सोमवार 16 अक्टूबर 2023 की दैनिक मुरली

16-10-2023 praatahmurli om shanti "baapdaada"' madhuban

“meethe bachche - gyaan ka sukh 21 peedhi chalta hai, woh hai svarga ka sada sukh, bhakti mein teevra bhakti se alpa-kaal kshan bhangur sukh milta hai''

prashn:- kis shreemat par chalkar tum bachche sadgati ko praapta kar sakte ho?

uttar:- baap ki tumhein shreemat hai - is puraani duniya ko bhool ek mujhe yaad karo। isi ko hi balihaar jaana athva jeete ji marna kaha jaata hai। isi shreemat se tum shreshtha te shreshtha bante ho। tumhaari sadgati ho jaati hai। saakaar manushya, manushya ki sadgati nahin kar sakte। baap hi sabka sadgati daata hai।

geet:- om namo shivaae …

om shanti। bachchon ne geet suna। gaaya jaata hai oonche te ooncha bhagwan। ab bhagwan ka naam to manushyamaatra nahin jaante। bhakta bhagwan ko nahin jaante, jab tak ki bhagwan aakar bhakton ko apni pahchaan na de। yeh to samjhaaya gaya hai - gyaan aur bhakti। satayug treta hai gyaan ki praalabdha। abhi tum gyaan saagar se gyaan paakar purushaartha se apni sada sukh ki praalabdha bana rahe ho phir dvaapar-kaliyug mein bhakti hoti hai। gyaan ki praalabdha satayug-treta tak chalti hai। gyaan ka sukh to 21 peedhi chalta hai। woh hain svarga ke sada sukh। narka ka hai alpakaal kshan bhangur sukh। bachchon ko samjhaaya jaata hai satayug-treta gyaan maarga tha, nai duniya, naya bhaarat tha। usko svarga kaha jaata hai। abhi tamopradhaan bhaarat narka ho gaya hai। anek prakaar ke duhkh hain। svarga mein duhkh ka naam-nishaan nahin rehta। guru karne ki darkaar hi nahin। bhakton ka uddhaar bhagwan ko hi karna hai। abhi kaliyug ka ant hai, vinaash saamne khada hai। baap aakar brahma dvaara gyaan dekar svarga ki sthaapna karte hain aur shankar dvaara vinaash, vishnu dvaara paalna karaate hain। paramatma ke kartavya ko koi samajhte nahin। manushya ko paap aatma, punya aatma kaha jaata hai, paap paramatma, punya paramatma nahin kaha jaata। mahaatma ko bhi mahaan aatma kahenge, mahaan paramatma nahin kahenge। aatma pavitra banti hai। baap ne samjhaaya hai - pahle-pahle mukhya hai devi devta dharma, us samay sooryavanshi hi raajya karte the, chandravanshi nahin the, ek dharma tha। bhaarat mein sone-chaandi ke mahal the, heere javaahron se chhaten-deevaaren sab saji hui thi। bhaarat heere jaisa tha, vahi bhaarat ab kaudi misal bana hai। baap kehte hain main kalpa ke ant mein, satayug aadi ke sangam par aata hoon। bhaarat ko maataaon dvaara phir se svarga banaata hoon। yeh hai shiv shakti, paandav sena। paandavon ki preet ek baap se hai। unhon ko baap padhaate hain। shaastra aadi hain sab bhakti maarga ki saamagri। woh hai bhakti cult। abhi baap aakar sabko bhakti ka phal gyaan dete hain, jisse tum sadgati mein jaate ho। sadgati daata sabka baap ek hi hai। baap ko hi gyaan saagar kaha jaata hai। baaki manushya, manushya ko mukti-jeevanmukti de nahin sakte। yeh gyaan koi shaastron mein nahin hai। gyaan saagar ek baap ko hi kaha jaata hai, unse tum varsa lete ho phir sarvagun sampanna, 16 kala sampoorn ban jaayenge। yeh devtaaon ki mahima hai। lakshmi-naaraayan hain 16 kala sampoorn, raam-seeta hain 14 kala। yeh padhaai hai। yeh koi common satsang nahin hai। sat hai hi ek, vahi aakar sat samjhaate hain। yeh hai hi patit duniya। paavan duniya mein patit hote hi nahin, patit duniya mein paavan hote nahin। paavan banaane vaala ek hi baap hai। aatma kehti hai shivaae namah, aatma ne apne baap ko kaha namaste। agar koi kehte shiv mere mein hai to phir namaskaar kisko karte hain। yeh agyaan phaila hua hai। ab tum bachchon ko baap trikaaldarshi banaate hain। tum jaante ho sab aatmaayen jahaan rehti hain woh hai nirvaandhaam, sweet hom। mukti ko to sabhi yaad karte hain, jahaan ham baap ke saath rehte hain। abhi tum baap ko yaad karte ho। sukhdhaam mein jaayenge to baap ko yaad nahin karenge। abhi yeh hai hi duhkhadhaam, sabhi durgati mein hain। nai duniya mein bhaarat naya tha, sukhdhaam tha, sooryavanshi-chandravanshi raajya tha। manushyon ko to yeh pata nahin hai ki lakshmi-naaraayan aur raadhe-krishna ka kya connection hai? woh raajkumaari, woh raajkumaar alag-alag raajya ke hain। aise nahin ki donon hi aapas mein bhaai-behen hain। woh alag apni raajdhaani mein thi, shreekrishna apni raajdhaani ka raajkumaar tha। unhon ka svayanvar hota hai to lakshmi-naaraayan bante hain। satayug mein har cheej sukh dene vaali hai, kaliyug mein har cheej duhkh dene vaali hai। satayug mein kisi ki akaale mrityu nahin hoti। tum bachche jaante ho ham apne parampita paramatma baap se sahaj raajayog seekhte hain - nar se naaraayan, naari se lakshmi banne ke liye। yeh school hai। un satsangon aadi mein to koi em object nahin hoti। ved-shaastra aadi sunaate rehte hain। baap ke dvaara tum is manushya srishti chakra ko ab jaan gaye ho। baap ko hi knowledgeful, blissful, merciful kaha jaata hai। gaate hain - O baba, aakar raham karo। heavenly god father hi aakar heaven sthaapan karte hain sangam par।

