मंगलवार 31 अक्टूबर 2023 की दैनिक मुरली

31-10-2023 praatahmurli om shanti "baapdaada"' madhuban

“meethe bachche - tum abhi pujaari se poojya, beggar se prince ban rahe ho, isliye tumhein khushi mein khaggiyaan maarni hai, kabhi bhi rona nahin hai''

prashn:- avinaashi gyaan ratnon ki varsha se bhaarat ko saahookaar banaane ke liye baap tumhein kis baat mein aap samaan banaate hain?

uttar:- baba kehte - bachche, jaise main roop basanta hoon, aise tumhein bhi roop basanta banaata hoon। jo avinaashi gyaan ratna tumhein mile hain unhein dhaaran kar mukh se daan karo। isi mahaadaan se bhaarat saahookaar banega। jaise tum bachche baap se varsa le rahe ho aise auron ko bhi do। tumhaara pharja hai sabko raasta bataana, sukhdaai banna।

geet:- insaaph ki dagar par…

om shanti। yeh geet congress se bhi lagta hai aur tum bachchon se bhi lagta hai kyonki unhonne bhi to sahan karke angrejon se bhaarat ko chhudaaya। to yeh geet unki khushi mein hai। khushiyaan to manaate rehte hain, bhal kitna bhi kiya parantu puraani duniya to nahin badli na। duniya to vahi puraani hai। tum bachche jaante ho shreemat par ham is duniya ko badal rahe hain। woh shreemat nahin kahenge। shreemat hai hi ek bhagwan ki। tum ho abhi baap ki shreshtha te shreshtha shreemat par। unhonne phir shreekrishna ka naam daal diya hai। abhi tum bachche jaante ho yeh hai shri shivbaaba ki mat। krishna ko baba kehna shobhta nahin। shri shivbaaba ki mat। shri krishna baba ki mat to nahin kahenge। tum is bhaarat ko phir se pavitra bana rahe ho। bhaarat khanda hi mukhya hai kyonki yeh behad ke baap ka birthplace hai। saari duniya ke manushya-maatra ka jo baap hai arthaat sarva ka sadgati daata hai, unka yeh birth place hai। isko sarvottam teertha kaha jaata hai, is jaisa oonch te oonch teertha koi hai nahin। parantu geeta mein naam badal diya hai। yeh bhaaratvaasi khud nahin jaante ki yeh bhaarat behad ke baap ka birth place hai। bhal shivraatri manaate hain parantu yeh pata nahin hai ki shiv kaun hai? kab aaya? unka naam-roop kya hai? tum ab jaan gaye ho। abhi shivling ke chitra mein saphed star dikhaate hain, jo manushya clear samjhen ki paramatma ka yeh roop hai। parantu pooja aadi kaise ki jaae - isliye bada roop banaaya hai। hai vaastav mein star। baba jauhri bhi hai। baba ko maaloom hai ek patthar bhi hota hai jisko star ruby, star fine maanik, star neelam aadi kehte hain। woh most valuable hota hai। akhbaar mein bhi pada tha ki sabse bada star phalaane khazaane se chori ho gaya hai। to yeh shivling laal to hai, inmen beech mein hai saphed star, star light। samjhaane mein bahut sahaj hoga। star saphed hota hai na। aatma ka bhi saphed hi saakshaatkaar hota hai। cheez to yahi hai। sirf star lagaana hai। aur kuchh likhne ki darkaar nahin rahegi। samjhaana bahut sahaj hoga। neeche yeh likhat to hai hi - aapka janma siddha adhikaar svarga ki raajaai kyonki heavenly god father hai। to star light daalna hai। ab baba direction de rahe hain। jhat kaam kar lena chaahiye। aise patthar bhi hote hain jismen star bada first class dikhaai de। yahaan unki bahut value hai। phir satayug mein to in cheezon ki value hoti nahin। vahaan yeh javaahraat to patthar gine jaate hain, mahlon mein lagaate rehte hain। yeh duniya ab badal rahi hai। tum bachche jaante ho ham svarga ka maalik banne liye baap se varsa le rahe hain, padh rahe hain। jitna jo padhega utna oonch pad paayega। padhna aur phir padhaana bhi hai, yaani aap samaan banaana hai tab hi oonch pad pa sakenge। bachche samajhte hain ham brahman hain, hamko sachchi yaatra sikhlaani hai। harek ko baap ka parichay dena hai। koi bhi manushyamaatra baap ko nahin jaante। baap to ek hi hai। baaki sabko apna-apna part mila hua hai। ek aatma ka part na mile doosre se। aatma to avinaashi hai, unke roop mein koi farka nahin ho sakta। shareeron mein farka hai aur har ek aatma ke part ka farka hai। har ek aatma jo star light hai, usmein avinaashi part bhara hua hai। imperishable part hai। yeh baaten bhi tum hi jaante ho, nambarvaar purushaartha anusaar। jaise aatma hai, gaate bhi hain chamakta hai bhrakuti ke beech ajab sitaara। ajab hai na। kitna chhota-sa star, usmein 84 janmon ka part bhara hua hai। yeh baaten jab sunenge to bahut aaphreen denge ki barobar inhon ko to padhaane vaala woh paramatma hai। tumko to sabko padhaana hai। bhal Christian log angreji jaanne vaale hain, tum hindi mein bolo, phir interpreter english mein translate kar sunaata jaayega। unke paas interpreter (anuvaad karne vaale) hote hain। baap ka parichay to dena hai। jaise baap duhkh harta, sukh karta hai, vaise tum bachchon ko bhi banna hai। har ek ko raasta bataana hai। auron ko bhi sukhdaai banaana - yeh tum bachchon ka farja hai। tum khud baap se itna varsa le rahe ho to phir auron ko bhi dena pade। yeh hai mahaadaan। yeh ek-ek versions laakhon roopayon ka hai। shaastron ke versions agar laakhon roopaye ke hote to phir bhaarat itna kangaal kyon hota?

