मंगलवार 31 दिसंबर 2024 की दैनिक मुरली

31-12-2024 praatahmurli om shanti "baapdaada"' madhuban

“meethe bachche - baap jo roz-roz padhaate hain, yeh padhaai kabhi miss nahin karni hai, is padhaai se hi andar ka sanshay door hota hai''

prashn:- baap ke dil ko jeetne ki yukti kya hai?

uttar:- baap ke dil ko jeetna hai to jab tak sangamayug hai tab tak baap se kuchh bhi chhipaao nahin। apne characters par poora-poora dhyaan do। agar koi paap karma ho jaata hai to avinaashi surgeon ko sunaao to halke ho jaayenge। baap jo shiksha dete hain yahi unki daya, kripa va aasheervaad hai। to baap se daya va kripa maangane ki bajaae svayan par kripa karo। aisa purushaartha kar baap ke dil ko jeet lo।

om shanti। abhi roohaani bachche yeh to jaante hain ki nai duniya mein sukh hai, puraani duniya mein duhkh hai। duhkh mein sabhi duhkh mein aa jaate hain aur sukh mein sabhi sukh mein aa jaate hain। sukh ki duniya mein duhkh ka naam-nishaan nahin phir jahaan duhkh hai vahaan sukh ka naam-nishaan nahin। jahaan paap hai vahaan punya ka naam-nishaan nahin, jahaan punya hai vahaan paap ka naam-nishaan nahin। woh kaun-si jagah hai? ek hai satayug, doosra hai kaliyug। yeh to bachchon ki buddhi mein zaroor hoga hi। abhi duhkh ka samay poora hota hai aur satayug ke liye taiyaari ho rahi hai। ham abhi is patit chhi-chhi duniya se us paar satayug arthaat raamraajya mein ja rahe hain। nai duniya mein hai sukh, puraani duniya mein hai duhkh। aisa nahin, jo sukh deta hai vahi duhkh bhi deta hai। nahin, sukh baap dete hain, duhkh maaya raavan deta hai। us dushman ki effigy har varsha jalaate hain। duhkh dene vaale ko hamesha jalaaya jaata hai। bachche jaante hain jab uska raajya poora hota hai to phir hamesha ke liye khalaas ho jaata hai। 5 vikaar hi sabko aadi-madhya-ant duhkh dete aaye hain। tum yahaan baithe ho to bhi tumhaari buddhi mein yahi rahe ki ham baba ke paas jaayen। raavan ko to tum baap nahin kahenge। kab suna hai - raavan ko parampita paramatma koi kehte ho? kabhi bhi nahin। kai samajhte hain lanka mein raavan tha। baap kehte hain yeh saari duniya hi lanka hai। kehte hain Vasco da Gama ne chakra lagaaya, steamer va boat ke dvaara। jis samay usne chakra lagaaya us samay aeroplane aadi nahin the। train bhi steam par chalti thi। bijli alag cheez hai। ab baap kehte hain duniya to ek hi hai। nai se puraani, puraani se nai banti hai। aise nahin kehna hota hai ki sthaapna, paalna, vinaash। nahin, pahle sthaapna phir vinaash, baad mein paalna, yeh right akshar hain। baad mein raavan ki paalna shuru hoti hai। woh jhoothi vikaari patit banne ki paalna hai, jisse sab duhkhi hote hain। baap to kabhi kisko duhkh nahin dete। yahaan to tamopradhaan banne ke kaaran baap ko hi sarvavyaapi kah dete hain। dekho, kya ban pade hain! yeh to tum bachchon ko chalte-phirte buddhi mein rehna chaahiye। hai to bahut sahaj। sirf alpha ki baat hai। musalmaan log bhi kehte hain uthkar allaah ko yaad karo। khud bhi savere uthte hain। woh kehte hain allaah va khuda ko yaad karo। tum kahege baap ko yaad karo। baba akshar bahut meetha hai। allaah kahne se varsa yaad nahin aayega। baba kahne se varsa yaad aa jaata hai। musalmaan log baap nahin kehte hain। woh phir allaah miyaan kehte hain। miyaan-beebi। yeh sabhi akshar bhaarat mein hain। parampita paramatma kahne se hi shivling yaad aa jaayega। yooropvaasi log god father kehte hain। bhaarat mein to patthar bhittar ko bhi bhagwan samajh lete hain। shivling bhi patthar ka hota hai। samajhte hain is patthar mein bhagwan baitha hai। bhagwan ko yaad karenge to patthar hi saamne aa jaata hai। patthar ko bhagwan samajh poojte hain। patthar kahaan se aata hai? pahaadon ke jharnon se girte-girte gol chikna ban jaata hai। phir kaise natural nishaan bhi ban jaate hain। devi-devtaaon ki moorti aisi nahin hoti hai। patthar kaat-kaat kar kaan, munh, naak, aankh aadi-aadi kitna sundar banaate hain। kharcha bahut karte hain। shivbaaba ki moorti par koi kharche aadi ki baat nahin। abhi tum bachche samajhte ho ham so devi-devta chaitanya mein khud ban rahe hain। chaitanya mein honge tab pooja aadi nahin hogi। jab pattharbuddhi bante hain tab patthar ki pooja karte hain। chaitanya hain to poojya hain phir pujaari ban jaate hain। vahaan na koi pujaari hote, na hi koi patthar ki moorti hoti। darkaar hi nahin। jo chaitanya the unki nishaani yaadgaar ke liye pattharon ki rakhte hain। abhi in devtaaon ki kahaani ka tumko maaloom pad gaya hai ki in devtaaon ki jeevan kahaani kya thi? phir se vahi repeat hoti hai। aage yeh gyaan chakshu nahin tha to jaise pattharbuddhi the। abhi baap dvaara jo gyaan mila hai, gyaan ek hi hai parantu uthaane vaale nambarvaar hain।

