बुधवार 15 जनवरी 2025 की दैनिक मुरली

15-01-2025 praatahmurli om shanti "baapdaada"' madhuban

“meethe bachche - baap aaya hai tum bachchon ko svachchha buddhi banaane, jab svachchha bano tab tum devta ban sakenge''

prashn:- is drama ka bana-banaaya plan kaun-sa hai, jisse baap bhi chhoot nahin sakta?

uttar:- har kalpa mein baap ko apne bachchon ke paas aana hi hai, patit duhkhi bachchon ko sukhi banaana hi hai - yeh drama ka plan bana hua hai, is bandhan se baap bhi nahin chhoot sakta hai।

prashn:- padhaane vaale baap ki mukhya visheshta kya hai?

uttar:- woh bahut nirhankaari ban patit duniya, patit tan mein aate hain। baap is samay tumhein svarga ka maalik banaate, tum phir dvaapar mein unke liye sone ka mandir banaate ho।

geet:- is paap ki duniya se…

om shanti। meethe-meethe roohaani bachchon ne yeh geet suna ki do duniya hain - ek paap ki duniya, ek punya ki duniya। duhkh ki duniya aur sukh ki duniya। sukh zaroor nai duniya, naye makaan mein ho sakta hai। puraane makaan mein duhkh hi hota hai isliye unko khalaas kiya jaata hai। phir naye makaan mein sukh mein baithna hota hai। ab bachche jaante hain bhagwan ko koi manushya maatra nahin jaante। raavan raajya hone kaaran bilkul hi pattharbuddhi, tamopradhaan buddhi ho gaye hain। baap aakar samjhaate hain mujhe bhagwan to kehte hain parantu jaante koi bhi nahin hain। bhagwan ko nahin jaante to koi kaam ke na rahe। duhkh mein hi he prabhu, he eeshvar kah pukaarte hain। parantu wonder hai, ek bhi manushya maatra behad ke baap rachta ko jaante nahin। kah dete hain sarvavyaapi hai, kachchha-machchha mein paramatma hai। yeh to paramatma ki glaani karte hain। baap ko kitna defame karte hain isliye bhagvaanuvaach hai - jab bhaarat mein meri aur devi-devtaaon ki glaani karte-karte seedhi utarte tamopradhaan ban jaate hain, tab main aata hoon। drama anusaar bachche kehte hain is part mein phir bhi aana padega। baap kehte hain yeh drama bana hua hai। main bhi drama ke bandhan mein bandha hua hoon। is drama se main bhi chhoot nahin sakta hoon। mujhe bhi patit ko paavan banaane aana hi padta hai। nahin to nai duniya kaun sthaapan karega? bachchon ko raavan raajya ke duhkhon se chhudaae nai duniya mein kaun le jaayega? bhal is duniya mein aise to bahut hi dhanvaan manushya hain, samajhte hain ham to svarga mein baithe hain, dhan hai, mahal hain, aeroplane hain parantu achaanak hi koi beemaar ho padte hain, baithe-baithe mar jaate hain, kitna duhkh hota hai। unhon ko yeh pata nahin ki satayug mein kabhi akaale mrityu hoti nahin, duhkh ki baat nahin। vahaan aayu bhi badi rehti hai। yahaan to achaanak mar jaate hain। satayug mein aisi baaten hoti nahin। vahaan kya hota hai? yeh bhi koi nahin jaante isliye baap kehte hain kitne tuchchha buddhi hain। main aakar inhon ko svachchha buddhi banaata hoon। raavan pattharbuddhi, tuchchha buddhi banaate hain। bhagwan svachchha buddhi bana rahe hain। baap tumko manushya se devta bana rahe hain। sab bachche kehte hain sooryavanshi mahaaraaja-mahaaraani banne aaye hain। em object saamne hai। nar se naaraayan banna hai। yeh hai satya naaraayan ki katha। phir bhakti mein brahman katha sunaate rehte hain। sachmuch koi nar se naaraayan banta thode hi hai। tum to sachmuch nar se naaraayan banne aaye ho। koi-koi poochhte hain aapki sanstha ka uddeshya kya hai? bolo nar se naaraayan banna - yeh hai hamaara uddeshya। parantu yeh koi sanstha nahin hai। yeh to parivaar hai। maa, baap aur bachche baithe hain। bhakti maarga mein to gaate the tum maat-pita.......। he maat-pita jab aap aate hain to ham aapse sukh ghanere lete hain, ham vishwa ke maalik bante hain। abhi tum vishwa ke maalik bante ho na, so bhi svarga ke। ab aise baap ko dekhte kitna khushi ka paara chadhna chaahiye। jisko aadhaakalpa yaad kiya hai - he bhagwan aao, aap aayenge to ham aapse bahut sukh paayenge। yeh behad ka baap to behad ka varsa dete hain, so bhi 21 janma ke liye। baap kehte hain - main tumko daivi sampradaay banaata hoon, raavan aasuri sampradaay banaate hain। main aadi sanaatan devi-devta dharma ki sthaapna karta hoon। vahaan pavitrata ke kaaran aayu bhi badi rehti hai। yahaan hain bhogi, achaanak marte rehte hain। vahaan yog se varsa mila hua rehta hai। aayu bhi 150 varsha rehti hai। apne samay par ek shareer chhod doosra lete hain। to yeh knowledge baap hi baithkar dete hain। bhakta bhagwan ko dhoondhate hain, samajhte hain shaastra padhna, teertha aadi karna - yeh sab bhagwan se milne ke raaste hain। baap kehte hain yeh raaste hain hi nahin। raasta to main hi bataaoonga। tum to kehte the - he andhon ki laathi prabhu aao, hamko shantidham-sukhdhaam le chalo। to baap hi sukhdhaam ka raasta bataate hain। baap kabhi duhkh nahin dete। yeh to baap par jhoothe ilzaam laga dete hain। koi marta hai to bhagwan ko gaali dene lag padte। baap kehte hain main thode hi kisi ko maarta hoon ya duhkh deta hoon। yeh to har ek ka apna part hai। main jo raajya sthaapan karta hoon, vahaan akaale mrityu, duhkh aadi kabhi hota hi nahin। main tumko sukhdhaam le chalta hoon। bachchon ke romaanch khade ho jaane chaahiye। oho, baba hamko purooshottam bana rahe hain। manushyon ko yeh pata nahin hai ki sangamayug ko purooshottam kaha jaata hai। bhakti maarga mein bhakton ne phir purooshottam maas aadi baith banaaye hain। vaastav mein hai purooshottam yug, jabki baap aakar oonch te oonch banaate hain। abhi tum purooshottam ban rahe ho। sabse oonch te oonch purooshottam, lakshmi-naaraayan hi hain। manushya to kuchh bhi samajhte nahin। chadhti kala mein le jaane vaala ek hi baap hai। seedhi par kisko bhi samjhaana bahut sahaj hai। baap kehte hain ab khel poora hua, ghar chalo। abhi yeh puraana chhi-chhi chola chhodna hai। tum pahle nai duniya mein satopradhaan the phir 84 janma bhog tamopradhaan shoodra bane ho। ab phir shoodra se brahman bane ho। ab baap aaye hain bhakti ka phal dene। baap ne satayug mein phal diya tha। baap hai hi sukhdaata। baap patit-paavan aate hain to saari duniya ke manushya maatra to kya, prakriti ko bhi satopradhaan banaate hain। abhi to prakriti bhi tamopradhaan hai। anaaj aadi milta hi nahin, woh samajhte hain ham yeh-yeh karte hain। agle saal bahut anaaj hoga। parantu kuchh bhi hota nahin। natural calamities ko koi kya kar sakenge! famine padega, earthquake hogi, beemaariyaan hongi। rakta ki nadiyaan bahengi। yeh vahi mahaabhaarat ladaai hai। ab baap kehte hain tum apna varsa pa lo। main tum bachchon ko svarga ka varsa dene aaya hoon। maaya raavan shraap deti hai, narka ka varsa deti hai। yeh bhi khel bana hua hai। baap kehte hain drama anusaar main bhi shivaalay sthaapan karta hoon। yeh bhaarat shivaalay tha, abhi veshyaalay hai। vishay saagar mein gota khaate rehte hain।

