गुरुवार 19 अक्टूबर 2023 की दैनिक मुरली

19-10-2023 praatahmurli om shanti "baapdaada"' madhuban

“meethe bachche - padhaai kabhi bhi miss nahin karna, padhaai ka shauk tab rahega jab padhaane vaale baap mein atoot nishchay hoga, nishchay buddhi bachche hi service kar sakenge''

prashn:- baapdaada ko bachchon ki kaun-si baat sunkar bahut khushi hoti hai?

uttar:- jab bachche service samaachaar ka patra likhte hain - baba, aaj hamne phalaane ko samjhaaya, usko do baap ka parichay diya… aise-aise seva ki। to baba un patron ko padhkar bahut khush hote hain। yaad-pyaar va khush khairaaphat ka patra likhne se baba ka pet nahin bharta। baba apne madadgaar bachchon ko dekh khush hote hain isliye service karke samaachaar likhna hai।

geet:- chalo chale maa…

om shanti। bachche jaante hain kaanton se phoolon ki duniya mein jaana hai। satayugi duniya ko daivi phool hi kahenge। kaliyug mein manushya hain kaanten misal। ek-do ko tang karte, duhkh dete rehte hain। tum bachche ab khush hote ho ki chalo, ab ham apne us daivi phoolon ke sukhdhaam mein chalen। chalne ka bhi raaz samajhna hai। chalenge tab, jab achhi reeti padhenge। pahle to nishchay chaahiye - padhaane vaala kaun hai? yeh baaten koi ved-shaastra aadi mein likhi hui nahin hain। bhal geeta mein raajayog likha hua hai, raajaai ke liye padhaai hai to zaroor raajaai satayug mein denge। pahle to padhaane vaale ka nishchay chaahiye। yeh koi saadhu, santa, manushya to hai nahin। yeh to hai niraakaar। sab aatmaon ka baap hai - parampita paramatma। jinhon ko kalpa pahle muaaphik nishchay hona hoga, unhon ko hi hoga। tum dekhte ho phoolon ki duniya svarga mein chalne ke liye harek ka apna-apna purushaartha hai। pahle jab nishchay ho to jhat padhaai mein lag pade। shaastron mein krishna bhagvaanuvaach likh diya hai - saath-saath likha bhi hai rudra gyaan yagya। ab yeh to gyaan ki baaten ho gai। manushyon ne phir shreekrishna ko kaath ki murli de di hai। gaayan bhi hai na teri murli mein jaadu hai khudaai। ab kaath ki murli mein to khudaai jaadu ho na sake। woh to mukh se murli baja sakte hain। shreekrishna ka bachpan hi dikhaate hain, aapas mein khelte-koodte rehte hain। yeh baaten badi samajhne laayak hain। yeh to bachche samajh gaye hain ki yeh barobar raajayog hai arthaat raajaai praapta karne ki padhaai karaane vaale ke saath yog। woh sammukh aakar padhaate hain। ismen kaath ke murli ki koi baat nahin। yeh baaten hi niraali hain। yeh kisko bhi pata nahin hai ki niraakaar bhagwan svayan aakar padhaate hain। shreekrishna ke liye bhi kehte hain, unki murli mein khudaai jaadu hai। to khuda aur ho gaya na। shreekrishna ko khuda nahin kahenge। khuda to khuda hi hai, unko hi jaadoogar kehte hain। jaadoogar svayan aakar jaadoogri dikhlaate hain, saakshaatkaar karaate hain। phir bhi oonch pad praapta karaane liye padhaate hain। meera ne bhi vaikuntha dekha aur dance ki, parantu woh raajayog nahin seekhi। raajayog ki baat koi bhi shaastra mein nahin hai। meera ko padhaane vaala to koi nahin tha। meera ka naam bhi bhakta maala mein hai। yeh hai gyaan maala। raat-din ka farka hai। tum samajh gaye ho - ham jitna gyaan uthaayenge, utna oonch banenge। barobar bhakta maala bhi hai, unmein bhi nambarvaar hain। unhon ke naam to mashhoor hain। yeh gyaan koi mein bhi nahin hai। to samjhaana chaahiye - yeh gyaan dene vaala woh authority baap hai, jiske liye kaha jaata hai brahma mukh kamal se brahman rach unhon ko sabhi vedon-shaastron ka saar sunaate hain। shivbaaba ko to shaastra de na saken, kyonki woh to hai niraakaar। to brahma dvaara samjhaate hain। yeh yukti rachi hai। parantu yeh sab baaten samjhaane vaala woh ek hai। dikhlaate bhi hain brahma dvaara saar batlaate hain to zaroor samjhaane vaala koi doosra hai na। abhi tum practical mein dekhte ho shivbaaba jo gyaan saagar hai, hamaara baba bhi hai, woh sammukh baithe hain। bhaarat mein hi aate hain aur zaroor koi ke shareer mein aate hain। yeh brahma ka shareer hai। prajaapita brahma hona bhi zaroori hai। barobar prajaapita brahma dvaara hi baap aakar brahman dharma rachte hain। dharma kaise racha jaata hai? yeh bhi tum jaante ho। tum practical mein brahma ki santaan ho। kehte ho ham brahman braahmaniyaan hain। baap se varsa le rahe hain। follower to kabhi varsa le na sake। bachche hi baap se varsa lete hain। tum aakar behad ke bachche bane ho। Christ ke follower kahenge, bachche nahin। buddha ke, gurunaanak ke follower hi kahenge, bachche nahin। yahaan tum bachche ho। prajaapita woh bhi baap thahra aur shivbaaba bhi baap ho gaya। woh niraakaar hai, yeh saakaar alag hai। is saakaar dvaara hi shivbaaba ne bachchon ko racha hai। ab tumhaare mein bhi koi ko to pakka nishchay hai, koi ko nahin hai। lottery hai bahut badi।

