मंगलवार 6 अगस्त 2024 की दैनिक मुरली

06-08-2024 praatahmurli om shanti "baapdaada"' madhuban

“meethe bachche - ab vikarma karna banda karo kyonki ab tumhein vikarmaajeet sanvat shuru karna hai''

prashn:- har ek brahman bachche ko kis ek baat mein baap ko follow avashya karna hai?

uttar:- jaise baap svayan teacher bankar tumhein padhaate hain, aise baap ke samaan har ek ko teacher banna hai। jo padhte ho use doosron ko padhaana hai। tum teacher ke bachche teacher, satguru ke bachche satguru bhi ho। tumhein sachkhanda sthaapan karna hai। tum sach ki naiya par ho, tumhaari naiya hilegi dulegi lekin doob nahin sakti।

om shanti। roohaani baap baith bachchon ke saath roohrihaan karte hain। roohon se poochhte hain kyonki yeh nai knowledge hai na। manushya se devta banne ki yeh hai nai knowledge athva padhaai। yeh tumko kaun padhaate hain? bachche jaante hain roohaani baap ham bachchon ko brahma dvaara padhaate hain। yeh bhoolna nahin chaahiye। woh baap hai phir padhaate hain to teacher bhi ho gaya। yeh bhi tum jaante ho ham padhte hi hain nai duniya ke liye। har ek baat mein nishchay hona chaahiye। nai duniya ke liye padhaane vaala baap hi hota hai। mool baat hi baap ki hui। baap hamko yeh shiksha dete hain brahma dvaara। koi dvaara to denge na। gaaya hua bhi hai bhagwan brahma dvaara raajayog sikhlaate hain। brahma dvaara aadi sanaatan devi-devta dharma ki sthaapna karte hain, jo devi-devta dharma abhi nahin hai। ab to hai hi kaliyug। to siddha hota hai svarga ki sthaapna ho rahi hai। svarga mein sirf devi-devta dharma vaale hain, baaki itne sab dharma honge hi nahin arthaat vinaash ho jaayenge kyonki satayug mein aur koi dharma tha hi nahin। yeh baaten tum bachchon ki buddhi mein hain, ab to anek dharma hain। ab phir baap hamko manushya se devta banaate hain kyonki ab sangamayug hai। yeh to bahut sahaj baat samjhaane ki hai। trimoorti mein bhi dikhaate hain - brahma dvaara sthaapna। kiski? sthaapna zaroor nai duniya ki hogi, puraani ki to nahin hogi। bachchon ko yeh nishchay hai ki nai duniya mein rehte hi hain daivi gun vaale devtaayen। to ab hamko bhi grihastha vyavhaar mein rehte daivi gun dhaaran karne hain। pahle-pahle kaam par jeet paakar nirvikaari banna hai। kal in devi-devtaaon ke aage jaakar kehte bhi the ki aap sampoorn nirvikaari ho, ham vikaari hain। apne ko vikaari feel karte the kyonki vikaar mein jaate the। ab baap kehte hain tumko bhi aise nirvikaari banna hai। daivi gun dhaaran karne hain। yeh vikaar kaam-krodh aadi agar hain to daivi gun nahin kahenge। vikaar mein jaana, krodh karna yeh aasuri gun hai। devtaaon mein lobh hoga kya? vahaan 5 vikaar hote nahin। yeh hai hi raavan ki duniya। raavan ka janma hota hai treta aur dvaapar ke sangam par। jaise yeh puraani duniya aur nai duniya ka sangam hai na, aise woh bhi sangam ho jaata hai। abhi raavan raajya mein bahut duhkh hai, beemaari hai, isko kaha hi jaata hai raavan raajya। raavan ko har varsha jalaate hain। vaam maarga mein jaane se vikaari ban jaate hain। ab tumko nirvikaari banna hai। yahaan hi daiveegun dhaaran karne hain। jaisa jo karma karta hai aisa hi phal paata hai। bachchon se ab koi vikarma nahin hona chaahiye।

