सोमवार 30 अक्टूबर 2023 की दैनिक मुरली

30-10-2023 praatahmurli om shanti "baapdaada"' madhuban

“meethe bachche - abhi tum bahut bade steamer mein baithe ho, tum khaari channel ko paar kar ksheersaagar mein ja rahe ho, tumhaara langar uth chuka hai''

prashn:- bachchon ko vishesh thakaavat kis baat mein aati hai? thakaavat aane ka mukhya kaaran kya hai?

uttar:- bachche chalte-chalte yaad ki yaatra mein hi thak jaate hain, ismen thakaavat aane ka mukhya kaaran hai sangadosh। sang aisa mil jaata hai jo baap ka haath chhod dete hain। kaha jaata hai sang taare, kusang bore। sang mein aakar steamer se paanv neeche utaara to maaya kachcha kha legi isliye baba bachchon ko saavdhaan karte hain - bachche, samartha baap ka haath kabhi nahin chhodna।

geet:- maata O maata…

om shanti। roohaani baap roohaani bachchon ko kehte hain - bachche, om shanti। isko bhi mahaamantra kaha jaata hai। aatma apne svadharma ka mantra japti hai। mujh aatma ka svadharma hai shant। mujhe shanti ke liye koi jangal aadi mein jaane ki darkaar nahin। main aatma shant swaroop hoon, yeh mere organs hain। aavaaj karna, na karna, yeh to mere haath mein hai। parantu yeh gyaan na hone kaaran dar-dar bhatakte hain। is par ek kahaani bhi hai - ek raani ka haar gale mein tha lekin woh bhool gai, use laga ki mera haar kho gaya hai, to woh baahar dhoondh rahi thi। phir koi ne kaha - haar to gale mein pada hai। yeh drishtaanta dete hain। manushya dar-dar bhatakte hain na। sannyaasi aadi bhi kehte hain man ki shanti kaise ho, parantu aatma mein hi man buddhi hai। aatma in organs mein aane se talkie banti hai। baap kehte hain tum aatma apne svadharma mein raho। is deh ke sab dharma bhool jaao। baar-baar samjhaate hain to bhi koi-koi kehte hain hamko shant mein bithaao, neshtha karaao। yeh bhi kehna wrong hai। ek aatma doosri aatma ko kehti hai ki mujhe shant mein bithaao। are, kya tumhaara svadharma shant nahin hai? tum aapehi nahin baith sakte ho? chalte-phirte tum svadharma mein kyon nahin tikte ho? jab tak raasta bataane vaala baap nahin mila tab tak svadharma mein koi tik nahin sakte। unhonne to kah diya hai aatma so paramatma to svadharma mein tik nahin sakte। is ashaanta desh mein tumhaara yeh antim janma hai। abhi tumko chalna hai shant desh mein, phir jaana hai sukhdhaam mein। yahaan to ghar-ghar mein ashaanti hai। satayug mein ghar-ghar mein roshni hai। to yahaan andhiyaara hai, yahaan har baat mein thokar khaani padti hai। ghar-ghar mein andhiyaara hai isliye deep jalaate hain। jab raavan marta hai phir deepmaala manaate hain। vahaan to raavan hota nahin। to sadaiv deepmaala hi hai। yahaan raavan raajya ke kaaran 12 maas ke baad deepmaala manaate hain। raavan mara aur lakshmi-naaraayan ka coronation hua। unki khushi manaate hain। satayug mein jab lakshmi-naaraayan takhta par baithte hain to coronation manaate hain। tum jaante ho abhi raavan raajya poora hoga। bhaarat ko phir se raajya-bhaagya milna hai। abhi koi raajya nahin hai। baap se raajya milna hai। behad ka baap behad ki raajdhaani ka varsa dete hain। baap kehte hain main tumko sada sukh ka varsa dene vaala hoon, baaki aur sabhi tumko duhkh dene vaale hain। karke koi sukh bhi denge to alpakaal kshanbhangur। woh sukh hai kaag vishta samaan। main tumko itna sukh deta hoon jo phir kabhi duhkh hoga hi nahin isliye is deh sahit deh ke sambandh rakhne vaalon ko bhoolo। yeh deh aur deh ke sambandhi tumko duhkh dene vaale hain, inko chhod mujh ek ko yaad karo। yaad karna hota hai - savere amritvele। bhaktimaarga mein bhi manushya savere uthte hain। koi kiski mat par kya karte, koi kya karte hain? baap samjhaate hain savere uthkar jitna ho sake apne ko aatma samajh mujh baap ko yaad karo। yeh hai baap ka farmaan।

