शनिवार 4 जनवरी 2025 की दैनिक मुरली

04-01-2025 praatahmurli om shanti "baapdaada"' madhuban

“meethe bachche - tum ashareeri ban jab baap ko yaad karte ho to tumhaare liye yeh duniya hi khatma ho jaati hai, deh aur duniya bhooli hui hai''

prashn:- baap dvaara sabhi bachchon ko gyaan ka teesra netra kyon mila hai?

uttar:- apne ko aatma samajh, baap jo hai jaisa hai, usi roop mein yaad karne ke liye teesra netra mila hai। parantu yeh teesra netra kaam tab karta hai jab poora yogayukta rahen arthaat ek baap se sachchi preet ho। kisi ke naam-roop mein latke hue na hon। maaya preet rakhne mein hi vighna daalti hai। isi mein bachche dhokha khaate hain।

geet:- marna teri gali mein …

om shanti। sivaae tum brahman bachchon ke is geet ka arth koi samajh na sake। jaise ved-shaastra aadi banaaye hain parantu jo kuchh padhte hain uska arth nahin samajh sakte isliye baap kehte hain main brahma mukh dvaara sab vedon-shaastron ka saar sam-jhaata hoon, vaise hi in geeton ka arth bhi koi samajh nahin sakte, baap hi inka arth bataate hain। aatma jab shareer se nyaari ho jaati hai to duniya se saara sambandh toot jaata hai। geet bhi kehta hai apne ko aatma samajh ashareeri ban baap ko yaad karo to yeh duniya khatma ho jaati hai। yeh shareer is prithvi par hai, aatma inse nikal jaati hai to phir us samay unke liye manushya srishti hai nahin। aatma nangi ban jaati hai। phir jab shareer mein aati hai to part shuru hota hai। phir ek shareer chhod doosre mein jaakar pravesh karti hai। vaapis mahtatva mein nahin jaana hai। udkar doosre shareer mein jaati hai। yahaan is aakaash tatva mein hi unko part bajaana hai। mool vatan mein nahin jaana hai। jab shareer chhodte hain to na yeh karmabandhan, na woh karmabandhan rehta hai। shareer se hi alag ho jaate hain na। phir doosra shareer lete to woh karmabandhan shuru hota hai। yeh baaten sivaae tumhaare aur koi manushya nahin jaante। baap ne samjhaaya hai sab bilkul hi besmajh hain। parantu aise koi samajhte thode hi hain। apne ko kitna aklamand samajhte hain, pees prize dete rehte hain। yeh bhi tum brahman kul bhooshan achhi reeti samjha sakte ho। woh to jaante hi nahin ki pees kisko kaha jaata hai? koi to mahaatmaaon ke paas jaate hain ki man ki shanti kaise ho? yeh to kehte hain world mein shanti kaise ho! aise nahin kahenge ki niraakaari duniya mein shanti kaise ho? woh to hai hi shantidham। ham aatmaayen shantidham mein rehti hain parantu yeh to man ki shanti kehte hain। woh jaante nahin ki shanti kaise milegi? shantidham to apna ghar hai। yahaan shanti kaise mil sakti? haan, satayug mein sukh, shanti, sampatti sab hai, jiski sthaapna baap karte hain। yahaan to kitni ashaanti hai। yeh sab ab tum bachche hi samajhte ho। sukh, shanti, sampatti bhaarat mein hi thi। woh varsa tha baap ka aur duhkh, ashaanti, kangaalapna, yeh varsa hai raavan ka। yeh sab baaten behad ka baap baith bachchon ko samjhaate hain। baap paramdham mein rahne vaala knowledgeful hai, jo sukhdhaam ka hamko varsa dete hain। woh ham aatmaon ko samjha rahe hain। yeh to jaante ho knowledge hoti hai aatma mein। unko hi gyaan ka saagar kaha jaata hai। woh gyaan ka saagar is shareer dvaara world ki history-geography samjhaate hain। world ki aayu to honi chaahiye na। world to hai hi। sirf nai duniya aur puraani duniya kaha jaata hai। yeh bhi manushyon ko pata nahin। new world se old world hone mein kitna samay lagta hai?