ek hota hai raaja vikarmaajeet, doosra hota hai raaja vikram। yeh hai hi vikram sanvat yaani raavan vikaariyon ka sanvat। yeh koi samajhte nahin। na kalpa ki aayu ka hi kisko pata hai। vaastav mein vikarmaajeet hote hain devtaayen। 5 hajaar varsha mein 2500 varsha hue raaja vikram ke, 2500 varsha raaja vikarmaajeet ke। aadha hai vikram ka। woh log bhal kehte hain parantu kuchh bhi pata nahin hai। tum kahenge vikarmaajeet ka sanvat ek varsha se shuru hota hai phir 2500 varsha baad vikram sanvat shuru hota hai। abhi vikram sanvat poora hoga phir tum vikarmaajeet mahaaraaja-mahaaraani ban rahe ho, jab ban jaayenge to vikarmaajeet sanvat shuru ho jaayega। yeh sab tum hi jaante ho। tumko kehte hain brahma ko kyon bithaaya hai? are, tumhaari inse kyon aakar padi hai। hamko padhaane vaala koi yeh thode hi hai। ham to shivbaaba se padhte hain। yeh bhi unse padhta hai। padhaane vaala to gyaan ka saagar hai, woh hai vichitra, unko chitra arthaat shareer hota nahin। unko kaha hi jaata hai niraakaar। vahaan sab niraakaari aatmaayen rehti hain। phir yahaan aakar saakaari banti hain। parampita paramatma ko sab yaad karte hain, woh hai aatmaon ka pita। laukik baap ko param akshar nahin kahenge। yeh samajh ki baat hai na। school ke student padhaai par attention dete hain। jab koi martaba pa lete, barrister aadi ban jaate to phir padhaai banda। aise thode hi barrister bankar phir padhega। nahin, padhaai poori ho jaati hai। tum bhi devta ban gaye phir tumko padhaai ki darkaar nahin rehti। 2500 varsha devtaaon ka raajya chalta hai। yeh baaten tum bachche hi jaante ho tumko phir auron ko samjhaana pade। yeh bhi khyaal rakhna chaahiye। padhaate nahin to teacher kaise thahre! tum sab teachers ho, teacher ki aulaad ho na to tumko bhi teacher hi banna hai। to kitne teachers chaahiye padhaane liye? jaise baap, teacher, satguru hai, vaise tum bhi teacher ho। satguru ke bachche satguru ho। woh koi satguru nahin hain। woh guru ke bachche guru। sat maana sach। sachkhanda bhi bhaarat ko kaha jaata tha, yeh jhooth khanda hai। sach khanda baba hi sthaapan karte hain, woh hai sachcha saani baba। jab real baap aate hain to jhoothe bhi bahut nikal padte hain। gaayan bhi hai na - naiya dolegi, toophaan aayenge, parantu doobegi nahin। bachchon ko samjhaaya jaata hai, maaya ke toofaan bahut aayenge। unse darna nahin hai। sannyaasi log tumko aise kabhi nahin kahenge ki maaya ke toofaan aayenge। unko pata hi nahin hai, naiya ko paar kahaan le jaayenge।