to tum bachchon ko samjhaana hai, baap ka parichay dena hai, woh bhi param aatma hai। roop bhi hai, basanta bhi hai। parantu avinaashi gyaan ratnon ki varsha kaise karen? zaroor shareer chaahiye। to baap aakar tum bachchon ko arthaat tumhaari aatma ko roop-basanta banaate hain। avinaashi gyaan ratnon ki dhaarna karni hai। mukh dvaara phir yeh daan dena chaahiye, jin ratnon ka koi moolya nahin kar sakta। us par bhi ek kahaani hai। to yeh dhaarna karni chaahiye। kehte hain na shivbaaba bam-bam bholaanaath bhar de jholi। yeh avinaashi gyaan ratnon se jholi bharni hai। phir vahaan to tumhaare mahal heere javaahron ke ban jaayenge। to yeh har ek ko samjhaana hai। jahaan baap rehte hain woh hai nirvaandhaam athva muktidhaam। buddha aadi ke liye kehte hain paar nirvaan gaya। to woh sabhi ka hom (ghar) hua na। woh baap ka bhi hom hai। baap abhi aaye hain sabko le jaane liye। athaah dhan de rahe hain। to baap ka parichay tum nahin denge to kaun denge? baap kehte hain yeh sab deh ke dharma hain ki main Christian hoon, phalaana hoon… yeh sab chhod ab mujh baap ko yaad karo। jisko tum bhakti maarga mein yaad karte aaye ho। gaaya bhi jaata hai ant mati so gati। granth mein bhi hai na - antakaal jo stri simre… ab kookar, sookar to ban nahin sakte। phir bhi janma to milta hai na। yahaan baap kehte hain - dehi-abhimaani bano, mujhe yaad karo। tum apne baap ko aur ghar ko bhool gaye ho। ab naatak poora hota hai phir repeat hona hai। islaami, bauddhi, Christian sab apna part repeat karte aaye hain। yeh drama anek baar repeat hota aaya hai। unka koi aadi ant nahin। drama ka aadi, ant to hai। phir-phir repeat hota rehta hai, automatically। yeh baaten jinki samjhi hui hain unko auron ko samjhaana pade ki aakar baap ko jaano। baap ko na jaanne se manushya orphan ban gaye hain। abhi samjho, pope kehte hain ki ladaai na karo to bhi woh maanenge thode hi। Christian logon ka bada hai pope। sabka guru hai। phir guru ki mat par kyon nahin chalte? yeh koi ki bhi baat maanne vaale nahin hain। baap hi aakarke mat dete hain to sabko samjhaana hai। dheere-dheere sab dharma vaale samjhenge। pahle tum sirf sindhi the, abhi sab aane lage hain। christians ko bhi baap ka parichay dena chaahiye jisse ve bhi baap se varsa lene ke hakdaar banen। ismen thakna nahin chaahiye। yeh pradarshani to bahut jor se chalegi। serviceable bachchon ke oopar service ki badi jimmevaari hai। vahi dil par chadhenge aur phir takhta par savaar honge। mahaadaani banna hai aur phir yaad karna hai baap ko। woh insure karte hain doosre janma liye। eeshvar arth va krishna arth daan karte hain। vaastav mein krishna to hai hi saahookaar, unka to daan liya hua hai, baap se varsa liya hua hai। svarga ka prince bana to svarga sthaapan karne vaale se varsa liya na। parantu kaise liya? yeh kiski buddhi mein nahin baithta। baap ne hi krishna ko bhi varsa diya। varse ko hi daan bhi kaha jaata hai। kanya daan karte hain na। abhi baap kehte hain main tumko avinaashi gyaan ratnon ka daan karne aaya hoon, iske liye prabandha rachna pade। bhal kharcha ho, harja nahin। hamaare paas bachchon ne saakshaatkaar to kiya hai। ibraaham, buddha, Christ aadi sab bade-bade ant mein aate hain। zaroor sunenge tab to pad paayenge na। bachchon ko to khush hona chaahiye। Christian ka bhaarat se connection bahut hai। raajaai bhi li phir return bhi kar rahe hain। unhon ko to bhaarat ki bahut sambhaal karni hai। agar bhaarat par koi chadhaai kar le to sab paise khatma ho jaaen। unhon ke paise to bahut diye hue hain। saari rakam hi khalaas ho jaae isliye har tarah se koshish karenge bhaarat ko bachaane ki। inhon ko madad to chaahiye zaroor aur return bhi chaahiye। unko to sambhaal karni hi hai। baba jaante hain bhaarat gareeb hai to vahaan se bhi madad karaate hain aur khud bhi aakar madad de rahe hain। abhi woh madad dete hain aur bhavishya ke liye phir baap madad dete hain। to bahut achha ek mandap banaakar vahaan sab Christian ko nimantran dena hai। kitne achhe-achhe chitra hain, inmen saari knowledge hai। din-pratidin buddhi ka taala khulta jaayega।

