सोमवार 13 जनवरी 2025 की दैनिक मुरली

13-01-2025 praatahmurli om shanti "baapdaada"' madhuban

“meethe bachche - patit se paavan banaane vaale baap ke saath tumhaara bahut-bahut lav hona chaahiye, savere-savere uthkar pahle-pahle kaho shivbaaba good morning''

prashn:- accurate yaad ke liye kaun si dhaarnaayen chaahiye? accurate yaad vaale ki nishaani kya hogi?

uttar:- accurate yaad ke liye dhairyata, gambheerta aur samajh chaahiye। is dhaarna ke aadhaar se jo yaad karte hain unki yaad, yaad se milti hai aur baap ki current aane lagti hai। us current se aayu badhegi, healthy bante jaayenge। dil ekdam thar jaayegi (sheetal ho jaayegi), aatma satopradhaan banti jaayegi।

om shanti। baap kehte hain meethe bachche tatatvam arthaat tum aatmaayen bhi shant swaroop ho। tum sarva aatmaon ka svadharma hai hi shanti। shantidham se phir yahaan aakar talkie bante ho। yeh karmendriyaan tumko milti hai part bajaane ke liye। aatma chhoti-badi nahin hoti hai। shareer chhota bada hota hai। baap kehte hain main to shareerdhaari nahin hoon। mujhe bachchon se sanmukh milne aana hota hai। samjho jaise baap hai, unse bachche paida hote hain, to woh bachcha aise nahin kahega ki main paramdham se janma le maat-pita se milne aaya hoon। bhal koi nai aatma aati hai kiske bhi shareer mein, va koi puraani aatma kiske shareer mein pravesh karti hai to aise nahin kahenge ki maat-pita se milne aaya hoon। unko automatically maat-pita mil jaate hain। yahaan yeh hai nai baat। baap kehte hain main paramdham se aakar tum bachchon ke sammukh hua hoon। bachchon ko phir se knowledge deta hoon kyonki main hoon knowledgeful, gyaan ka saagar… main aata hoon tum bachchon ko padhaane, raajayog sikhaane। raajayog sikhaane vaala bhagwan hi hai। krishna ki aatma ko yeh eeshvareey part nahin hai। har ek ka part apna। eeshvar ka part apna hai। to baap samjhaate hain meethe bachche apne ko aatma samjho। aisa apne ko samajhna kitna meetha lagta hai। ham kya the! ab kya ban rahe hain!

yeh drama kaisa wonderful bana hua hai yeh bhi tum abhi samjhaate ho। yeh purushottam sangamayug hai itna sirf yaad rahe to bhi pakka ho jaata hai ki ham satayug mein jaane vaale hain। abhi sangam par hain phir jaana hai apne ghar isliye paavan to zaroor banna hai। andar mein bahut khushi honi chaahiye। oho! behad ka baap kehte hain meethe-meethe bachchon mujhe yaad karo to tum satopradhaan banenge। vishwa ka maalik banenge। baap kitna bachchon ko pyaar karte hain। aise nahin ki sirf teacher ke roop mein padhaakar aur ghar chale jaate hain। yeh to baap bhi teacher bhi hai। tumko padhaate bhi hai। yaad ki yaatra bhi sikhlaate hain।

aisa vishwa ka maalik banaane vaale, patit se paavan banaane vaale baap ke saath bahut lav hona chaahiye। savere-savere uthne se hi pahle-pahle shivbaaba se good morning karna chaahiye। good morning arthaat yaad karenge to bahut khushi mein rahenge। bachchon ko apne dil se poochhna hai ham savere uthkar kitna behad ke baap ko yaad karte hain? manushya bhakti bhi savere karte hain na! bhakti kitna pyaar se karte hain। parantu baba jaante hain kai bachche dil va jaan, sik va prem se yaad nahin karte hain। savere uth baba se good morning karen, gyaan ke chintan mein rahen to khushi ka paara chadhe। baap se good morning nahin karenge to paapon ka bojha kaise utrega। mukhya hai hi yaad, isse bhavishya ke liye tumhaari bahut bhaari kamaai hoti hai। kalpa-kalpaantar yeh kamaai kaam aayegi। bada dhairya, gambheerta, samajh se yaad karna hota hai। mote hisaab mein to bhal karke yeh kah dete hain ki ham baba ko bahut yaad karte hain parantu accurate yaad karne mein mehnat hai। jo baap ko jaasti yaad karte hain unko current jaasti milti hai kyonki yaad se yaad milti hai। yog aur gyaan do cheeze hain। yog ki subject alag hai, bahut bhaari subject hai। yog se hi aatma satopradhaan banti hai। yaad bina satopradhaan hona, asambhav hai। achhi reeti pyaar se baap ko yaad karenge to automatically current milegi, healthy ban jaayenge। current se aayu bhi badhti hai। bachche yaad karte hain to baba bhi searchlight dete hain। baap kitna bada bhaari khajaana tum bachchon ko dete hain।

