गुरुवार 26 दिसंबर 2024 की दैनिक मुरली

26-12-2024 praatahmurli om shanti "baapdaada"' madhuban

“meethe bachche - tum abhi padhaai padh rahe ho, yeh padhaai hai patit se paavan banne ki, tumhein yeh padhna aur padhaana hai''

prashn:- duniya mein kaun-sa gyaan hote hue bhi agyaan andhiyaara hai?

uttar:- maaya ka gyaan, jisse vinaash hota hai। moon tak jaate hain, yeh gyaan bahut hai lekin nai duniya aur puraani duniya ka gyaan kisi ke paas nahin hai। sab agyaan andhiyaare mein hain, sabhi gyaan netra se andhe hain। tumhein abhi gyaan ka teesra netra milta hai। tum knowledgeful bachche jaante ho unhon ki brain mein vinaash ke khyaalaat hain, tumhaari buddhi mein sthaapna ke khyaalaat hain।

om shanti। baap is shareer dvaara samjhaate hain, inko jeev kaha jaata hai। inmen aatma bhi hai aur main bhi ismen aakar baithta hoon, yeh to pahle-pahle pakka hona chaahiye। inko daada kaha jaata hai। yeh nishchay bachchon ko bahut pakka hona chaahiye। is nishchay mein hi raman karna hai। barobar baba ne jismen padhraamni ki hai, woh baap khud kehte hain - main inke bahut janmon ke ant mein aata hoon। bachchon ko samjhaaya gaya hai, yeh hai sarva shaastra shiromni geeta ka gyaan। shreemat arthaat shreshtha mat। shreshtha te shreshtha mat hai ek bhagwan ki। jiski hi shreshtha mat se tum devta bante ho। baap khud kehte hain main aata hi tab hoon jab tum bhrashta mat par patit ban jaate ho। manushya se devta banne ka arth bhi samajhna hai। vikaari manushya se nirvikaari devta banaane baap aate hain। satayug mein manushya hi rehte hain parantu daivi gun vaale। abhi kaliyug mein hain sabhi aasuri gun vaale। hai saari manushya srishti। parantu yeh hai eeshvareey buddhi aur woh hai aasuri buddhi। yahaan hai gyaan, vahaan hai bhakti। gyaan aur bhakti alag-alag hai। bhakti ke pustak kitne dher ke dher hain। gyaan ka pustak ek hai। ek gyaan saagar ki pustak ek hi hona chaahiye। jo bhi dharma sthaapan karte hain, unka pustak bhi ek hi hota hai, jisko religious book kaha jaata hai।

pahli-pahli religious book hai geeta। pahla-pahla aadi sanaatan devi-devta dharma hai, na ki hindu dharma। manushya samajhte hain geeta se hindu dharma sthaapan hua। geeta ka gyaan shreekrishna ne diya। kab diya? parampara se। koi shaastra mein shiv bhagvaanuvaach to hai nahin। tum abhi samajhte ho is geeta gyaan dvaara hi manushya se devta bane hain, jo baap abhi humein de rahe hain। isko hi bhaarat ka praacheen raajayog kaha jaata hai। jis geeta mein hi kaam mahaashatru likha hua hai। is shatru ne hi tumhein haar khilaai hai। baap is par hi jeet pahnaakar jagatjeet vishwa ka maalik banaate hain। behad ka baap baith in dvaara tumko padhaate hain। woh hai sabhi aatmaon ka baap। yeh phir hai sabhi manushya aatmaon ka behad ka baap। naam hi hai prajaapita brahma। tum kisse poochh sakte ho ki brahma ke baap ka naam kya hai, to moonjh padenge। brahma, vishnu, shankar in teenon ka baap koi hoga na। brahma, vishnu, shankar sookshm vatan mein devtaayen hain। unke oopar hai shiv। bachche jaante hain shivbaaba ke jo bachche aatmaayen hain unhon ne shareer dhaaran kiya hai, woh to sadaiv niraakaar parampita paramatma hai। aatma hi shareer dvaara kehti hai parampita। kitni sahaj baat hai! inko kaha jaata hai alpha aur be ki padhaai। kaun padhaate hain? geeta ka gyaan kisne sunaaya? shreekrishna ko to bhagwan kaha nahin jaata। woh to dehdhaari hai। taajdhaari hai। shiv to hai niraakaar। un par to koi taaj aadi hai nahin। vahi gyaan ka saagar hai। baap hi beejroop chaitanya hai। tum bhi chaitanya ho। sabhi jhaadon ke aadi, madhya, ant ko tum jaante ho। bhal tum maali nahin ho parantu samajh sakte ho ki beej kaise daalte hain, unse jhaad kaise nikalta hai। woh hai jad, yeh hai chaitanya। aatma ko chaitanya kaha jaata hai। tumhaari aatma mein hi gyaan hai, aur kisi aatma mein gyaan ho nahin sakta। to baap chaitanya manushya srishti ka beejroop hai। yeh chaitanya creation hai।

