बुधवार 10 अप्रैल 2024 की दैनिक मुरली

10-04-2024 praatahmurli om shanti "baapdaada"' madhuban

“meethe bachche - baap ke paas tum refresh hone aate ho, yahaan tumhein duniyaavi vibration se door sat ka sachcha sang milta hai''

prashn:- baba bachchon ki unnati ke liye sada kaun-si ek raay dete hain?

uttar:- meethe bachche, kabhi bhi aapas mein sansaari jharmui jhagmui ki baaten nahin karo। koi sunaata hai to suni-ansuni kar do। achhe bachche apne service ki duty poori kar baba ki yaad mein masta rehte hain। parantu kai bachche phaaltu vyartha baaten bahut khushi se sunte-sunaate hain, ismen bahut samay barbaad jaata hai, phir unnati nahin hoti।

om shanti। double om shanti kahen to bhi right hai। bachchon ko arth to samjha diya hai। main hoon aatma shant swaroop। jab mera dharma hai hi shant to phir jangalon aadi mein bhatakne se shanti nahin mil sakti hai। baap kehte hain main bhi shant swaroop hoon। yeh to bahut sahaj hai parantu maaya ki ladaai hone ke kaaran thodi difficulty hoti hai। yeh sab bachche jaante hain ki sivaae behad ke baap ke yeh gyaan koi de na sake। gyaan saagar ek hi baap hai। dehdhaariyon ko gyaan ka saagar kabhi nahin kaha ja sakta। rachayita hi rachna ke aadi-madhya-ant ka gyaan dete hain। woh tum bachchon ko mil raha hai। kai achhe ananya bachche bhi bhool jaate hain kyonki baap ki yaad paare misal hai। school mein to zaroor nambarvaar honge na। number hamesha school ke gine jaate hain। satayug mein kabhi number nahin gina jaata। yeh school hai, ise samajhne mein bhi badi buddhi chaahiye। aadha-kalpa hoti hai bhakti, phir bhakti ke baad gyaan saagar aate hain gyaan dene। bhakti maarga vaale kab gyaan de na saken kyonki sab dehdhaari hain। aise nahin kahenge - shivbaaba bhakti karte hain। woh kiski bhakti karenge! ek hi baap hai, jisko deh nahin hai। woh kiski bhakti nahin karte। baaki jo dehdhaari hain, woh sab bhakti karte hain kyonki rachna hai na। rachayita hai ek baap। baaki in aankhon se jo bhi dekha jaata hai, chitra aadi, woh sab hain rachna। yeh baaten ghadi-ghadi bhool jaati hain।

