शुक्रवार 14 मार्च 2025 की दैनिक मुरली

14-03-2025 praatahmurli om shanti "baapdaada"' madhuban

“meethe bachche - tumhaara chehra sada khushnuma chaahiye ‘humein bhagwan padhaate hain', yeh khushi chehre se jhalakni chaahiye''

prashn:- abhi tum bachchon ka mukhya purooshaartha kya hai?

uttar:- tum sajaaon se chhootne ka hi purooshaartha karte rehte ho। uske liye mukhya hai yaad ki yaatra, jisse hi vikarma vinaash hote hain। tum pyaar se yaad karo to bahut kamaai jama hoti jaayegi। savere-savere uthkar yaad mein baithne se puraani duniya bhoolti jaayegi। gyaan ki baaten buddhi mein aati rahengi। tum bachchon ko mukh se koi kichad-patti ki baaten nahin bolni hain।

geet:- tumhein paake hamne…

om shanti। geet jab sunte hain to us samay koi-koi ko uska arth samajh mein aata hai aur woh khushi bhi chadhti hai। bhagwan hamko padhaate hain, bhagwan hamko vishwa ki baadshaahi dete hain। parantu itni khushi koi virle ko yahaan rehti hai। sthaai woh yaad thaharti nahin hai। ham baap ke bane hain, baap hamko padhaate hain। bahut hain jinko yeh nasha chadhta nahin hai। un satsangon aadi mein kathaayen sunte hain, unko bhi khushi hoti hai। yahaan to baap kitni achhi baaten sunaate hain। baap padhaate hain aur phir vishwa ka maalik banaate hain to student ko kitni khushi honi chaahiye। us jismaani padhaai padhne vaalon ko jitni khushi rehti hai, yahaan vaalon ko utni khushi nahin rehti। buddhi mein baithta hi nahin। baap ne samjhaaya hai aise-aise geet 4-5 baar suno। baap ko bhoolne se phir puraani duniya aur puraane sambandh bhi yaad aa jaate hain। aise samay geet sunne se bhi baap ki yaad aa jaayegi। baap kahne se varsa bhi yaad aa jaata hai। padhaai se varsa milta hai। tum shivbaaba se padhte ho saare vishwa ka maalik banne। to baaki aur kya chaahiye। aise student ko andar mein kitni khushi honi chaahiye! raat-din neend bhi fit jaae। khaas neend phita karke bhi aise baap aur teacher ko yaad karte rehna chaahiye। jaise mastaane। oho, hamko baap se vishwa ki baadshaahi milti hai! parantu maaya yaad karne nahin deti hai। mitra-sambandhiyon aadi ki yaad aati rehti hai। unka hi chintan rehta hai। puraana sada hua kichda bahuton ko yaad aata hai। baap jo batlaate hain, tum vishwa ke maalik bante ho woh nasha nahin chadhta। school mein padhne vaalon ka chehra khushnuma rehta hai। yahaan bhagwan padhaate hain, woh khushi koi virle ko rehti hai। nahin to khushi ka paara athaah chadha rehna chaahiye। behad ka baap hamko padhaate hain, yeh bhool jaate hain। yeh yaad rahe to bhi khushi rahe। parantu past ka karmabhog hi aisa hai to baap ko yaad karte hi nahin। munh phir bhi kichde taraph chala jaata hai। baba sabke liye to nahin kehte hain, nambarvaar hain। mahaan saubhaagyashaali woh jo baap ki yaad mein rahe। bhagwan, baba hamko padhaate hain! jaise us padhaai mein rehta hai phalaana teacher hamko barrister banaate hain, vaise yahaan hamko bhagwan padhaate hain - bhagwan bhagavti banaane ke liye to kitna nasha rehna chaahiye। sunne samay koi-koi ko nasha chadhta hai। baaki to kuchh bhi nahin samajhte hain। bas guru kiya, samjhenge yeh hamko saath le jaayenge। bhagwan se milaayenge। yeh to khud bhagwan hain। apne se milaate hain, saath le jaayenge। manushya guru karte hi isliye hain ki bhagwan ke paas le jaae va shantidham le jaaye। yeh baap sammukh kitna samjhaate hain। tum student ho। padhaane vaale teacher ko to yaad karo। bilkul hi yaad nahin karte, baat mat poochho। achhe-achhe bachche bhi yaad nahin karte। shivbaaba hamko padhaate hain, woh gyaan ka saagar hai, hamko varsa dete hain, yeh yaad rahe to bhi khushi ka paara chadha rahe। baap sammukh bataate hain phir bhi woh nasha nahin