abhi tum bachche jaante ho baba hamko shivaalay mein le jaate hain to yeh khushi rahni chaahiye na। hamko behad ka bhagwan padha rahe hain। baap kehte hain main tumko vishwa ka maalik banaata hoon। bhaaratvaasi apne dharma ko hi nahin jaante hain। hamaari biraadri to bade te badi hai jisse aur biraadriyaan nikalti hain। aadi sanaatan kaun-sa dharma, kaun-si biraadri thi - yeh samajhte nahin hain। aadi sanaatan devi-devta dharma vaalon ki biraadri, phir second number mein chandravanshi biraadri, phir islaami vansh ki biraadri। yeh saare jhaad ka raaz aur koi samjha na sake। abhi to dekho kitni biraadriyaan hain। taal-taaliyaan kitni hain। yeh hai variety dharmon ka jhaad, yeh baaten baap hi aakar buddhi mein daalte hain। yeh padhaai hai, yeh to roz padhni chaahiye। bhagvaanuvaach - main tumko raajaaon ka raaja banaata hoon। patit raajaayen to vinaashi dhan daan karne se ban sakte hain। main tumko aisa paavan banaata hoon jo tum 21 janma ke liye vishwa ka maalik bante ho। vahaan kabhi akaale mrityu hoti nahin। apne time par shareer chhodte hain। tum bachchon ko drama ka raaz bhi baap ne samjhaaya hai। woh bioscope, drama aadi nikle hain to is par samjhaane mein bhi sahaj hota hai। aajkal to bahut drama aadi banaate hain। manushyon ko bahut shauk ho gaya hai। woh sab hain had ke, yeh hai behad ka drama। is samay maaya ka pomp bahut hai। manushya samajhte hain - abhi to svarga ban gaya hai। aage thode hi itni badi buildings aadi thi। to kitna opposition hai। bhagwan svarga rachte hain to maaya bhi apna svarga dikhaati hai। yeh hai sab maaya ka pomp। iska fall hona hai kitni jabardasta maaya hai। tumko unse munh modna hai। baap hai hi gareeb nivaaz। saahookaaron ke liye svarga hai, gareeb bichaare narka mein hain। to ab narkavaasiyon ko svargavaasi banaana hai। gareeb hi varsa lenge, saahookaar to samajhte hain ham svarga mein baithe hain। svarga-narka yahaan hi hai। in sab baaton ko ab tum samajhte ho। bhaarat kitna bhikhaari ban gaya hai। bhaarat hi kitna saahookaar tha। ek hi aadi sanaatan dharma tha। abhi bhi kitni puraani cheejen nikaalte rehte hain। kehte hain itne varshon ki puraani cheez hai। haddiyaan nikaalte hain, kehte hain itne laakhon varsha ki hain। ab laakhon varsha ki haddiyaan phir kahaan se nikal sakti। unka phir daam bhi kitna rakhte hain।

