बुधवार 1 जनवरी 2025 की दैनिक मुरली

01-01-2025 praatahmurli om shanti "baapdaada"' madhuban

“meethe bachche - tum gyaan ki barsaat kar hariyaali karne vaale ho, tumhein dhaarna karni aur karaani hai''

prashn:- jo baadal baraste nahin hain, unhein kaun-sa naam denge?

uttar:- woh hain susta baadal। chusta woh jo baraste hain। agar dhaarna ho to barasne ke bina rah nahin sakte। jo dhaarna kar doosron ko nahin karaate unka pet peeth se lag jaata hai, woh gareeb hain। praja mein chale jaate hain।

prashn:- yaad ki yaatra mein mukhya mehnat kaun-si hai?

uttar:- apne ko aatma samajh baap ko bindu roop mein yaad karna, baap jo hai jaisa hai usi swaroop se yathaartha yaad karna, ismen hi mehnat hai।

geet:- jo piya ke saath hai …

om shanti। jaise saagar ke oopar mein baadal hain to baadlon ka baap hua saagar। jo baadal saagar ke saath hain unke liye hi barsaat hai। woh baadal bhi paani bharkar phir baraste hain। tum bhi saagar ke paas aate ho bharne ke liye। saagar ke bachche baadal to ho hi, jo meetha paani kheench lete ho। ab baadal bhi anek prakaar ke hote hain। koi khoob jor se baraste hain, baadh kar dete hain, koi kam baraste hain। tumhaare mein bhi aise nambarvaar hain jo khoob jor se baraste hain, unka naam bhi gaaya jaata hai। jaise varsha bahut hoti hai to manushya khush hote hain। yeh bhi aise hai। jo achha baraste hain, unki mahima hoti hai, jo nahin baraste hain unki dil jaise susta ho jaati hai, pet bharega nahin। poori reeti dhaarna na hone se pet jaakar peeth se lagta hai। famine hota hai to manushyon ka pet peeth se lag jaata hai। yahaan bhi dhaarna kar aur dhaarna nahin karaate hain to pet jaakar peeth se lagega। khoob barasne vaale jaakar raaja-raani banenge aur woh gareeb। gareebon ka pet peeth se rehta hai। to bachchon ko dhaarna badi achhi karni chaahiye। ismen bhi aatma aur paramatma ka gyaan kitna sahaj hai। tum ab samajhte ho hamaare mein aatma aur paramatma donon ka gyaan nahin tha। to pet peeth se lag gaya na। mukhya hai hi aatma aur paramatma ki baat। manushya aatma ko hi nahin jaante hain to paramatma ko phir kaise jaan sakenge। kitne bade vidvaan, pandit aadi hain, koi bhi aatma ko nahin jaante। ab tumko maaloom hua hai ki aatma avinaashi hai, usmein 84 janmon ka avinaashi part noondha hua hai, jo chalta rehta hai। aatma avinaashi to part bhi avinaashi hai। aatma kaisa all-round part bajaati hai - yeh kisko pata nahin hai। woh to aatma so paramatma kah dete hain। tum bachchon ko aadi se lekar ant tak poora gyaan hai। woh to drama ki aayu hi laakhon varsha kah dete। abhi tumko saara gyaan mila hai। tum jaante ho is baap ke rache hue gyaan yagya mein yeh saari duniya svaahah honi hai isliye baap kehte hain deh sahit jo kuchh bhi hai yeh sab bhool jaao, apne ko aatma samjho। baap ko aur shantidham, sweet hom ko yaad karo। yeh to hai hi duhkhadhaam। tumhaare mein bhi nambarvaar purooshaartha anusaar samjha sakte hain। abhi tum gyaan se to bharpoor ho। baaki saari mehnat hai yaad mein। janma-janmaantar ka deh-abhimaan mitaakar dehi-abhimaani banen, ismen badi mehnat hai। kehna to bada sahaj hai parantu apne ko aatma samjhen aur baap ko bhi bindu roop mein yaad karen, ismen mehnat hai। baap kehte hain main jo hoon, jaisa hoon, aisa koi mushkil yaad kar sakte hain। jaise baap vaise bachche hote hain na। apne ko jaana to baap ko bhi jaan jaayenge। tum jaante ho padhaane vaala to ek hi baap hai, padhne vaale bahut hain। baap raajdhaani kaise sthaapan karte hain, woh tum bachche hi jaante ho। baaki yeh shaastra aadi sab hain bhakti maarga ki saamagri। samjhaane ke liye hamko kehna padta hai। baaki ismen ghrina ki koi baat nahin hai। shaastron mein bhi brahma ka din aur raat kehte hain parantu samajhte nahin। raat aur din aadha-aadha hota hai। seedhi par kitna sahaj samjhaaya jaata hai।