chadhta। buddhi aur-aur taraph chali jaati hai। baap kehte hain mujhe yaad karo to tumhaare vikarma vinaash honge। main guarantee karta hoon - ek baap ke sivaae aur koi ko yaad na karo। vinaash hone vaali cheez ko yaad kya karna hai। yahaan to koi marta hai to 2-4 varsha tak bhi unko yaad karte rehte। unka gaayan karte rehte। ab baap sammukh kehte hain bachchon ko ki mujhe yaad karo। jo jitna pyaar se yaad karte hain utna paap katte jaate hain। bahut kamaai hoti hai। savere uthkar baap ko yaad karo। bhakti bhi manushya savere uthkar karte hain। tum to ho gyaan vaale। tumhein puraani duniya ki kichadpatti mein nahin phansana hai। parantu kai bachche aise phans padte hain jo baat mat poochho। kichadpatti se nikalte hi nahin। saara din kichda hi bolte rehte। gyaan ki baaten buddhi mein aati hi nahin। kai to aise bachche bhi hain jo saara din service par bhaagte rehte hain। baap ki jo service karte hain, yaad bhi woh aayenge। is samay sabse jaasti service par tatpar manohar dekhne mein aati hai। aaj karnaal gai, aaj kahaan gai, service par bhaagti rehti hai। jo aapas mein ladte rehte vo service kya karte honge! baap ko pyaare kaun lagenge? jo achhi service karte hain, din-raat service ki hi chinta rehti hai, baap ki dil par bhi vahi chadhte hain। ghadi-ghadi aise geet tum sunte raho to bhi yaad rahe, kuchh nasha chadhe। baba ne kaha hai, koi samay kisko udaasi aa jaati hai to record bajaane se khushi aa jaayegi। oho! ham vishwa ke maalik bante hain। baap to sirf kehte hain mujhe yaad karo। kitni sahaj padhaai hai। baba ne achhe-achhe 10-12 record chhaantakar nikaale the ki harek ke paas rahne chaahiye। parantu phir bhi bhool jaate hain। kai to chalte-chalte padhaai hi chhod dete hain। maaya vaar kar leti hai। baap tamopradhaan buddhi ko satopradhaan banaane ki kitni sahaj yukti bataate hain। abhi tumko wrong right sochne ki buddhi mili hai। bulaate bhi baap ko hain - he patit-paavan aao। ab baap aaye hain to paavan banna chaahiye na। tumhaare sir par janma-janmaantar ka bojha hai, uske liye jitna yaad karenge, pavitra banenge, khushi bhi rahegi। bhal service to karte rehte hain parantu apna bhi hisaab rakhna hai। ham baap ko kitna samay yaad karte hain। yaad ka chart koi rakh nahin sakte। point to bhal likhte hain parantu yaad ko bhool jaate hain। baap kehte hain tum yaad mein rah bhaashan karenge to bal bahut milega। nahin to baap kehte hain main hi jaakar bahuton ko madad karta hoon। koi mein pravesh kar main hi jaakar service karta hoon। service to karni hai na। dekhta hoon kiska bhaagya khulne ka hai, samjhaane vaale mein itna akla nahin hai to main pravesh kar service kar leta hoon phir koi-koi likhte hain - baba ne hi yeh service ki। hamaare mein to itni taakat nahin, baba ne murli chalaai। koi ko phir apna ahankaar aa jaata hai, hamne aisa achha samjhaaya। baap kehte hain main kalyaan karne ke liye pravesh karta hoon phir woh braahmani se bhi teekhe ho jaate hain। koi buddhu ko bhej doon to woh samajhte hain isse to ham achha samjha sakte hain। gun bhi nahin hain। isse to hamaari avastha achhi hai। koi-koi head bankar rehte hain to bada nasha chadh jaata hai। bahut bhabhke se rehte hain। bade aadmi se bhi tu-tu kar baat karte hain। bas unko devi-devi kehte hain to usmein hi khush ho jaate। aise bhi bahut hain। teacher se bhi student hoshiyaar ho jaate hain। imtahaan paas kiya hua to ek baba hi hai, woh hai gyaan saagar। un dvaara tum padhkar phir padhaate ho। koi to achhi reeti dhaarna kar lete hain। koi bhool jaate hain। bade te badi mukhya baat hai yaad ki yaatra। hamaare vikarma vinaash kaise hon? kai bachche to aisi chalan chalte hain jo bas yeh baba jaane aur woh baba jaane।

