गुरुवार 5 सितंबर 2024 की दैनिक मुरली

05-09-2024 praatahmurli om shanti "baapdaada"' madhuban

meethe bachche - “tumhein yahaan pravritti maarga ka lav milta hai kyonki baap dil se kehte hain - mere bachche, baap se varsa milta hai, yeh lav dehdhaari guru nahin de sakte''

prashn:- jin bachchon ki buddhi mein gyaan ki dhaarna hai, shrewd buddhi hain - unki nishaani kya hogi?

uttar:- unhein doosron ko sunaane ka shauk hoga। unki buddhi mitra-sambandhiyon aadi mein bhatkegi nahin। shrewd buddhi jo hote hain, woh padhaai mein kabhi ubaasi aadi nahin lenge। school mein kabhi aankhen banda karke nahin baithenge। jo bachche tavaai hokar baithte, jinki buddhi idhar-udhar bhatakti rehti, woh gyaan ko samajhte hi nahin, unke liye baap ko yaad karna bada mushkil hai।

om shanti। yeh hai baap aur bachchon ka mela। guru aur chele athva shishyon ka mela nahin hai। in guru logon ki drishti rehti hai ki yeh hamaare shishya hain athva followers va jigyaasu hain। halki drishti ho gai na। woh us drishti se hi dekhenge। aatma ko nahin। woh dekhte hain shareeron ko aur woh chele bhi deh-abhimaani hokar baithte hain। unko apna guru samajhte hain, drishti hi woh rehti hai ki hamaara guru hai। guru ke liye regard rakhte hain। yahaan to bahut pharka hai, yahaan baap hi bachchon ka regard rakhte hain। jaante hain in bachchon ko padhaana hai। yeh srishti chakra kaise phirta hai। behad ki history-geography bachchon ko samjhaani hai। un gurooon ki dil mein bachche ka love nahin hoga। baap ke paas to bachchon ka bahut love rehta hai aur bachchon ka bhi baap par love rehta hai। tum jaante ho baba to hamko srishti chakra ka gyaan sunaate hain। woh kya sikhaate hain? aadhaakalpa shaastra aadi sunaate, bhakti ke karmakaanda karte, gaayatri, sandhya aadi sikhaate rehte hain। yeh to baap aaya hua hai apna parichay de rahe hain। ham baap ko bilkul nahin jaante the। sarvavyaapi hi kah dete the। kabhi bhi poochho paramatma kahaan hai to jhat kahenge woh to sarvavyaapi hai। tumhaare paas manushya jab aate hain to poochhte hain yahaan kya sikhaaya jaata hai? bolo, ham raajayog sikhaate hain, jisse tum manushya se devta arthaat raaja ban sakte ho aur koi satsang aisa nahin hoga jo kahe ham manushya se devta banne ki shiksha dete hain। devtaayen hote hain satayug mein। kaliyug mein hain manushya। ab ham tumko saare srishti chakra ka raaz samjhaate hain, jisse tum chakravarti raaja ban jaayenge aur phir tumko paavan banne ki bahut achhi yukti bataate hain। aisi yukti kabhi koi samjha na sake। yeh hai sahaj raajayog। baap hai patit-paavan। woh sarvashaktimaan bhi hai to unko yaad karne se hi paap bhasma honge kyonki yog agni hai na। to yahaan nai baat sikhlaate hain।

