बुधवार 5 मार्च 2025 की दैनिक मुरली

05-03-2025 praatahmurli om shanti "baapdaada"' madhuban

“meethe bachche - khushi jaisi khuraak nahin, tum khushi mein chalte phirte paidal karte baap ko yaad karo to paavan ban jaayenge''

prashn:- koi bhi karma vikarma na bane uski yukti kya hai?

uttar:- vikarmon se bachne ka saadhan hai shreemat। baap ki jo pahli shreemat hai ki apne ko aatma samajh baap ko yaad karo, is shreemat par chalo to tum vikarmaajeet ban jaayenge।

om shanti। roohaani bachche yahaan bhi baithe hain aur sabhi centres par bhi hain। sabhi bachche jaante hain ki abhi roohaani baba aaya hua hai, woh hamko is puraani chhi-chhi patit duniya se phir ghar le jaayenge। baap aaye hi hain paavan banaane aur aatmaon se hi baat karte hain। aatma hi kaanon se sunti hai kyonki baap ko apna shareer to hai nahin isliye baap kehte hain main shareer ke aadhaar se apni pahchaan deta hoon। main is saadhaaran tan mein aakar tum bachchon ko paavan banne ki yukti bataata hoon। woh bhi har kalpa aakar tumko yeh yukti batlaata hoon। is raavan raajya mein tum kitne duhkhi ban pade ho। raavan raajya, shok vaatika mein tum ho। kaliyug ko kaha hi jaata hai duhkhadhaam। sukhdhaam hai krishnapuri, svarga। woh to abhi hai nahin। bachche achhi reeti jaante hain ki abhi baba aaya hua hai hamko padhaane ke liye।

