रविवार 29 सितंबर 2024 की दैनिक मुरली

29-09-24 praatahmurli om shanti ''avyakt-baapdaada'' revise 03-02-2002 madhuban

“lakshya aur lakshan ko samaan banaao, sarva khajaanon mein sampanna bano''

aaj sarva khajaanon ke maalik apne khajaanon se sampanna bachchon ko dekh rahe hain। har ek bachcha sarva khajaanon se sampanna hai। jo sampanna hota hai unki nishaani sada praapti swaroop, tripta aatma dikhaai degi। sada khush nazar aayegi kyonki bharpoor hai। to har ek apne se poochhe ki hamaare paas kitne khajaane jama hain? yeh avinaashi khajaane ab bhi praapta hain aur bhavishya mein anek janma saath rahenge। yeh khajaane khatma nahin hone vaale hain। sabse pahla khajaana hai - gyaan ka khajaana, jis gyaan ke khajaane se is samay bhi aap sabhi mukti aur jeevanmukti ka anubhav kar rahe ho। jeevan mein rehte, puraani duniya mein rehte, tamoguni vaayumandal mein rehte gyaan ke khajaane ke aadhaar se in sab vaayumandal, vibration se nyaare mukta ho, kamal pushpa samaan nyaare mukta aatmaayen duhkh se, chintaaon se, ashaanti se mukta ho। jeevan mein rehte buraaiyon ke bandhanon se mukta ho। vyartha sankalpon ke toofaan se mukta ho। hain mukta? sabhi haath hila rahe hain।

to mukti aur jeevanmukti is gyaan ke khajaane ka phal hai, praapti hai। chaahe vyartha sankalp aane ki koshish karte hain, negative bhi aate hain lekin gyaan arthaat samajh hai ki vyartha sankalp va negative ka kaam hai aana aur aap gyaani tu aatmaon ka kaam hai inse mukta, nyaare aur baap ke pyaare rehna। to check karo - gyaan ka khajaana praapta hai? bharpoor hai? sampanna hai ya kam hai? agar kam hai to usko jama karo, khaali nahin rehna।

aise hi yog ka khajaana - jisse sarva shaktiyon ki praapti hoti hai। to apne ko dekho yog ke khajaane dvaara sarva shaktiyaan jama hai? sarva? ek bhi shakti agar kam hogi to samay par dhokha de degi। aap sabka title - master sarvashaktivaan hai, shaktivaan nahin, sarvashaktivaan। to sarva shaktiyon ka khajaana yogbal dvaara jama hai? bharpoor hai, praapti swaroop hai va kami hai? kyon? abhi apni kami ko bhar sakte ho। abhi chance hai। phir sampanna karne ka samay samaapta ho jaayega to kami rah jaayegi। check karo - ek ek shakti ko saamne laao aur saare din ki dincharya mein check karo - agar percentage bhi kam hai to full paas nahin kahenge kyonki aap sabka lakshya hai, kisi bhi bachche se poochhte hain ki full paas hona hai ya half paas? to sabhi kehte hain ki ham to sooryavanshi banenge, chandravanshi nahin banenge। chandravanshi banenge? baapdaada bahut achha takhta denge, banenge chandravanshi? india vaale sooryavanshi ban jaaen, foreign vaale chandravanshi ban jaaen, banenge? nahin banenge? sooryavanshi banna hai? banna hi hai। yeh to baapdaada chit-chat kar rahe hain। jab sooryavanshi banna hi hai, dridh nishchay hai, baap se aur svayan se pratigya kar li hai to ab se kisi bhi shakti ki percentage kam nahin ho। agar kahenge circumstance anusaar, samasyaaon anusaar percentage kam rah gai to 14 kala ban jaayenge isliye aajkal baapdaada chaaron or ke sabhi bachchon ka potaamel, register check kar raha hai। baapdaada ke paas bhi har ek ka register hai kyonki samay ke anusaar pahle hi baapdaada bachchon ko suna rahe hain ki samay ki raphtaar anusaar abhi kab nahin kaho, ab। kab ho jaayega, kar lenge… hona to hai hi... yeh nahin socho। hona to hai nahin, abhi-abhi karna hi hai। samay ki raphtaar teevra ho rahi hai isliye jo lakshya rakha hai baap samaan banne ka, full paas hone ka, 16 kala sampanna banne ka, to baapdaada bhi yahi chaahte hain ki lakshya aur practical mein lakshan samaan hon। jab lakshya aur lakshan donon samaan honge tab hi baap samaan sahaj ban jaayenge। to check karo - ho jaayega, ban hi jaayenge... yeh albela-pan hai। jo karna hai, jo banna hai, jo lakshya hai, woh abhi se hi karna hai, banna hai। kabhi shabd nahin lagaao, abhi-abhi।