tumko apne shareer nirvaah arth karma bhi karna hai aur phir yeh gyaan bhi seekhna hai। us padhaai mein bahut mehnat karni padti hai। yahaan bhi baap kehte hain ek ghadi, aadhi ghadi, padho zaroor। achha, koi kaaran se roz nahin padh sakte ho to pahle 7 roz padhkar phir murli ke aadhaar par chal sakte ho। lakshya pakad liya, baaki hai taal, daal, patte aadi ko samajhna, woh sab bhi chakra mein aa jaata hai। tumko 84 janmon ka raaz bhi samjhaaya hai। jhaad mein detail hai, chakra mein nutshell hai। samjhaaya bhi hai yeh variety manushya srishti ke dharma hain। pahle ek dharma rehta hai phir vriddhi hoti hai। jhaad bhi dikhaaya hai - kaise foundation nikalta hai। kitna sahaj raaz hai! drama aur jhaad ko samajhna hai, buddhi mein dhaaran karna hai aur doosron ko samjhaana hai। do baap ki point to zaroor samjhaani hai। behad ke baap se svaraajya milta hai isliye raajayog zaroor seekhna pade। parampita paramatma hi svarga ki sthaapna karte hain, jisko krishnapuri bhi kehte hain। kansapuri mein to krishnapuri sthaapan ho na sake, isliye sangam rakha hua hai। tum bachchon ke liye yeh sangamayug hai, baaki aur sabke liye kaliyug hai। tum hi sangam se phir satayug mein jaane vaale ho, yeh nishchay chaahiye। abhi ham sangam par hain। sangamayug yaad rahe to satayug bhi yaad rahe aur satayug sthaapan karne vaala bhi yaad rahe। parantu ghadi-ghadi bhool jaate hain। tum samajhte ho abhi ham sangam par hain, behad ka baap aate hi hain kalpa ke sangamayuge। geeta mein bhool kar di hai। geeta se tailuk rakhne vaale sirf bhaagvat, mahaabhaarat aadi hain।

