शनिवार 22 मार्च 2025 की दैनिक मुरली

22-03-2025 praatahmurli om shanti "baapdaada"' madhuban

“meethe bachche - tumhein nasha chaahiye ki hamaara paarlaukik baap wonder oph di world (svarga) banaata, jiske ham maalik bante hain''

prashn:- baap ke sang se tumhein kya-kya praaptiyaan hoti hain?

uttar:- baap ke sang se ham mukti, jeevan-mukti ke adhikaari ban jaate hain। baap ka sang taar deta hai (paar le jaata hai)। baba humein apna banaakar aastik aur trikaaldarshi bana dete hain। ham rachta aur rachna ke aadi-madhya-ant ko jaan jaate hain।

geet:- dheeraj dhar manua…

om shanti। yeh kaun kehte hain? bachchon ko baap hi kehte hain, sab bachchon ko kehna hota hai kyonki sab duhkhi hain, adheerya hain। baap ko yaad karte hain ki aakar duhkh se liberate karo, sukh ka raasta bataao। ab manushyon ko, usmein bhi khaas bhaaratvaasiyon ko yeh yaad nahin hai ki ham bhaaratvaasi bahut sukhi the। bhaarat praacheen se praacheen wonderful land tha। wonder oph di world kehte hain na। yahaan maaya ke raajya mein 7 wonders gaaye jaate hain। woh hain sthool wonders। baap samjhaate hain yeh maaya ke wonders hain, jismen duhkh hai। raam, baap ka wonder hai svarga। vahi wonder oph world hai। bhaarat svarga tha, heere jaisa tha। vahaan devi-devtaaon ka raajya tha। yeh bhaaratvaasi sab bhool gaye hain। bhal devtaaon ke aage maatha tekte hain, pooja karte hain parantu jinki pooja karte hain, unhon ki biography ko jaanna chaahiye na। yeh behad ka baap baith samjhaate hain, yahaan tum aaye ho paarlaukik baap ke paas। paarlaukik baap hai svarga sthaapan karne vaala। yeh kaarya koi manushya nahin kar sakte, inko (brahma ko) bhi baap kehte hain - he shreekrishna ki aatma tum apne janmon ko nahin jaanti ho। tum shreekrishna the to satopradhaan the phir 84 janma lete abhi tum tamopradhaan bane ho, bhinna-bhinna naam tumhaare pade hain। abhi tumhaara naam brahma rakha hai। brahma so vishnu va shreekrishna banega। baat ek hi hai - brahma so vishnu, vishnu so brahma। brahma mukh vanshaavli brahman so phir devta bante hain। phir vahi devi-devta phir shoodra bante hain। abhi tum brahman bane ho। abhi baap baith tum bachchon ko samjhaate hain, yeh hai bhagvaanuvaach। tum to ho gaye student। to tumko kitni khushi honi chaahiye। parantu itni khushi rehti nahin hai। dhanvaan dhan ke nashe mein bahut khush rehte hain na। yahaan bhagwan ke bachche bane ho to bhi itna khushi mein nahin rehte। samajhte nahin, pattharbuddhi hain na। takdeer mein nahin hai to gyaan ki dhaarna kar nahin sakte। ab tumko baap mandir laayak bana rahe hain। parantu maaya ka sang bhi kam nahin hai। gaaya hua hai sang taare, kusang bore। baap ka sang tumko mukti-jeevanmukti mein le jaata hai phir raavan ka kusang tumko durgati mein le jaata hain। 5 vikaaron ka sang ho jaata hai na। bhakti mein naam kehte hain satsang parantu seedhi to neeche utarte rehte hain, seedhi se koi dhakka khaayega to zaroor neeche hi girega na! sarva ka sadgati daata ek baap hi hai। koi bhi honge bhagwan ka ishaara oopar mein karenge। ab baap bigar bachchon ko parichay kaun de? baap hi bachchon ko apna parichay dete hain। unko apna banaae srishti ke aadi, madhya, ant ka knowledge dete hain। baap kehte hain main aakar tumko aastik bhi banaata hoon, trikaaldarshi bhi banaata hoon। yeh drama hai, yeh koi saadhu-santa aadi nahin jaante। woh hote hain had ke drama, yeh hai behad ka। is behad ke drama mein ham sukh bhi bahut dekhte hain to duhkh bhi bahut dekhte hain। is drama mein krishna aur Christian ka bhi kaisa hisaab-kitaab hai। unhonne bhaarat ko ladaae raajaai li। abhi tum ladte nahin ho। woh aapas mein ladte hain, raajaai tumko mil jaati hai। yeh drama mein noondh hai। yeh baaten koi bhi jaante nahin hain। gyaan dene vaala gyaan ka saagar ek hi baap hai, jo sarva ki sadgati karte hain। bhaarat mein devi-devtaaon ka raajya tha to sadgati thi। baaki sab aatmaayen muktidhaam mein thi। bhaarat sone ka tha। tum hi raajya karte the। satayug mein sooryavanshi raajya tha। abhi tum satya naaraayan ki katha sunte ho। nar se naaraayan banne ki yeh katha hai। yeh bhi bade aksharon mein likh do - sachchi geeta se bhaarat sachkhanda, worth pound banta hai। baap aakar sachchi geeta sunaate hain। sahaj raajayog sikhlaate hain to worth pound ban jaate hain। baba totke to bahut samjhaate hain, parantu bachche deh-abhimaan ke kaaran bhool jaate hain। dehi-abhimaani banen to dhaarna bhi ho। deh-abhimaan ke kaaran dhaarna hoti nahin।