tumhaari roodra maala bhi is dhaarna ke anusaar hi banti hai। ek hai roodra maala, doosri hai roonda maala। ek hai brothers ki, doosri hai brothers aur sisters ki। yeh to buddhi mein aata hai ham aatmaayen bahut chhoti-chhoti bindi muaaphik hain। gaayan bhi hai bhrikuti ke beech chamakta hai ajab sitaara। abhi tum samajhte ho ham aatma chaitanya hain। ek chhote sitaare misal hain। phir jab garbha mein aate hain to pahle kitna chhota pinda hota hai। phir kitna bada ho jaata hai। vahi aatma apne shareer dvaara avinaashi part bajaati rehti hai। is shareer ko hi phir sab yaad karne lag padte hain। yeh shareer hi achha-bura hone ke kaaran sabko aakarshit karta hai। satayug mein aise nahin kahenge ki aatma-abhimaani bano, apne ko aatma samjho। yeh gyaan tumhein abhi hi milta hai kyonki tum jaante ho abhi aatma patit ban padi hai। patit hone kaaran jo kaam karti hai woh sabhi ulta ho jaata hai। baap sulta kaam karaate, maaya ulta kaam karaati hai। sabse ulta kaam hai baap ko sarvavyaapi kehna। aatma jo part bajaati hai woh avinaashi hai। unko jalaaya nahin jaata, unki to pooja hoti hai। shareer ko jalaaya jaata hai। aatma jab shareer chhodti to shareer ko jalaate hain। aatma doosre shareer mein pravesh kar jaati hai। aatma bigar shareer do-chaar din bhi nahin rakh sakte hain। kai to phir shareer mein davaaiyaan aadi lagaakar rakh bhi lete hain। parantu phaayda kya? Christian ka ek saint Xavier hai, kehte hain uska shareer abhi bhi rakha hua hai। unka bhi jaise mandir bana hua hai। kisko dikhaate nahin hain sirf unke paanv dikhaate hain। kehte hain koi paanv chhu leta hai to beemaar nahin hota। paanv chhoone se beemaari se halke ho jaate hain to samajhte hain unki kripa। baap kehte hain bhaavna ka bhaada mil jaata hai। nishchaybuddhi hone se kuchh faayda hota hai। baaki aise ho to dher ke dher vahaan jaayen, mela lag jaae। baap bhi yahaan aaye hain phir bhi itna dher nahin hote। dher hone ki jagah bhi nahin hai। jab dher hone ka samay aata hai to vinaash ho jaata hai। yeh bhi drama bana hua hai। iska aadi va ant nahin hai। haan, jhaad ki jadajdeebhoot avastha hoti hai arthaat tamopradhaan ban jaata hai tab yeh jhaad change hota hai। kitna yeh behad ka bada jhaad hai। pahle woh aayenge jinko pahle number mein jaana hai। nambarvaar aayenge na? sabhi sooryavanshi to ikatthe nahin aayenge। chandravanshi bhi sabhi ikatthe nahin aate। nambarvaar maala anusaar hi aayenge। paartadhaari sabhi ikatthe kaise aayenge। khel hi bigad jaae। yeh khel bada accurate bana hua hai, ismen koi change ho nahin sakti।