abhi tum bachchon ko sajaaon se chhootne ka hi mukhya purooshaartha karna hai। uske liye mukhya hai yaad ki yaatra, jisse hi vikarma vinaash hote hain। bhal koi paise mein madad karte hain, samajhte hain ham saahookaar banenge parantu purooshaartha to sajaaon se bachne ka karna hai। nahin to baap ke aage saja khaani padegi। judge ka bachcha koi aisa kaam kare to judge ko bhi lajja aayegi na। baap bhi kahenge ham jinki paalna karta hoon unko phir saja khilaaoonga! us samay kaandh neeche kar haay-haay karte rahenge - baap ne itna samjhaaya, padhaaya, hamne dhyaan nahin diya। baap ke saath dharmaraaj bhi to hai na। woh to janmapatri ko jaante hain। abhi to tum practical mein dekhte ho। 10 varsha pavitrata mein chala, achaanak hi maaya ne aisa ghoonsa lagaaya, ki kamaai chat kar di, patit ban pada। aise bahut misaal hote rehte hain। bahut girte hain। maaya ke toofaanon mein saara din hairaan rehte hain, phir baap ko hi bhool jaate hain। baap se hamko behad ki baadshaahi milti hai, woh khushi nahin rehti। kaam ke peechhe phir moh bhi hai। ismen nashtomoha banna pade। patiton se kya dil lagaani hai। haan, yahi khyaal rakhna hai - inko bhi ham baap ka parichay de uthaaven। inko kis reeti shivaalay ka laayak banaayen। andar mein yeh yukti racho। moh ki baat nahin। kitna bhi pyaara sambandhi ho, unko bhi samjhaate raho। kisi mein bhi haddi pyaar ki rag na jaaye। nahin to sudhrenge nahin। merciful banna chaahiye। apne par bhi raham karna hai aur auron par bhi raham karna hai। baap ko bhi taras padta hai। dekhna hai ham kitnon ko aapasmaan banaate hain। baba ko saboot dena pade। hamne kitnon ko parichay diya। woh bhi phir likhte - baba hamko in dvaara parichay bahut achha mila। baba ke paas saboot aaye tab baba samjhe haan yeh service karte hain। baba ko likhen baba yeh braahmani to badi hoshiyaar hai। bahut achhi service karti hai, hamko achha padhaati hai। yog mein phir bachche fail hote hain। yaad karne ka akla nahin hai। baap samjhaate hain bhojan khaate ho to bhi shivbaaba ko yaad karke khaao। kahaan ghoomne phirne jaate ho shivbaaba ko yaad karo। jharmui jhagmui na karo। bhal koi baat ka khyaalaat bhi aata hai phir baap ko yaad karo to goya kaamkaaj ka khyaal bhi kiya phir baba ki yaad mein lag gaya। baap kehte hain karma to bhal karo, neend bhi karo, saath-saath yeh bhi karo। kam se kam 8 ghante tak aana chaahiye - yeh hoga pichhaadi tak। dheere-dheere apna chart badhaate raho। koi-koi likhte hain do ghanta yaad mein raha phir chalte-chalte chart dheela ho jaata hai। woh bhi maaya gum kar deti hai। maaya badi jabardasta hai। jo is service mein saara din busy rahenge vahi yaad bhi kar sakenge। ghadi-ghadi baap ka parichay dete rahenge। baba yaad ke liye bahut jor dete rehte hain। khud bhi feel karte hain ham yaad mein rah nahin sakte hain। yaad mein hi maaya vighna daalti hai। padhaai to bahut sahaj hai। baap se ham padhte bhi hain। jitna dhan lenge utna saahookaar banenge। baap to sabhi ko padhaate hain na। vaani sabke paas jaati hai sirf tum nahin, sab padh rahe hain। vaani nahin jaati to chillaate hain। kai to phir aise bhi hain jo sunenge hi nahin। aise hi chalte rehte। murli sunne ka shauk hona chaahiye। geet kitna first class hai - baba ham apna varsa lene aaye hain। kehte bhi hain na - baba, jaisi hoon, taisi hoon, kaani hoon, kaisi bhi hoon, aapki hoon। woh to theek hai parantu chhi-chhi se to achha banna chaahiye na। saara madaar hai yog aur padhaai par।