baap samjhaate hain main thode hi kehta hoon ki main sarvavyaapi hoon। mujhe to kehte bhi ho tum maat-pita. . . to iska arth kya? tumhari kripa se sukh ghanere। abhi to duhkh hai। yeh gaayan kis samay ka hai - yeh bhi samajhte nahin hain। jaise pakshi choon-choon karte rehte hain, arth kuchh nahin। vaise yeh bhi choon-choon karte rehte, arth kuchh nahin। baap baith samjhaate hain, yeh sab hai unrighteous। kisne unrighteous banaaya hai? raavan ne। bhaarat sachkhanda tha to sab sach bolte the, chori thagi aadi kuchh bhi nahin tha। yahaan kitni chori aadi karte hain। duniya mein to thagi hi thagi hai। isko kaha hi jaata hai - paap ki duniya, duhkh ki duniya। satayug ko kaha jaata hai sukh ki duniya। yeh hai vicious, veshyaalay, satayug hai shivaalay। baap kitna achhi reeti baith samjhaate hain। naam bhi kitna achha hai - brahmaakumaari eeshvareey vishwa-vidyaalay। ab baap aakar samajhdaar banaate hain। kehte hain in vikaaron ko jeeto to tum jagat jeet banenge। yeh kaam hi mahaashatru hai। bachche bulaate bhi isliye hain ki hamko aakar god-goddess (devi devta) banaao।

baap ki yathaartha mahima tum bachche hi jaante ho। manushya to na baap ko jaante, na baap ki mahima ko jaante hain। tum jaante ho woh pyaar ka saagar hai। baap tum bachchon ko itna gyaan sunaate hain, yahi unka pyaar hai। teacher student ko padhaate hain to student kya se kya ban jaate hain। tum bachchon ko bhi baap jaisa pyaar ka saagar banna hai, pyaar se koi ko bhi samjhaana hai। baap kehte hain tum bhi ek-do ko pyaar karo। number one pyaar hai - baap ka parichay do। tum gupta daan karte ho। ek-do ke liye ghrina bhi nahin rahni chaahiye। nahin to tumko bhi dande khaane padenge। kisi ka tiraskaar karenge to dande khaayenge। kabhi bhi kisi se naphrat nahin rakho, tiraskaar nahin karo। deh-abhimaan mein aane se hi patit bane ho। baap dehi-abhimaani banaate hain to tum paavan bante ho। sabko yahi samjhaao ki ab 84 ka chakra poora hua hai। jo sooryavanshi mahaaraaja-mahaaraani the vahi phir 84 janma lete utarte-utarte ab aakar pat pade hain। ab baap phir se mahaaraaja-mahaaraani bana rahe hain। baap sirf kehte hain maamekam yaad karo to paavan ban jaayenge। tum bachchon ko merciful ban saara din service ke khyaalaat chalaane chaahiye। baap direction dete rehte hain - meethe bachche, merciful ban jo bichaari duhkhi aatmaayen hain, un duhkhi aatmaon ko sukhi banaao। unhein patra likhna chaahiye bahut short mein। baap kehte hain mujhe yaad karo aur varse ko yaad karo। ek shivbaaba ki hi mahima hai। manushyon ko baap ki mahima ka bhi pata nahin hai। hindi mein bhi chitthi likh sakte ho। service karne ka bhi bachchon ko haunsala chaahiye। bahut hain jo aapghaat karne baith jaate hain, unhein bhi tum samjha sakte ho ki jeev-ghaat mahaapaap hai। abhi tum bachchon ko shreemat dene vaala hai shivbaaba। woh hai shri shri shivbaaba। tumko banaate hain shri lakshmi, shri naaraayan। shri shri to woh ek hi hai। woh kabhi chakra mein aate nahin hain। baaki tumko shri ka title milta hai। aajkal to sabko shri ka title dete rehte hain। kahaan woh nirvikaari, kahaan yeh vikaari - raat-din ka farka hai। baap roz samjhaate rehte hain - ek to dehi-abhimaani bano aur sabko paigaam pahunchaao। paigambar ke bachche tum bhi ho। sarva ka sadgati daata ek hi hai। baaki dharma sthaapak ko guru thode hi kahenge। sadgati karne vaala hai hi ek। achha-