meethe-meethe bachche jab yahaan baithte ho to buddhi mein yahi yaad rehna chaahiye। aur satsangon mein to aur-aur baaten buddhi mein aati hain। yeh to ek hi padhaai hai, jisse tumhaari kamaai hoti hai। un shaastron aadi ko padhne se kamaai nahin hoti। haan, kuchh na kuchh gun achhe hote hain। granth padhne baithte hain to aise nahin sabhi nirvikaari hote hain। baap kehte hain is duniya mein sabhi bhrashtaachaar se paida hote hain। tum bachchon se kai poochhte hain vahaan janma kaise hoga? bolo, vahaan to 5 vikaar hi nahin, yogbal se bachche paida hote hain। pahle hi saakshaatkaar hota hai ki bachcha aane vaala hai। vahaan vikaar ki baat nahin। yahaan to bachchon ko bhi maaya gira deti hai। koi-koi to baap ko aakar sunaate bhi hain। sunaayenge nahin to sauguna danda pad jaayega। baap to sabhi bachchon ko kehte hain ki koi bhi paap karma ho jaata hai to baap ko jhat bataana chaahiye। baap avinaashi vaidya hai। surgeon ko sunaane se tum halke ho jaayenge। jab tak sangamayug hai tab tak baap se kuchh chhipaana nahin hai। koi chhipaate hain to baap ke dil ko jeet nahin sakte। saara madaar purooshaartha par hai। school mein aayenge hi nahin to character kaise sudhrenge? is samay sabke characters kharaab hain। vikaar hi pahle number ka kharaab characters hai isliye baap kehte hain - bachchon, kaam vikaar tumhaara mahaashatru hai। aage bhi yeh geeta ka gyaan suna tha to yeh sabhi baaten samajh mein nahin aati thi। ab baap direct geeta sunaate hain। abhi baap ne tum bachchon ko divya buddhi di hai, to bhakti ka naam sunte hansi aati hai ki kya-kya karte the! abhi to baap shiksha dete hain, ismen daya, kripa va aasheervaad ki baat hoti nahin। khud par hi daya, kripa va aasheervaad karni hai। baap to har bachche ko purushaartha karaate hain। koi to purushaartha kar baap ke dil ko jeet lete, koi to purushaartha karte-karte mar bhi padte hain। baap to har bachche ko ek jaisa hi padhaate hain phir koi samay aisi guhya baaten nikalti hain jo puraana sanshay hi ud jaata hai, phir khade ho jaate hain isliye baba ki padhaai kabhi miss nahin karni chaahiye। mukhya hai baap ki yaad। daiveegun bhi dhaaran karne hain। koi kuchh chhi-chhi bole to suna-ansuna kar dena chaahiye। hear no evil… oonch pad paana hai to maan-apmaan, duhkh-sukh, haar-jeet sab sahan zaroor karna hai। baap kitni yuktiyaan batlaate hain। phir bhi bachche baap ka bhi suna-ansuna kar dete hain to woh kya pad paayenge? baap kehte hain jab tak ashareeri nahin bane hain tab tak maaya ki kuchh na kuchh chot lagti rahegi। baap ka kehna nahin maante to baap ka disregard karte hain। phir bhi baap kehte hain bachche, sada jeete jaagte raho aur baap ko yaad kar oonch pad paao। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) koi bhi ulti-sulti baaten kare to suna-ansuna kar dena hai। hear no evil… duhkh-sukh, maan-apmaan sab kuchh sahan karna hai।

2) baap jo sunaate hain use kabhi suna-ansuna kar baap ka disregard nahin karna hai। maaya ki chot se bachne ke liye ashareeri rahne ka abhyaas zaroor karna hai।

vardaan:- baap samaan merciful ban sabko kshama kar sneh dene vaale master daata bhav

jaise baap ko merciful, merciful kehte hain, aise aap bachche bhi master merciful ho। jo merciful hain vahi kalyaan kar sakte hain, akalyaan karne vaale ko bhi kshama kar sakte hain। woh master sneh ke saagar hote hain, unke paas sneh ke bina aur kuchh hai hi nahin। vartamaan samay sampatti se bhi jyaada sneh ki aavashyakta hai isliye master daata ban sabko sneh dete chalo। koi bhi khaali haath na jaaye।

slogan:- teevra purushaarthi banne ki chaahna ho to jahaan chaah hai vahaan raah mil jaayegi।