baap kehte hain tum ghar mein bhi school bana sakte ho। paavan banna aur banaana hai। tum paavan banenge to phir duniya bhi paavan banegi। abhi to yeh bhrashtaachaari patit duniya hai। abhi hai raavan ki raajdhaani। in baaton ko jo achhi reeti samajhte hain woh phir auron ko bhi samjhaate hain। baap to sirf kehte hain - bachche, apne ko aatma samajh mujh baap ko yaad karo, auron ko bhi aise samjhaao। baap aaya hua hai, kehte hain mujhe yaad karo to tum paavan ban jaayenge। koi bhi aasuri karma nahin karo। maaya tumse jo chhi-chhi karma karaayegi woh karma zaroor vikarma banega। pahle number mein jo kehte hain eeshvar sarvavyaapi hai, yeh bhi maaya ne kahlaaya na। maaya tumse har baat mein vikarma hi karaayegi। karma-akarma-vikarma ka raaz bhi samjhaaya hai। shreemat par aadha-kalpa tum sukh bhogte ho, aadhaakalpa phir raavan ki mat par duhkh bhogte ho। is raavan raajya mein tum bhakti jo karte ho, neeche hi utarte aaye ho। tum in baaton ko nahin jaante the, bilkul hi pattharbuddhi the। pattharbuddhi aur paarasbuddhi gaate to hain na। bhakti maarga mein kehte bhi hain - he eeshvar, inko achhi buddhi do, to yeh ladaai aadi banda kar den। tum bachche jaante ho baba bahut achhi buddhi abhi de rahe hain। baba kehte hain - meethe bachchon, tumhaari aatma jo patit bani hai, unko paavan banaana hai, yaad ki yaatra se। bhal ghoomo phiro, baba ki yaad mein tum kitna bhi paidal karke jaayenge, tumko shareer bhi bhool jaayega। gaaya jaata hai na - khushi jaisi khuraak nahin। manushya dhan kamaane ke liye kitna door-door khushi se jaate hain। yahaan tum kitne dhanvaan, sampattivaan bante ho। baap kehte hain main kalpa-kalpa aakar tum aatmaon ko apna parichay deta hoon। is samay sabhi patit hain, jo bulaate rehte hain ki paavan banaane liye aao। aatma hi baap ko bulaati hai। raavan raajya mein, shok vaatika mein sabhi duhkhi hain। raavanraajya saari duniya mein hai। is samay hai hi tamopradhaan srishti। satopradhaan devtaaon ke chitra khade hain। gaayan bhi unhon ka hai। shantidham, sukhdhaam jaane ke liye manushya kitna maatha maarte hain। yeh thode hi koi jaante hain - bhagwan kaise aakar bhakti ka phal hamko dega। tum abhi samajhte ho hamko bhagwan se phal mil raha hai। bhakti ke do phal hain - ek mukti, doosra jeevanmukti। yeh samajhne ki badi maheen baaten hain। jinhonne shuru se lekar bahut bhakti ki hogi, woh gyaan achhi reeti lenge to phal bhi achha paayenge। bhakti kam ki hogi to gyaan bhi kam lenge, phal bhi kam paayenge। hisaab hai na। nambarvaar pad hai na। baap kehte hain - mera bankar vikaar mein gira to goya mujhe chhoda। ekdam neeche jaakar padenge। koi to girkar phir uth padte hain। koi to bilkul hi gutter mein gir jaate, buddhi bilkul sudharti hi nahin। koi ko dil andar khaata hai, duhkh hota hai - hamne bhagwan se pratigya ki aur phir unko dhokha de diya, vikaar mein gir pada। baap ka haath chhoda, maaya ka ban pada। ve phir vaayumandal hi kharaab kar dete hain, shraapit ho jaate hain। baap ke saath dharmaraaj bhi hai na। us samay pata nahin padta hai ki ham kya karte hain, baad mein pashchaataap hota hai। aise bahut hote hain, kiska khoon aadi karte hain to jel mein jaana padta hai, phir pashchaataap hota hai - naahek unko maara। gusse mein aakar maarte bhi bahut hain। dher samaachaar akhbaaron mein padte hain। tum to akhbaar padhte nahin ho। duniya mein kya-kya ho raha hai, tumko maaloom nahin padta hai। din-pratidin haalten kharaab hoti jaati hain। seedhi neeche utarni hi hai। tum is drama ke raaz ko jaante ho। buddhi mein yeh baat hai ki ham baba ko hi yaad karen। koi bhi aisa chhi-chhi kartavya na karen jisse register kharaab ho jaae। baap kehte hain main tumhaara teacher hoon na। teacher ke paas student ki padhaai ka aur chaal chalan ka record rehta hai na। koi ki chaal bahut achhi, koi ki kam, koi ki bilkul kharaab। nambarvaar hote hain na। yeh bhi supreme baap kitna oonch padhaate hain। woh bhi har ek ki chaal-chalan ko jaante hain। tum khud bhi jaan sakte ho - hamaare mein yeh aadat hai, is kaaran ham fail ho jaayenge। baba har baat clear kar samjhaate hain। poori reeti padhaai nahin padhenge, kisko duhkh denge to duhkhi hokar marenge। pad bhi bhrashta hoga। sajaayen bhi bahut khaayenge।