yeh gyaan maarga hai। gyaan saagar ek hi baap hota hai। gyaan aur bhakti alag-alag hai। gyaan sikhaane liye baap ko aana padta hai kyonki vahi gyaan ka saagar hai। woh khud aakar apna parichay dete hain ki main sabka baap hoon। brahma dvaara saari srishti ko paavan banaata hoon। paavan duniya hai satayug। patit duniya hai kaliyug। to satayug aadi, kaliyug ant ka yeh hai sangamayug। inko leap yug kaha jaata hai। ismen ham jump maarte hain। kahaan? puraani duniya se nai duniya mein jump maarte hain। woh to seedhi se aahiste-aahiste neeche utarte aaye। yahaan to ham chhi-chhi duniya se nai duniya mein ekdam jump maarte hain। seedha chale jaate hain oopar। puraani duniya ko chhod ham nai duniya mein jaate hain। yeh hai behad ki baat। behad ki puraani duniya mein dher manushya hain। nai duniya mein to bahut thode manushya hote hain jisko svarga kaha jaata hai। vahaan sab pavitra rehte hain। kaliyug mein hain sab apvitra। apvitra raavan banaate hain। yeh to sabko samjhaate hain ki tum ab raavan raajya athva puraani duniya mein ho। asal mein raamraajya mein the jisko svarga kaha jaata tha। phir kaise 84 ka chakra laga-kar neeche gire ho, so to ham bata sakte hain। jo achhe samajhdaar honge woh jhat samjhenge, jisko buddhi mein nahin aayega woh to tavaai ke misal idhar-udhar dekhte rahenge। attention se sunenge nahin। kehte hain na tum to jaise tavaai ho। sannyaasi log bhi jab katha baith sunaate hain to koi jhutka khaate hain ya attention aur taraph rehta hai to achaanak unse poochhte hain kya sunaaya? baap bhi sabko dekhte rehte hain। koi tavaai to nahin baithe hain। achhe shrewd bachche jo hote hain woh padhaai mein kabhi ubaasi aadi nahi lenge। school mein kabhi koi aankhe banda karke baithen yeh to kaayda nahin। kuchh bhi gyaan ko samajhte nahin। baap ko yaad karna, unhon ke liye bada mushkil hai, phir paap kaise katen। shrewd buddhi to achhi reeti se dhaaran kar auron ko sunaane ka shauk rakhte hain। gyaan nahin hai to buddhi mitra-sambandhiyon ke taraph bhatakti rehti hai। yahaan to baap kehte hain aur sab kuchh bhool jaana hai। pichhaadi mein kuchh bhi yaad na aaye। baba ne sannyaasiyon aadi ko dekha hua hai jo pakke brahm gyaani hote hain, savere aise baithe-baithe brahm mahtatva ko yaad karte-karte shareer chhod dete hain। unke shanti ka pravaah bahut hota hai। ab woh brahm mein leen to ho na saken। phir bhi maata ke garbha se janma lena padta hai।