to gyaan ka khajaana, yog ka khajaana aur bhi dhaarnaaon ka khajaana hai। jisse (dhaarnaaon se) gunon ka khajaana jama ho jaata hai। gunon mein bhi jaise sarva shaktiyaan hain, aise hi sarvagun hain, sirf gun nahin hain, sarvagun hain। to sarva gun hain ya sochte ho ek do gun kam hua, to kya hua, chalega? nahin chalega। to sarvagunon ka khajaana jama hai? kaun se gun ki kami hai usko check karke bharpoor ho jaao।

chauthi baat hai - seva। seva dvaara sabhi ko anubhav hai, jab bhi mansa seva ya vaani dvaara va karma dvaara bhi seva karte ho to uski praapti aatmik khushi milti hai। to check karo seva dvaara khushi ki anubhooti kahaan tak ki hai? agar seva ki aur khushi nahin hui, to woh seva yathaartha seva nahin hai। seva mein koi na koi kami hai, isliye khushi nahin milti। seva ka arth hai aatma apne ko khushnumah, khila hua roohaani gulaab khushi ke jhoole mein jhoolne vaala anubhav karegi। to check karo - saara din seva ki lekin saare din ki seva ki tulna mein itni khushi hui ya soch-vichaar hi chalte rahe, yeh nahin ye, yeh nahin ye...? aur aapki khushi ka prabhaav ek to seva sthaan par, doosra seva saathiyon par, teesra jin aatmaon ki seva ki un aatmaon par pade, vaayumandal bhi khush ho jaae। yeh hai seva ka khajaana khushi।

aur baat - chaar subject to aa hi gai। aur hai sambandh-samparka, woh bhi bahut zaroori hai, kyon? kai bachche samajhte hain baapdaada se to sambandh hai hi। parivaar mein hua nahin hua, kya baat hai, (kya harja hai) beej se to hai hi। lekin aapko vishwa ka raajya karna hai na! to raajya mein sambandh mein aana hi hoga। isliye sambandh-samparka mein aana hi hai lekin sambandh-samparka mein yathaartha khajaana milta hai duaayen। bina sambandh-samparka ke aapke paas duaaon ka khajaana jama nahin hoga। maa baap ki duaayen to hain, lekin sambandh-samparka mein bhi duaayen leni hain। agar duaayen nahin milti, feeling nahin aati to samjho sambandh-samparka mein koi kami hai। yathaartha reet agar sambandh-samparka hai to duaaon ki anubhooti honi chaahiye। aur duaaon ki anubhooti kya hogi? anubhvi to ho na! agar seva se duaayen milti hain to duaayen milne ka anubhav yahi hoga jo svayan bhi sambandh mein aate, kaarya karte double light (halka) hoga, bojh nahin mahsoos karega aur jinki seva ki, sambandh-samparka mein aaye woh bhi double light feel karega। anubhav karega ki yeh sambandh mein sada halka arthaat easy hai, bhaari nahin rahega। sambandh mein aaoon, nahin aaoon... lekin duaayen milne ke kaaran donon taraph niyam pramaan, aisa easy bhi nahin - jaise kahaavat hai, jyaada meethe par cheetinyaan bahut aati hain। to itna easy bhi nahin, lekin double light rahega। to baapdaada kehte hain - apne khajaane check karo। samay de rahe hain। abhi samaapti ka board nahin laga hai। isliye check karo aur badhte chalo।

