मंगलवार 7 मई 2024 की दैनिक मुरली

07-05-2024 praatahmurli om shanti "baapdaada"' madhuban

“meethe bachche - baap se current leni hai to service mein lage raho, jo bachche sab kuchh tyaag baap ki service mein rehte hain vahi pyaare lagte hain, dil par chadhte hain''

prashn:- bachchon ko sthaai khushi kyon nahin rehti, mukhya kaaran kya hai?

uttar:- yaad ke samay buddhi bhatakti hai, sthir buddhi na hone kaaran khushi nahin rah sakti। maaya ke toophaan deepkon ko hairaan kar dete hain। jab tak karma, akarma nahin bante hain tab tak khushi sthaai nahin rah sakti hai isliye bachchon ko yahi mehnat karni hai।

om shanti। jab om shanti kehte hain to bade hullaas se kehte hain ham aatma shant swaroop hain। arth kitna sahaj hai। baap bhi kahenge om shanti। daada bhi kahenge om shanti। woh kehte hain main paramatma hoon, yeh kehte main aatma hoon। tum sab sitaare ho। sab sitaaron ka baap bhi chaahiye na। gaaya jaata hai soorya, chaand aur lucky sitaare। tum bachche ho most lucky sitaare। unmein bhi nambarvaar hain। jaise raat ko chandrama nikalta hai phir sitaaron mein koi dim hote hain, koi bade teekhe hote hain। koi chandrama ke aage hote hain। sitaare hain na। tum bhi gyaan sitaare ho। chamakta hai bhrakuti ke beech mein wonderful sitaara। baap kehte hain yeh sitaare (aatmaayen) bade wonderful hain। ek to itni chhoti bindi hai, jiska koi ko pata nahin hai। aatma hi shareer se part bajaati hai। yeh bada wonder hai। to tum bachchon mein bhi nambarvaar hain। koi kaise, koi kaise। baap unko baith yaad karte hain jo sitaare achhe chamakte hain, jo bahut service karte hain, unko current milti jaati hai। tumhaari battery bharti jaati hai। tamopradhaan se satopradhaan banne ke liye search light milti hai nambarvaar purooshaartha anusaar। baap kehte hain jo mere arth sab kuchh tyaag service mein lage rehte hain, woh bahut pyaare lagte hain। dil par bhi chadhte hain। baap dil lene vaala hai na। dilvaala mandir bhi hai na। ab dilvaala ya dil lene vaala mandir। kiski dil lene vaala? tumne dekha hai na। prajaapita brahma baitha hai na। zaroor unmein shivbaaba ki praveshta hai aur phir tum dekhte bhi ho - oopar mein svarga ki sthaapna bhi hai, neeche bachche tapasya mein baithe hain। yeh to chhota model roop mein banaaya hua hai। to jo bahut achhi service karte hain, bahut madadgaar hain। mahaarthi, ghodesvaar, pyaade hain na। yeh mandir yaadgaar bahut achha accurate bana hua hai। tum kahenge yeh hamaara hi yaadgaar hai। abhi tumko roshni mili hai aur koi ko bhi gyaan ka teesra netra nahin hai। bhakti maarga mein to jo manushyon ko sunaate hain, sat sat karte jaate hain। vaastav mein hai jhooth, usko sat samajhte hain। ab baap jo truth hain, woh baithkar tumko truth sunaate hain, jisse tum vishwa ke maalik bante ho। baap to kuchh bhi mehnat nahin karaate hain। saare jhaad ka raaz tumhaari buddhi mein baith gaya hai। tumko samjhaate to bahut sahaj hain, parantu time kyon lagta hai? knowledge va varsa lene mein time nahin lagta। time lagta hai pavitra banne mein। mukhya hai yaad ki yaatra। yahaan tum aate ho to yahaan attention jaasti hota hai yaad ki yaatra mein। ghar mein jaane se itna nahin rehta। yahaan sab nambarvaar hain। koi to yahaan baithe honge, buddhi mein yahi nasha hoga - ham bachche, woh baap hai। behad ka baap aur ham bachche baithe hain। tum bachche jaante ho baap is shareer mein aaya hua hai। divya drishti de rahe hain, service kar rahe hain। to us ek ko hi yaad karna chaahiye। aur koi taraph buddhi jaani nahin chaahiye। sandeshi poori report de sakti hai - kiski buddhi baahar bhatakti hai, kaun kya karte hain, kisko jhutka aata hai, sab bata sakti hai।