baap ne samjhaaya hai vaastav mein mahaatma to shreekrishna ko kaha jaata hai। manushya to bigar arth samjhe aise hi kah dete hain। baap samjhaate hain shreekrishna hai sampoorn nirvikaari, parantu unko sannyaasi nahin, devta kaha jaata hai। sannyaasi kehna va devta kehna unka bhi arth hai। yeh devta kaise bana? sannyaasi se devta bana। behad ka sannyaas kiya phir chale gaye nai duniya mein। woh to had ka sannyaas karte hain। behad mein ja na saken। had mein hi punarjanma lena pade, vikaar se। behad ka maalik ban na saken। raaja-raani kabhi ban na saken kyonki unhon ka dharma hi alag hai। sannyaas dharma devi-devta dharma nahin hai। baap kehte hain main adharma vinaash kar devi-devta dharma ki sthaapna karta hoon। vikaar bhi adharma hai na, isliye baap kehte hain in sabka vinaash aur ek aadi sanaatan devi-devta dharma ki sthaapna karne mujhe aana padta hai। bhaarat mein jab satayug tha to ek hi dharma tha, vahi dharma phir adharma banta hai। ab tum phir se aadi sanaatan devi-devta dharma sthaapan kar rahe ho। jo jitna purooshaartha karenge utna oonch pad paayenge। apne ko aatma nishchay karna hai। bhal grihastha vyavhaar mein raho। usmein bhi jitna ho sake uthte-baithte yeh pakka karo, jaise bhakta log savere uthkar ekaanta mein baith maala japte hain, tum to saare din ka hisaab nikaalte ho। phalaane samay itni yaad rahi, saare din mein itna samay yaad rahi, total nikaalte ho। woh to savere uthkar maala pherte hain, bhal koi sachche bhakta nahi hote hain। kaeeyon ki buddhi to baahar kahaan-kahaan bhatakti rehti hai। abhi tum samajhte ho bhakti se phaayda kuchh bhi nahin milna hai। yeh to hai gyaan, jisse bahut phaayda hota hai। abhi tumhaari hai chadhti kala। baap ghadi-ghadi kehte manamnaabhav। geeta mein bhi akshar hain parantu uska arth koi bhi suna nahin sakenge। javaab dene aayega nahin। vaastav mein uska arth likha hua bhi hai apne ko aatma samajh, deh ke sab dharma chhod maamekam yaad karo। bhagvaanuvaach hai na। parantu unki buddhi mein hai shreekrishna bhagwan। woh to dehdhaari punarjanma mein aane vaala hai na। unko bhagwan kaise kah sakte hain। to sannyaasi aadi kisi ki bhi drishti baap aur bachchon ki nahin ho sakti hai। bhal gaandhi ji ko baapu ji kehte the parantu baap-bachche ka sambandh nahin kahenge। woh to phir bhi saakaar ho gaya na। tumko to samjhaaya hai apne ko aatma samjho। ismen jo baap baitha hai woh hai behad ka baapu ji। laukik aur paarlaukik donon baap se varsa milta hai। baapu ji se to kuchh bhi nahin mila। achha, bhaarat ki raajdhaani vaapas mili parantu yeh varsa to nahin kahenge। sukh milna chaahiye na।