baap samjhaate hain - tum sab seetaayen ho, main raam hoon। tum raavan raajya roopi lanka mein pade ho, woh lanka nahin। aise nahin, vahaan koi raavan raajya tha। satayug mein lanka aadi hoti nahin। us taraph bauddha dharma hai। abhi bauddha dharma bahut phaila hua hai। ab yeh to bachchon ko samjhaaya gaya hai bhaarat pahle bilkul pavitra tha, sukh-shanti thi, ek hi devi-devta dharma tha। pahle-pahle to yeh nishchay pakka rehna chaahiye ki yeh hamaara behad ka baap hai, unse varsa lena hai, purushaartha mein kabhi chookna nahin hai। nishchay bigar purushaartha bhi kaise karenge? baap padhaate hain, unse svarga ka, sada sukh ka varsa mil raha hai, yeh to certain hai। school mein bigar nishchay athva em object thode hi baithenge। vahaan to subject bahut hoti hain, margin hoti hai। yahaan to ek hi subject hai। ek hi subject se kitni badi raajdhaani sthaapan ho jaati hai। jo nahin padhte hain to padhe hue ke aage bhari dhoyenge। praja mein bhi jo achhi praja honge unke aage kam darje vaali praja bhari dhoyegi। praja bhi nambarvaar to hai na। koi gareeb, koi saahookaar, ek na mile doosre se। kaisa yeh drama hai! sabhi manushyon ke features drama mein noondh hain part bajaane ke liye। kitni guhya baaten hain jo dhaaran kar yathaartha reeti samjhaana hai। sab to nahin samjha sakte। kitni achhi baaten samjhaate hain। nishchay mein hi vijay hai। nishchay hoga tab hi padhenge। koi to sanshaybuddhi ho padhaai ko chhod dete hain। aho maaya, jhat toofaan lagaae sanshay mein daal deti hai। sanshaybuddhi vinshayanti। chadhe to chaakhe vaikuntha ras, gire to chaknaachoor। farka to bahut hai। gire to ekdam chandaal, chadhe to ekdam baadshaah। saara padhaai par madaar hai। aage kabhi suna ki niraakaar shikshak kaise hota hai! abhi shivbaaba dvaara tum sunte ho। tumko nishchay hua hai - main tumhaara baap hoon, patit-paavan bhi hoon, knowledgeful bhi kehte ho। knowledge se chakravarti raaja banna hai, yeh nishchay hona chaahiye na। nishchay mein hi maaya vighna daalti hai। dushman saamne khada hai। tum jaante ho maaya hamaari dushman hai, ghadi-ghadi dhokha deti hai, padhaai mein sanshay daal deti hai। sanshay mein aakar bahut bachche padhaai ko chhod dete hain। padhaai ko chhoda goya baap, teacher, satguru ko bhi chhod diya। woh to guru badalte rehte hain। anek guru karte hain। yeh to ek hi satguru hai। yeh apni mahima nahin karte hain। baap apna parichay dete hain। bhakta log gaate hain na shivaae namah, tum maat-pita… lekin jaante kuchh bhi nahin, sirf kehte rehte hain, pooja karte rehte hain। tum abhi jaan gaye ho shiv kaun hai? shiv ke baad phir aate hain brahma-sarasvati। lakshmi-naaraayan baad mein aate hain। pahle shivbaaba phir brahma, vishnu, shankar। baap kehte hain main pahle-pahle brahma mein pravesh karta hoon, inko pahle rachta hoon। brahma dvaara sthaapna phir brahma hi vishnu ban paalna karte hain। yeh sab points note karni chaahiye। phir kisko samjhaane ki koshish karni chaahiye। koi to bahut achha samjhaate hain। baba ki to baat hi alag hai। kabhi shivbaaba samjhaate, kabhi yeh bhi samjhaate hain। tum hamesha samjho - shivbaaba samjhaate hain। shivbaaba ko yaad karne se vikarma vinaash hote hain। tum samjho - shivbaaba in dvaara nai-nai points sunaate hain, bada yukti se samjhaate hain। to bachchon ko samajhna bhi chaahiye। pahle to nishchay karna hai। 7 roz mein bhi rang achha lag sakta hai। parantu maaya bhi bahut teekhi hai na। pahle-pahle to nishchay baithe ki baap parampita paramatma svarga ka rachayita hai, to zaroor usne hi raajayog sikhaaya hoga। shreekrishna sikhla na sake। unka aana hi satayug mein hota hai। svarga ka rachayita shivbaaba hai। agar koi kahe shreekrishna ke tan mein aaya parantu shreekrishna to us roop mein aa na sake। unka aana hi satayug mein hota hai। baba kisi ke garbha se to janma nahin leta। inke tan mein pravesh kar inka bhi parichay deta hai ki inka naam brahma hamne kyon rakha? yahi shuru se lekar ant tak part bajaate hain। tumhaare bhi bahut achhe-achhe naam rakhe the। kitne bachchon ke naam aaye। wonder hai na, phat se do adhaai sau ke naam aa gaye। itne naam to yahaan ke brahman log de na saken। sandeshi phat se naam le aai। behad ke baap ne naam rakhe। wonder hai। wonderful baap, wonderful em object।

