मंगलवार 16 जनवरी 2024 की दैनिक मुरली

16-01-2024 praatahmurli om shanti "baapdaada"' madhuban

“meethe bachche - yahaan tum vanvaah mein ho, achha-achha pahanna, khaana… yeh shauk tum bachchon mein nahin hona chaahiye, padhaai aur character par poora-poora dhyaan do''

prashn:- gyaan ratnon se sada bharpoor rahne ka saadhan kya hai?

uttar:- daan। jitna-jitna doosron ko daan karenge utna svayan bharpoor rahenge। sayaane woh jo sunkar dhaaran kare aur phir doosron ko daan kare। buddhi roopi jholi mein agar chhed hoga to bah jaayega, dhaarna nahin hogi isliye kaayde anusaar padhaai padhni hai। 5 vikaaron se door rehna hai। roop-basanta banna hai।

om shanti। roohaani baap roohaani bachchon ko samjhaate hain। roohaani baap bhi karmendriyon se bolte hain, roohaani bachche bhi karmendriyon se sunte hain। yeh hai nai baat। duniya mein koi manushya aise kah na sake। tumhaare mein bhi nambarvaar purooshaartha anusaar samjhaate hain। jaise teacher padhaate hain to student ka register show karta hai। register se unki padhaai aur chalan ka pata pad jaata hai। mool hai hi padhaai aur character, yeh hai eeshvareey padhaai jo koi padha na sake। rachta aur rachna ke aadi-madhya-ant ki, srishti chakra ki knowledge hai, yeh koi bhi manushya saari duniya mein nahin jaante। rishi muni jo itne padhe likhe authority hain, woh praacheen rishi muni khud kehte the ki ham rachta aur rachna ko nahin jaante। baap ne hi aakar pahchaan di hai। gaaya bhi jaata hai - yeh hai kaanton ka jangal। jangal ko aag zaroor lagti hai। phoolon ke bageeche ko kabhi aag nahin lagti kyonki jangal saara sookha hua hai। bageecha hara hota hai। hare bageeche ko aag nahin lagti। sookhe ko aag jhat lag jaati hai। yeh hai behad ka jangal, inko bhi aag lagi thi। bageecha bhi sthaapan hua tha। tumhaara bageecha ab gupta sthaapan ho raha hai। tum jaante ho ham bageeche ke phool khushboodaar devta ban rahe hain, uska naam hai hi svarga। ab svarga sthaapan ho raha hai। wonder hai, tum kitna bhi logon ko samjhaate ho parantu kiski buddhi mein baithta nahin hai, jo is dharma ke nahin honge unki buddhi mein baithega bhi nahin। ek kaan se sunenge doosre se nikaal denge। satayug treta mein bhaaratvaasi kitne thode honge। phir dvaapar kaliyug mein kitni vriddhi ho jaati hai। vahaan ek do bachche yahaan 4-5 bachche to zaroor vriddhi ho gai। bhaaratvaasi hi ab hindu kahlaate hain। vaastav mein devta dharma ke the aur koi bhi dharma vaala apne dharma ko nahin bhoolta। yeh bhaaratvaasi hi bhoole hue hain। dekho is samay kitne dher manushya hain। itne sab to gyaan aakar nahin lenge। har ek apne janmon ko bhi samajh sakte hain। jisne poore 84 janma liye honge, woh zaroor puraane bhakta honge। tum samajh sakte ho ki hamne kitni bhakti ki hai। thodi ki hogi to gyaan bhi thoda hi uthaayenge aur thodon ko samjhaayenge। bahut bhakti ki hogi to gyaan bhi bahut uthaayenge aur bahuton ko samjhaayenge। gyaan nahin uthaate to samjha bhi kam sakte, isliye unhein phal bhi thoda milta hai। hisaab hai na।