meethe bachche, apni aur doosron ki takdeer banaani hai to merciful ka sanskaar dhaaran karo। jaise baap merciful hai tab teacher bankar tumhein padhaate hain। koi bachche achhi reeti padhte aur padhaate hain, ismen merciful banna hota hai। teacher merciful hai na। kamaai ka raasta bataate hain ki kaise achha position tum pa sakte ho। us padhaai mein to anek prakaar ke teachers hote hain। yeh to ek hi teacher hai। padhaai bhi ek hi hai manushya se devta banne ki। ismen mukhya hai pavitrata ki baat। pavitrata hi sab maangate hain। baap to raasta bata rahe hain parantu jinki takdeer mein hi nahin hai to tadbeer kya kar sakte! oonch marks paane ka hi nahin hai to teacher tadbeer bhi kya kare! yeh behad ka teacher hai na। baap kehte hain tumko aur koi srishti ke aadi-madhya-ant ki history-geography samjha na sake। tumko har ek baat behad ki samjhaai jaati hai। tumhaara hai behad ka vairaagya। yeh bhi tumko sikhlaate hain jabki patit duniya ka vinaash, paavan duniya ki sthaapna honi hai। sannyaasi to hain nivritti maarga vaale, vaastav mein unhon ko to jangal mein rehna hai। pahle-pahle rishi-muni aadi sab jangal mein rehte the, woh satopradhaan taakat thi, to manushyon ko kheenchate the। kahaan-kahaan kutiyaaon mein bhi unko bhojan jaakar pahunchaate the। sannyaasiyon ke kabhi mandir nahin banaate hain। mandir hamesha devtaaon ke banaate hain। tum koi bhakti nahin karte ho। tum yog mein rehte ho। unka to gyaan hi hai brahm tatva ko yaad karne ka। bas brahm mein leen ho jaayen। parantu sivaae baap ke vahaan to koi le ja na sake। baap aate hi hain sangamayug par। aakarke devi-devta dharma ki sthaapna karte hain। baaki sabki aatmaayen vaapis chali jaati hain kyonki tumhaare liye nai duniya chaahiye na। puraani duniya ka koi bhi rehna nahin chaahiye। tum saare vishwa ke maalik bante ho। yeh to tum jaante ho jab hamaara raajya tha to saare vishwa par ham hi the, doosra koi khanda nahin tha। vahaan jameen to bahut rehti hai। yahaan jameen kitni hai phir bhi samudra ko sukhaakar jameen karte rehte hain kyonki manushya badhte jaate hain। yeh jameen sukhaana aadi vilaayat vaalon se seekhe hain। baambe pahle kya thi phir bhi nahin rahegi। baba to anubhvi hai na। samjho earthquake hoti hai va moosaldhaar barsaat hoti hai to phir kya karenge! baahar to nikal nahin sakenge। natural calamities to bahut aayengi। nahin to itna vinaash kaise hoga। satayug mein to sirf thode bhaaratvaasi hi hote hain। aaj kya hai, kal kya hoga। yeh sab tum bachche hi jaante ho। yeh gyaan aur koi de na sake। baap kehte hain tum patit bane ho isliye ab mujhe bulaate ho ki aakar paavan banaao to zaroor aayenge tab to paavan duniya sthaapan hogi na। tum bachche jaante ho baba aaya hua hai। yukti kitni achhi batlaate hain। bhagvaanuvaach manamnaabhav। deh sahit deh ke sabhi sambandhon ko tod maamekam yaad karo। ismen hi mehnat hai। gyaan to bahut sahaj hai। chhota bachcha bhi jhat yaad kar lega। baaki apne ko aatma samajh aur baap ko yaad kare, woh impossible hai। badon ki buddhi mein hi nahin thahar sakta, to chhote phir kaise yaad kar sakenge? bhal shivbaaba-shivbaaba kahe bhi parantu hai to besmajh na। ham bhi bindi hain, baba bhi bindi hai, yeh smriti mein aana mushkil lagta hai। yahi yathaartha reeti yaad karna hai। moti cheez to hai nahin। baap kehte hain yathaartha roop mein main bindi hoon isliye main jo hoon, jaisa hoon woh simran karen - yeh badi mehnat hai।