manushya samajhte hain ki bhagwan to bada samartha hai woh jo chaahe so kar sakte hain। lekin baba kehte main bhi drama ke bandhan mein baandha hua hoon। bhaarat par to kitni aaphten aati rehti hain phir main ghadi-ghadi aata hoon kya? mere part ki limit hai। jab poora duhkh hota jaata hai tab main apne samay par aata hoon। ek second ka bhi farka nahin padta hai। drama mein har ek ka accurate part noondha hua hai। yeh hai highest baap ki reincarnation। phir nambarvaar sab aate hain, kam taakat vaale। tum bachchon ko abhi baap se knowledge mili hai jo tum vishwa ke maalik bante ho। tumhaare mein full force ki taakat aati hai। purooshaartha kar tum tamopradhaan se satopradhaan bante ho। auron ka to part hi nahin hai। mukhya hai drama, jiski knowledge tumko abhi milti hai। baaki to sab hain material kyonki woh sab in okhon se dekha jaata hai। wonder oph di world to baba hai, jo phir rachte bhi svarga hain, jisko heaven, paradise kehte hain। unki kitni mahima hai, baap aur baap ke rachna ki badi mahima hai। oonch te oonch hai bhagwan। oonch te oonch svarga ki sthaapna baap kaise karte hain, yeh koi bhi kuchh bhi nahin jaante hain। tum meethe-meethe bachche bhi nambarvaar purooshaartha anusaar jaante ho aur us anusaar hi pad paate ho, jisne purooshaartha kiya woh drama anusaar hi karte hain। purooshaartha bigar to kuchh mil na sake। karma bigar ek second bhi rah nahin sakte। woh hathayogi praanaayaam chadha lete hain, jaise jad ban jaate hain, andar pade rehte hain, oopar mitti jam jaati hai, mitti ke oopar paani padne se ghaas jam jaati hai। parantu isse kuchh phaayda nahin। kitna din aise baithe rahenge? karma to zaroor karna hi hai। karma sannyaasi koi ban na sake। haan, sirf khaana aadi nahin banaate hain isliye unko karma-sannyaasi kah dete hain। yeh bhi unhon ka drama mein part hai। yeh nivritti maarga vaale bhi nahin hote to bhaarat ki kya haalat ho jaati? bhaarat number one pure tha। baap pahle-pahle purity sthaapan karte hain, jo phir aadhaakalpa chalti hai। barobar satayug mein ek dharma, ek raajya tha। phir deity raajya ab phir se sthaapan ho raha hai। aise achhe-achhe slogan banaakar manushyon ko sujaag karna chaahiye। phir se deity raajya-bhaagya aakar lo। abhi tum kitna achhi reeti samajhte ho। shreekrishna ko shyaam-sundar kyon kehte hain - yeh bhi abhi tum jaante ho। aajkal to bahut hi aise-aise naam rakh dete hain। shreekrishna se competition karte hain। tum bachche jaante ho patit raajaayen kaise paavan raajaaon ke aage jaakar maatha tekte hain parantu jaante thode hi hain। tum bachche jaante ho jo poojya the vahi phir pujaari ban jaate hain। abhi tumhaari buddhi mein saara chakra hai। yeh bhi yaad rahe to avastha badi achhi rahe। parantu maaya simran karne nahin deti hai, bhula deti hai। sadaiv harshitmukh avastha rahe to tumko devta kaha jaae। lakshmi-naaraayan ka chitra dekh kitna khush hote hain। raadhe-krishna athva raam aadi ko dekh itna khush nahin hote kyonki shreekrishna ke liye shaastron mein hangaamen ki baaten likh di hain। yeh baba banta bhi shri naaraayan hai na। baba to in lakshmi-naaraayan ke chitra ko dekh khush hote hain। bachchon ko bhi aise samajhna chaahiye, baaki kitna samay is puraane shareer mein honge phir jaakar prince banenge। yeh em object hai na। yeh bhi sirf tum jaante ho। khushi mein kitna gadgad hona chaahiye। jitna padhenge utna oonch pad paayenge, padhenge nahin to kya pad milega? kahaan vishwa ke mahaaraaja-mahaaraani, kahaan saahookaar, praja mein naukar-chaakar। subject to ek hi hai। sirf manmanaabhav, madhyaaji bhav, alpha aur be, yaad aur gyaan। inko kitni khushi hui - alpha ko allaah mila, baaki sab de diya। kitni badi lottery mil gai। baaki kya chaahiye! to kyon na bachchon ke andar mein khushi rahni chaahiye isliye baba kehte hain aisa translight ka chitra sabke liye banvaayen jo bachche dekhkar khush hote rahen। shivbaaba brahma dvaara hamko yeh varsa de rahe hain। manushya to kuchh nahin jaante hain। bilkul hi tuchchha buddhi hain। abhi tum tuchchha buddhi se svachchha buddhi ban rahe ho। sab kuchh jaan gaye ho, aur kuchh padhne ki darkaar nahin। is padhaai se tumko vishwa ki baadshaahi milti hai, isliye baap ko knowledgeful kehte hain। manushya phir samajhte hain har ek ki dil ko jaante hain, parantu baap to knowledge dete hain। teacher samajh sakte hain phalaana padhte hain, baaki saara din yeh thode hi baith dekhenge ki inki buddhi mein kya chalta hai। yeh to wonderful knowledge hai। baap ko gyaan ka saagar, sukh-shanti ka saagar kaha jaata hai। tum bhi abhi master gyaan saagar bante ho। phir yeh title ud jaayega। phir sarvagun sampanna, 16 kala sampoorn banenge। yeh hai manushya ka oonch martaba। is samay yeh hai eeshvareey martaba। kitni samajhne aur samjhaane ki baaten hain। lakshmi-naaraayan ka chitra dekh badi khushi honi chaahiye। ham abhi vishwa ke maalik banenge। knowledge se hi sab gun aate hain। apna em object dekhne se hi refreshment aa jaati hai, isliye baba kehte hain yeh lakshmi-naaraayan ka chitra to harek ke paas hona chaahiye। yeh chitra dil mein pyaar badhaata hai। dil mein aata hai - bas, yeh mrityulok mein last janma hai। phir ham amarlok mein yeh jaakar banoonga, tatatvam। aise nahin ki aatma so paramatma। nahin, yeh gyaan saara buddhi mein baitha hua ho। jab bhi kisko samjhaate ho, bolo ham kabhi bhi koi se bheekh nahin maangate। prajaapita brahma ke bachche to bahut hain। ham apne hi tan-man-dhan se seva karte hain। brahman apni kamaai se hi yagya ko chala rahe hain। shoodron ke paise nahin laga sakte। dher bachche hain woh jaante hain jitna ham tan-man-dhan se service karenge, surrender honge utna pad paayenge। jaante hain baba ne beej boya hai to yeh lakshmi-naaraayan bante hain। paise yahaan kaam mein to aane nahin hain, kyon na is kaarya mein laga den। phir kya surrender hone vaale bhookh marte hain kya? bahut sambhaal hoti rehti hai। baba ki kitni sambhaal hoti rehti hai। yeh to shivbaaba ka rath hai na। saare world ko heaven banaane vaala hai। yeh haseen musaaphir hai।

