सोमवार 10 मार्च 2025 की दैनिक मुरली

10-03-2025 praatahmurli om shanti "baapdaada"' madhuban

“meethe bachche - tumhein manushya se devta banne ki padhaai padhni aur padhaani hai, sabko shantidham aur sukhdhaam ka raasta bataana hai''

prashn:- jo satopradhaan purooshaarthi hain unki nishaani kya hogi?

uttar:- woh auron ko bhi aap samaan banaayenge। woh bahuton ka kalyaan karte rahenge। gyaan dhan se jholi bharkar daan karenge। 21 janmon ke liye varsa lenge aur doosron ko bhi dilaayenge।

geet:- om namo shivaae…

om shanti। bhakta jiski mahima karte hain, tum unke sammukh baithe ho, to kitni khushi honi chaahiye। unko kehte hain shivaae namah। tumko to namah nahin karna hai। baap ko bachche yaad karte hain, namah kabhi nahin karte। yeh bhi baap hai, inse tumko varsa milta hai। tum namah nahin karte ho, yaad karte ho। jeev ki aatma yaad karti hai। baap ne is tan ka loan liya hai। woh hamko raasta bata rahe hain - baap se behad ka varsa kaise liya jaata hai। tum bhi achhi reeti jaante ho। satayug hai sukhdhaam aur jahaan aatmaayen rehti hain usko kaha jaata hai shantidham। tumhaari buddhi mein hai ki ham shantidham ke vaasi hain। is kaliyug ko kaha hi jaata hai duhkhadhaam। tum jaante ho ham aatmaayen ab svarga mein jaane ke liye, manushya se devta banne ke liye padh rahi hain। yeh lakshmi-naaraayan devtaayen hain na। manushya se devta banna hai nai duniya ke liye। baap dvaara tum padhte ho। jitna padhenge, padhaai mein purooshaartha koi ka teekha hota hai, koi ka dheela hota hai। satopradhaan purooshaarthi jo hote hain woh doosre ko bhi aapasmaan banaane ka nambarvaar purooshaartha karaate hain, bahuton ka kalyaan karte hain। jitna dhan se jholi bharkar aur daan karenge utna faayda hoga। manushya daan karte hain, uska doosre janma mein alpakaal ke liye milta hai। usmein thoda sukh baaki to duhkh hi duhkh hai। tumko to 21 janmon ke liye svarga ke sukh milte hain। kahaan svarga ke sukh, kahaan yeh duhkh! behad ke baap dvaara tumko svarga mein behad ka sukh milta hai। eeshvar arth daan punya karte hain na। woh hai indirect। abhi tum to sammukh ho na। ab baap baith samjhaate hain - bhakti maarga mein eeshvar arth daan-punya karte hain to doosre janma mein milta hai। koi achha karte hain to achha milta hai, bura paap aadi karte hain to usko aisa milta hai। yahaan kaliyug mein to paap hi hote rehte hain, punya hota hi nahin। karke alpakaal ke liye sukh milta hai। abhi to tum bhavishya satayug mein 21 janmon ke liye sada sukhi bante ho। uska naam hi hai sukhdhaam। pradarshani mein bhi tum likh sakte ho ki shantidham aur sukhdhaam ka yeh maarga hai, shantidham aur sukh-dhaam mein jaane ka sahaj maarga। abhi to kaliyug hai na। kaliyug se satayug, patit duniya se paavan duniya mein jaane ka sahaj raasta - bigar kaudi kharcha। to manushya samjhen kyonki pattharbuddhi hain na। baap bilkul sahaj karke samjhaate hain। iska naam hi hai sahaj raajayog, sahaj gyaan।