woh sabhi hain jad beej। aise nahin ki jad beej mein koi gyaan hai। yeh to hai chaitanya beejroop, unmein saare srishti ki knowledge hai। jhaad ki utpatti, paalna, vinaash ka saara gyaan unmein hai। phir naya jhaad kaise khada hota hai, woh hai gupta। tumko gyaan bhi gupta milta hai। baap bhi gupta aaye hain। tum jaante ho yeh kalam lag raha hai। abhi to sabhi patit ban gaye hain। achha, beej se pahla-pahla patta nikla, woh kaun tha? satayug ka pahla patta to shreekrishna ko hi kahenge। lakshmi-naaraayan ko nahin kahenge। naya patta chhota hota hai। peechhe bada hota hai। to is beej ki kitni mahima hai। yeh to chaitanya hai na। bhal doosre bhi nikalte hain, dheere-dheere unhon ki mahima kam hoti jaati hai। abhi tum devta bante ho। to mool baat hai hamko daivi gun dhaaran karne hain। in jaisa banna hai। chitra bhi hain। yeh chitra na hote to buddhi mein gyaan kaise aata। yeh chitra bahut kaam mein aate hain। bhakti maarga mein in chitron ki pooja hoti hai aur gyaan maarga mein tumko inhon se gyaan milta hai ki in jaisa banna hai। bhakti maarga mein aisa nahin samjhenge ki hamko aisa banna hai। bhakti maarga mein mandir aadi kitne banvaate hain, sabse jaasti mandir kiske honge? zaroor shivbaaba ke hi honge। phir unke baad creation ke honge। pahli creation yeh lakshmi-naaraayan hain, to shiv ke baad inki pooja jaasti hogi। maataayen jo gyaan deti hain unki pooja nahin। woh to padhti hain। tumhaari pooja abhi nahin hoti hai kyonki tum abhi padh rahe ho। jab tum padhkar, anpadh banenge phir pooja hogi। abhi tum devi-devta bante ho। satayug mein baap thode hi padhaane jaayega। vahaan aisi padhaai thode hi hogi। yeh padhaai patiton ko paavan banaane ki hai। tum jaante ho hamko jo aisa banaate hain unki pooja hogi phir hamaari bhi pooja nambarvaar hogi। phir girte-girte 5 tatvon ki bhi pooja karne lag padte hain। 5 tatvon ki pooja maana patit shareer ki pooja। yeh buddhi mein gyaan hai ki in lakshmi-naaraayan ka saare srishti par raajya tha। in devi-devtaaon ne raajya kaise aur kab paaya? yeh kisko pata nahin hai। laakhon varsha kah dete hain। laakhon varsha ki baat to kiski buddhi mein baith na sake isliye kah dete yeh parampara se chala aata hai। abhi tum jaante ho devi-devta dharma vaale aur dharmon mein convert ho gaye hain, jo bhaarat mein hain woh apne ko hindu kah dete hain kyonki patit hone kaaran devi-devta kehna shobhta nahin। parantu manushyon mein gyaan kahaan। devi-devtaaon se bhi ooncha title apne par rakhvaate hain। paavan devi-devtaaon ki pooja karte maatha jhukaate hain, parantu apne ko patit samajhte thode hi hain।