parampita paramatma to aakar sabko haseen banaate hain, tum saanvare se gora haseen bante ho na। kitna salona saajan hai, aakar sabko gora bana dete hain। un par to kurbaan jaana chaahiye। yaad karte rehna chaahiye। jaise aatma ko dekh nahin sakte, jaan sakte hain, vaise paramatma ko bhi jaan sakte hain। dekhne mein to aatma-paramatma donon ek jaise bindu hain। baaki to saari knowledge hai। yeh badi samajh ki baaten hain। bachchon ki buddhi mein yeh note rahni chaahiye। buddhi mein nambarvaar purooshaartha anusaar dhaarna hoti hai। doctor logon ko bhi davaaiyaan yaad rehti hain na। aise nahin ki us samay baith kitaab dekhenge। doktari ki bhi points hoti hain, bairistari ki bhi points hoti hain। tumhaare paas bhi points hain, topics hain, jis par samjhaate hain। koi point kisko phaayda kar leti hai, koi ko kis point se teer lag jaata hai। point to bahut dher ki dher hain। jo achhi reeti dhaaran karenge woh achhi reeti service kar sakenge। aadhaakalpa se mahaarogi patient hain। aatma patit bani hai, unke liye ek avinaashi surgeon davaai dete hain। woh sadaiv surgeon hi rehte hain, kabhi beemaar hote nahin। aur to sab beemaar pad jaate hain। avinaashi surgeon ek hi baar aakar manmanaabhav ka injection lagaate hain। kitna sahaj hai, chitra ko pocket mein rakh do sadaiv। baba naaraayan ka pujaari tha to lakshmi ka chitra nikaal akela naaraayan ka chitra rakh diya। abhi pata padta hai jiski ham pooja karte the, woh ab ban rahe hain। lakshmi ko vidaai de di to yeh pakka hai, ham lakshmi nahin banoonga। lakshmi baith pair dabaaye, yeh achha nahin lagta tha। unko dekhkar puroosh log stri se pair dabvaate hain। vahaan thode hi lakshmi aise pair dabaayegi। yeh rasma-rivaaj vahaan hoti nahin। yeh rasam raavan raajya ki hai। is chitra mein saari knowledge hai। oopar mein trimoorti bhi hai, is knowledge ko saara din simran kar bada wonder lagta hai। bhaarat ab svarga ban raha hai। kitni achhi samjhaani hai, pata nahin, manushyon ki buddhi mein kyon nahin baithta hai? aag bade jor se lagegi, bhambhor ko aag lagni hai। raavan raajya to zaroor khalaas hona chahie। yagya mein bhi pavitra brahman chaahiye। yeh bada bhaari yagya hai - saare vishwa mein purity laane ka। vo brahman bhi bhal brahma ki aulaad kahlaate hain, parantu woh to kukh vanshaavli hain। brahma ki santaan to pavitra mukh vanshaavli the na। to unhon ko yeh samjhaana chaahiye। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) svachchha buddhi ban wonderful gyaan ko dhaaran kar baap samaan master gyaan saagar banna hai। knowledge se sarva gun svayan mein dhaaran karne hain।

