गुरुवार 6 जून 2024 की दैनिक मुरली

06-06-2024 praatahmurli om shanti "baapdaada"' madhuban

“meethe bachche - baap baagvaan hai, is baagvaan ke paas tum maaliyon ko bahut achhe-achhe khushboodaar phool laane hain, aisa phool nahin laao jo murjhaaya hua ho''

prashn:- baap ki nazar kin bachchon par padti hai, kiske oopar nahin padti hai?

uttar:- jo achhi khushbu dene vaale phool hain, anek kaanton ko phool banaane ki service karte hain, unhein dekh-dekh baap khush hota। un par hi baap ki nazar jaati hai aur jinki vritti gandi hai, aankhe dhokha deti hain, un par baap ki nazar bhi nahin padti। baap to kahenge bachche phool ban anekon ko phool banaao tab hoshiyaar maali kahe jaayenge।

om shanti। baagvaan baap baith apne phoolon ko dekhte hain kyonki aur sab centres par to phool aur maali hain, yahaan tum baagvaan paas aate ho apni khushbu dene। tum phool ho na। tum bhi jaante ho, baap bhi jaante hain - koton ke jangal ka beejroop hai raavan। yoon to saare jhaad ka beej ek hi hai parantu phoolon ke bageeche se phir kaanton ka jangal banaane vaala bhi zaroor hoga। woh hai raavan। to judge karo baap theek samjhaate hain na। devtaaon roopi phoolon ke bageeche ka beejroop hai baap। tum abhi devi-devta ban rahe ho na। yeh to har ek jaante hain ki ham kis kisma ka phool hain। baagvaan bhi yahaan hi aate hain phoolon ko dekhne। woh to sab hain maali। woh bhi anek prakaar ke maali hain। us bageeche ke bhi bhinna-bhinna prakaar ke maali hote hain na। koi ki 500 rupaya tanakhvaah hoti, koi ki 1000, koi ki 2000 rupaya। jaise mugal garden ka maali zaroor bahut hoshiyaar hoga। uski pagaar bhi adhik hogi। yeh to behad ka bada bageecha hai, usmein bhi anek prakaar ke nambarvaar maali hain। jo bahut achhe maali hote hain woh bageeche ko bahut achha shobhnik bana dete hain, achhe phool lagaate hain। government house ka mugal garden kitna achha hai। yeh hai behad ka bageecha। ek hai baagvaan। ab kaanton ke jangal ka beej hai raavan aur phoolon ke bageeche ka beej hai shivbaaba। varsa milta hai baap se। raavan se varsa nahin milta। woh jaise shraap deta hai। jab shraapit hote hain to jo sukh dene vaala hai unko sab yaad karte hain kyonki woh hai sukh daata, sada sukh dene vaala। maali bhi bhinna-bhinna prakaar ke hain, baagvaan aakarke maaliyon ko bhi dekhte hain ki kaise chhota-mota bageecha banaate hain। kaun-kaun se phool hain, woh bhi khyaal mein laate hain। kabhi-kabhi bahut achhe-achhe maali bhi aate hain, unhon ke phoolon ki sajaavat bhi aksar karke achhi ho jaati hai। to baagvaan ko bhi khushi hoti hai - oho! yeh maali to bada achha hai, phool bhi achhe-achhe laaye hain। yeh hai behad ka baap aur unki hain behad ki baaten। tum bachche dil mein samajhte ho baba bilkul satya kehte hain। aadhaakalpa chalta hai raavan raajya। phoolon ke bageeche ko kaanton ka jangal raavan bana deta hai। jangal mein kaante hi kaante hote hain। bahut duhkh dete hain। bageeche ke beech mein kaante thode hi hote hain, ek bhi nahin। bachche jaante hain। raavan deh-abhimaan mein le aata hain। bade te bada kaanta hai deh-abhimaan।