baap tum bachchon ko kitna sensible banaate hain। yeh lakshmi-naaraayan sensible hain na। bhal shreekrishna ke liye kya-kya likh diya hai, woh hain jhoothe kalank। shreekrishna kehta hai maeeya main nahin maakhan khaayo... ab iska bhi arth nahin samajhte। main nahin maakhan khaayo, to baaki khaaya kisne? bachche ko doodh pilaaya jaata hai, bachche maakhan khaayenge ya doodh piyenge! yeh jo dikhaaya hai matki phodi aadi-aadi - aisi koi baaten hain nahin। vo to svarga ka first prince hai। mahima to ek shivbaaba ki hi hai। duniya mein aur kiski mahima hai nahin! is samay to sab patit hain parantu bhakti maarga ki bhi mahima hai, bhakta maala bhi gaai jaati hai na। females mein meera ka naam hai, males mein naarad mukhya gaaya hua hai। tum jaante ho ek hai bhakta maala, doosri hai gyaan ki maala। bhakta maala se roodra maala ke bane hain phir roodra maala se vishnu ki maala banti hai। roodra maala hai sangamayug ki, yeh raaz tum bachchon ki buddhi mein hai। yeh baaten tumko baap sammukh baith samjhaate hain। sammukh jab baithte ho to tumhaare romaanch khade ho jaane chaahiye। aho saubhaagya - 100 pratishat durbhaagyashaali se ham saubhaagyashaali bante hain। kumaariyaan to kaam kataari ke neeche gai nahin hain। baap kehte hain woh hai kaam kataari। gyaan ko bhi kataari kehte hain। baap ne kaha hai gyaan ke astra shastra, to unhonne phir deviyon ko sthool astra shastra de diye hain। woh to hain hinsak cheejen। manushyon ko yeh pata nahin hai ki svadarshan chakra kya hai? shaastron mein shreekrishna ko bhi svadarshan chakra de hinsa hi hinsa dikha di hai। vaastav mein hai gyaan ki baat। tum abhi svadarshan chakradhaari bane ho unhon ne phir hinsa ki baat dikha di hai। tum bachchon ko ab sva arthaat chakra ka gyaan mila hai। tumko baba kehte hain - brahma mukh vanshaavli brahman kul bhooshan, svadarshan chakradhaari। inka arth bhi abhi tum samajhte ho। tumhaare mein saare 84 janmon ka aur srishti chakra ka gyaan hai। pahle satayug mein ek sooryavanshi dharma hai phir chandravanshi। donon ko milaakar svarga kaha jaata hai। yeh baaten tumhaare mein bhi nambarvaar sabki buddhi mein hain। jaise tumko baba ne padhaaya hai, tum padhkar hoshiyaar hue ho। ab tumko phir auron ka kalyaan karna hai। svadarshan chakradhaari banna hai। jab tak brahma mukh vanshaavli nahin bane to shivbaaba se varsa kaise lenge। abhi tum bane ho brahman। varsa shivbaaba se le rahe ho। yeh bhoolna nahin chaahiye। point note karni chaahiye। yeh seedhi hai 84 janmon ki। seedhi utarne mein to sahaj hoti hai। jab seedhi chadhte hain to kamar ko haath de kaise chadhte hain। parantu lift bhi hai। abhi baba aate hi hain tumko lift dene। second mein chadhti kala hoti hai। ab tum bachchon ko to khushi honi chaahiye ki hamaari chadhti kala hai। most beloved baba mila hai। un jaisi pyaari cheez koi hoti nahin। saadhu-santa aadi jo bhi hain sab us ek maashook ko yaad karte hain, sabhi unke aashik hain। parantu woh kaun hai, yeh kuchh bhi samajhte nahin hain। sirf sarvavyaapi kah dete hain।