tum bachche jaante ho kaliyug ke baad satayug zaroor aana hai isliye kaliyug aur satayug ke sangam par baap ko aana padta hai। yeh bhi tum jaante ho parampita paramatma brahma dvaara nai duniya ki sthaapna, shankar dvaara vinaash karaate hain। trimoorti ka arth hi yeh hai - sthaapna, vinaash, paalna। yeh to common baat hai। parantu yeh baaten tum bachche bhool jaate ho। nahin to tumko khushi bahut rahe। nirantar yaad rahni chaahiye। baba hamko ab nai duniya ke liye laayak bana rahe hain। tum bhaaratvaasi hi laayak bante ho, aur koi nahin। haan, jo aur-aur dharmon mein convert ho gaye hain, woh aa sakte hain। phir ismen convert ho jaayenge, jaise usmein hue the। yeh saari knowledge tumhaari buddhi mein hai। manushyon ko samjhaana hai yeh puraani duniya ab badalti hai। mahaabhaarat ladaai bhi zaroor lagni hai। is samay hi baba aakar raajayog sikhlaate hain। jo raajayog seekhte hain, woh nai duniya mein chale jaayenge। tum sabko samjha sakte ho ki oonch te oonch hai bhagwan, phir brahma-vishnu-shankar, phir aao yahaan, mukhya hai jagat amba, jagat pita। baap aate bhi yahaan hain brahma ke tan mein, prajaapita brahma to yahaan hai na। brahma dvaara sthaapna sookshm vatan mein to nahin hogi na। yahaan hi hoti hai। yeh vyakta se avyakt ban jaate hain। yeh raajayog seekh phir vishnu ke do roop bante hain। world ki history-geography samajhni chaahiye na। manushya hi samjhenge। world ka maalik hi world ki history-geography samjha sakte hain। woh knowledgeful, punarjanma rahit hai। yeh knowledge kiski buddhi mein nahin hai। parakhne ki bhi buddhi chaahiye na। kuchh buddhi mein baithta hai ya aise hi hai, nabja dekhni chaahiye। ek ajmal khaan naameegraami vaidya hokar gaya hai। kehte hain dekhne se hi unko beemaari ka pata pad jaata tha। ab tum bachchon ko bhi samajhna chaahiye ki yeh laayak hai ya nahin?

baap ne bachchon ko gyaan ka teesra netra diya hai, jisse tum apne ko aatma samajh, baap jo hai, jaisa hai, usko usi roop mein yaad karte ho। parantu aisi buddhi unki hogi jo poora yogayukta honge, jinki baap se preet buddhi hogi। sab to nahin hain na। ek do ke naam-roop mein latak padte hain। baap kehte hain preet to mere saath lagaao na। maaya aisi hai jo preet rakhne nahin deti hai। maaya bhi dekhti hai hamaara graahak jaata hai to ekdam naak-kaan se pakad leti hai। phir jab dhokha khaate hain tab samajhte hain maaya se dhokha khaaya। maayaajeet, jagatjeet ban nahin sakenge, oonch pad pa nahin sakenge। ismen hi mehnat hai। shreemat kehti hai maamekam yaad karo to tumhaari jo patit buddhi hai woh paavan ban jaayegi। parantu kaiyon ko bada mushkil lagta hai। ismen subject ek hi hai alaph aur be। bas, do akshar bhi yaad nahin kar sakte hain! baba kahe alaph ko yaad karo phir apni deh ko, doosre ki deh ko yaad karte rehte hain। baba kehte hain deh ko dekhte hue tum mujhe yaad karo। aatma ko ab teesra netra mila hai mujhe dekhne-samajhne ka, usse kaam lo। tum bachche abhi trinetri, trikaaldarshi bante ho। parantu trikaaldarshi bhi nambarvaar hain। knowledge dhaaran karna koi mushkil nahin hai। bahut hi achha samajhte hain parantu yogbal kam hai, dehi-abhimaani-pana bahut kam hai। thodi baat mein krodh, gussa aa jaata hai, girte rehte hain। uthte hain, girte hain। aaj uthe kal phir gir padte hain। deh-abhimaan mukhya hai phir aur vikaar lobh, moh aadi mein phans padte hain। deh mein bhi moh rehta hai na। maataaon mein moh jaasti hota hai। ab baap usse chhudaate hain। tumko behad ka baap mila hai phir moh kyon rakhte ho? us samay shakla baatcheet hi bandar misal ho jaati hai। baap kehte hain - nashtomoha ban jaao, nirantar mujhe yaad karo। paapon ka bojha sir par bahut hai, woh kaise utre? parantu maaya aisi hai, yaad karne nahin degi। bhal kitna bhi maatha maaro ghadi-ghadi buddhi ko uda deti hai। kitni koshish karte hain ham most beloved baba ki hi mahima karte rahen। baba, bas aapke paas aaye ki aaye, parantu phir bhool jaate hain। buddhi aur taraph chali jaati hai। yeh number one mein jaane vaala bhi purushaarthi hai na।