baba ne raatri ko bhi samjhaaya kinhon ki drishti kaami rehti hai, to koi ki semi kaami drishti hai। koi naye-naye bhi aate hain jo pahle achha-achha chalte hain, samajhte hain vikaar mein kabhi nahin jaayenge, pavitra rahenge। us samay shamshaani vairaagya aata hai। phir vahaan (ghar mein) jaate hain to kharaab ho padte hain। drishti gandi ho padti hai। yahaan jinko achha-achha phool samajh baagvaan ke paas le aate hain ki baba yeh bahut achha phool hai, koi-koi maali kaan mein aakar bataate hain yeh phalaana phool hai। maali to zaroor bataayenge na। aise nahin ki baba antaryaami hai, maali har ek ki chaal-chalan bataate hain ki baba inki drishti achhi nahin hai, inki chalan royal nahin hai, inki 10-20 percent sudhri hai। mool hain aankhen, jo bahut dhokha deti hain। maali aakar baagvaan ko sab kuchh bataayenge। baba ek-ek se poochhte hain bataao tumne kaise phool laaye hain? koi gulaab ke phool hote hain, koi motiye ke, koi ak ke bhi le aate hain। yahaan bahut khabardaar rehte hain। jangal mein jaate hain to phir murjha jaate hain। baba dekhte hain ki yeh kis prakaar ke phool hain। maaya bhi aisi hai jo maaliyon ko bhi bada jor se thappad laga deti hai, jo maali bhi kaante ban padte hain। baagvaan aate hain to pahle-pahle bageeche ko dekhte hain, phir baap baith unko shrringaarte hain। bachche, khabardaar raho, khaamiyaan nikaalte jaao, nahin to phir bahut pachhtaayenge। baba aaye hain lakshmi-naaraayan banaane, unke badle ham naukar banen! apni jaanch ki jaati hai, ham aisa oonch laayak bante hain? yeh to jaante ho kaanton ke jangal ka beej raavan hai, phoolon ke bageeche ka beej hai raam। yeh sab baaten baap baith bataate hain। baba phir bhi school ki padhaai ki mahima karte hain, woh padhaai phir bhi achhi hai, kyonki usmein source oph income hai। em object bhi hai। yeh bhi paathshaala hai, ismen em object hai। phir kahaan bhi yeh em object hoti nahin hai। tumhaari ek hi em hai nar se naaraayan banne ki। bhakti maarga mein satya naaraayan ki katha bahut-bahut sunte hain, har maas brahman ko bulaate hain, brahman geeta sunaate hain। aajkal to geeta sab sunaate hain, sachcha-sachcha brahman to koi hai nahin। tum ho sachche-sachche brahman। sachche baap ke bachche ho। tum sachchi-sachchi katha sunaate ho। satya naaraayan ki katha bhi hai, amraktha bhi hai, teejri ki katha bhi hai। bhagvaanuvaach - main tumko raajaaon ka raaja banaata hoon। vo log geeta to sunaate aaye hain। phir kaun raaja bana? aisa koi hai jo kahe main tumko raajaaon ka raaja banaaoonga, main khud nahin banoonga? aisa kabhi suna? yeh ek hi baap hai jo bachchon ko baith samjhaate hain। bachche jaante hain yahaan baagvaan paas refresh hone aate hain। maali bhi bante hain, phool bhi bante hain। maali to zaroor banna hai। kisma-kisma ke maali hain। service nahin karenge to achha phool kaise banenge? har ek apne dil se poochhe ki main kis prakaar ka phool hoon? kis prakaar ka maali hoon? bachchon ko vichaar saagar manthan karna pade। braahmaniyaan jaanti hain - maali bhi kisma-kisma ke hote hain na। koi achhe-achhe maali bhi aate hain, jinka bada achha bageecha hota hai। jaise achha maali to bageecha bhi achha banaate hain। achhe-achhe phool le aate hain, jo dekh dil khush ho jaata hai। koi-koi halke phool le aate hain। baagvaan samajh jaate hain yeh kya-kya pad paayenge। abhi to time pada hai। ek-ek kaante ko phool banaane mein mehnat lagti hai। koi to phool banna chaahte nahin, kaanta hi pasanda karte hain। aankhon ki vritti bahut gandi rehti hai। yahaan aate hain to bhi unse khushbu nahin aati। baagvaan chaahte hain mere aage phool baithe to achha hai, jinko dekh khush hota hoon। dekhta hoon ki vritti aisi hai to us par nazar bhi nahin daalte hain isliye ek-ek ko dekhte hain, yeh mere phool kis prakaar ke hain? kitni khushbu dete hain? kaante se phool bane hain va nahin? har ek khud bhi samajh sakte hain ki ham kahaan tak phool bane hain? purushaartha karte hain? ghadi-ghadi kehte hain - baba, ham aapko bhool jaate hain। yog mein thahar nahin sakte hain। are, yaad nahin karenge to phool kaise banenge? yaad karo to paap katen tab phool bankar phir auron ko bhi phool banaayenge, tab maali naam rakh sakte hain। baba maaliyon ki maang karte rehte hain। hai koi maali? kyon nahin maali ban sakte hain? bandhan to chhodna chaahiye। andar mein josh aana chaahiye। service ka ulhaas rehna chaahiye। apne pankh aazaad karne ke liye mehnat karni chaahiye। jismen bahut pyaar hai, unko chhodna hota hai kya? baap ki service liye jab tak phool ban auron ko nahin banaaya hai to oonch pad kaise paayenge? 21 janmon ke liye oonch pad hai। mahaaraajaayen, raajaayen, bade-bade saahookaar bhi hain। phir nambarvaar kam saahookaar bhi hain, praja bhi hai। ab ham kya banen? jo abhi purushaartha karenge woh kalpa-kalpaantar banenge। abhi poora jor dekar purushaartha karna pade। nar se naaraayan banna chaahiye, jo achhe purushaarthi honge woh amal karenge। roz ki aamadni aur ghaate ko dekhna hota hai। 12 maas ki baat nahin, roz apna ghaata aur faayda nikaalna chaahiye। ghaata nahin daalna chaahiye। nahin to third class ban padenge। school mein bhi nambarvaar to hote hain na।