baap ka banne ke baad yeh vichaar har bachche ko aana chaahiye ki ham baap ka bane hain to svarga mein chalenge hi parantu humein svarga mein kya banna hai, woh bhi sochna hai। achhi reeti padho, daiveegun dhaaran karo। bandar ke bandar hi honge to kya pad paayenge? vahaan bhi to praja naukar chaakar sab chaahiye na। padhe hue ke aage anapdhe bhari dhoyenge। jitna purooshaartha karenge utna achha sukh paayenge। achha dhanvaan banenge to ijjat bahut hogi। padhne vaale ki ijjat achhi hoti hai। baap to raay dete rehte hain। baap ki yaad mein shanti mein raho। parantu baba jaante hain sammukh rahne vaalon se bhi door rahne vaale bahut yaad mein rehte hain aur achha pad pa lete hain। bhakti maarga mein bhi aisa hota hai। koi bhakta achhe first class hote hain jo guru se bhi jaasti yaad mein rehte hain। jo bahut achhi bhakti karte honge vahi yahaan aate hain। sabhi bhakta hain na। sanyaasi aadi nahin aayenge, sabhi bhakta bhakti karte-karte aa jaayenge। baap kitna clear kar samjhaate hain। tum gyaan utha rahe ho, siddha hota hai tumne bahut bhakti ki hai। jaasti bhakti karne vaale jaasti padhenge। kam bhakti karne vaale kam padhenge। mukhya mehnat hai yaad ki। yaad se hi vikarma vinaash honge aur bahut meetha bhi banna hai। achha।

meethe-meethe sikeeldhe serviceable, vaphaadaar, pharmaanbardaar bachchon ko baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) kitna bhi koi pyaara sambandhi ho usmein moh ki rag nahin jaani chaahiye। nashtomoha banna hai। yukti se samjhaana hai। apne oopar aur doosron par raham karna hai।

2) baap aur teacher ko bahut pyaar se yaad karna hai। nasha rahe bhagwan hamko padhaate hain, vishwa ki baadshaahi dete hain! ghoomte phirte yaad mein rehna hai, jharmui, jhagmui nahin karna hai।

vardaan:- avinaashi roohaani rang ki sachchi holi dvaara baap samaan sthiti ke anubhvi bhav

aap parmaatma rang mein rangi hui holi aatmaayen ho। sangamayug holi jeevan ka yug hai। jab avinaashi roohaani rang lag jaata hai to sadaakaal ke liye baap samaan ban jaate ho। to aapki holi hai sang ke rang dvaara baap samaan banna। aisa pakka rang ho jo auron ko bhi samaan bana do। har aatma par avinaashi gyaan ka rang, yaad ka rang, anek shaktiyon ka rang, gunon ka rang, shreshtha vritti drishti, shubh bhaavna, shubh kaamna ka roohaani rang chadhaao।

slogan:- drishti ko alaukik, man ko sheetal, buddhi ko merciful aur mukh ko madhur banaao।

avyakt ishaare - satyata aur sabhyata roopi culture ko apnaao

satyata ke shakti swaroop hokar, nashe se bolo, nashe se dekho। ham almighty government ke anuchar hain, isi smriti se aythaartha ko yathaartha mein laana hai। satya ko prasiddha karna hai na ki chhipaana hai lekin sabhyata ke saath। nasha rahe ki ham shiv ki shaktiyaan hain। himmate shaktiyaan, madde sarvashaktivaan।