tum bachche jaante ho bhakti se sadgati nahin hoti hai। neeche hi utarte jaate hain। bhal kehte hain bhagwan aakar bhakton ko bhakti ka phal dete hain। bhakti to zaroor karni chaahiye। achha, bhakti ka phal bhagwan kya aakar denge? zaroor sadgati denge। kehte hain parantu kab aur kaise denge - yeh pata nahin hai। tum koi se poochho to kah denge yeh to anaadi chalti aa rahi hai। parampara se chali aai hai। raavan ko kab se jalaana shuru kiya hai? kahenge parampara se। tum samjhaate ho to kehte hai inhon ka gyaan to koi naya hai। jinhonne kalpa pahle samjha hai, woh jhat samajh jaate hain। brahma ki to baat hi chhod do। shivbaaba ka janma to hai na, jisko shivraatri bhi kehte hain। baap samjhaate hain mera janma divya aur alaukik hai। praakritik manushyon sadrishya janma nahin milta hai kyonki woh sab garbha se janma lete hain, shareerdhaari bante hain। main to garbha mein pravesh nahin karta hoon। yeh knowledge sivaae parampita paramatma, gyaan saagar ke aur koi de na sake। gyaan saagar koi manushya ko nahin kaha jaata hai। yeh upma hai hi niraakaar ki। niraakaar baap aatmaon ko padhaate hain, samjhaate hain। tum bachche is raavan ke raajya mein part bajaate-bajaate deh-abhimaani ban pade ho। aatma sab kuchh karti hai। yeh gyaan ud gaya hai। yeh to organs hain na। main aatma hoon, chaahe inse karma karaaoon, chaahe na karaaoon। niraakaari duniya mein to shareer rahit baithe rehte hain। abhi tum apne ghar ko bhi jaan gaye ho। vo log phir ghar ko eeshvar maan lete hain। brahm gyaani, tatva gyaani hain na। kehte hain brahm mein leen ho jaayenge। agar kahen brahm mein nivaas karenge to eeshvar alag ho jaaye। yeh to brahm ko hi eeshvar kah dete hain। yeh bhi drama mein noondh hai। baap ko bhi bhool jaate hain। jo baap vishwa ka maalik banaate hain, unko to yaad karna chaahiye na kyonki vahi svarga banaane vaala hai। abhi tum ho purooshottam sangamayugi brahman। tum uttam puroosh bante ho। kanishta puroosh uttam ke aage maatha tekte hain। devtaaon ke mandir mein jaakar kitni mahima gaate hain। abhi tum jaante ho ham so devta bante hain। yeh to bahut simple baat hai। viraat roop ke baare mein bhi batlaaya hai। viraat chakra hai na। woh to sirf gaate hain brahman, devta, kshatriy…। lakshmi-naaraayan aadi ke chitra to hain na। baap aakar sabko correct karte hain। tumko bhi correct kar rahe hain kyonki bhakti maarga mein janma-janmaantar tum jo kuchh karte aaye ho woh hai wrong isliye tum tamopradhaan bane ho। abhi hai hi unrighteous world। ismen duhkh hi duhkh hai kyonki raavan ka raajya hai, sab vikaari hain। raavan ka raajya hai unrighteous, raam ka raajya hai righteous। yeh hai kaliyug, woh hai satayug। yeh to samajh ki baat hai na। inko shaastra uthaate kabhi dekha hai kya। apna bhi knowledge diya, rachna ki bhi samjhaani di hai। shaastra buddhi mein unhon ke hote jo padhkar auron ko sunaate hain। to sabka sukh daata ek shivbaaba hai। vahi oonch te oonch baap hai, unko parampita paramatma kaha jaata hai। behad ka baap zaroor behad ka varsa dete hain। 5 hajaar varsha pahle tum svargavaasi the, ab narkavaasi ho। is raavan raajya mein bhi raajaayen, mahaaraajaayen hote hain। woh bahut saahookaar, woh kam saahookaar। unko koi sooryavanshi-chandravanshi nahin kahenge। inmen saahookaar ko mahaaraaja ka lakab milta hai। kam saahookaar ko raaja ka। abhi to hai hi praja ka praja par raajya। dhani dhoni koi hai nahin। raaja ko praja anna daata samajhti thi। abhi to woh bhi gaye, baaki praja ka dekho kya haal hai! ladaai-jhagda aadi kitna hai। abhi tumhaari buddhi mein aadi se ant tak saari knowledge hai। rachayita baap ab practical mein hai, jiski phir bhakti maarga mein kahaani banegi। abhi tum bhi practical mein ho। aadha-kalpa tum raajya karenge phir baad mein kahaani ho jaayegi। chitra to rehte hain। koi se poochho yeh kab raajya karte the? to laakhon varsha kah denge। sannyaasi hain nivritti maarga vaale, tum ho pavitra grihastha aashram vaale। phir apvitra grihastha aashram mein jaana hai। svarga ke sukhon ko koi jaanta nahin। nivritti maarga vaale to kabhi pravritti maarga sikhla na saken। aage to jangal mein rehte the, unmein taakat thi। jangal mein hi unhon ko bhojan pahunchaate the, abhi woh taakat hi nahin rahi hai। jaise tumhaare mein bhi vahaan raajya karne ki taakat thi, abhi kahaan hai। ho to vahi na। abhi woh taakat nahin rahi hai। bhaaratvaasiyon ka asul jo dharma tha woh abhi nahin hai। adharma ho gaya hai। baap kehte hain main aakar dharma ki sthaapna, adharma ka vinaash karta hoon। adharmiyon ko dharma mein le aata hoon। baaki jo bachte hain, woh vinaash ho jaayenge। phir bhi baap bachchon ko samjhaate hain ki sabko baap ka parichay do। baap ko hi duhkh harta sukh karta kaha jaata hai। jab bahut duhkhi hote hain tab hi baap aakar sukhi banaate hain। yeh bhi anaadi bana-banaaya khel hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) is purooshottam sangamayug par uttam puroosh banne ke liye aatma-abhimaani banne ka purooshaartha karna hai। sat baap mila hai to koi bhi asatya, unrighteous kaam nahin karna hai।

2) maaya ke toofaanon se darna nahin hai। sada yaad rahe sat ki naiya hilegi dulegi lekin doobegi nahin। satguru ke bachche satguru ban sabki naiya paar lagaani hai।

vardaan:- sahaj yog ki saadhna dvaara saadhnon par vijay praapta karne vaale prayogi aatma bhav

saadhnon ke hote, saadhnon ko prayog mein laate yog ki sthiti dagmag na ho। yogi ban prayog karna isko kehte hain nyaara। hote hue nimitta maatra, anaasakta roop se prayog karo। agar ichchha hogi to woh ichchha achha banne nahin degi। mehnat karne mein hi samay beet jaayega। us samay aap saadhna mein rahne ka prayatna karenge aur saadhan apni taraph aakarshit karenge isliye prayogi aatma ban sahjayog ki saadhna dvaara saadhnon ke oopar arthaat prakriti par vijayi bano।

slogan:- svayan santushta rah, sabko santushta karna hi santushtamni banna hai।