tum so raajaaon ke raaja banenge। lakshmi-naaraayan ka chitra bada clear hai। oopar mein trimoorti ka chitra bada accurate hai। 84 janma bhi zaroor lene hain। kaliyug ka ant patit, satayug ki aadi paavan। bachchon ko service ka saboot dena chaahiye - baba, hamne bhi yeh chhote-chhote parche chhapvaaye। oopar mein shiv, trimoorti aur do baap ka parichay ho। yeh point zaroor honi chaahiye। aise-aise parche chhapvaakar khoob service karke samaachaar dena chaahiye, tab baap ki dil par chadhenge। chitthi sirf khush-khairaaphat ki nahin, service karke samaachaar likhna hai ki baba yeh-yeh service ki। sirf yaad-pyaar likhne se baba ka pet kya bharega। aaj phalaane ko samjhaaya, aaj pati ki service ki, bahut achha khush hua, aise-aise service ki, samaachaar baba ko likhna hai। do baap ki point mukhya hai। behad ka baap hai hi svarga ka raajya-bhaagya dene vaala। tum kitne meethe-meethe bachche ho। baap samjhaate hain yeh sab adopted children hain। itne sab to dharma ke bachche hi ho sakte hain। woh dharma ke followers hote hain। yahaan tum bachche ho, baap bhi aise bachchon ko dekh khush hote hain। yeh sab hamaare bachche hain। abhi ant ka part baja rahe hain। svarga ki sthaapna mein madad karne liye mere saathi bane hain। yeh hai rudra shivbaaba ka raajasva ashvamedh gyaan yagya। shivbaaba svarga ki sthaapna kaise karte hain? pahle brahma aur braahmanon dvaara rudra gyaan yagya rachte hain jisse svarga ki sthaapna hoti hai। to zaroor braahmanon ko hi yagya sambhaalna hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) nishchay buddhi ban padhaai karni hai। kabhi bhi kisi baat mein sanshay nahin uthaana hai। nishchay mein hi vijay hai।

2) baap ka saathi ban svarga ki sthaapna mein poora madadgaar banna hai। yagya ki sambhaal karne vaala pakka brahman banna hai।

vardaan:- gyaan swaroop ban karma philosophy ko pahchaan kar chalne vaale karmabandhan mukta bhav

kai bachche josh mein aakar sab kuchh chhod kinaara kar tan se alag ho jaate lekin man ka hisaab-kitaab hone ke kaaran kheenchata rehta hai। buddhi jaati rehti hai, yeh bhi ek bada vighna ban jaata hai isliye koi se kinaara bhi karna hai to pahle nimitta aatmaon se verify karaao kyonki yeh karmo ki philosophy hai। jabardasti todne se man baar-baar jaata rehta hai। to gyaan swaroop hokar karma philosophy ko pahchaano aur verify karaao to sahaj karmabandhan se mukta ho jaayenge।

slogan:- apne svamaan ki seat par set raho to maaya aapke aage surrender ho jaayegi।