meethe-meethe bachche jaante hain - hamaara beej hai vrikshapti, jiske aane se ham par brihaspati ki dasha baithti hai। phir raavan raajya aata hai to raahu ki dasha baithti hai। woh ekdam highest, woh ekdam lowest। ekdam shivaalay se veshyaalay bana dete hain। abhi tum bachchon par hai brihaspati ki dasha। pahle naya vriksha hota hai। phir aadha se puraana shuru hota hai। baagvaan bhi hai, maali bhi vriddhi ko paate rehte hain। baagvaan paas le aate hain। har ek maali phool le aate hain। koi to aise achhe phool le aate hain, tadaphte hain baba ke paas jaayen। kaisi-kaisi yuktiyon se bachchiyaan aati hain। baba kehte hain bada achha phool laaya hai। bhal maali second class hai, maali se phool achhe hote hain - tadaphte hain shivbaaba ke paas jaayen, jo baba hamko itna oonch vishwa ka maalik banaate hain। ghar mein maar khaati hain to bhi kehti hain shivbaaba hamaari raksha karo। unko hi sachchi dropdi kaha jaata hai। past jo ho gaya so phir repeat hona hai। kal pukaara tha na, aaj baba aaye hain bachaane ke liye yuktiyaan bataate hain - aise-aise bhoon-bhoon karo। tum ho bhramriyaan, woh hain keeda। un par bhoon-bhoon karte raho। bolo, bhagvaanuvaach - kaam mahaashatru hai, usko jeetne se vishwa ka maalik bante hain। koi na koi samay ablaaon ke bol lag jaate hain to phir thande ho jaate hain। kehte hain - achha, bhale jaao। aisa banaane vaale paas jaao। meri takdeer mein nahin hai tum to jaao। aise dropdiyaan pukaarti hain। baba likhte hain bhoon-bhoon karo। koi-koi striyaan bhi aisi hoti hai jinko soopankha, pootna kaha jaata hai। purush unko bhoon-bhoon karte hain, woh keeda ban padti hain, vikaar bigar rah nahin sakti। baagvaan paas kisma-kisma ke aate hain, baat mat poochho। koi-koi kanyaayen bhi kaanta ban padti hain isliye baba kehte hain apni janmapatri bataao। baap ko sunaayenge nahin, chhipaayenge to woh vriddhi hoti jaayegi। jhooth chal na sake। tumhaari vritti kharaab hoti jaayegi। baap ko sunaane se tum bach jaayenge। sach bataana chaahiye, nahin to bilkul mahaarogi ban jaayenge। baap kehte hain vikaari jo bante hain unka kaala munh hota hai। patit maana kaala munh। krishna ko bhi shyaam-sundar kehte hain। krishna ko kaala bana diya hai। raam ko, naaraayan ko bhi kaala dikhaate hain। arth kuchh nahin samajhte hain। tumhaare paas to naaraayan ka chitra gora hai, tumhaari to yeh em object hai। tumko kaala naaraayan thode hi banna hai। yeh mandir jo banaaye hain, aise the nahin। vikaar mein girne se phir kaala munh ho jaata hai। aatma kaali ban gai hai। iron ej se golden ej mein jaana hai। sone ki chidiya banna hai। kaali kalkatte vaali kehte hain। kitni bhayankar shakla dikhaai deti hai। baat mat poochho। baap kehte hain - bachche, yeh sab hai bhakti maarga। abhi tumhein to gyaan mila hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) apne pankh aazaad karne ki mehnat karni hai, bandhanon se mukta ho hoshiyaar maali banna hai। kaanto ko phool banaane ki seva karni hai।

2) apne aapko dekhna hai ki main kitna khushboodaar phool bana hoon? meri vritti shuddh hai? aankhe dhokha to nahin deti hain? apni chaal-chalan ka potaamel rakh khaamiyaan nikaalni hai।

vardaan:- svaraajya adhikaar ke nashe aur nishchay se sada shaktishaali banne vaale sahajyogi, nirantar yogi bhav

svaraajya adhikaari arthaat har karmendriy par apna raajya। kabhi sankalp mein bhi karmendriyaan dhokha na den। kabhi thoda bhi deh-abhimaan aaya to josh ya krodh sahaj aa jaata hai, lekin jo svaraajya adhikaari hain woh sada niranhakaari, sada hi nirmaan ban seva karte hain isliye main svaraajya adhikaari aatma hoon - is nashe aur nishchay se shaktishaali ban maayaajeet so jagatjeet bano to sahajyogi, nirantar yogi ban jaayenge।

slogan:- light house ban man-buddhi se light phailaane mein busy raho to kisi baat mein bhay nahin lagega।