tum abhi jaante ho ki shivbaaba hamko in dvaara padhaate hain। shivbaaba ko apna shareer to hai nahin। woh hai param aatma। param aatma maana paramatma। jiska naam hai shiv। baaki sab aatmaon ke shareer par naam alag-alag padte hain। ek hi param aatma hai, jiska naam shiv hai। phir manushyon ne anek naam rakh diye hain। bhinna-bhinna mandir banaaye hain। abhi tum arth samajhte ho। baambe mein baabureenaath ka mandir hai, is samay tumko kaanton se phool banaate hain। vishwa ke maalik bante ho। to pahli baat mukhya yeh hai ki ham aatmaon ka baap ek hai, unse hi bhaaratvaasiyon ko varsa milta hai। bhaarat ke yeh lakshmi-naaraayan maalik hain na। cheen ke to nahin hain na। cheen ke hote to shakla hi aur hoti। yeh hain hi bhaarat ke। pahle-pahle gore phir saanvare bante hain। aatma mein hi khaad padti hai, saanvari banti hai। misaal saara inke oopar hai। bhramri keede ko change kar aapasmaan banaati hai। sannyaasi kya change karte hain! saphed kapde vaale ko geru kapde pahnaakar maatha muda dete hain। tum to yeh gyaan lete ho। aise lakshmi-naaraayan jaisa shobhnik ban jaayenge। abhi to prakriti bhi tamopradhaan hai, to yeh dharti bhi tamopradhaan hai। nuksaankaarak hai। aasmaan mein toofaan lagte hain, kitna nuksaan karte hain, upadrav hote rehte hain। abhi is duniya mein hai param duhkh। vahaan phir param sukh hoga। baap param duhkh se param sukh mein le jaate hain। inka vinaash hota hai phir sab satopradhaan ban jaata hai। abhi tum purooshaartha kar jitna baap se varsa lena hai utna le lo। nahin to pichhaadi mein pashchaataap karna padega। baba aaya parantu hamne kuchh nahin liya। yeh likha hua hai - bhambhor ko aag lagti hai tab kumbhakran ki neend se jaagte hain। phir haay-haay kar mar jaate hain। haay-haay ke baad phir jay-jaykaar hogi। kaliyug mein haay-haay hai na। ek-do ko maarte rehte hain। bahut dher ke dher marenge। kaliyug ke baad phir satayug zaroor hoga। beech mein yeh hai sangam। isko purooshottam yug kaha jaata hai। baap tamopradhaan se satopradhaan banne ki yukti achhi bataate hain। sirf kehte hain mujhe yaad karo aur kuchh bhi nahin karna hai। abhi tum bachchon ko maatha aadi bhi nahin tekna hai। baba ko koi haath jodte hain to baba kehte, na to tum aatma ko haath hain, na baap ko, phir haath kisko jodte ho। kaliyugi bhakti maarga ka ek bhi chinha nahin hona chaahiye। he aatma, tum haath kyon jodti ho? sirf mujh baap ko yaad karo। yaad ka matlab koi haath jodna nahin hai। manushya to soorya ko bhi haath jodenge, koi mahaatma ko bhi haath jodenge। tumko haath jodna nahin hai, yeh to mera loan liya hua tan hai। parantu koi haath jodte hain to return mein jodna padta hai। tumko to yeh samajhna hai ki ham aatma hain, hamko is bandhan se chhootkar ab vaapis ghar jaana hai। inse to jaise naphrat aati hai। is puraane shareer ko chhod dena hai। jaise sarpa ka misaal hai। bhramri mein bhi kitna akla hai jo keede ko bhramri bana deti hai। tum bachche bhi, jo vishay saagar mein gote kha rahe hain, unko usse nikaal ksheersaagar mein le jaate ho। ab baap kehte hain - chalo shantidham। manushya shanti ke liye kitna maatha maarte hain। sannyaasiyon ko svarga ki jeevanmukti to milti nahin। haan, mukti milti hai, duhkh se chhoot shantidham mein baith jaate hain। phir bhi aatma pahle-pahle to jeevanmukti mein aati hai। peechhe phir jeevanbandh mein aati hai। aatma satopradhaan hai phir seedhi utarti hai। pahle sukh bhog phir utarte-utarte tamopradhaan ban pade hain। ab phir sabko vaapas le jaane ke liye baap aaye hain। baap kehte hain mujhe yaad karo to tum paavan ban jaayenge।