meethe bachchon ko yeh pakka yaad rakhna hai, shivbaaba hamko padhaate hain। shivbaaba patit-paavan bhi hai। sadgati daata bhi hain। sadgati maana svarga ki raajaai dete hain। baba kitna meetha hai। kitna pyaar se bachchon ko baith padhaate hain। baap, daada dvaara hamko padhaate hain। baba kitna meetha hai। kitna pyaar karte hain। koi takleeph nahin dete। sirf kehte hain mujhe yaad karo aur chakra ko yaad karo। baap ki yaad mein dil ekdam thar jaani chaahiye। ek baap ki hi yaad sataani chaahiye kyonki baap se varsa kitna bhaari milta hai। apne ko dekhna chaahiye hamaara baap ke saath kitna lav hai? kahaan tak hamaare mein daiveegun hain? kyonki tum bachche ab kaanton se phool ban rahe ho। jitna-jitna yog mein rahenge utna kaanton se phool, satopradhaan bante jaayenge। phool ban gaye phir yahaan rah nahin sakenge। phoolon ka bageecha hai hi svarga। jo bahut kaanton ko phool banaate hain unhein hi sachcha khushboodaar phool kahenge। kabhi kisko kaanta nahin lagaayenge। krodh bhi bada kaanta hai, bahuton ko duhkh dete hain। abhi tum bachche kaanton ki duniya se kinaare par aa gaye ho, tum ho sangam par। jaise maali phoolon ko alag pot (bartan) mein nikaalkar rakhte hain vaise hi tum phoolon ko bhi ab sangamayugi pot mein alag rakha hua hai। phir tum phool svarga mein chale jaayenge, kaliyugi kaanten bhasma ho jaayenge।

meethe bachche jaante hain paarlaukik baap se hamko avinaashi varsa milta hai। jo sachche-sachche bachche hain, jinka baapdaada se poora lav hai unko badi khushi rahegi। ham vishwa ka maalik bante hain। haan purushaartha se hi vishwa ka maalik bana jaata hai, sirf kahne se nahin। jo ananya bachche hain unhon ko sadaiv yeh yaad rahega ki ham apne liye phir se vahi sooryavanshi, chandra-vanshi raajdhaani sthaapan kar rahe hain। baap kehte hain meethe bachche jitna tum bahuton ka kalyaan karenge utna hi tumko ujoora milega। bahuton ko raasta bataayenge to bahuton ki aasheervaad milegi। gyaan ratnon se jholi bharkar phir daan karna hai। gyaan saagar tumko ratnon ki thaaliyaan bhar-bhar kar dete hain। jo phir daan karte hain vahi sabko pyaare lagte hain। bachchon ke andar mein kitni khushi honi chaahiye। sensible bachche jo honge woh to kahenge ham baba se poora hi varsa lenge, ekdam chatak padenge। baap se bahut lav rahega kyonki jaante hain praan-daan dene vaala baap mila hai। knowledge ka vardaan aisa dete hain jisse ham kya se kya ban jaate hain। insolvent se solvent ban jaate hain, itna bhandaara bharpoor kar dete hain। jitna baap ko yaad karenge utna lav rahega, kashish hogi। sui saaph hoti hai to chakmak (chumbak) taraph khaich jaati hai na। baap ki yaad se kat nikalti jaayegi। ek baap ke sivaae aur koi yaad na aaye। jaise stri ka pati ke saath kitna lav hota hai। tumhaari bhi sagaai hui hai na। sagaai ki khushi kam hoti hai kya? shivbaaba kehte hain meethe bachche tumhaari hamaare saath sagaai hai, brahma ke saath sagaai nahin hai। sagaai pakki ho gai phir to unki hi yaad sataani chaahiye।

