मंगलवार 11 मार्च 2025 की दैनिक मुरली

11-03-2025 praatahmurli om shanti "baapdaada"' madhuban

“meethe bachche - baap aaye hain tum bachchon ko sukh-chain ki duniya mein le chalne, chain hai hi shantidham aur sukhdhaam mein''

prashn:- is yuddha ke maidaan mein maaya sabse pahla vaar kis baat par karti hai?

uttar:- nishchay par। chalte-chalte nishchay tod deti hai isliye haar kha lete hain। yadi pakka nishchay rahe ki baap jo sabka duhkh harkar sukh dene vaala hai, vahi humein shreemat de rahe hain, aadi-madhya-ant ki knowledge suna rahe hain, to kabhi maaya se haar nahin ho sakti।

geet:- is paap ki duniya se…

om shanti। kiske liye kehte hain, kahaan le chalo, kaise le chalo....... yeh duniya mein koi bhi nahin jaante। tum brahman kul bhooshan nambarvaar purooshaartha anusaar jaante ho। tum bachche jaante ho inmen jiska pravesh hai, jo hamko apna aur rachna ke aadi-madhya-ant ka gyaan suna rahe hain woh sabka duhkh harkar sabko sukhdaai bana rahe hain। yeh koi nai baat nahin। baap kalpa-kalpa aate hain, sabko shreemat de rahe hain। bachche jaante hain baap bhi vahi hai, ham bhi vahi hain। tum bachchon ko yeh nishchay hona chaahiye। baap kehte hain ham aaye hain bachchon ko sukhdhaam, shantidham le jaane liye। parantu maaya nishchay bithaane nahin deti। sukhdhaam mein chalte-chalte phir hara deti hai। yeh yuddha ka maidaan hai na। woh yuddha hoti hai baahubal ki, yeh hai yogbal ki। yogbal bada naameegraami hai, isliye sab yog-yog kehte rehte hain। tum yeh yog ek hi baar seekhte ho। baaki woh sab anek prakaar ke hathayog sikhlaate hain। yeh unko pata nahin hai ki baap kaise aakar yog sikhlaate hain। woh to praacheen yog sikhla na saken। tum bachche achhi reeti jaante ho yeh vahi baap raajayog sikhla rahe hain, jisko yaad karte hain - he patit-paavan aao। aisi jagah le chalo jahaan chain ho। chain hai hi shantidham, sukhdhaam mein। duhkhadhaam mein chain kahaan se aaya? chain nahin hai tab to drama anusaar baap aate hain, yeh hai duhkhadhaam। yahaan duhkh hi duhkh hai। duhkh ke pahaad girne vaale hain। bhal kitne bhi dhanvaan hon va kuchh bhi hon, koi na koi duhkh zaroor lagta hai। tum bachche jaante ho ham meethe baap ke saath baithe hain, jo baap abhi aaye hue hain। drama ke raaz ko bhi abhi tum jaante ho। baap abhi aaye hue hain hamko saath le jaayenge। baap ham aatmaon ko kehte hain kyonki woh ham aatmaon ka baap hai na। jiske liye hi gaayan hai - aatmaayen paramatma alag rahe bahukaal....... shantidham mein sabhi aatmaayen saath mein rehti hain। abhi baap to aaye hain baaki jo thode vahaan rahe hue hain, vo bhi oopar se neeche aate rehte hain। yahaan tumko baap kitni baaten samjhaate hain। ghar mein jaane se tum bhool jaate ho। hai badi sahaj baat aur baap jo sarva ka sukh-daata, shaantidaata hai woh bachchon ko baith samjhaate hain। tum kitne thode ho। aahiste-aahiste vriddhi ko paate jaayenge। tumhaara baap ke saath gupta love hai। kahaan bhi raho, tumhaari buddhi mein hoga - baba madhuban mein baithe hain। baap kehte hain hamko vahaan (mool vatan mein) yaad karo। tumhaara bhi nivaas sthaan vahaan hai to zaroor baap ko yaad karenge, jisko kehte hain tum maat-pita। woh barobar ab tumhaare paas aaye hain। baap kehte hain main tumko le jaane ke liye aaya hoon। raavan ne tumko patit tamopradhaan banaaya hai, ab satopradhaan paavan banna hai। patit chal kaise sakenge। pavitra to zaroor banna hai। abhi ek bhi manushya satopradhaan nahin। yeh hai tamopradhaan duniya। yeh manushyon ki hi baat hai। manushya ke liye hi satopradhaan, sato, rajo, tamo ka raaz samjhaaya jaata hai। baap bachchon ko hi samjhaate hain। yeh to bahut easy hai। tum aatmaayen apne ghar mein thi। vahaan to sab paavan aatmaayen rehti hain। apvitra to rah na saken। uska naam hi hai muktidhaam। abhi baap tumko paavan banaae bhej dete hain। phir tum part bajaane ke liye sukhdhaam mein aate ho। sato, rajo, tamo mein tum aate ho।