heaven mein bahut thode manushya hote hain। baaki itne sabhi kahaan jaayenge? baap sabhi ko muktidhaam mein le jaate hain। svarga mein sirf bhaarat hi tha, phir bhi bhaarat hi rahega। bhaarat sachkhanda yahaan gaaya hua hai। abhi to bhaarat kangaal ban gaya hai। paise-paise ke liye bheekh maangate rehte hain। bhaarat heere jaisa tha, ab kaudi misal hai। yeh drama ke raaz ko samajhna hai। tum rachayita baap ko aur unki rachna ke aadi-madhya-ant ko jaante ho। manushya gaate bhi hain vande maatram, parantu vandana pavitra ki hi ki jaati hai। paramatma hi aakar vande maatram kehna shuru karte hain। shivbaaba ne hi aakar kaha hai - naari svarga ka dvaar hai। shakti sena hai na। yeh svarga ka raajya dilaane vaali hai, jisko hi world almighty authority raajya kaha jaata hai। tum shaktiyon ne svaraajya sthaapan kiya tha, ab phir se sthaapan ho raha hai। raamraajya kaha jaata hai satayug ko। abhi bhi kehte hain raamraajya ho। parantu woh koi manushya to kar na sake। incorporeal god father hi aakar padhaate hain। unko bhi zaroor shareer chaahiye। zaroor brahma tan mein aana pade। shivbaaba to tum sab aatmaon ka baap hai। prajaapita bhi gaaya hua hai। pita to baap thahra na। brahma ko great great grand father kaha jaata hai। aadi dev aur aadi devi donon baithe hain, tapasya kar rahe hain। tum bhi tapasya kar rahe ho। yeh hai raajayog। sannyaasiyon ka hai hathayog। woh kabhi raajayog sikhla nahin sakte। geeta aadi jo bhi shaastra hain woh sab hain bhakti maarga ki saamagri। padhte aaye hain parantu tamopradhaan ban gaye hain। yeh vahi mahaabhaarat ladaai hai jisse vinaash hona hai। science koi vedon mein nahin hai। unmein to gyaan ki baaten hain। yeh science buddhi ka chamatkaar hai jo invention nikaalte rehte hain। vimaan aadi banaate hain sukh ke liye। phir pichhaadi mein inke dvaara hi vinaash hota hai। yeh sukh ka hunar bhaarat mein rah jaayega। duhkh ka hunar, maarne aadi ka khalaas ho jaayega। science ka akla chala aata hai। yeh bombs aadi kalpa pahle bhi bane the। patit duniya ka vinaash phir nai duniya ki sthaapna honi hai। baap kehte hain tumne 84 janma poore kiye hain, ab is deh ka ahankaar chhod mujh baap ko yaad karo to yaad ki yog agni se vikarma vinaash honge। raavan ne tumse bahut vikarma karaaye hain। paavan banne ka to ek hi upaay hai। tum aatma to ho hi। kehte bhi ho main aatma, aise nahin kahege main paramatma hoon। kehte ho meri aatma ko ranj (naaraaj) mat karo। aatma so paramatma kehna yeh to bahut badi bhool hai। abhi hai tamopradhaan vyabhichaari bhakti। jo aaya unko baith poojte hain। avyabhichaari ek ki yaad ko kaha jaata hai। ab vyabhichaari bhakti ka bhi ant hona hai। baap aakar behad ka varsa dete hain। sabhi ko sukh dene vaala ek baap hai, doosra na koi। baap kehte hain mujh ek ke saath buddhiyog jodne se hi ant mati so gati ho jaayegi। main hoon hi svarga ka rachayita। yeh kaanton ki duniya hai। ek-do mein ladte-jhagadte rehte hain। abhi yeh puraani duniya badal rahi