2) jaise baba ne tan-man-dhan service mein lagaaya, surrender hue aise baap samaan apna sab kuchh eeshvareey seva mein saphal karna hai। sada refresh rahne ke liye em object ka chitra saath mein rakhna hai।

vardaan:- ekras sthiti dvaara sada ek baap ko follow karne vaale prasannachit bhav

aap bachchon ke liye brahma baap ki jeevan accurate computer hai। jaise aajkal computer dvaara har ek prashn ka uttar poochhte hain। aise man mein jab bhi koi prashn uthta hai to kya, kyon, kaise ke bajaae brahma baap ke jeevan roopi computer se dekho। kya aur kaise ka question aise mein badal jaayega। prashnachit ke bajaae prasannachit ban jaayenge। prasannachit arthaat ekras sthiti mein ek baap ko follow karne vaale।

slogan:- aatmik shakti ke aadhaar par sada svastha rahne ka anubhav karo।

vishesh note:- sabhi brahma vatsa 1 January se 31 January 2025 tak vishesh antarmukhta ki gupha mein baith yog tapasya karte hue poore vishwa ko apni shaktishaali mansa dvaara vishesh sakaash dene ki seva karna ji। isi lakshya se is maas ke patra pushpa mein jo avyakt ishaare bheje gaye hain, woh poore January maas mein murli ke neeche bhi likh rahe hain। aap sabhi in points par vishesh manan chintan karte hue mansa seva ke anubhvi banen।

apni shaktishaali mansa dvaara sakaash dene ki seva karo

aap shanti doot bachche, kahaan bhi rehte, chalte-phirte sada apne ko shanti doot samajhkar chalo। jo svayan shant swaroop, shaktishaali swaroop mein sthit honge woh doosron ko bhi shanti aur shakti ki sakaash dete rahenge।