pukaarte bhi hain - baba hamko vahaan le chalo jahaan chain ho। saadhu-santa aadi kisko bhi yeh pata nahin hai ki chain kahaan mil sakta hai? abhi tum bachche jaante ho sukh-shanti ka chain hamko kahaan milega। baba abhi hamko 21 janma ke liye sukh dene ke liye aaye hain। baaki jo peechhe aate hain un sabko mukti dene aaye hain। deri se jo aate hain unka part hi thoda hai। tumhaara part hai sabse bada। tum jaante ho hamne 84 janmon ka part bajaae abhi poora kiya hai। abhi chakra poora hota hai। saare puraane jhaad ko poora hona hai। abhi tumhaari yeh gupta government daivi jhaad ka kalam laga rahi hai। ve log to jangali jhaadon ka kalam lagaate rehte hain। yahaan baap kaanton se badal daivi phoolon ka jhaad bana rahe hain। vo bhi government hai, yeh bhi gupta government hai। woh kya karte hain aur yeh kya karte hain! farka to dekho kitna hai। vo log samajhte kuchh bhi nahin hain। jhaadon ka sapling lagaate rehte hain, woh jangali jhaad to anek prakaar ke hain। koi kiska kalam lagaate hain, koi kiska। abhi tum bachchon ko baap phir se devta bana rahe hain। tum satopradhaan devta the phir 84 ka chakra lagaakar tamopradhaan bane ho। koi sadaiv satopradhaan rahe, aise hota hi nahin hai। har cheez nai se phir puraani hoti hai। tum 24 carat sona the, ab 9 carat sone ke jevar ban gaye ho, phir 24 carat banna hai। aatmaayen aisi bani hain na। jaisa sona vaisa jevar hota hai। abhi sab kaale saanvare ban gaye hain। ijjat rakhne ke liye kaala akshar na kah saanvara kah dete hain। aatma satopradhaan pure thi phir kitni khaad pad gai hai। abhi phir pure hone ke liye baba yukti bhi batlaate hain। yeh hai yog agni inse hi tumhaari khaad nikal jaayegi। baap ko yaad karna hai। baap khud kehte hain mujhe is prakaar yaad karo। patit-paavan main hoon। tumko anek baar hamne patit se paavan banaaya hai। yeh bhi pahle tum nahin jaante the। abhi tum samajhte ho - aaj ham patit hain, kal phir paavan honge। unhonne to kalpa ki aayu laakhon varsha likh manushyon ko ghor andhiyaare mein daal diya hai। baap aakar achhi reeti sab baaten samjhaate hain। tum bachche jaante ho hamko kaun padhaate hain, gyaan ka saagar patit-paavan baap jo sabhi ka sadgati daata hai। manushya bhakti maarga mein kitni mahima gaate hain parantu uska arth kuchh bhi nahin jaante hain। stuti karte hain to sabhi ko milaakar karte hain। jaise gudguddhaani kar dete hain, jisne jo sikhaaya woh kantha kar liya। ab baap kehte hain jo kuchh seekhe ho, woh sab baaten bhool jaao। jeete ji hamaara bano। grihastha vyavhaar mein rehte bhi yukti se chalna hai। yaad ek baap ko hi karna hai। unka to hai hi hathayog। tum ho raajayogi। ghar vaalon ko bhi aisi shiksha deni hai। tumhaari chalan ko dekh aisa follow karen। kabhi aapas mein ladna jhagadna nahin hai। agar ladenge to aur sab kya samjhenge, inmen to bahut krodh hai। tumhaare mein koi bhi vikaar na rahe। manushyon ki buddhi ko chat karne vaala hai bioscope (cinema), yeh jaisa ek hell hai। vahaan jaane se hi buddhi chat ho jaati hai। duniya mein kitna ganda hai। ek taraph government kaayde paas karti hai ki 18 varsha ke andar koi shaadi na kare phir bhi dher ki dher shaadiyaan hoti rehti hain। kachchha (god) mein bachche ko bithaae shaadi karaate rehte hain। abhi tum jaante ho baba hamko is chhi-chhi duniya se le jaate hain। hamko svarga ka maalik banaate hain। baap kehte hain nashtomoha ban jaao, sirf mujhe yaad karo। kutumba parivaar mein rehte hue mere ko yaad karo। kuchh mehnat karenge tab to vishwa ka maalik banenge। baap kehte hain maamekam yaad karo aur aasuri gun chhodo। roz raatri ko apna potaamel nikaalo। yeh tumhaara vyaapaar hai। yeh virla koi vyaapaar kare। ek second mein kangaal ko sirtaaj bana dete hain, yeh jaadu thahra na। aise jaadoogar ka to haath pakad lena chaahiye। jo hamko yogbal se patit se paavan banaate hain। doosra koi bana na sake। ganga ji se koi paavan ban nahin sakta। tum bachchon mein abhi kitna gyaan hai। tumhaare andar khushi honi chaahiye - baba phir se aaya hua hai। deviyon ke bhi kitne chitra aadi banaate hain, unko hathiyaar dekar bhayankar bana dete hain। brahma ko bhi kitni bhujaayen dete hain, ab tum samajhte ho brahma ki bhujaayen to laakhon hongi। itne sab brahmaakumaar-kumaariyaan yeh baba ki utpatti hai na, to prajaapita brahma ki itni bhujaayen hain।

