मंगलवार 17 अक्टूबर 2023 की दैनिक मुरली

17-10-2023 praatahmurli om shanti "baapdaada"' madhuban

“meethe-bachche - tum aatmaon ko apna-apna rath hai, main hoon niraakaar, mujhe bhi kalpa mein ek hi baar rath chaahiye, main brahma ka anubhvi vriddha rath udhaar leta hoon''

prashn:- kis nishchay ke aadhaar par shareer ka bhaan bhoolna ati sahaj hai?

uttar:- tum bachchon ne nishchay se kaha - baba, ham aapke ban gaye, to baap ka banna maana hi shareer ka bhaan bhoolna। jaise shivbaaba is rath par aata aur chala jaata, aise tum bachche bhi practice karo is rath par aane-jaane ki। ashareeri banne ka abhyaas karo। ismen mushkil ka anubhav nahin hona chaahiye। apne ko niraakaari aatma samajh baap ko yaad karo।

geet:- om namo shivaae …

om shanti। shivbaaba bachchon ko is brahma ke rath dvaara samjhaate hain kyonki baap bachchon se hi poochhte hain mujhe apna rath to hai nahin। mujhe rath to zaroor chaahiye। jaise tum har ek aatma ko apna-apna rath hai na। brahma, vishnu, shankar ko bhi sookshm shareer hai na। lakshmi-naaraayan aadi sab aatmaon ko shareer roopi rath hai zaroor, jisko ashva kehte hain। hain to manushya na। manushyon ki hi baat samjhaai jaati hai, jaanavron ki baaten jaanvar jaanen। yahaan to manushya srishti hai to baap bhi manushyon ko baith samjhaate hain। manushya mein bhi jo aatma hai, unko baith samjhaate hain। direct poochhte hain tum har ek ko apna-apna shareer hai na। har ek aatma shareer leti aur chhodti hai। manushya to kah dete ki aatma 84 laakh janma leti hai। yeh bhool hai jabki tum 84 janma lekar hi bilkul phaan ho gaye ho (thak gaye ho), kitne tang ho gaye ho। to 84 laakh janmon ki to baat hi nahin। yeh hain manushyon ke gapode। to baap samjhaate hain tum aatmaon ka bhi apna-apna rath hai। mujhe bhi to rath chaahiye na। main tumhaara behad ka baap hoon। gaate bhi hain patit-paavan, gyaan ka saagar… tum aur koi ko patit-paavan nahin kahenge। lakshmi-naaraayan aadi ko bhi nahin kahenge। patit srishti ko paavan banaane vaala arthaat paavan srishti svarga ka rachayita, parampita paramatma bigar koi ho nahin sakta। supreme father vahi hai। baap jaante hain tum nambarvaar pattharbuddhi se paaras buddhi ban rahe ho। baahar vaale manushya yeh nahin jaante। to baap samjhaate hain mujhe bhi zaroor rath to chaahiye na। mujh patit-paavan ko zaroor patit duniya mein aana pade na। plague ki beemaari hoti hai to doctor ko plegiyon ke paas aana padega। baap kehte hain tumhaare mein 5 vikaaron ki beemaari aadha-kalpa ki hai। manushya to duhkh dene vaale hain। in 5 vikaaron se tum bilkul hi patit ban gaye ho। to baap samjhaate hain mujhe patit duniya mein hi aana pade na। patit ko hi bhrashtaachaari kaha jaata hai, paavan ko shreshthaachaari kahenge। barobar tumhaara bhaarat paavan shreshthaachaari tha, lakshmi-naaraayan ka raajya tha। jiski hi mahima gaate ho sarvagun sampanna........ vahaan sab sukhi the। yeh to kal ki baat hai। to baap kehte hain main aaoon to kaise aaoon, kiske shareer mein aaoon? pahle to mujhe prajaapita chaahiye। sookshm vatanvaasi ko yahaan kaise le aa sakta? woh to pharishta hai na। unko patit duniya mein le aaoon - yeh to dosh ho jaae। kahenge mainne kya gunaah kiya? baap badi ramneek baaten samjhaate hain। samjhega vahi jo baap ka bana hoga। ghadi-ghadi baap ko yaad karta rahega।