baapdaada ka bachchon se pyaar hai na! to baapdaada samajhte hain koi bhi bachcha peechhe nahin rah jaae। har ek bachcha aage se aage jaae। chalte-chalte deh-abhimaan aa jaata hai। svamaan aur deh-abhimaan। deh-abhimaan ka kaaran hai svamaan mein kami ho jaati hai। to deh-abhimaan ko mitaane ka bahut sahaj saadhan hai - deh-abhimaan aane ka ek hi akshar hai, ek hi shabd hai, woh jaante bhi ho। deh-abhimaan ka ek shabd kaun sa hai? (main) achha to kitna baari main-main kehte ho? saare din mein kitne baari “main'' bolte ho, kabhi note kiya hai? achha ek din note karna। baar-baar main shabd to aata hi hai। lekin main kaun? pahla paath hai, main kaun? jab deh-abhimaan mein main kehte ho, lekin vaastav mein main hoon kaun? aatma ya deh? aatma ne deh dhaaran ki, ya deh ne aatma dhaaran ki? kya hua? aatma ne deh dhaaran ki। theek hai na? to aatma ne deh dhaaran ki, to main kaun? aatma na! to sahaj saadhan hai, jab bhi main shabd bolo, to yeh yaad karo ki main kaun si aatma hoon? aatma niraakaar hai, deh saakaar hai। niraakaar aatma ne saakaar deh dhaaran ki, to jitna baari bhi main main shabd bolte ho, utna samay yeh yaad karo ki main niraakaar aatma saakaar mein pravesh kiya hai। jab niraakaar sthiti yaad hogi to niranhakaari svatah ho jaayenge। deh-bhaan khatma ho jaayega। vahi pahla paath main kaun? yeh smriti mein rakh karke main kaun si aatma hoon, aatma yaad aane se niraakaari sthiti pakki ho jaayegi। jahaan niraakaari sthiti hogi vahaan niranhakaari, nirvikaari ho hi jaayenge। to kal se note karna - jab main shabd kehte ho to kya yaad aata hai? aur jitna baari main shabd use karo utna baari niraakaari, niranhakaari, nirvikaari svatah ho jaayenge। achha।

aaj youth group aaya hai। youth bahut hain। baapdaada youth group ko vardaan dete hain ki sada aabaad rehna। ek bhi khajaana barbaad nahin karna, aabaad rehna, aabaad karna। laukik guru log aasheervaad dete hain aayushvaan bhav aur baapdaada kehte hain shareer ki aayu to jitni hai utni rahegi iseelie shareer ki aayu ke hisaab se aayushvaan bhav ka vardaan nahin dete hain lekin is brahman jeevan mein sada aayushvaan bhav। kyon? brahman so devta banenge। to aayushvaan to honge na! youth ki ek visheshta hoti hai। aap youth apni visheshta ko jaante ho? kya visheshta hoti hai, jaante ho? kya visheshta hai aapmen? (jo chaahe woh kar sakte hain) achha - kar sakte ho? achhi baat hai, duniya ke hisaab se kehte hain, youth jiddi bahut hote hain, jo sochenge woh karenge, dikhaayenge। woh log ulta kehte hain lekin yahaan brahman youth jiddi nahin hain lekin apni pratigya par pakke rahne vaale hain। hatne vaale nahin hain। aise ho youth? haath uthaana to bahut sahaj hai। baapdaada khush hai haath uthaana, yeh bhi himmat hai na। lekin roz amritvele baap se ki hui pratigya, ki ham is brahman jeevan ki praapti se, seva se kabhi bhi sankalp mein bhi hatenge nahin। is himmat ko, pratigya ko roz dohraao aur baar-baar check karo ki himmat jo rakhi, sankalp kiya woh practical mein ho raha hai?

government to kehti hai, bas do chaar laakh ban jaaen to bhi theek hai। baapdaada kehte hain - yeh brahman youth ek ek laakh ke samaan hain। itne majboot hain। hain? dekho, aise nahin ghar jaakar phir likh do baba maaya aa gai, sanskaar aa gaya, samasya aa gai। samasyaaon ke samaadhaan swaroop bano। samasyaayen to aayengi lekin apne se poochho main kaun? samaadhaan swaroop hoon ya samasya se haar khaane vaala hoon? aap sabka title kya hai - vijayi ratna ya haar khaane vaale ratna? vijayi ratna hain। brahman janma hote hi baapdaada ne har brahman ke mastak mein vijay ka tilak amar laga diya। to amarbhav ke vardaani ho। abhi yeh apne se vaayda karo, aise to vaayda kahlaayenge to sab kar lenge lekin apne man mein apne se vaayda karo - kabhi bhi sanskaar ke vash nahin honge jo baap ke sanskaar woh mujh brahman aatma ke sanskaar। jo dvaapar, kaliyug ke sanskaar hain woh mere sanskaar nahin kyonki baap ke sanskaar nahin hain। yeh tamoguni sanskaar braahmanon ke sanskaar hain? nahin hai na! to aap kaun ho? brahman ho na!

baapdaada ko bhi youth group par naaz hai। dekho, daadiyon ko bhi youth par naaz hai। daadi ko pyaar hai na youth se। extra pyaar hai। kumaar hai sukumaar। kumaar nahin, sukumaar hain। ek-ek kumaar vishwa ke kumaaron ka parivartan kar dikhaane vaale। achha, kumaaron ko kaam den? himmat hai? karna padega। kumaariyaan karengi?