ab tum ho roop-basanta। tumhaare mukh se sadaiv ratna nikalne chaahiye। sivaae gyaan ratna aur koi baat nahin। in ratnon ki koi value kar nahin sakte। baap kehte hain manamnaabhav। baap ko yaad karo to devta banenge। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

raatri class 11-3-68

tumhaare paas pradarshani ka udghaatan karne liye bade bade log aate hain, woh sirf itna samajhte hain ki bhagwan ko paane liye inhonne yeh achha raasta nikaala hai। jaise bhagwan ki praapti ke liye satsang aadi karte hain, ved padhte hain vaise yeh bhi inhonne yeh raasta liya hai। baaki yeh nahin samajhte ki inhon ko bhagwan padhaate hain। sirf achha karma karte hain, pavitrata hai aur bhagwan se milaate hain। in deviyon ne achha raasta nikaala hai, bas। jinse udghaatan karaaya jaata hai woh to apne ko bahut oonch samajhte hain। koi bade bade aadmi baba ke liye samajhte hain koi mahaan purush hai, unse jaakar milen। baba to kehte hain pahle form bharkar bhejo। pahle to tum bachche unko baap ka poora parichay do। parichay bigar kya aakar karenge! shivbaaba se to tab mil saken jab pahle poora nishchay ho। bigar pahchaan milkar kya karenge! kai saahookaar aate hain, samajhte hain ham inhen kuchh deven। gareeb koi ek roopaya dete hain, saahookaar 100 roopaya dete hain, gareebon ka ek roopaya valuable ho jaata hai। ve saahookaar log to kab yaad ki yaatra mein yathaartha reeti rah na saken, woh aatma-abhimaani ban na saken। pahle to patit se paavan kaise banna hai, woh likhkar dena hai। tamopradhaan se satopradhaan banna hai। ismen prerna aadi ki koi baat hi nahin। baap kehte hain maamekam yaad karo to junk nikal jaaye। pradarshani aadi dekhne aate hain parantu phir do-teen baari aakar samjhen tab samajhna chaahiye inko kuchh teer laga hai। devta dharma ka hai, isne bhakti achhi ki hai। bhal koi ko achha lagta hai parantu lakshya ko pakda nahin hai, to woh kis kaam ka। yeh to tum bachche jaante ho drama chalta rehta hai। jo kuchh chal raha hai buddhi se samajhte hain kya ho raha hai! tumhaari buddhi mein chakra chalta rehta hai, repeat hota rehta hai। jinhonne jo kuchh kiya hai so karte hain। baap koi se leve, na leve unke haath mein hain। bhal abhi centres aadi khulte hain, paise kaam mein aate hain। jab tumhaara prabhaav niklega phir paise kya karenge! mool baat hai patit se paavan banna। woh to bada mushkil hai, ismen lag jaayen। hamko to baap ko yaad karna hai। roti khaave aur baap ko yaad kare। samjhenge pahle ham baap se varsa to leven। ham aatma hain pahle to yeh pakka karna chaahiye। aise jab koi nikle tab teekhi daudi pahan sake। vaastav