baap samjhaate hain main aakar sabki sadgati karta hoon, inmen pravesh kar aata hoon। yeh brahma saakaari hai, yahi phir sookshmav-tanvaasi farishta bante hain। woh avyakt, yeh vyakta। baap kehte hain main bahut janmon ke ant ke bhi ant mein aata hoon, jo number one paavan woh phir number one patit। main inmen aata hoon kyonki inko hi phir number one paavan banna hai। yeh apne ko kahaan kehte hain ki main bhagwan hoon, phalaana hoon। baap bhi samajhte hain main is tan mein pravesh kar in dvaara sabko satopradhaan banaata hoon। ab baap bachchon ko samjhaate hain tum ashareeri aaye the phir 84 janma le part bajaaya, ab vaapis jaana hai। apne ko aatma samjho, deh-abhimaan todo। sirf yaad ki yaatra par rehna hai aur koi takleeph nahin hai। jo pavitra banenge, knowledge sunenge vahi vishwa ke maalik banenge। kitna bada school hai। padhaane vaala baap kitna nirhankaari ban patit duniya, patit tan mein aate hain। bhakti maarga mein tum unke liye kitna achha sone ka mandir banaate ho। is samay tumko svarga ka maalik banaata hoon to patit shareer mein aakar baithta hoon। phir bhakti maarga mein tum hamko somnaath mandir mein bithaate ho। sone heeron ka mandir banaate ho kyonki tum jaante ho hamko svarga ka maalik banaate hain isliye khaatiri karte ho। yeh sab raaz samjhaaya hai। bhakti pahle avyabhichaari phir vyabhichaari hoti hai। aajkal dekho manushyon ki bhi pooja karte rehte hain। ganga ke kanthe par dekho shivoham kah baith jaate hain। maataayen jaakar doodh chadhaati hain, pooja karti hain। is daada ne khud bhi kiya hai, pujaari number one bana hai na। wonder hai na। baap kehte hain yeh wonderful duniya hai। kaise svarga banta hai, kaise narka banta hai - sab raaz bachchon ko samjhaate rehte hain। yeh gyaan to shaastron mein nahin hai। woh hain philosophy ke shaastra। yeh hai spiritual knowledge jo roohaani father ke va tum braahmanon ke sivaae koi de na sake। aur tum braahmanon ke sivaae roohaani knowledge kisko mil na sake। jab tak brahman na banen to devta ban na saken। tum bachchon ko bahut khushi rahni chaahiye, bhagwan hamko padhaate hain, shri krishna nahin। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) maaya ka bahut bada pomp hai, isse apna munh mod lena hai। sada isi khushi mein romaanch khade ho ki ham to abhi purooshottam ban rahe hain, bhagwan humein padhaate hain।

2) vishwa ka raajya-bhaagya lene ke liye sirf pavitra banna hai। jaise baap nirhankaari ban patit duniya, patit tan mein aate hain, aise baap samaan nirhankaari ban seva karni hai।

vardaan:- ek ke saath sarva rishta nibhaane vaale sarva kinaaron se mukta sampoorn pharishta bhav

jaise koi cheez banaate hain jab woh bankar taiyaar ho jaati hai to kinaara chhod deti hai, aise jitna sampanna stage ke sameep aate jaayenge utna sarva se kinaara hota jaayega। jab sab bandhanon se vritti dvaara kinaara ho jaae arthaat kisi mein bhi lagaav na ho tab sampoorn pharishta banenge। ek ke saath sarva rishte nibhaana - yahi thikaana hai, isse hi antim pharishte jeevan ki manzil sameep anubhav hogi। buddhi ka bhatakna banda ho jaayega।

slogan:- sneh aisa chumbak hai jo glaani karne vaale ko bhi sameep le aata hai।

apni shaktishaali mansa dvaara sakaash dene ki seva karo

mansa seva ke liye man, buddhi vyartha sochne se mukta hona chaahiye। ‘manamnaabhav' ke mantra ka sahaj swaroop hona chaahiye। jin shreshtha aatmaon ki shreshtha mansa arthaat sankalp shaktishaali hai, shubh-bhaavna, shubh-kaamna vaale hain woh mansa dvaara shaktiyon ka daan de sakte hain।