bachchon ki buddhi mein yeh yaad rehna chaahiye ki ham god fatherly student hain। geeta mein bhi hai - bhagvaanuvaach, main tumko raajaaon ka raaja banaata hoon। sirf shiv ke badle shreekrishna ka naam daal diya hai। vaastav mein shivbaaba ki jayanti saari duniya mein manaani chaahiye। shivbaaba sabko duhkh se liberate kar guide ban le jaate hain। yeh to sab maante hain ki woh liberator, guide hai। sabka patit-paavan baap hai, sabko shantidham-sukhdhaam mein le jaane vaala hai to unki jayanti kyon nahin manaate hain? bhaaratvaasi hi nahin manaate hain isliye hi bhaarat ki yeh buri gati hui hai। maut bhi buri gati se hota hai। woh to bombs aise banaate hain, gas nikla aur khalaas, jaise chloroform lag jaata hai। yeh bhi unhon ko banaane hi hain। banda hona impossible hai। jo kalpa pahle hua tha so ab repeat hoga। in mooslon aur natural calamities se puraani duniya ka vinaash hua tha, so abhi bhi hoga। vinaash ka samay jab hoga to drama plan anusaar act mein aa hi jaayenge। drama vinaash zaroor karaayega। rakta ki nadiyaan yahaan bahengi। civil war mein ek-do ko maar daalte hain na। tumhaare mein bhi thode jaante hain ki yeh duniya badal rahi hai। ab ham jaate hain sukhdhaam। to sadaiv gyaan ke ateendriy sukh mein rehna chaahiye। jitna yaad mein rahenge utna sukh badhta jaayega। chhi-chhi deh se nashtomoha hote jaayenge। baap sirf kehte hain alaph ko yaad karo to be baadshaahi tumhaari hai। second mein baadshaahi, baadshaah ko bachcha hua to goya bachcha baadshaah bana na। to baap kehte hain mujhe yaad karte raho aur chakra ko yaad karo to chakravarti mahaaraaja banenge isliye gaaya jaata hai second mein jeevanmukti, second mein beggar tu prince। kitna achha hai। to shreemat par achhi reeti chalna chaahiye। kadam-kadam par raay leni hoti hai।