woh to kah dete paramatma brahm tatva hai aur ham kehte hain woh ekdam bindi hai। raat-din ka farka hai na। brahm tatva jahaan ham aatmaayen rehti hain, unko paramatma kah dete। buddhi mein yeh rehna chaahiye - main aatma hoon, baba ka bachcha hoon, in kaanon se sunta hoon, baba is mukh se sunaate hain ki main param aatma hoon, pare te pare rahne vaala hoon। tum bhi pare te pare rehte ho parantu janma-maran mein aate ho, main nahin aata hoon। tumne abhi apne 84 janmon ko bhi samjha hai। baap ke part ko bhi samjha hai। aatma koi chhoti-badi nahin hoti hai। baaki iron ej mein aane se maili ban jaati hai। itni chhoti-si aatma mein saara gyaan hai। baap bhi itna chhota hai na। parantu unko param aatma kaha jaata hai। woh gyaan ka saagar hai, tumko aakar samjhaate hain। is samay tum jo padh rahe ho kalpa pahle bhi padha tha, jisse tum devta bane the। tumhaare mein sabse khoti takdeer unhon ki hai jo patit ban apni buddhi ko maleen bana dete hain, kyonki unmein dhaarna ho nahin sakti। dil andar khaati rahegi। auron ko kah na saken pavitra bano। andar samajhte hain paavan bante-bante hamne haar kha li, ki kamaai saari chat ho gai। phir bahut samay lag jaata hai। ek hi chot jor se ghaayal kar deti hai, register kharaab ho jaata hai। baap kahenge tum maaya se haar gaye, tumhaari takdeer khoti hai। maayaajeet jagatjeet banna hai। jagatjeet mahaaraaja-mahaaraani ko hi kaha jaata hai। praja ko thode hi kahenge। abhi daivi svarga ki sthaapna ho rahi hai। apne liye jo karega so paayega। jitna paavan ban auron ko banaayenge, bahut daan karne vaale ko phal bhi to milta hai na। daan karne vaale ka naam bhi hota hai। doosre janma mein alpakaal ka sukh paate hain। yahaan to 21 janma ki baat hai। paavan duniya ka maalik banna hai। jo paavan bane the vahi banenge। chalte-chalte maaya chamaat maar ekdam gira deti hai। maaya bhi kam dushtar nahin hai। 8-10 varsha pavitra raha, pavitrata par jhagda hua, doosron ko bhi girne se bachaaya aur phir khud gir pada। takdeer kahenge na। baap ka bankar phir maaya ka ban jaate hain to dushman ho gaya na। khuda dosta ki bhi ek kahaani hai na। baap aakar bachchon ko pyaar karte hain, saakshaatkaar karaate hain, bigar koi bhakti karne ke bhi saakshaatkaar hota hai। to dosta banaaya na। kitne saakshaatkaar hote the phir jaadu samajh hangaama karne lage to banda kar diya phir pichhaadi mein tum bahut saakshaatkaar karte rahenge। aage kitna maza hota tha। woh dekhte-dekhte bhi kitne kat ho gaye। bhatthi se koi eeten pak kar nikli, koi kuchh kachchi rah gai। koi to ekdam toot pade। kitne chale gaye। abhi woh lakhapti, karodapti ban gaye hain। samajhte hain ham to svarga mein baithe hain। ab svarga yahaan kaise ho sakta hai। svarga to hota hi hai nai duniya mein। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) apni oonchi takdeer banaane ke liye merciful ban padhna aur padhaana hai। kabhi bhi kisi aadat ke vash ho apna register kharaab nahin karna hai।

2) manushya se devta banne ke liye mukhya hai pavitrata isliye kabhi bhi patit ban apni buddhi ko maleen nahin karna hai। aisa karma na ho jo dil andar khaati rahe, pashchaataap karna pade।

vardaan:- beejroop sthiti dvaara saare vishwa ko light ka paani dene vaale vishwa kalyaankaari bhav

beejroop stage sabse powerful stage hai yahi stage light house ka kaarya karti hai, isse saare vishwa mein light phailaane ke nimitta bante ho। jaise beej dvaara svatah hi saare vriksha ko paani mil jaata hai aise jab beejroop stage par sthit rehte ho to vishwa ko light ka paani milta hai। lekin saare vishwa tak apni light phailaane ke liye vishwa kalyaankaari ki powerful stage chaahiye। iske liye light house bano na ki bulb। har sankalp mein smriti rahe ki saare vishwa ka kalyaan ho।

slogan:- adjust hone ki shakti naajuk samay par paas with honour bana degi।

avyakt ishaare - satyata aur sabhyata roopi culture ko apnaao

parmaatma pratyakshata ka aadhaar satyata hai। satyata se hi pratyakshata hogi - ek svayan ke sthiti ki satyata, doosri seva ki satyata। satyata ka aadhaar hai - svachchhata aur nirbhayta। in donon dhaarnaaon ke aadhaar se satyata dvaara parmaatma pratyakshata ke nimitta bano। kisi bhi prakaar ki asvachchhata arthaat zara bhi sachchaai saphaai ki kami hai to kartavya ki siddhi nahin ho sakti।