varse hote hi hain do - ek had ke baap ka, doosra behad ke baap ka। brahma se bhi koi varsa nahin milta hai। bhal saari praja ka woh pita hai, unko kehte hain great-great grand father। woh khud kehte hain mere se tumko kuchh bhi varsa nahin milta, jabki yeh khud kehte hain mere se varsa nahin mil sakta, to us baapu ji se phir kya varsa mil sakega। kuchh bhi nahin। angrej to chale gaye। abhi kya hai? bhookh hadtaal, picketing, strike aadi hoti rehti, kitni maaraamaari hoti rehti hai। koi ka dar nahin hai। bade-bade officers ko bhi maar dete hain। sukh ke bajaae aur duhkh hai। to behad ki baat yahaan hi hai। baap kehte hain pahle-pahle to yeh pakka nishchay karo ki ham aatma hain, shareer nahin। baap ne hamko adopt kiya hai, ham adopted bachche hain। tumko samjhaaya jaata hai baap gyaan ka saagar aaya hai aur srishti chakra ka raaz samjhaate hain। doosra koi samjha na sake। baap kehte hain deh sahit deh ke sab dharmo ko bhool, maamekam yaad karo। satopradhaan zaroor banna padega। yeh bhi jaante ho puraani duniya ka vinaash to hona hi hai। nai duniya mein bahut thode hote hain। kahaan itni karodon aatmaayen aur kahaan 9 laakh। itne sab kahaan jaayenge? ab tumhaari buddhi mein hai ki ham sab aatmaayen oopar mein thi। phir yahaan aai hai part bajaane। aatma ko hi actor kahenge। aatma act karti hai is shareer ke saath। aatma ko organs to chaahiye na। aatma kitni chhoti hai। 84 laakh janma hain nahin। har ek agar 84 laakh janma le phir part repeat kaise karenge। yaad nahin rah sakta। smriti se baahar chala jaae। 84 janma bhi tumko yaad nahin rehte, bhool jaate ho। ab tum bachchon ko baap ko yaad kar pavitra zaroor banna hai। is yog agni se vikarma vinaash honge। yeh bhi nishchay hai - behad ke baap se behad ka varsa ham kalpa-kalpa lete hain। ab phir svargavaasi banne ke liye baap ne kaha hai ki maamekam yaad karo kyonki main hi patit-paavan hoon। tumne baap ko pukaara hai na, to ab baap aaye hain paavan banaane। paavan hote hain devta, patit hote hain manushya। paavan bankar phir shantidham mein jaana hai। tum shantidham jaana chaahte ho ya sukhdhaam aana chaahte ho? sannyaasi to kehte hain sukh kaag vishta ke samaan hai, hamko shanti chaahiye। to woh satayug mein kabhi aa nahin sakenge। satayug mein tha pravritti maarga ka dharma। devtaayen nirvikaari the vahi punarjanma lete-lete patit bante hain। ab baap kehte hain nirvikaari banna hai। svarga mein chalna hai to mujhe yaad karo to tumhaare paap kat jaayen, punya aatma ban jaayenge phir shantidham-sukhdhaam mein jaayenge। vahaan shanti bhi thi, sukh bhi tha। abhi hai duhkhadhaam। phir baap aakar sukhdhaam ki sthaapna karte hain, duhkhadhaam ka vinaash। chitra bhi saamne hain। bolo, abhi tum kahaan khade ho? abhi hai kaliyug ka ant, vinaash saamne khada hai। baaki jaakar thoda tukda rahega। itne khanda to vahaan hote nahin। yeh sab world ki history-geography baap hi baith samjhaate hain। yeh paathshaala hai। bhagvaanuvaach, pahle-pahle baap ka parichay dena padta hai। abhi kaliyug hai phir satayug mein jaana hai। vahaan to sukh hi sukh hota hai। ek ko yaad karna - woh hai avyabhichaari yaad। shareer ko bhi bhool jaana hai। shantidham se aaye hain phir shantidham mein jaana hai। vahaan patit koi ja na sake। baap ko yaad karte-karte paavan ban tum muktidhaam mein chale jaayenge। yeh achhi reeti baith samjhaana padta hai। aage itne sab chitra thode hi the। bigar chitra bhi nutshell mein samjhaaya jaata tha। is paathshaala mein manushya se devta ban jaana hai। yeh hai nai duniya ke liye knowledge। woh baap hi denge na। to baap ki drishti rehti hai bachchon par। ham aatmaon ko padhaate hain। tum bhi samjhaate ho behad ka baap hamko samjhaate hain, unka naam hai shivbaaba। sirf behad ka baba kahne se bhi moonjh jaayenge kyonki baabaayen bhi bahut ho gaye hain। municipality ke mayor ko bhi kehte hain baba। baap kehte hain main ismen aata hoon to bhi mera naam shiv hi hai। main is rath dvaara tumko knowledge deta hoon, inko adopt kiya hai। inka naam rakha hai prajaapita brahma। inko bhi mere se varsa milta hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) abhi puraani duniya se nai duniya mein jump dene ka samay hai isliye is puraani duniya se behad ka sannyaas karna hai। ise buddhi se bhool jaana hai।

2) padhaai par poora attention dena hai। school mein aankhe banda karke baithna - yeh kaayda nahin hai। dhyaan rahe - padhaai ke samay buddhi, idhar-udhar na bhatke, ubaasi na aaye। jo sunte jaaen woh dhaaran hota jaae।

vardaan:- roohaani nashe dvaara puraani duniya ko bhoolne vaale svaraajya so vishwa raajya adhikaari bhav

sangamayug par jo baap ke varse ke adhikaari hain vahi svaraajya aur vishwa raajya adhikaari bante hain। aaj svaraajya hai kal vishwa ka raajya hoga। aaj kal ki baat hai, aisi adhikaari aatma roohaani nashe mein rehti hai aur nasha puraani duniya sahaj bhula deta hai। adhikaari kabhi koi vastu ke, vyakti ke, sanskaar ke adheen nahin ho sakte। unhein had ki baaten chhodni nahin padti, svatah chhoot jaati hain।

slogan:- har second, har shvaans, har khajaane ko saphal karne vaale hi saphaltaamoorta bante hain।