jo sitaare achhe serviceable hain, unhon ko hi dekhta rehta hoon। baap ka lav hai na। sthaapna mein madad karte hain। hoobhu kalpa pahle misal yeh raajdhaani sthaapan ho rahi hai, anek baar hui hai। yeh to drama ka chakra chalta rehta hai। ismen phikra ki bhi koi baat nahin rehti। baba ke saath hain na। to sang ka rang lagta hai। phikra kam hoti jaati hai। yeh to drama bana hua hai। baap bachchon ke liye svarga ki raajdhaani le aaye hain। sirf kehte hain meethe-meethe bachchon, patit se paavan banne ke liye baap ko yaad karo। ab jaana hai sweet hom, jiske liye hi tum bhakti maarga mein maatha maarte ho। parantu ek bhi ja nahin sakte। ab baap ko yaad karte raho aur svadarshan chakra phiraate raho। alpha aur be। baap ko yaad karo aur 84 ka chakra phiraao। aatma ko 84 ke chakra ka gyaan hua hai। rachayita aur rachna ke aadi-madhya-ant ko koi bhi nahin jaante hain। tum jaante ho so bhi nambarvaar purooshaartha anusaar। subah ko uthkar tum buddhi mein yahi rakho - ab hamne 84 ka chakra poora kiya hai, ab vaapis jaana hai isliye ab baap ko yaad karna hai to tum chakravarti banenge। yeh to sahaj hai na। parantu maaya tumko bhula deti hai। maaya ke toophaan hain na, woh deepkon ko hairaan kar dete hain। maaya badi dustar hai, itni shakti hai jo bachchon ko bhula deti hai। woh khushi sthaai nahin rehti hai। tum baap ko yaad karne baithte ho, baithe-baithe buddhi aur taraph chali jaati hai। yeh sab hain gupta baaten। kitni bhi koshish karenge parantu yaad kar nahin sakenge। phir koi ki buddhi bhatak-bhatak kar sthir ho jaati hai, koi phat se sthir ho jaate hain, koi se to kitna bhi maatha maaro to bhi buddhi mein thaharta nahin। isko maaya ki yuddha kaha jaata hai। karma, akarma banaane ke liye kitni mehnat karni padti hai। vahaan to raavan raajya hi nahin to karma-vikarma bhi nahin hote। maaya hoti hi nahin jo ulta karma karaaye। raavan aur raam ka khel hai। aadhaakalpa hai raam raajya, aadhaakalpa hai raavan raajya। din aur raat। sangamayug par sirf brahman hi hote hain। ab tum brahman samajhte ho raat poori ho din shuru hona hai। woh shoodra varna vaale thode hi samajhte hain।

manushya to bahut aavaaz se bhakti aadi ke geet gaate hain। tumko to jaana hai aavaaz se pare। tum to apne baap ki hi yaad mein masta rehte ho। aatma ko gyaan ka teesra netra mila hai। aatma samajhti hai ab baap ko yaad karna hai। bhakti maarga mein shiv-baba-shivbaaba to karte aaye hain। shiv ke mandir mein shiv ko baba zaroor kehte hain। gyaan kuchh bhi nahin। ab tumko gyaan mila hai। woh shivbaaba hai, unka yeh chitra hai, woh to ling hi samajhte hain। ab tumko to gyaan mila hai। woh ling ke oopar jaakar loti chadhaate hain। ab baap to hai niraakaar। niraakaar ke oopar loti chadhaayenge, woh kya karenge! saakaar ho to sveekaar bhi kare। niraakaar par doodh aadi chadhaayenge, woh kya karenge! baap kehte hain doodh aadi jo chadhaate ho woh tum hi peete ho, bhog aadi bhi tum hi khaate ho। yahaan to main sammukh hoon na। aage indirect karte the, abhi to direct hai, neeche aakar part baja rahe hain। searchlight de rahe hain। bachche samajhte hain madhuban mein baba ke paas zaroor aana chaahiye। vahaan hamaari battery achhi charge hoti hai। ghar mein to gorakhdhandhe aadi mein ashaanti hi ashaanti lagi hui hai। is samay saare vishwa mein ashaanti hai। tum jaante ho abhi ham shanti sthaapan kar rahe hain yogbal se। baaki raajaai milti hai padhaai se। kalpa pahle bhi tumne yeh suna tha, ab bhi sunte ho। jo kuchh act hoti hai phir bhi hogi। baap kehte hain kitne bachche aashcharyavat bhaaganti ho gaye। mujh maashook ko itna yaad karte the। ab main aaya hoon to phir chhodkar chale jaate hain। maaya kaisa thappad laga deti hai। baba anubhvi to hai na! baba ko apni saari history yaad hai। sir par topi, nange paanv daudta tha… musalmaan log bhi bahut pyaar karte the। bahut khaatiri karte the। master ka bachcha aaya jaise guru ka bachcha aaya। baajri ka dhodha khilaate the। yahaan bhi baba ne 15 din programme diya tha dhodha aur chhaanchh khaane ka। aur kuchh bhi nahin banta tha। beemaar aadi sabke liye yahi banta tha। kisko kuchh bhi hua nahin। aur hi beemaar bachche bhi tanduroosta ho gaye। dekhte the aasakti tooti hui hai! yeh nahin hona chaahiye ya yeh chaahiye। chaahna ko chuhra (jamaadaar) kaha jaata hai। yahaan to baap kehte hain maangane se marna bhala। baap hi jaante hain - bachchon ko kya dena hai। jo kuchh dena hoga woh khud hi denge। yeh sab drama bana hua hai।