baap kehte hain main aata hi tab hoon jab dharti par paap badh jaata hai। kaliyug mein manushya kitne paap karte hain। to baap poochhte hain - bachche, bataao main aaoon to kis tan mein aaoon? mujhe chaahiye bhi zaroor vriddha anubhvi rath। yeh jo mainne rath liya hai, barobar inke bahut guru kiye hue hain। shaastra aadi padha hua hai। yeh bhi likha hua hai na ki bahut padha hua tha। arjun ki baat nahin। mujhe koi arjun va krishna ka rath thode hi chaahiye। mujhe to chaahiye brahma ka rath, unko hi prajaapita kahenge। krishna ko to prajaapita nahin kahenge। baap ko to brahma ka hi rath chaahiye jisse braahmanon ki praja rache। braahmanon ka hai sarvottam kul। viraat roop dikhaate hain na। devta, kshatriy, vaishya, shoodra, baaki brahman kahaan gaye? yeh kisko bhi pata nahin। oonch te oonch hai braahmanon ki choti। choti ho tab hi samjha jaata hai ki yeh brahman hai। sachchi-sachchi choti to tumhaari hai। tum raajarishi ho, badi choti vaale। rishi unko kaha jaata jo pavitra rehte hain। tum ho raajayogi, raajarishi। raajaai ke liye tapasya kar rahe ho। woh mukti ke liye hathayog ki tapasya karte hain, tum jeevanmukti, raajaai ke liye raajayog ki tapasya kar rahe ho। tumhaara naam hi hai shiv shakti। shivbaaba tumhein reincarnate karte hain। to tum phir se bhaarat mein janma lete ho। janma liya hai na। koi-koi ne bhal janma liya hai parantu samajhte nahin ki ham shivbaaba ke bane hain, unke paas janma liya hai। agar aisa samjhen to shareer ka bhaan bilkul hi nikal jaana chaahiye। jaise shivbaaba niraakaar is rath mein hai, tum bhi apne ko niraakaar aatma samjho। baap kehte hain - bachche, mujhe yaad karo। ab vaapis ghar chalna hai। tum to pahle ashareeri the phir devi va devta ka shareer liya, phir kshatriy shareer, phir vaishya shareer, phir shoodra shareer liya। abhi phir tum ashareeri bano। tum mujh niraakaar ko hi kehte ho - baba, abhi ham aapke bane hain, hamko vaapis jaana hai। deh ko to le nahin chalna hai। he aatmaayen, ab mujh baap ko aur sweet hom ko yaad karo। manushya jab vilaayat se lautte hain to kehte hain - chalo, apne sweet hom bhaarat mein chalen। jahaan janma liya tha vahaan lauten। manushya marte hain to jahaan janma liya tha unko vahaan le jaate hain। samajhte hain bhaarat ki mitti ka bana hua hai to woh mitti bhaarat mein hi chhoden।

baap kehte hain mera janma bhi bhaarat mein hai। shiv jayanti bhi manaate ho। mere naam to dher rakh diye hain। kehte hain har-har mahaadev, sabke duhkh kaatne vaala, woh bhi main hi hoon, shankar nahin hai। brahma service par haazir hai। aur phir jo sthaapna karte hain vahi vishnu ke do roop se paalna karenge। mujhe prajaapita brahma zaroor chaahiye। aadi dev ka barobar mandir bhi hai। aadi dev kiska bachcha hai? koi bataaye, unka baap kaun tha? aadi dev prajaapita brahma hai, unka baap hai shiv। yeh jagatpita, jagat amba ka yaadgaar mandir hai। is aadi dev brahma ke rath mein baap ne baith gyaan sunaaya hai। kothri mein sab bachche baithe hain। sabhi ka mandir to nahin banaayenge। mukhya hai 108 ki maala, to 108 kothriyaan bana di hain। 108 ki hi pooja hoti hai। mukhya hai shivbaaba phir brahma-sarasvati yugal। woh shivbaaba hai phool। unko apna shareer nahin hai। brahma-sarasvati ko apna shareer hai। maala shareer-dhaariyon ki bani hui hai। sab maala ko poojte hain। poojkar poora karenge phir shivbaaba ko namaskaar karenge, maatha jhukaayenge kyonki usne in sabko patit se paavan banaaya hai isliye pooji jaati hai। maala haath mein le baith raam-raam kehte hain। parampita paramatma ke naam ka kisko pata nahin hai। shivbaaba hai mukhya phir prajaapita brahma aur sarasvati bhi mukhya hai। baaki brahmaaku-maarkumaariyaan jo-jo purushaartha karte rehte hain unhon ke naam honge। aage chal tum sab dekhte rahenge। jab pichhaadi hogi tab tum yahaan aakar rahenge। jo pakke yogi honge vahi rah sakenge। bhogi to thoda thaka sunne se khatma ho jaayenge। koi ka operation dekhne se bhi manushya unconscious ho jaate hain। abhi partition mein kitne manushya mare। vo log to gapode maarte rehte hain ki hamne bigar koi ladaai raajya le liya। parantu mare itne jo baat mat poochho। yeh hai hi jhoothi maaya........ abhi sachcha baap baith tumko sach sunaate hain। baap kehte hain mujhe rath to zaroor chaahiye। main saajan bada hoon to sajni bhi badi chaahiye। sarasvati hai brahma mukh vanshaavli। woh koi brahma ki yugal nahin hai, brahma ki beti hai। unko phir jagat amba kyon kehte hain? kyonki yeh mel hai na, to maataaon ki sambhaal ke liye unko rakha hai। brahma mukh vanshaavli sarasvati to brahma ki beti ho gai। mama to javaan hai, brahma to boodha hai। sarasvati javaan, brahma ki stri shobhti bhi nahin। half partner kahla na sake। abhi tum samajh gaye ho। to baap kehte hain mujhe is brahma ka shareer loan lena padta hai। udhaar par to bahut lete hain। brahman ko khilaate hain to woh aatma aakar brahman ke shareer ka aadhaar legi। aatma woh shareer chhodkar aati hai kya? nahin, yeh to bachchon ko samjhaaya gaya hai ki drama mein saakshaatkaar ki rasma-rivaaj pahle se noondh hai। yahaan bhi bulaate hain। aise nahin ki aatma shareer chhodkar aayegi। nahin, yeh drama mein noondh hai। baap ke liye to yeh rath nandeegan hai। nahin to shiv ke mandir mein bail kyon dikhaate? sookshm vatan mein shankar ke paas bail kahaan se aaya? vahaan to hai hi brahma, vishnu, shankar aur woh yugal dikhaate hain। pravritti maarga dikhaate hain। baaki vahaan jaanvar kahaan se aaya? manushyon ki buddhi kuchh bhi kaam nahin karti, jo aata hai so kehte rehte, jisse vesta oph time, vesta oph energy hoti hai।