tum jaante ho chhoti aatma mein kitna bhaari part bhara hua hai! saainsadaan bhi is baat par bada wonder khaayenge। saainsadaan bhi samajhte hain ki koi hamko prerta hai। vinaash to hona hai zaroor। yeh drama mein noondh hai। shankar ki koi baat nahin, yeh to nimitta karke naam rakha hai। natural calamities bhi honi hai। yeh baaten sunne se woh bade khush honge, tumko bahut thanks denge। bahut foreigners aayenge। ghar baithe aate hain to daan zaroor dena hai। apne liye to is samay sab orphan, kangaal hain। saari duniya chhore aur chhoriyaan hain kyonki father-mother ka hi parichay nahin hai। to tum vishwa ke maalik bante ho। to bachchon ko service ka bhi nasha hona chaahiye। taar bhi denge ki aakar samjho, baap aaye hue hain sab aatmaon ko le jaane। aatma khush hoti hai - barobar ab naatak poora hua, ab baba aaye hain le jaane। phir ham sukhdhaam mein aayenge। aadhaakalpa pujaari ban baap ko yaad kiya hai। ab phir poojya banna hai। to khushi mein khaggiyaan maarni chaahiye। khushi na hone se phir rote rehte। jo rote hain so khote hain। haan, aise sukh dene vaale baap ki yaad mein prem ke aansu aaye to woh maala ke daane hain। baap ki shreemat se shreshtha banenge। yeh baap bhi kehte hain kadam-kadam par shivbaaba ki mat par chalna hai। shreemat hi shreshtha hai। badi oonchi padhaai hai। teerthon par manushya jaate hain, bahut kathinaaeeyaan saamne aati hain। aage to paidal jaate the, abhi government ne sahaj kar diya hai। to baap samjhaate hain kadam-kadam par shreemat par chalna hai। saavdhaani se chadhe to chaakhe vaikuntha ras, gire to chaknaachoor। kadam-kadam par raay leni hai। chitthi likho shivbaaba through brahma athva brahmaakumaariyaan, to shivbaaba yaad padega। parantu bahut bachche likhne mein bhool jaate hain। ek din sabki buddhi ka taala zaroor khulne ka hai। bachchon ko service ka bahut shauk chaahiye। service bahut karni hai। yeh bhi drama mein noondh hai। kharcha aapehi aayega। anaayaas hi sab kuchh hota jaayega। baap kehte hain tumko 3 pair prithvi ka milna bhi mushkil hai। phir bhi tumne kalpa pahle bhaarat ko svarga banaaya hi hai।