bhakta bhagwan ko yaad bhi karte hain aur phir kah dete sab bhagwan hain। abhi woh samajhte nahin hain। ek din woh sab tumhaare mitra banenge। kahenge yeh baat to theek hai। eeshvar sarvavyaapi kehna goya apna aur bhaarat ka beda garka karna hai। doosri baat - bhaarat ko svaraajya ka makkhan dilaane vaala hai baap, unke badle phir naam rakh diya hai bachche ka, jis shreekrishna ko makkhan milta hai। to manushya samajhte hain bhaarat ko makkhan dilaane vaala shreekrishna hai। baap ke badle bachche ka naam daal anartha kar diya hai। ab saari duniya ka bhagwan koi shreekrishna to ho nahin sakta। manushyon ne raavan ki mat par apne aapko shraapit kiya hai। baap hai khivaiya, tum sab ho naeeya (naanv)। gaate hain na - naeeya meri paar karo। abhi tum baithe ho - bade steamer mein। chandrakaant vedaanta mein steamer ki baat hai। woh bhi abhi ka banaaya hua hai। tum steamer mein us paar ja rahe ho। vishay saagar se amrit athva ksheersaagar mein jaate ho। jaise london se khaari channel se jo steamer paar karte hain, unko inaam milta hai। yeh phir narka se svarga jaana hai। vishay saagar khaari hai। tum bade steamer par baithe ho। tum chal pade ho, langar uth gaya hai। tum ja rahe ho, us paar jaana hai। steamer chalte-chalte port aate hain। vahaan par koi utarte hain, koi chadhte hain। koi khaan-paan ke peechhe jaate hain to rah jaate hain। is par ek kahaani banaai hui hai। krishna ko batuk mahaaraaj likh diya hai। woh steamer ka captain hai। phir steamer se chalte-chalte kai utar jaate hain to vahaan maaya ajgar baithi hai। mahaarthiyon ko bhi hap kar kha jaati hai। padhaai ko chhod dete hain goya nishchaybuddhi na rahe। phir beech saagar mein gir padte hain।