baap ko ek bachche ne hisaab nikaal bheja to islaamiyon ke itne janma, bauddhiyon ke itne janma hone chaahiye। buddha bhi dharma sthaapak hai। unke pahle koi buddha dharma ka tha nahin। buddha ki soul ne pravesh kiya। usne buddha dharma sthaapan kiya। phir ek se vriddhi hoti hai। woh bhi ek prajaapita hai। ek se kitni vriddhi hoti hai। tumko to raaja banna hai - nai duniya mein। yahaan to vanvaah mein ho। kisi cheez ka shauk nahin rehna chaahiye। ham achhe kapde aadi pahnen, yeh bhi deh-abhimaan hai। jo mila so achha। yeh duniya hi thoda samay hai। yahaan achha kapda pahna, vahaan phir kam ho jaayega। yeh shauk bhi chhodna hai। aage chalkar tum bachchon ko aapehi saakshaatkaar hote rahenge। tum khud kahenge yeh to bahut service karte hain, kamaal hai। yeh zaroor oonch number lenge। phir aap samaan banaate rahenge। din pratidin bageecha to bada hone ka hai। jitne devi-devta satayug ke va treta ke hain, woh sab gupta yahaan hi baithe hain phir pratyaksha ho jaayenge। abhi tum gupta pad pa rahe ho। tum jaante ho ham padh rahe hain - mrityulok mein, pad amarlok mein paayenge। aisi padhaai kabhi dekhi। yeh wonder hai। padhna puraani duniya mein, pad paana nai duniya mein। padhaane vaala bhi vahi hai jo amar-lok ki sthaapna aur mrityulok ka vinaash karaane vaala hai। tumhaara yeh purooshottam sangamayug bahut chhota hai, inmen hi baap aate hain - padhaane ke liye। aane se hi padhaai shuru ho jaati hai। tab baap kehte hain likho - shiv jayanti so geeta jayanti। inko manushya nahin jaante। unhonne shreekrishna ka naam rakh diya hai। ab yeh bhool jab koi samjhe। kitne bade-bade aadmi museum mein aate hain, aise nahin ki woh baap ko jaante hain, kuchh nahin isliye baba kehte hain form bharaao to pata lage ki kuchh seekha hai। baaki yahaan aakar kya karenge। jaise saadhu santa mahaatma ke paas jaate hain, yahaan woh baat nahin। inka to vahi saadhaaran roop hai। dress mein bhi kuchh farka nahin isliye koi samajh nahin sakte hain। samajhte hain yeh to jauhri tha। pahle tha vinaashi ratnon ka jauhri। abhi bane hain avinaashi ratnon ka jauhri। tum sauda bhi behad ke baap se karte ho। jo bada saudaagar, jaadoogar, ratnaagar hai। to har ek apne ko samjhe ki ham roop basanta hain। hamaare andar gyaan ratna laakhon roopaye ke hain। in gyaan ratnon se tum paarasbuddhi ban jaate ho। yeh bhi samajhne ki baat hai। koi achhe sayaane hain jo in baaton ko dhaaran karte hain। agar dhaarna nahin hoti to koi kaam ke nahin। samjho uski jholi mein chhed hai, bah jaata hai। baap kehte hain main tumko avinaashi gyaan ratnon ka daan deta hoon। agar tum daan dete rahenge to bhartu rahenge। nahin to kuchh bhi nahin, khaali hain। padhte nahin, kaayde anusaar chalte nahin। ismen subject badi achhi hain। 5 vikaaron se tumko bilkul door jaana hai।