achha, samjhaate to bahut hain, dhaarna bhi ho। jaasti bhaari maal khaane se phir hazam nahin hota hai। pradarshani mein bhal aate to bahut hain parantu ek ko bhi yeh nishchay nahin baithta hai ki inhon ko padhaane vaala athva raajayog sikhlaane vaala baap hai। pahle-pahle yeh nishchay bithaana hai। tum samjha sakte ho yeh hai prajaapita brahmaakumaar kumaariyaan। rachayita to ek hi parampita paramatma hai। baap se hi varsa milna hai। baap ka jab tak bachcha na banen to varsa mil na sake। bhakton ko phal dene vaala hai baap। itne sab brahmaakumaar-kumaariyaan hain। prajaapita brahma ko bhi creator kehte hain। abhi rachna hoti hai nai duniya ki। bhagvaanuvaach main tumko raajayog sikhaata hoon। achha!

meethe-meethe lucky sitaaron prati gyaan soorya, gyaan chandrama ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) baap ke diltakhta par baithne ke liye service ki javaabdaari leni hai। mahaadaani zaroor banna hai। gyaan daan karne mein kuchh kharcha ho to harja nahin।

2) oonchi chadhaai hai isliye bahut saavdhaani se chalna hai। kadam-kadam par shreemat lete rehna hai।

vardaan:- lagan ki agni mein sab chintaaon ko samaapta karne vaale nishchaybuddhi nishchint bhav

jo bachche nishchaybuddhi hain woh sabhi baaton mein nishchint rehte hain। chintaayen saari mit gai। baap ne chintaaon ki chita se uthaakar diltakhta par bitha diya। baap se lagan lagi aur lagan ke aadhaar par, lagan ki agni mein sab chintaayen samaapta ho gai, jaise thi hi nahin। na tan ki chinta, na man mein koi vyartha chinta aur na dhan ki chinta। kya hoga… gyaan ki shakti se sab jaan gaye isliye sab chintaaon se pare nishchint jeevan ho gai।

slogan:- aise achal adol bano jo kisi bhi prakaar ki samasya buddhi rupi paanv ko hila na sake।