baap samjhaate hain meethe bachche, trustee bankar raho to mamatva mit jaaye। parantu trustee banna maasi ka ghar nahin hai। yeh khud trustee bane hain, bachchon ko bhi trustee banaate hain। yeh kuchh bhi lete hain kya? kehte hain tum trustee ho sambhaalo। trustee bane to phir mamatva mit jaata hai। kehte bhi hain eeshvar ka sab kuchh diya hua hai। phir kuchh nuksaan padta hai ya koi mar jaata hai to beemaar ho padte hain। milta hai to khushi hoti hai। jabki kehte ho eeshvar ka diya hua hai to phir marne par rone ki kya darkaar hai? parantu maaya kam nahin hai, maasi ka ghar thode hi hai। is samay baap kehte hain tumne hamko bulaaya hai ki is patit duniya mein ham nahin rehna chaahte hain, hamko paavan duniya mein le chalo, saath le chalo parantu iska arth bhi samajhte nahin। patit-paavan aayega to zaroor shareer khatma honge na, tab to aatmaon ko le jaayenge। to aise baap ke saath preet buddhi honi chaahiye। ek se hi lav rakhna hai, unko hi yaad karna hai। maaya ke toofaan to aayenge। karmendriyon se koi vikarma nahin karna chaahiye। woh bekaayde ho jaata hai। baap kehte hain main aakar is shareer ka aadhaar leta hoon। yeh inka shareer hai na। tumko yaad baap ko karna hai। tum jaante ho brahma bhi baba, shiv bhi baba hai। vishnu aur shankar ko baba nahin kahenge। shiv hai niraakaar baap। prajaapita brahma hai saakaari baap। ab tum saakaar dvaara niraakaar baap se varsa le rahe ho। daada inmen pravesh karte hain tab kehte hain daade ka varsa baap dvaara ham lete hain। daada (grand father) hai niraakaar, baap hai saakaar। yeh wonderful nai baaten hain na। trimoorti dikhaate hain parantu samajhte nahin। shiv ko uda diya hai। baap kitni achhi-achhi baaten samjhaate hain to khushi rahni chaahiye - ham student hain। baba hamaara baap, teacher, satguru hai। abhi tum world ki history-geography behad ke baap se sun rahe ho phir auron ko sunaate ho। yeh 5 hazaar varsha ka chakra hai। college ke bachchon ko world ki history-geography samjhaani chaahiye। 84 janmon ki seedhi kya hai, bhaarat ki chadhti kala aur utarti kala kaise hoti hai, yeh samjhaana hai। second mein bhaarat svarga ban jaata hai phir 84 janmon mein bhaarat narka banta hai। yeh to bahut hi sahaj samajhne ki baat hai। bhaarat golden ej se iron ej mein kaise aaya hai - yeh to bhaaratvaasiyon ko samjhaana chaahiye। teachers ko bhi samjhaana chaahiye। woh hai jismaani knowledge, yeh hai roohaani knowledge। woh manushya dete hain, yeh god father dete hain। woh hai manushya srishti ka beejroop, to unke paas manushya srishti ka hi knowledge hoga। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) is chhi-chhi deh se poora nashtomoha ban gyaan ke ateendriy sukh mein rehna hai। buddhi mein rahe ab yeh duniya badal rahi hai ham jaate hain apne sukhdhaam।

2) trustee bankar sab kuchh sambhaalte hue apna mamatva mita dena hai। ek baap se sachchi preet rakhni hai। karmendriyon se kabhi bhi koi vikarma nahin karna hai।

vardaan:- brahma baap samaan shreshtha te shreshtha tasveer banaane vaale paropkaari bhav

shreshtha smriti aur shreshtha karma dvaara takdeer ki tasveer to sabhi bachchon ne banaai hai, abhi sirf last touching hai sampoornata ki va brahma baap samaan shreshtha te shreshtha banne ki, iske liye paropkaari bano arthaat svaartha bhaav se sada mukta raho। har paristhiti mein, har kaarya mein, har sahayogi sangathan mein jitna nihsvaartha pan hoga utna hi par-upkaari ban sakenge। sada svayan ko bharpoor anubhav karenge। sada praapti swaroop ki sthiti mein sthit rahenge। sva ke prati kuchh bhi sveekaar nahin karenge।

slogan:- sarvasva tyaagi banne se hi saralta va sahansheelta ka gun aayega।

apni shaktishaali mansa dvaara sakaash dene ki seva karo

yeh sakaash dene ki seva nirantar kar sakte ho, ismen tabiyat va samay ki baat nahin hai। din raat is behad ki seva mein lag sakte ho। jaise brahma baap ko dekha, raat ko bhi aankh khuli aur behad ki sakaash dene ki seva hoti rahi, aise follow father karo। jab aap bachche behad ko sakaash denge to najdeek vaale automatic sakaash lete rahenge। is behad ki sakaash dene se vaayumandal automatic banega।