baap ne samjhaaya hai yeh jo raakhi bandhan manaate hain woh bhi is samay ka hai। parantu manushya arth nahin jaante to raakhi kyon baandhi jaati hai। vo to apvitra hote rehte raakhi baandhate rehte। aage brahman log baandhate the। ab bahnen bhaai ko baandhati hain - kharchi ke liye। vahaan pavitrata ki baat nahin। badi fashion vaali raakhiyaan banaate hain। yeh deevaali dashahra sab sangam ke hain। jo baap ne act ki hai woh phir bhakti maarga mein chalti hai। baap tumko sachchi geeta sunaae yeh lakshmi-naaraayan banaate hain। abhi tum first grade mein jaate ho। satya naaraayan ki katha sunkar tum nar se naaraayan bante ho। ab tum bachchon ko saari duniya ko jagaana hai। kitni yog ki taakat chaahiye। yog ki taakat se hi tum kalpa-kalpa svarga ki sthaapna karte ho। yogbal se hoti hai sthaapna, baahubal se hota hai vinaash। akshar hi do hain - alpha aur be। yogbal se tum vishwa ke maalik bante ho। tumhaara gyaan bilkul hi gupta hai। tum jo satopradhaan the, woh ab tamopradhaan bane ho। phir satopradhaan banna hai। har ek cheez nai se puraani zaroor hoti hai। nai duniya mein kya nahin hoga। puraani duniya mein to kuchh bhi nahin hai। jaise khokha। kahaan bhaarat svarga tha, kahaan bhaarat ab narka hai। raat din ka farka hai। raavan ka but banaakar jalaate hain, parantu arth nahin jaante। tum ab samajhte ho yeh kya-kya kar rahe hain। tumhaare mein bhi kal agyaan tha, aaj gyaan hai। kal narka mein the, aaj svarga mein ja rahe ho - real। aise nahin jaise duniya vaale log kehte hain svargavaasi hua। tum ab svarga mein jaayenge to phir narka hoga hi nahin। kitni samajhne ki baat hai। hai bhi second ki baat। baap ko yaad karo to vikarma vinaash honge। yeh sabko bataate raho। bolo, tum in (lakshmi-naaraayan) jaise the phir 84 janma lekar yeh bane ho। satopradhaan se tamopradhaan bane ho phir satopradhaan banna hai। aatma to vinaash nahin hoti। baaki unko tamopradhaan se satopradhaan phir banna hi pade। baba kisam-kisam se samjhaate rehte hain। meri battery kabhi puraani hoti nahin। baba sirf kehte hain apne ko bindu aatma samjho। kehte hain inki aatma nikal gai। to aatma sanskaaron anusaar ek shareer chhod doosra leti hai। ab aatmaon ko ghar jaana hai। yeh bhi drama hai। srishti chakra repeat hota hi rehta hai। pichhaadi mein hisaab nikaal kehte hain duniya mein itne manushya hain। aise kyon nahin kehte itni aatmaayen hain। baap kehte hain bachche mujhe kitna bhool gaye hain। phir sabka mujhe hi kalyaan karna hai, tab to baap ko pukaarte hain। tum baap ko bhool jaate ho, baap bachchon ko nahin bhoolte। baap aate hain patiton ko paavan banaane। yeh hai gaoomukh। baaki bail aadi ki baat nahin। yeh bhaagyashaali rath hai। baba tum bachchon ko kehte hain shivbaaba hamko shrringaarte hain। yeh pakka yaad rahe। shivbaaba ko yaad karne se bahut phaayda hai। baba humein inke dvaara (brahma dvaara) padhaate hain, to inko nahin yaad karna hai। satguru ek shivbaaba hai, us par tumhein balihaar jaana hai। yeh bhi un par balihaar gaya na। baap kehte hain maamekam yaad karo। bachche jaate hain satayugi phoolon ki duniya mein, phir kaanton mein moh kyon hona chaahiye। 63 janma to bhakti maarga ke shaastra padhte pooja karte aaye ho। tumne pooja bhi pahle shivbaaba ki ki hai, tab to somnaath ka mandir banaaya hai। mandir to sabhi raajaaon ke ghar mein the, kitne heere javaahar the। peechhe aakar chadhaai ki। ek mandir se kitna sona aadi le gaye। tum aise dhanvaan vishwa ke maalik bante ho। yeh dhanvaan the, vishwa ke maalik the parantu inke raajya ko kitna samay ho gaya hai, koi ko pata nahin hai। baap kehte hain 5 hazaar varsha hue। 2500 varsha raajya kiya, baaki 2500 varsha mein itne math panth aadi vriddhi ko paate hain।