bhaarat mein khaas kanyaaon ko kitna naman karte hain। kumaaron ko itna nahin karte। mel se jyaada female ko naman karte hain kyonki is samay gyaan amrit pahle in maataaon ko milta hai। baap inmen pravesh karte hain। yeh bhi samajhte ho yeh (brahma baba) gyaan ki badi nadi hai। gyaan nadi bhi hai phir purush bhi hai। brahm putra nadi sabse badi hai, jo kalkatta taraph saagar mein jaakar milti hai। mela bhi vahaan hi lagta hai parantu unhein yeh pata nahin ki yeh aatmaon aur paramatma ka mela hai। woh to paani ki nadi hai, jiska naam brahm putra rakha hai। woh to brahm ko eeshvar kah dete hain isliye brahm putra ko paavan samajhte hain। patit-paavan vaastav mein ganga ko nahin kaha jaata hai। yahaan saagar aur brahma nadi ka mel hai। baap kehte hain yeh female to nahin hai, jis dvaara adoption hoti hai, yeh bahut guhya samajhne ki baaten hain jo phir praayahlop ho jaani hain। phir baad mein manushya is aadhaar par shaastra aadi banaate hain। pahle haath ke likhe hue shaastra the, baad mein badi-badi moti kitaaben chhapvaai hain। sanskrit mein shlok aadi the nahin। yeh to bilkul sahaj baat hai। main in dvaara raajayog sikhlaata hoon phir yeh duniya hi khalaas ho jaayegi। shaastra aadi kuchh bhi nahin rahenge। phir bhakti maarga mein yeh shaastra aadi banenge। manushya samajhte hain yeh shaastra aadi parampara se chale aaye hain, isko kaha jaata hai agyaan andhiyaara। abhi tum bachchon ko baap padhaate hain jisse tum sojhre mein aaye ho। satayug mein hai pavitra pravritti maarga। kaliyug mein sabhi apvitra pravritti vaale hain। yeh bhi drama hai। baad mein hai nivritti maarga, jisko sannyaas dharma kehte hain, jangal mein jaakar rehte hain। woh hai had ka sannyaas। rehte to is puraani duniya mein hain। abhi tum jaate ho nai duniya mein। tumhein to baap se gyaan ka teesra netra mila hai to tum kitne knowledgeful bante ho। isse jaasti knowledge hoti hi nahin। woh to hai maaya ki knowledge, jisse vinaash hota hai। vo log moon (chaand) par jaakar khoj karte hain। tumhaare liye koi nai baat nahin। yeh sabhi maaya ka pomp hai। bahut show karte hain। ati deepness mein jaate hain ki kuchh kamaal karke dikhaayen। bahut kamaal karne se phir nuksaan ho jaata hai। unhon ke brain mein vinaash ke hi khyaalaat aate hain। kya-kya banaate rehte hain। banaane vaale jaante hain, isse hi vinaash hoga। trial bhi karte rehte hain। kehte bhi hain do bille lade maakhan teesra kha gaya। kahaani to chhoti hai parantu khel kitna bada hai। naam inhon ka hi baala hai। in dvaara hi vinaash ki noondh hai। koi to nimitta banta hai na। Christian log samajhte hain paradise tha, par ham nahin the। islaami, bauddhi bhi nahin the phir bhi Christian logon ki samajh achhi hai। bhaaratvaasi kehte hain devi-devta dharma laakhon varsha pahle tha to buddhu thahre na। baap bhaarat mein hi aate hain, jo mahaan besmajh hain unhein hi mahaan te mahaan samajhdaar banaate hain। parantu phir bhi yaad rahe tab।

baba tum bachchon ko kitna sahaj karke samjhaate hain, mujhe yaad karo to tum sone ka bartan ban jaayenge to dhaarna bhi achhi hogi। yaad ki yaatra se hi paap katenge। murli nahin sunte to gyaan raphoochakkar ho jaata hai। baap to merciful hone ke naate uthne ki hi yukti batlaate hain। ant tak bhi sikhlaate hi rahenge। achha, aaj bhog hai, bhog lagaakar jaldi vaapas aa jaana hai। baaki vaikuntha mein jaakar devi-devtaaon aadi ka saakshaatkaar karna yeh sab phaaltu hai। ismen bahut maheen buddhi chaahiye। baap is rath dvaara kehte hain mujhe yaad karo, main hi patit-paavan tumhaara baap hoon। tumheen se khaaoon… tumheen se baithoon.... yeh yahaan ke liye hai। oopar mein kaise hoga। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachcho ko namaste।

dhaarna ke liye mukhya saar:-

1) baap is daada mein pravesh ho humein manushya se devta arthaat vikaari se nirvikaari banaane ke liye geeta ka gyaan suna rahe hain, isi nishchay se raman karna hai। shreemat par chalkar shreshtha gunvaan banna hai।

2) yaad ki yaatra se buddhi ko sone ka bartan banaana hai। gyaan buddhi mein sada bana rahe uske liye murli zaroor padhni va sunni hai।

vardaan:- apne position ki smriti dvaara maaya par vijay praapta karne vaale nirantar yogi bhav

jaise sthool position vaale apni position ko kabhi bhoolte nahin। aise aapka position hai - master sarvashaktimaan, ise sada smriti mein rakho aur roz amritvele is smriti ko emerge karo to nirantar yogi ban jaayenge aur saara din uska sahayog milta rahega। phir master sarvashaktimaan ke aage maaya aa nahin sakti, jab aap apni smriti ki oonchi stage par rahenge to maaya cheenti ko jeetna sahaj ho jaayega।

slogan:- aatma roopi purush ko shreshtha banaane vaale hi sachche purushaarthi hain।