baap samjhaate hain tumko behad ka varsa baap bigar to mil na sake। baikuntha ki baadshaahi to tumko milti hai। 5 hazaar varsha pahle bhaarat mein inhon ka raajya tha। 2500 varsha sooryavanshi-chandravanshiyon ki raajdhaani chali। tum bachche hi jaante ho yeh to kal ki baat hai। sivaae baap ke aur koi bata na sake। patit-paavan woh baap hi hai। samjhaane mein bhi badi mehnat lagti hai। baap khud kehte hain koton mein koi samjhenge। yeh chakra bhi samjhaaya gaya hai। yeh saari duniya ke liye knowledge hai। seedhi bhi bahut achhi hai, phir bhi koi gurra-gurra karte hain। baba ne samjhaaya hai shaadi ke liye haal banaate hain, unko bhi samjhaakar drishti do। aage chalkar sabko yeh baaten pasanda aayengi। tum bachchon ko samjhaana hai। baba to kiske paas nahin jaayenge। bhagvaanuvaach - jo pujaari hain unko kabhi poojya nahin kah sakte। kaliyug mein ek bhi koi pavitra ho na sake। poojya devi-devta dharma ki sthaapna bhi sabse oonch te oonch jo poojya hain vahi karte hain। aadhaakalpa hai poojya phir aadhaakalpa pujaari hote hain। is baba ne dher guru kiye, abhi samajhte hain guru karna to bhakti maarga tha। abhi satguru mila hai, jo poojya banaate hain। sirf ek ko nahin, sabko banaate hain। aatmaayen sabki poojya satopradhaan ban jaati hain। ab to tamopradhaan, pujaari hain। yeh points samajhne ki hain। baba kehte hain kaliyug mein ek bhi pavitra poojya nahin ho sakta hai। sab vikaar se janma lete hain। raavan raajya hai। yeh lakshmi-naaraayan bhi punarjanma lete hain parantu woh hain poojya kyonki vahaan raavan hi nahin। akshar kehte hain parantu raamraajya kab aur raavan raajya kab hota hai, yeh kuchh bhi pata nahin hai। is samay dekho kitni sabhaayen hai। phalaani sabha, phalaani sabha। kahaan se kuchh mila to ek ko chhod doosre taraph chale jaate hain। tum is samay paarasbuddhi ban rahe ho। phir usmein bhi koi 20 percent bane hain, koi 50 percent bane hain। baap ne samjhaaya hai yeh raajdhaani sthaapan ho rahi hai। abhi oopar se bhi bachi hui aatmaayen aa rahi hain। circus mein koi achhe-achhe actors bhi hote hain to koi halke bhi hote hain। yeh hai behad ki baat। bachchon ko kitna achhi reeti samjhaaya jaata hai। yahaan tum bachche aate ho refresh hone ke liye, na ki hava khaane ke liye। koi pattharbuddhi ko le aate hain, to woh duniyaavi vibration mein rehte hain। abhi tum bachche baap ki shreemat se maaya par vijay praapta karte ho। maaya ghadi-ghadi tumhaari buddhi ko bhaga deti hai। yahaan to baba kashish karte hain। baba kabhi bhi koi ulti baat nahin karenge। baap to satya hai na। tum yahaan sat ke sang mein baithe ho। doosre sab asat sang mein hain। unko satsang kehna bhi badi bhool hai। tum jaante ho sat ek hi baap hai। manushya sat paramatma ki pooja karte hain lekin yeh pata nahin ki ham kiski pooja karte hain। to unko kahenge andhashradha। aagaakhaan ke dekho kitne followers hain। ve jab kahaan jaate hain to unko bahut bhenta milti hai। heeron mein vazan karte hain। nahin to heeron mein vazan kabhi kiya nahin ja sakta। satayug mein heere javaahar to tumhaare liye jaise patthar hain jo makaanon mein lagaate hain। yahaan koi aisa nahin hai, jisko heeron ka daan mile। manushyon ke paas bahut paise hain isliye daan karte hain। parantu woh daan paap aatmaon ko karne kaaran dene vaale par bhi chadhta hai। ajaamil jaisi paap aatmaayen ban padte hain। yeh bhagwan baith samjhaate hain, na ki manushya isliye baba ne kaha tha tumhaare jo chitra hain un par hamesha likha hua ho - bhagvaanuvaach। hamesha likho trimoorti shiv bhagvaanuvaach। sirf bhagwan kahne se bhi manushya moonjhenge। bhagwan to hai niraakaar, isliye trimoorti zaroor likhna hai। usmein sirf shivbaaba nahin hai। brahma, vishnu, shankar teenon hi naam hain। brahma devta namah, phir unko guru bhi kehte hain। shiv-shankar ek kah dete hain। ab shankar kaise gyaan denge। amraktha bhi hai। tum sab paarvatiyaan hon। baap tum sab bachchon ko aatma samajh gyaan dete hain। bhakti ka phal bhagwan hi dete hain। ek shivbaaba hai, eeshvar bhagwan aadi bhi nahin। shivbaaba akshar bahut meetha hai। baap khud kehte hain meethe bachchon, to baba hua na।