baap ne samjhaaya hai jis samay manushya shareer chhodte hain to us samay badi takleeph bhogte hain kyonki sajaayen bhogni padti hain। jaise kaashi kalvat khaate hain kyonki suna hai shiv par bali chadhne se mukti mil jaati hai। tum abhi bali chadhte ho na, to bhakti maarga mein bhi phir woh baaten chalti hain। to shiv par jaakar bali chadhte hain। ab baap samjhaate hain vaapis to koi ja nahin sakte। haan, itna balihaar jaate hain to paap kat jaate hain phir hisaab-kitaab nayesir shuru hota hai। tum is srishti chakra ko jaan gaye ho। is samay sabki utarti kala hai। baap kehte hain main aakar sarva ki sadgati karta hoon। sabko ghar le jaata hoon। patiton ko to saath nahin le jaaoonga isliye ab pavitra bano to tumhaari jyot jag jaayegi। shaadi ke time stri ke maathe par matki mein jyot jagaate hain। yeh rasam bhi yahaan bhaarat mein hi hai। stri ke maathe par matki mein jyot jagaate hain, pati ke oopar nahin jagaate, kyonki pati ke liye to eeshvar kehte hain। eeshvar par phir jyot kaise jagaayenge। to baap samjhaate hain meri to jyot jagi hui hai। main tumhaari jyot jagaata hoon। baap ko shama bhi kehte hain। brahm-samaaji phir jyoti ko maante hain, sadaiv jyot jagi rehti hai, unko hi yaad karte hain, unko hi bhagwan samajhte hain। doosre phir samajhte hain chhoti jyoti (aatma) badi jyoti (paramatma) mein sama jaayegi। anek maten hain। baap kehte hain tumhaara dharma to athaah sukh dene vaala hai। tum svarga mein bahut sukh dekhte ho। nai duniya mein tum devta bante ho। tumhaari padhaai hai hi bhavishya nai duniya ke liye, aur sab padhaaeeyaan yahaan ke liye hoti hain। yahaan tumko padhkar bhavishya mein pad paana hai। geeta mein bhi barobar raajayog sikhlaaya hai। phir pichhaadi mein ladaai lagi, kuchh bhi nahin raha। paandavon ke saath kutta dikhaate hain। ab baap kehte hain main tumko god-goddess banaata hoon। yahaan to anek prakaar ke duhkh dene vaale manushya hain। kaam kataari chalaae kitna duhkhi banaate hain। to ab tum bachchon ko yeh khushi rahni chaahiye ki behad ka baap gyaan ka saagar hamko padha rahe hain। most beloved maashook hai। ham aashik unko aadhaakalpa yaad karte hain। tum yaad karte aaye ho, ab baap kehte hain main aaya hoon, tum meri mat par chalo। apne ko aatma samajh mujh baap ko yaad karo। doosra na koi। sivaae meri yaad ke tumhaare paap bhasma nahin honge। har baat mein surgeon se raay poochhte raho। baba raay denge - aise-aise tod nibhaao। agar raay par chalenge to kadam-kadam par padam milenge। raay li to responsibility chhooti। achha।

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) behad ke baap se behad sukh ka varsa lene ke liye direct eeshvar arth daan-punya karna hai। gyaan dhan se jholi bharkar sabko dena hai।

2) is purooshottam yug mein svayan ko sarva bandhanon se mukta kar jeevanmukta banna hai। bhramri ki tarah bhoon-bhoon kar aap samaan banaane ki seva karni hai।

vardaan:- sarva praaptiyon ke anubhav dvaara powerful banne vaale sada saphaltaamoorta bhav

jo sarva praaptiyon ke anubhvi moorta hain vahi powerful hain, aisi powerful sarva praaptiyon ki anubhvi aatmaayen hi saphaltaamoorta ban sakti hain kyonki abhi sarva aatmaayen dhoondhegi ki sukh-shanti ke master daata kahaan hain। to jab aapke paas sarvashaktiyon ka stock hoga tab to sabko santushta kar sakenge। jaise videsh mein ek hi store se sab cheejen mil jaati hain aise aapko bhi banna hai। aise nahin sahanshakti ho saamna karne ki nahin। sarvashaktiyon ka stock chaahiye tab saphaltaamoorta ban sakenge।

slogan:- maryaadaayen hi brahman jeevan ke kadam hain, kadam par kadam rakhna maana manzil ke sameep pahunchna।

avyakt ishaare - satyata aur sabhyata roopi culture ko apnaao

aajkal koi koi ek vishesh bhaasha use karte hain ki hamse asatya dekha nahin jaata, asatya suna nahin jaata, isliye asatya ko dekh, jhooth ko sun karke andar mein josh aa jaata hai। lekin yadi woh asatya hai aur aapko asatya dekhkar josh aata hai to woh josh bhi asatya hai na! asatyata ko khatma karne ke liye svayan mein satyata ki shakti dhaaran karo।