tum kehte ho ham so paavan devta the phir punarjanma lete-lete ham patit pujaari bane hain। aape hi poojya, aapehi pujaari। poojya aur pujaari koi bhagwan nahin banta। unko thode hi 84 janma lene padte। maaya manushyon ko bilkul pattharbuddhi bana deti hai। ham so ka arth yeh nahin ki ham aatma so paramatma hain, nahin। ham so brahman, so devta banenge। punarjanma lete aayenge। kitni achhi samjhaani hai। baap kehte hain mainne jismen pravesh kiya hai, isne bahut guru kiye, shaastra padhe hain, janma bhi poore 84 liye hue hain। yeh nahin jaanta, ham tumko in sahit bataata hoon। brahma ko bhi batlaata hoon। sadaiv bhi to savaari nahin kar sakta hoon। brahma mukh vanshaavli braahmanon ko batlaata hoon। mujhe rath bhi chaahiye na। tum bachche yaad karte ho aur main aa jaata hoon। mujhe to service karni hai to shri shri shiv ki mat se bhaarat paavan banta hai। narkavaasiyon ko shri shri ka title dena wrong hai। aage shri naam nahin tha। abhi to sabko shri arthaat shreshtha bana diya hai। shri shri to hai shivbaaba। phir sookshmavtanvaasi brahma, vishnu, shankar phir shri lakshmi-naaraayan। yeh samajhne ki baaten hain। knowledge badi maze ki hai। parantu koi-koi padhte-padhte raphu-chakkar ho jaate hain। maaya haath chhuda deti hai। dukaan bhi nambarvaar hain। badi dukaan mein zaroor achhe sales man honge। chhote-chhote mein kam honge। to badi dukaan par jaana chaahiye jahaan mahaarthi hon। maataaon ko to time bahut rehta hai। purushon ko dhandha aadi karna hai to busy rehte hain। maataayen to free hain। khaana pakaaya bas। woh tum par phir bandhan daalte hain। sunte hain brahmaakumaariyon paas jaane se vish band ho jaayega, to rokte hain।

shivbaaba aisi tirakni (phisalne vaali) cheez hai jo ghadi-ghadi bhool jaati hai। baap bilkul sahaj raasta bataate hain ki mujhe yaad karo to tumhaare paap bhi kat jaayenge aur mere paas bhi aa jaayenge। yaad nahin karenge to paap bhi nahin katenge aur saath bhi nahin le jaaoonga। phir saja khaani padegi। bhakti maarga mein chhaanchh peete aaye। makkhan to tumne satayug-treta mein khaakar poora kar diya। baaki peechhe chhaanchh rah jaati hai। chhaanchh bhi pahle achhi milti phir paani milta hai। satayug-treta mein ghi doodh ki nadi bahti hai। abhi to ghi kitna mahanga ho gaya hai। achha!

maat-pita baapdaada ka meethe-meethe sikeeldhe bachchon prati yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) raajarishi ban tapasya karni hai। poojyaneey maala mein aane ke liye baap samaan service karni hai। pakka yogi banna hai।

2) knowledge badi maze ki hai, isliye ramneekta se padhna hai, moonjhana nahin hai।

vardaan:- variety anubhootiyon dvaara sada umang-utsaah se bharpoor rahne vaale vighna jeet bhav

roz amritvele saare din ke liye variety umang-utsaah ki points buddhi mein emerge karo। har din ki murli se umang-utsaah ki points note karo, woh variety points umang-utsaah badhaayengi। manushya aatma ka nature hai ki variety pasanda aati hai isliye chaahe gyaan ki point manan karo ya roohrihaan karo, variety roop se zero ban apne hero part ki smriti mein raho, to umang-utsaah se bharpoor rahenge aur sab vighna sahaj samaapta ho jaayenge।

slogan:- apni avastha ko aisa shant-chit bana lo jo krodh ka bhoot door se hi bhaag jaae।