baap samjhaate hain - aatmaon mein hi sanskaar bhare jaate hain। aatma nirlep nahin hai। nirlemp hoti to patit kyon banti! zaroor lep-chhep lagta hai tab to patit banti hai। kehte bhi hain bhrashtaachaari। devtaayen hain shreshthaachaari। unhon ki mahima gaate hain aap sarvagun sampanna ho, ham neench paapi hain isliye apne ko devta kah nahin sakte hain। ab baap baith manushyon ko devta banaate hain। guroonaanak ke bhi granth mein mahima hai। sikkha log kehte hain sat shri akaal। jo akaal moorta hai, vahi sachcha satguru hai। to us ek ko hi maanna chaahiye। kehte ek hain, karte phir doosra hain। arth kuchh bhi jaante nahin hain। ab baap jo satguru hai, akaal hai, woh khud baith samjhaate hain। tumhaare mein bhi nambarvaar hain। sammukh baithe hain to bhi kuchh nahin samajhte hain। kai yahaan se nikle aur khalaas। baba mana karte hain - bachche, kabhi bhi sansaari jharmui jhagmui ki baaten nahin suno। kai to bahut khushi se aisi baaten sunte aur sunaate hain। baap ke mahaavaakya bhool jaate hain। vaastav mein jo achhe bachche hain, woh apni service ki duty bajaakar phir apni masti mein rehte hain। baba ne samjhaaya hai shreekrishna aur Christian ka bada achha sambandh hai। shreekrishna ki raajaai hoti hai na। lakshmi-naaraayan baad mein naam padta hai। baikuntha kahne se jhat shreekrishna yaad aayega। lakshmi-naaraayan bhi yaad nahin aate hain kyonki chhota bachcha shreekrishna hai। chhota bachcha pavitra hota hai। tumne yeh bhi saakshaatkaar kiya hai - bachche kaise janma lete hain, nurse khadi rehti hai, jhat uthaaya, sambhaala। bachpan, yuva, vriddha alag-alag part bajta hai, jo hua so drama। unmein kuchh bhi sankalp nahin chalte। yeh to drama bana hua hai na। hamaara bhi part baj raha hai drama ke plan anusaar। maaya ki bhi praveshta hoti hai aur baap ki bhi praveshta hoti hai। koi baap ki mat par chalte hain, koi raavan ki mat par। raavan kya cheez hai? kabhi dekha hai kya? sirf chitra dekhte ho। shivbaaba ka to phir yeh roop hai। raavan ka kya roop hai! 5 vikaar roopi bhoot jab aakar pravesh karte hain tab raavan kaha jaata hai। yeh hai bhooton ki duniya, asuron ki duniya। tum jaante ho hamaari aatma ab sudharti ja rahi hai। yahaan to shareer bhi aasuri hain। aatma sudharte-sudharte paavan ho jaayegi। phir yeh khal utaar denge। phir tumko satopradhaan khal (shareer) mil jaayegi। kanchan kaaya milegi। so tab jab aatma bhi kanchan ho। sona kanchan ho to jevar bhi kanchan banega। sone mein khaad bhi daalte hain। ab tum bachchon ki buddhi mein aadi-madhya-ant ki knowledge chakkar lagaati rehti hai। manushya kuchh bhi nahin jaante hain। kehte hain rishi-muni sab neti-neti kar chale gaye। ham kehte hain in lakshmi-naaraayan se poochho to yeh bhi neti-neti karenge। parantu inse poochha hi nahin jaata hai। poochhenge kaun? poochha jaata hai guru logon se। tum unse yeh prashn poochh sakte ho। tum samjhaane ke liye kitna maatha maarte ho। gala kharaab ho jaata hai। baap to bachchon ko hi sunaayenge na, jinhonne samjha hai। baaki auron ke saath phaaltu thode hi maatha lagaayenge। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) service ki duty poori kar phir apni masti mein rehna hai। vyartha ki baaten sunni va sunaani nahin hai। ek baap ke mahaavaakya hi smriti mein rakhne hain। unhein bhoolna nahin hai।

2) sada khushi mein rahne ke liye rachta aur rachna ki knowledge buddhi mein chakkar lagaati rahe arthaat uska hi simran hota rahe। kisi bhi baat mein sankalp na chale, uske liye drama ko achhi reeti samajhkar part bajaana hai।

vardaan:- main pan ko “baba'' mein sama dene vaale nirantar yogi, sahajyogi bhav

jin bachchon ka baap se har shvaans mein pyaar hai, har shvaans mein baba-baba hai। unhein yog ki mehnat nahin karni padti hai। yaad ka proof hai - kabhi mukh se “main'' shabd nahin nikal sakta। baba-baba hi niklega। “main pan'' baba mein sama jaae। baba backbone hai, baba ne karaaya, baba sada saath hai, tumheen saath rehna, khaana, chalna, phirna…yeh emerge roop mein smriti rahe tab kahenge sahajyogi।

slogan:- main-main karna maana maaya roopi billi ka aahvaan karna, baba baba kaho to maaya bhaag jaayegi।