tum bachchon ko bahut khushi honi chaahiye ki hamko behad ka baap padhaate hain। athaah milkiyat milti hai। dikhaate hain saagar se devta nikle ratnon ki thaaliyaan bharkar aaye। ab tumko gyaan ratnon ki thaaliyaan bhar bharkar milti hain। baap to gyaan ka saagar hai। koi achhi reeti thaali bharte hain, koi ki bah jaati hai। jo achhi reeti padhenge, padhaayenge woh zaroor achha dhanvaan banenge। raajdhaani sthaapan ho rahi hai। yeh drama mein noondh hai। jo achhi reeti padhte hain unko hi scholarship milti hai। yeh hai eeshvareey scholarship, avinaashi। woh hai vinaashi। seedhi badi wonderful hai। 84 janmon ki kahaani hai na। baap kehte hain seedhi ki itni badi translight banaao jo door se bilkul saaph dikhaai de। manushya dekhkar wonder khaayenge। phir tumhaara naam bhi baala hota jaayega। abhi jo pheri pahankar (chakra lagaakar) jaate hain woh pichhaadi mein aayenge। do chaar baar pheri pahni, takdeer mein hoga to jam jaayenge। shama to ek hi hai, kahaan jaayenge। bachchon ko bahut meetha banna hai। meetha tab banenge jab yog mein rahenge। yog se hi kashish hogi। jab tak kat (junk) nahin nikli hogi to kisko kashish bhi nahin hogi। yeh seedhi ka raaz sab aatmaon ko bataana hai। dheere-dheere nambarvaar sab jaante jaayenge। yeh hai drama। world ki history-geography repeat hoti rehti hai। jisne yeh samjhaaya, usko yaad karna chaahiye na। baap ko omni present kehte hain lekin vahaan to omni present hai maaya, yahaan hai baap kyonki second mein aa sakta hai। tumko samajhna chaahiye ki baba ismen baitha hi hai। karan-karaavanhaar hai na। karta bhi hai, karaata bhi hai, bachchon ko direction dete hain। khud bhi karte rehte hain। kya kar sakte hain, kya nahin kar sakte hain - is shareer mein, woh hisaab karo। baba khaate nahin vaasna lete hain। achha!

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) roop-basanta ban apni buddhi roopi jholi avinaashi gyaan ratnon se sada bharpoor rakhni hai। buddhi roopi jholi mein koi chhed na ho। gyaan ratna dhaaran kar doosron ko daan karna hai।

2) scholarship lene ke liye padhaai achhi tarah padhni hai। poora vanvaah mein rehna hai। kisi bhi prakaar ka shauk nahin rakhna hai। khushboodaar phool bankar doosron ko banaana hai।

vardaan:- baaton roopi baadlon ko dekh ghabraane ke bajaae second mein cross karne vaale siddhi swaroop bhav

kai bachche shaastravaadiyon ki tarah baat banaane mein bahut hoshiyaar hain। aisi baaten banaate hain jo sunte hi baap ko bhi hansi aa jaati hai lekin doosre prabhaavit ho jaate hain। yeh anek prakaar ki vyartha baaten, vyartha register ka roll banaati rehti hain, isliye isse teevra udaan bharo, innocent bano। baap ko dekho baaton ko nahin। ye baaten hi baadal hain inhen second mein cross karne ki vidhi se siddhi swaroop bano।

slogan:- kisi bhi baat mein question mark uthaana arthaat vyartha ka khaata praarambha hona।

avyakti silence dvaara double light pharishta sthiti ka anubhav karo

ab apne dil ki shubh bhaavnaayen anya aatmaon tak pahunchaao। silence ki shakti ko pratyaksha karo। har ek brahman bachche mein yeh silence ki shakti hai। sirf is shakti ko man se, tan se emerge karo। ek second mein man ke sankalpon ko ekaagra kar lo tab pharishte roop dvaara vaayumandal mein silence ki shakti ke prakampanna phail sakenge।