baba ne to poochha tha na baap ko jo baap bhi samajhte hain aur bachcha bhi samajhte hain, woh haath uthaayen। to sabne haath uthaaya। haath to jhat utha dete hain। jaise baba poochhte hain lakshmi-naaraayan kaun banenge? to jhat haath uthaayenge। yeh paarlaukik bachcha bhi zaroor add karte hain, yeh to maa-baap ki bahut seva karte hain। 21 janma ka varsa dete hain। baap jab vaanaprastha mein jaate hain to phir bachchon ka farja hai baap ki sambhaal karna। woh jaise sannyaasi ban jaate hain। jaise inka laukik baap tha, vaanaprastha avastha hui to bola ham jaakar banaaras mein satsang karenge, hamko vahaan le chalo। (history sunaana) tum ho brahman prajaapita brahmaakumaar-kumaariyaan। prajaapita brahma hai great-great grand father। sabse pahla patta hai manushya srishti ka। inko gyaan saagar nahin kaha jaata। na brahma-vishnu-shankar hi gyaan ke saagar hain। shivbaaba woh hai behad ka baap, to unse varsa milna chaahiye na। woh niraakaar parampita paramatma kab, kaise aaya, unki jayanti manaate hain। yeh koi ko pata nahin। yeh to garbha mein nahin aate hain। samjhaate hain main inmen pravesh karta hoon, bahut janmon ke ant mein vaanaprastha avastha mein। manushya jab sannyaas karte hain to unki vaanaprastha avastha kahi jaati hai। to ab baap tumko kehte hain - bachche, tumne poore 84 janma liye, yeh hai bahut janmon ke ant ka janma। hisaab to jaante ho na। to main inmen pravesh karta hoon। kahaan aakar baithta hoon, inki aatma jahaan baithi hai, unke baaju mein aakar baithta hoon। jaise guru log apne shishya ko baaju mein gaddi par bithaate hain। inka bhi sthaan yahaan hai, mera bhi yahaan hai। kehta hoon he aatmaon, maamekam yaad karo to paap vinaash ho jaayenge। manushya se devta banna hai na। yeh hai raajayog। nai duniya ke liye zaroor raajayog chaahiye। baap kehte hain main aaya hoon aadi sanaatan devi-devta dharma ka foundation lagaane। guru log anek hain, satguru ek hai, vahi satya hai। baaki to sab jhooth hain।

tum jaante ho ek hai roodra maala, doosri hai vaijayanti maala vishnu ki। uske liye tum purooshaartha karte ho, baap ko yaad karo to maala ka daana banenge। jis maala ka tum bhakti maarga mein simran karte ho parantu jaante nahin ho ki yeh maala kiski hai, oopar mein phool kaun hai, phir meru kya hai, daane kaun hain? jiski maala pherte hain, samajhte kuchh nahin। aise hi raam-raam kehte maala pherte rehte hain। raam-raam kahne se samajhte hain sab raam hi raam hain। sarvavyaapi ki baat ka andhiyaara isse nikla hai। maala ka arth hi nahin jaante। koi kehte 100 maala phero… itni maala phero। baap to anubhvi hai na। 12 guru kiye, 12 ka anubhav liya। aise bhi bahut hote hain, apna guru hote bhi phir auron ke paas jaate hain ki kuchh anubhav mil jaae। maala aadi pherte hain। hai bilkul andhashraddha। maala poori kar phool ko namaskaar karte hain। shivbaaba phool hai na। maala ke daane tum ananya bachche bante ho। tumhaara phir simran chalta hai। unko kuchh bhi pata nahin। woh to koi raam kehte, koi shreekrishna ko yaad karte, arth kuchh bhi nahin। shreekrishna sharnam kah dete। ab woh to satayug ka prince tha। unki sharan kaise lenge। sharan to baap ki li jaati hai। tum hi poojya phir pujaari bante ho। 84 janma le patit bane ho to shivbaaba ko kehte hain he phool, hamko bhi aapasmaan banaao। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) kisi bhi prakaar ki chaahna nahin rakhni hai। aasakti khatma kar deni hai। baba jo khilaaye... tumhein direction hai, maangane se marna bhala।

2) baap ki searchlight lene ke liye ek baap se sachcha lav rakhna hai। buddhi mein nasha rahe ki ham bachche hain, woh baap hai। unki searchlight se humein tamopradhaan se satopradhaan banna hai।

vardaan:- raham ki bhaavna dvaara nimitta bhaav se seva karne vaale sarva lagaav mukta bhav

vartamaan samay jab sabhi aatmaayen thak kar niraash ho mercy maangati hain। to aap daata ke bachche apne bhaai bahinon par merciful bano। koi kitna bhi bura ho, uske prati bhi raham ki bhaavna ho to kabhi ghrina, eershya va krodh ki bhaavna nahin aayegi। raham ki bhaavna sahaj nimitta bhaav emerge kar deti hai, lagaav se raham nahin lekin sachcha raham lagaav mukta bana deta hai kyonki usmein deh bhaan nahin hota।

slogan:- doosron ko sahayog dena hi svayan ke khaate jama karna hai।