti ho jaayenge woh yeh sab nahin dekhenge। past bhi tumne dekha aur jo naya hoga woh bhi tum dekhenge, mehnat karo। meethe-meethe bachchon ko baap bahut pyaar karte hain। pyaare bachchon ko bahut pyaar milta hai। jo achhi service karenge unko pyaar bhi milega, pad bhi milega। bhoolo nahin, ham aatmaon ko niraakaar parampita paramatma shiksha de rahe hain, svarga ka vaaris bana rahe hain। daivi gunvaan banna hai। aage to sabmen aasuri gun the। ab baba sammukh baithe hain, jisse varsa milta hai, unse love rehta hai, dalaal se nahin। dalaal to beech mein hua। sauda tumko unse milta hai। to baap ko yaad karo। deh-abhimaan ko chhodte jaao। mera to ek baba, doosra koi bhi dehdhaari yaad na aaye। yeh to baba puraani boot mein aaye hain। mainne yeh loan liya hai। kalpa pahle bhi yeh akshar kahe honge। ab bhi kah rahe hain। aaj ke hi din tumko yeh samjhaaya tha phir samjha raha hoon। kitni achhi vishaal buddhi chaahiye। lakshmi-naaraayan number one bane hain, zaroor achhi praalabdha banaai hogi। yeh god fatherly salvation army hai, saari duniya ko mukti-jeevanmukti ki salvation dene vaali। sarva ka sadgati daata raam। gati mein to jaana hi hai saari duniya ko। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) baap ke saath saare vishwa ko shanti ka daan dena hai। baap samaan duhkh harta sukh-karta banna hai।

2) ek baap se poora love rakhna hai। aapas mein deh-abhimaan ki baaten nahin karni hai। roohaani baaten hi karni hai।

vardaan:- himmat ke sankalp dvaara maaya ko himmatheen banaane vaale himmatvaan aatma bhav

jo bachche ek bal ek bharose mein rehte hain, himmat ka sankalp karte hain ki humein vijayi banna hi hai to himmate bachche madde baap ka sada anubhav hota hai। himmat se madad ke paatra ban jaate hain। himmat ke sankalp ke aage maaya himmatheen ban jaati hai। jo kamjor sankalp karte ki pata nahin hoga ya nahin, main kar sakoonga ya nahin, aise sankalp hi maaya ka aahvaan karte hain isliye sada umang-utsaah sampanna himmat ke sankalp karo tab kahenge himmatvaan aatma।

slogan:- nirmaanchit ke takhta par baith, jimmevaari ka taaj dhaaran karna hi shreshthata hai।