mein tum bachche saare vishwa ko yogbal se pavitra banaate ho to kitna bachchon ko nasha rehna chaahiye। mool baat hai hi pavitrata ki। yahaan padhaaya bhi jaata hai aur pavitra bhi banna hota hai, svachchha bhi rehna hai। andar mein aur koi baat yaad nahin rahni chaahiye। bachchon ko samjhaaya jaata hai ashareeri bhav। yahaan tum part bajaane aaye ho। sabhi ko apna-apna part bajaana hi hai। yeh knowledge buddhi mein rahni chaahiye। seedhi par bhi tum samjha sakte ho। raavan raajya hai hi patit, raamraajya hai paavan। phir patit se paavan kaise banen, aisi aisi baaton mein raman karna chaahiye, isko hi vichaar saagar manthan kaha jaata hai। 84 ka chakra yaad aana chaahiye। baap ne kaha hai mujhe yaad karo। yeh hai roohaani yaatra। baap ki yaad se hi vikarma vinaash hote hain। un jismaani yaatraaon se aur hi vikarma bante hain। bolo, yeh taabeej hai। inko samjhenge to sabhi duhkh door ho jaayenge। taabeej pahante hi hain duhkh door hone liye।

achha। meethe-meethe sikeeldhe bachchon prati maat pita baapdaada ka yaadapyaar aur goodnight।

dhaarna ke liye mukhya saar:-

1) nashtomoha ban baap ko yaad karna hai। kutumba parivaar mein rehte vishwa ka maalik banne liye mehnat karni hai। avgunon ko chhodte jaana hai।

2) apni aisi chalan rakhni hai jo sab dekhkar follow karen। koi bhi vikaar andar na rahe, yeh jaanch karni hai।

vardaan:- double seva dvaara alaukik shakti ka saakshaatkaar karaane vaale vishwa sevaadhaari bhav

jaise baap ka swaroop hi hai vishwa sevak, aise aap bhi baap samaan vishwa sevaadhaari ho। shareer dvaara sthool seva karte hue mansa se vishwa parivartan ki seva par tatpar raho। ek hi samay par tan aur man se iktthi seva ho। jo mansa aur karmana donon saath-saath seva karte hain, unse dekhne vaalon ko anubhav va saakshaatkaar ho jaata ki yeh koi alaukik shakti hai। isliye is abhyaas ko nirantar aur natural banaao। mansa seva ke liye vishesh ekaagrata ka abhyaas badhaao।

slogan:- sarva prati gunagraahak bano lekin follow brahma baap ko karo।

avyakt ishaare - satyata aur sabhyata roopi culture ko apnaao

ab svachchhata aur nirbhayta ke aadhaar se satyata dvaara pratyakshata karo। mukh se satyata ki authority svatah hi baap ki pratyakshata karegi। abhi parmaatma bomb (satya gyaan) dvaara dharni ko parivartan karo। iska sahaj saadhan hai - sada mukh par va sankalp mein nirantar maala ke samaan parmaatma smriti ho। sabke andar ek hi dhun ho “mera baba''। sankalp, karma aur vaani mein yahi akhanda dhun ho, yahi ajpaajaap ho। jab yeh ajpaajaap ho jaayega tab aur sab baaten svatah hi samaapta ho jaayengi।