baap samjhaate hain meethe bachche gaphlat mat karo। svadarshan chakradhaari bano, light house bano। svadarshan chakradhaari banne ki practice achhi ho jaayegi to phir tum jaise gyaan ka saagar ho jaayenge। jaise student padhkar teacher ban jaate hain na। tumhaara dhandha hi yeh hai। sabko svadarshan chakradhaari banaao tab hi chakravarti raaja-raani banenge isliye baba sadaiv bachchon se poochhte hain svadarshan chakradhaari ho baithe ho? baap bhi svadarshan chakradhaari hai na। baap aaye hain tum meethe bachchon ko vaapis le jaane। tum bachchon bigar hamko bhi jaise beaaraami hoti hai। jab samay hota hai to beaaraami ho jaati hai। bas abhi ham jaaoon, bachche bahut pukaarte hain, bahut duhkhi hain। taras padta hai। ab tum bachchon ko chalna hai ghar। phir vahaan se tum aapehi chale jaayenge sukhdhaam। vahaan main tumhaara saathi nahin banoonga। apni avastha anusaar tumhaari aatma chali jaayegi।

tum bachchon ko yeh nasha rehna chaahiye ham roohaani university mein padh rahe hain। ham godly student hain। ham manushya se devta athva vishwa ka maalik banne ke liye padh rahe hain। isse ham saari ministry paas kar lete hain। health ki education bhi padhte hain, character sudhaarne ki bhi knowledge padhte hain। health ministry, food ministry, land ministry, building ministry sab ismen aa jaati hai।

meethe-meethe bachchon ko baap baith samjhaate hain jab koi sabha mein bhaashan karte ho va kisko samjhaate ho to ghadi-ghadi bolo apne ko aatma samajh parampita paramatma ko yaad karo। is yaad se hi tumhaare vikarma vinaash honge। tum paavan ban jaayenge। ghadi-ghadi yeh yaad karna hai। parantu yeh bhi tum tabhi kah sakenge jab khud yaad mein honge। is baat ki bachchon mein bahut kamjori hai। andarooni tum bachchon ko khushi hogi, yaad mein rahenge tab doosron ko samjhaane ka asar hoga। tumhaara bolna jaasti nahin hona chaahiye। aatma-abhimaani ho thoda bhi samjhaayenge to teer bhi lagega। baap kehte hain bachche beeti so beeti। ab pahle apne ko sudhaaro। khud yaad karenge nahin, doosron ko kehte rahenge, yeh thagi chal na sake। andar dil zaroor khaati hogi। baap ke saath poora lav nahin hai to shreemat par chalte nahin hain। behad ke baap jaisi shiksha to aur koi de na sake। baap kehte hain meethe bachche is puraani duniya ko ab bhool jaao। pichhaadi mein to yeh sab bhool hi jaana hai। buddhi lag jaati hai apne shantidham aur sukhdhaam mein। baap ko yaad karte-karte baap ke paas chale jaana hai। patit aatma to ja na sake। woh hai hi paavan aatmaon ka ghar। yeh shareer 5 tatvon se bana hua hai। to 5 tatva yahaan rahne liye kheenchate hain kyonki aatma ne yeh jaise property li hui hai, isliye shareer mein mamatva ho gaya hai। ab inse mamatva nikaal jaana hai apne ghar। vahaan to yeh 5 tatva hain nahin। satayug mein bhi shareer yogbal se banta hai। satopradhaan prakriti hoti hai isliye kheenchati nahin। duhkh nahin hota। yeh badi maheen baaten hain samajhne ki। yahaan 5 tatvon ka bal aatma ko kheenchata hai isliye shareer chhodne ki dil nahin hoti hai। nahin to ismen aur hi khush hona chaahiye। paavan ban shareer aise chhodenge jaise makkhan se baal। to shareer se, sab cheezon se mamatva ekdam mita dena hai, isse hamaara koi connection nahin। bas ham jaate hain baba ke paas। is duniya mein apna bag baggage taiyaar kar pahle se hi bhej diya hai। saath mein to chal na sake। baaki aatmaon ko jaana hai। shareer ko bhi yahaan chhod diya hai। baba ne naye shareer ka saakshaatkaar kara diya hai। heere javaahron ke mahal mil jaayenge। aise sukhdhaam mein jaane liye kitni mehnat karni chaahiye। thakna nahin chaahiye। dinraat bahut kamaai karni hai isliye baba kehte hain neend ko jeetne vaale bachche maamekam yaad karo aur vichaar saagar manthan karo। drama ke raaz ko buddhi mein rakhne se buddhi ekdam sheetal ho jaati hai। jo mahaarthi bachche honge woh kab hilenge nahin। shivbaaba ko yaad karenge to woh sambhaal bhi karenge।