tumne dekha hai - panchhi marte hain to phir cheetinyon ka jhunda aakar unko uthaate hain। to yeh 5 vikaaron roopi bhoot ekdam kachcha khaakar hap kar lete hain। is par badi kahaani likhi hui hai। samjho koi steamer mein baithe hain - guarantee bhi likhte hain, photo bhi apna bhej dete hain। phir agar kiske sang mein bigad gaye to padhaai chhod denge, phir woh chitra unko vaapas bhej denge। is samay maaya hai tamopradhaan। eeshvar ka haath chhoda to asur pakad lenge। aise bahut chalte-chalte haath chhod utar jaate hain। samaachaar aate hain - inko krodh ke bhoot ne, moh ke bhoot ne pakad liya hai। pahle to nashtomoha banna pade। moh ek se rakhna chaahiye। yeh hai mehnat। moh ki janjeeren bahut lagi hui hain। ab ek se buddhiyog lagaana hai। jaise manushya bhakti baith karte hain to buddhi dhandhe taraph, ghar taraph chali jaati hai। yahaan bhi tumhaara aise hoga। chalte-chalte tumko bachcha yaad aa jaayega। pati yaad aa jaayega। baap kehte hain in janjeeron se buddhiyog hataakar ek ko yaad karo। agar ant samay aur koi smriti aai to ant-kaal jo pati simre… pichhaadi mein sivaae shivbaaba ke aur koi yaad na aaye, aisa abhyaas daalna hai। savere uth baap ko yaad karo। baba ham aapke paas aaye hain - zaroor ham svarga ke maalik banenge। baap aur varse ko arthaat alpha aur be ko yaad karna hai। alpha allaah, be baadshaahi। aatma bindi hai। yahaan manushya teeka lagaate hain to koi bindi lagaate hain, koi lamba tilak lagaate hain, koi crown muaaphik karte hain, koi chhota star laga dete hain, koi heera lagaate hain। baap kehte hain tum aatma ho। jaante ho aatma star misal hai। us aatma mein saare drama ka record bhara hua hai। ab baap farmaan karte hain nirantar mujh baap ko yaad karo aur sabse buddhiyog todo। yeh lakshya aur koi bhi de na sake। baap kehte hain tumhaare sir par janma-janmaantar ke paap hain। woh yaad ke sivaae bhasma nahin honge। ever healthy banne liye baap ko yaad karna hai। baap se hi varsa milta hai। ever healthy aur ever wealthy-pane ka। health-wealth hai to baaki aur kya chaahiye! health hai, wealth nahin to bhi maja nahin। wealth hai, health nahin to bhi maja nahin। aatma ko pahle baap ko yaad karna hai to vikarma vinaash honge aur 21 janmon ke liye health milegi aur svadarshan chakradhaari banenge to phir 21 janmon liye wealth milegi। kitni sahaj baat hai। hamne 84 janma aise chakra lagaaya hai। abhi sab khaak ho jaane vaale hain, unse dil kyon lagaayen? dil unse lagaani hai jo nai duniya ki baadshaahi de। aatmaon se baat karte hain - bachche, ab is shareer ko bhool apne ko ashareeri samajh mujhe yaad karo। yeh shareer tumko part bajaane ke liye mila hai। savere uthkar yeh simran karna chaahiye। saajan jo khaadi se paar le jaate hain, unko yaad karna hai, baaki aur sab vishay saagar mein doobne vaale hain। baap hai paar karne vaala, unko khivaiya, baagvaan bhi kaha jaata hai। tumko kaante se phool banaakar svarga mein bhej dete hain। phir svarga mein tum kabhi duhkh nahin dekhenge isliye unko kehte hain duhkh harta, sukh karta। har-har mahaadev kehte hain na। shiv ko hi kahenge। yeh hai brahma, vishnu, shankar ka bhi baap। vahi baap 21 janma ke liye sukh ka varsa dete hain to usko yaad karna chaahiye na, ismen chaahiye himmat। yaad karte-karte thak jaate hain to chalna hi banda kar dete hain। sang aisa mil jaata jo chhod dete hain isliye kaha jaata hai sang taare, kusang bore। baahar jaane se kusang milega, to nasha ud jaayega। koi kahenge brahmaakumaariyon ke paas to jaadu hai, lag jaayega। inke paas nahin jaana। pareekshaayen to aayengi। aise bahut hote hain - 10 varsha rahkar bhi phir sangadosh mein aa jaate hain। paanv neeche utaara aur maaya kachcha kha leti। yeh bhi nishchay karte hain ki baap se svarga ka varsa zaroor milta hai। phir bhi maaya ke bade toofaan aate hain, yeh yuddha ka maidaan hai। aadhaakalpa maaya ka raajya chala hai। ab un par vijay paani hai। raavan ko jalaate hain phir ek din khushi manaate hain। yeh sab artificial sukh hai। real sukh milta hai sukhdhaam mein। baaki narka ka sukh hai kaag vishta ke samaan। svarga mein to sukh hi sukh hai। tum sukhdhaam ke liye purushaartha kar rahe ho। boxing mein kabhi maaya ki jeet, kabhi bachchon ki jeet hoti hai। yeh yuddha raat din chalti hai। ustaad ka haath poora pakadna hai। ustaad sarvashaktimaan, samartha hai। haath chhod denge to phir sarvashaktimaan bhi kya kare? haath chhoda yeh gaya। steamer ki baat shaastron mein bhi hai। ab steamer ja raha hai। baaki thode din hai। vaikuntha to saamne dekhne mein aata hai। pichhaadi ke time to ghadi-ghadi vaikuntha ke drishya dekhte rahenge। jaise shurooaat mein bahut dekhte the। pichhaadi mein bhi tumko bahut saakshaatkaar hoga। jo yahaan honge, jo himmat se haath pakad kar rakhte hain, vahi ant samay yeh sab dekhenge। bachchiyaan batlaane lag padengi - baba, yeh daasi banne vaali hai, yeh phalaani banne vaali hai। phir aphsos karenge - ham daasi ban gaye। mehnat nahin ki to aur kya haal hoga? phir bahut pachhtaana hoga। shurooaat mein tumne bahut khelpaal dekhe hain। geet hai na jo hamne dekha… to jaise samay najdeek aata jaayega, sab batlaate rahenge phir padhaai to ho na sake। baap kahenge tumko kitna samjhaaya, tum shreemat par na chale to yeh haal hua, ab kalpa-kalpa yeh pad milta rahega isliye baba kehte hain apna purushaartha karte raho, maat-pita ko follow karo। kai kapoot bachche bhi hote hain na। maaya ke vash ho tang karte hain phir bahut bhaari saja khaayenge, pad bhi bhrashta ho jaayega। sajaaon ka bhi bachchiyon ne saaksha-tkaar kiya hai। duniya mein hai aasuri sang aur yahaan hai eeshvareey sang। baba sab baaten samjhaate hain phir aise koi na kahe ki hamko kya pata? vinaash ke samay manushya bahut traahi-traahi karne lag padenge। tum bahut saakshaatkaar karte rahenge। mirooa maut malooka shikaar… isi prakaar se tum dance karte rahenge। tum dekhte rahenge ki vinaash ke baad phir hamaare mahal kaise bante hain। jo jeete rahenge woh sab dekhenge। baap ka bankar phir agar faarakti de di to dekh thode hi sakenge। achha!

meethe-meethe sikeeldhe 5 hajaar varsha baad phir se aakar mile hue bachchon prati nambarvaar purushaartha anusaar yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) samartha baap ka haath pakadkar rakhna hai, ek baap se hi dil lagaani hai, savere uthkar yaad mein baithna hai।

2) sangadosh se apni sambhaal karni hai। kusang mein aakar kabhi padhaai nahin chhodni hai।

vardaan:- khushi ki goli va injection dvaara svayan ki davaai svayan karne vaale knowledgeful bhav

brahman bachche apne beemaari ki davaai svayan hi kar sakte hain। khushi ki khuraak second mein asar karne vaali davaai hai। jaise doctors powerful injection laga dete hain to change ho jaate। aise brahman svayan hi svayan ko khushi ki goli de dete va khushi ka injection laga dete to beemaari ka roop badal jaata। knowledge ki light might shareer ko bhi chalaane mein bahut madad deti hai। koi bhi beemaari aati hai to yeh bhi buddhi ko rest dene ka saadhan hai।

slogan:- jo man ki ekaagrata dvaara sarva siddhiyaan praapta kar lete hain vahi siddhi swaroop bante hain।