hai। gyaan amrit ka kalash maataaon par rakhte hain। yeh hai knowledge। parantu vish ki bhent mein amrit kaha gaya hai। kaha bhi jaata hai amrit chhod vish kaahe ko khaae…। shreemat se hi tum shreshtha banenge। parampita paramatma aakar shreemat dete hain। shreekrishna bhi shreemat se aisa bana hai। yeh samajhne ki baaten hain। is saari puraani duniya ko bhool ek baap ko yaad karna hai। balihaar bhi abhi jaana hota hai, inko hi jeete ji marna kaha jaata hai। bhakti maarga ki baaten alag hain। woh hai bhakti cult। bhakti ke to dher guru hain। parantu sadgati daata ek hi niraakaar parampita paramatma hai। saakaar manushya, manushya ki sadgati kar nahin sakte। sada ke liye sukh de nahin sakte। sada sukh dene vaala baap hai। yeh paathshaala hai। em object bhi baap batlaate hain। kehte hain tumko svarga ke sukh ka varsa milega। baaki sab mukti-dhaam mein chale jaayenge। shantidham, sukhdhaam aur yeh hai duhkhadhaam। yeh chakra phirta rehta hai, isko svadarshan chakra kaha jaata hai। is drama ke chakra se koi chhoot nahin sakta hai। bana banaaya avinaashi part hai harek ka। baap tumko padhaakar manushya se devta bana rahe hain। phir jitna jo padhenge, to koi raaja banenge, koi praja banenge। sooryavanshi dynasty hai na। satayug mein sooryavanshi the to aur koi nahin the। bhaarat khanda hi oonch te oonch sachkhanda tha, ab jhooth khanda bana hai, isko raurav narka kaha jaata hai। paise ke liye kitni maaraamaari hoti hai। vahaan to koi apraapta vastu nahin rehti, jiski praapti ke liye koi paap karna pade। baap hi is bhrashtaachaari duniya ko shreshthaachaari bana rahe hain, in maataaon dvaara। inhon ko baap vande maatram kehte hain। sannyaasi nahin kehte vande maatram। unka hai had ka sannyaas। yeh hai behad ka sannyaas। saari duniya ka buddhi se sannyaas karna hai। shantidham, sukhdhaam ko yaad karna hai। duhkhadhaam ko bhool jaana hai। baap ka yeh farmaan hai। baap aatmaon ko samjhaate hain, tum in kaanon se sunte ho। shivbaaba in organs dvaara tumko samjhaate hain। woh hai gyaan saagar। yeh koi saadhu, santa, mahaatma nahin hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) baap par poora balihaar jaana hai। deh ka ahankaar chhod yog agni se vikarma vinaash karne hain।

2) em object ko buddhi mein rakhkar padhaai karni hai। bane banaaye drama ko buddhi mein rakhkar svadarshan chakradhaari banna hai।

vardaan:- sada umang-utsaah ke pankhon dvaara udti kala mein udne vaali shreshtha aatma bhav

gyaan-yog ke saath-saath har samay, har karma mein, har din naya umang-utsaah bana rahe, yahi udti kala ka aadhaar hai। kaisa bhi kaarya ho, chaahe saphaai ka ho, bartan maanjane ka ho, saadhaaran karma ho, usmein bhi umang-utsaah natural aur nirantar ho। udti kala vaali shreshtha aatma umang-utsaah ke pankhon se sada udti rahegi, woh kabhi confuse nahin hogi, chhoti-chhoti baaton mein thakkar rukegi nahin।

slogan:- jo nimaarnachit, athak aur sada jaagti jyot hain - vahi vishwa kalyaankaari hain।