baap tum bachchon ko duhkh se chhudaakar shanti ka daan dete hain। tumko bhi shanti ka daan dena hai। tumhaari yeh behad ki shanti arthaat yogbal doosron ko bhi ekdam shant kar denge। jhat maaloom pad jaayega, yeh hamaare ghar ka hai va nahin। aatma ko jhat kashish hogi yeh hamaara baba hai। nabja bhi dekhni hoti hai। baap ki yaad mein rah phir dekho yeh aatma hamaare kul ki hai। agar hogi to ekdam shant ho jaayegi। jo is kul ke honge unhon ko hi in baaton mein ras baithega। bachche yaad karte hain to baap bhi pyaar karte hain। aatma ko pyaar kiya jaata hai। yeh bhi jaante hain jinhonne bahut bhakti ki hai woh hi jaasti padhenge। unke chehre se maaloom padta jaayega ki baap mein kitna lav hai। aatma baap ko dekhti hai। baap ham aatmaon ko padha rahe hain। baap bhi samajhte hain ham itni chhoti bindi aatma ko padhaata hoon। aage chal tumhaari yeh avastha ho jaayegi। samjhenge ham bhaai-bhaai ko padhaate hain। shakla behen ki hote bhi drishti aatma taraph jaae। shareer par drishti bilkul na jaaye, ismen badi mehnat hai। yeh badi maheen baaten hain। badi oonch padhaai hai। vazan karo to is padhaai ka taraph bahut bhaari ho jaayega। achha!

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) apni jholi gyaan ratnon se bharkar phir daan bhi karna hai। jo daan karte hain vo sabko pyaare lagte hain, unhein apaar khushi rehti hai।

2) praandaan dene vaale baap ko bahut pyaar se yaad karte sabko shanti ka daan dena hai। svadarshan chakra phiraate gyaan ka saagar banna hai।

vardaan:- antahvaahak shareer dvaara seva karne vaale karmabandhan mukta double light bhav

jaise sthool shareer dvaara saakaari eeshvareey seva mein busy rehte ho aise apne aakaari shareer dvaara antahvaahak seva bhi saath-saath karni hai। jaise brahma dvaara sthaapna ki vriddhi hui vaise abhi aapke sookshm shareeron dvaara, shiv shakti ke combined roop ke saakshaatkaar dvaara saakshaatkaar aur sandesh milne ka kaarya hona hai। lekin is seva ke liye karma karte bhi kisi bhi karmabandhan se mukta sada double light roop mein raho।

slogan:- manan karne se jo khushi roopi makkhan nikalta hai - vahi jeevan ko shaktishaali banaata hai।

apni shaktishaali mansa dvaara sakaash dene ki seva karo

koi bhi yeh nahin kah sakta ki hamko to seva ka chance nahin hai। koi bol nahin sakte to mansa vaayumandal se sukh ki vritti, sukhmay sthiti se seva karo। tabiyat theek nahin hai to ghar baithe bhi sahayogi bano, sirf mansa mein shuddh sankalpon ka stock jama karo, shubh bhaavnaaon se sampanna bano।