to kaam de rahe hain dhyaan se sunna। to jo agli season hogi, agli season mein kumaaron ka aise hi special programme rakhenge lekin... lekin bhi hai। jyaada kaam nahin dete hain ek-ek kumaar 10-10 kumaaron ka, chhota sa haath ka kangan taiyaar karke laana। haath mein kangan padta hai na। brahma baap ko sadaiv haath mein phoolon ka kangan daalte hain। to ek-ek kumaar, kachche-kachche nahin laana, pakke-pakke laana। to madhuban mein to aayen phir ghar jaayen to badal jaaen! nahin। aise pakke banaakar laana jo baapdaada dekh-dekh kahe vaah kumaar vaah! aise taiyaar hain? karenge, aise? thoda socho। aise hi haath nahin utha lo। karna padega। banaana padega। double foreigners bhi karenge? double foreigners mein kumaar haath uthaao। to aap bhi 10 laayenge na? foreigners bhi laayenge, india vaale bhi laayenge। phir jo first class quality laayenge usko inaam denge। inaam badhiya denge, ghatiya nahin denge। pyaar hai na kumaaron se। agar government ko jyaada mein jyaada kumaar positive karma karne vaale mil jaaen to government kitna khush hogi। agar aap 10-10 kumaar laayenge to saara hall kumaaron se bharenge phir government ko bulaayenge, dekho yeh kumaar। lekin laane padenge, banaane padenge। agar apni sthiti, lakshya aur lakshan ko samaan rakhenge to seva mein saphalta hogi ya nahin hogi - yeh sankalp bhi nahin uth sakta। hui padi hai। sirf aapko nimitta banna padega। yeh pratigya sada revise karte rehna। kamaal to karni hi hai। achha।

(murli ke beech achaanak baapdaada ke saamne do kumaar stage par aa gaye, jinhen hataaya gaya)

achha। abhi khel mein khel dekha। abhi baapdaada kehte hain saakshi hokar khel dekha, enjoy kiya, abhi ek second mein ekdam deh se nyaare powerful aatmik roop mein sthit ho sakte ho? fullstop।

(baapdaada ne bahut powerful drill karaai) achha - yahi abhyaas har samay beech-beech mein karna chaahiye। abhi-abhi kaarya mein aaye, abhi-abhi kaarya se nyaare, saakaari so niraakaari sthiti mein sthit ho jaaen। aise hi yeh bhi ek anubhav dekha, koi samasya bhi aati hai to aise hi ek second mein saakshi drishta ban, samasya ko ek sidescene samajh, toofaan ko ek tohpha samajh usko paar karo। abhyaas hai na? aage chalkar to aise abhyaas ki bahut aavashyakta padegi। fullstop। question mark nahin, yeh kyon hua, yeh kaise hua? ho gaya। fullstop aur apne full shaktishaali stage par sthit ho jaao। samasya neeche rah jaayegi, aap oonchi stage se samasya roopi sidescene ko dekhte rahenge। achha।

chaaron or ke sarva khajaanon se sampanna aatmaon ko, sada har samay praaptiyon se bharpoor, muskaraate hue harshit rahne vaali aatmaon ko, sada baap se ki hui pratigya ko jeevan mein pratyaksha karne vaale gyaani tu aatmaayen, yogi tu aatmaayen bachchon ko, sada lakshya aur lakshan ko samaan karne vaale baap samaan aatmaon ko, sada har samay sarva khajaanon ka stock aur stop lagaane vaale teevra purushaarthi shreshtha aatmaon ko baapdaada ka yaadapyaar, dilaaraam ka dil se yaadapyaar aur namaste।

vardaan:- paristhitiyon ko shikshak samajh unse paath padhne vaale anubhvi moorta bhav

koi bhi paristhiti mein ghabraane ke bajaae thode samay ke liye use shikshak samjho। paristhiti aapko vishesh do shaktiyon ke anubhvi banaati hai ek sahanshakti aur doosra saamna karne ki shakti। yeh donon paath padh lo to anubhvi ban jaayenge। jab kehte ho ham to trustee hain, mera kuchh nahin hai to phir paristhitiyon se ghabraate kyon ho। trustee maana sab kuchh baap havaale kar diya isliye jo hoga woh achha hi hoga is smriti se sada nishchint, samartha swaroop mein raho।

slogan:- jinka mijaaz meetha hai woh bhool se bhi kisi ko duhkh nahin de sakte।