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) kisi se bhi ghrina va naphrat nahin karni hai। merciful ban duhkhi aatmaon ko sukhi banaane ki seva karni hai। baap samaan master pyaar ka saagar banna hai।

2) “bhagwan ke ham bachche hain'' isi nashe va khushi mein rehna hai। kabhi maaya ke ulte sang mein nahin jaana hai। dehi-abhimaani bankar gyaan ki dhaarna karni hai।

vardaan:- baap samaan vardaani ban har ek ke dil ko aaraam dene vaale master dilaaraam bhav

jo baap samaan vardaani moorta bachche hain woh kabhi kisi ki kamjori ko nahin dekhte, woh sabke oopar merciful hote hain। jaise baap kisi ki kamjoriyaan dil par nahin rakhte aise vardaani bachche bhi kisi ki kamjori dil mein dhaaran nahin karte, ve harek ki dil ko aaraam dene vaale master dilaaraam hote hain isliye saathi ho ya praja sabhi unka gungaan karte hain। sabhi ke andar se yahi aasheervaad nikalti hai ki yeh hamaare sada snehi, sahayogi hain।

slogan:- sangamayug par shreshtha aatma woh hai jo sada bephikra baadshaah hai।

maateshvari ji ke anmol mahaavaakya

“gyaani tu aatma bachchon ki bhool hone se 100 guna danda''

is avinaashi gyaan yagya mein aae saakshaat paramatma ka haath lekar phir kaarne akaarne agar unse vikarma ho jaata hai to uski saza bahut bhaari hai। jaise gyaan lene se unko 100 guna phaayda hai, vaise gyaan lete koi bhool ho jaati hai to phir 100 guna danda bhi hai isliye bahut khabardaari rakhni hai। bhool karte rahenge to kamjor padte rahenge isliye chhoti badi bhool ko pakadte raho, aainde ke liye (aage ke liye) pareekshan kar chalte chalo। dekho, jaise samajhdaar bada aadmi bura kaam karta hai to unke liye badi saja hai aur jo neeche gira hua aadmi hai kuchh bura kaam karta hai to unke liye itni saza nahin hai। ab tum bhi paramatma ke bachche kahlaate ho to itne hi tumko daiveegun dhaaran karne hain, sachche baap ke paas aate ho to sachcha hokar rehna hai।

2- log kehte hain paramatma jaani-jaananhaar hai, ab jaani-jaananhaar ka arth yeh nahin hai ki sabke dilon ko jaanta hai। parantu srishti rachna ke aadi-madhya-ant ko jaanne vaala hai। baaki aise nahin paramatma rachta paalan karta aur sanhaar karta hai to iska matlab yeh hai ki paramatma paida karta hai, khilaata hai aur maarta hai, parantu aise nahin hai। manushya apne karmon ke hisaab-kitaab se janma lete hain, iska matlab yeh nahin ki paramatma baith unke bure sankalp aur achhe sankalpon ko jaanega। vo to jaanta hai ki agyaaniyon ke dil mein kya chalta hoga? saara din maayaavi sankalp chalte honge aur gyaani ke andar shuddh sankalp chalte honge, baaki ek ek sankalp ko baith thode hi read karega? baaki paramatma jaanta hai, ab to sabki aatma durgati ko pahunchi hui hai, unhon ki sadgati kaise honi hai, yeh saari pahchaan jaani-jaananhaar ko hai। ab manushya jo karma bhrashta bane hain, unhon ko shreshtha karma karaana, sikhlaana aur unko karmabandhan se chhutkaara dena, yeh paramatma jaanta hai। paramatma kehta hai mujh rachta aur meri rachna ke aadi-madhya-ant ki yeh saari knowledge ko main jaanta hoon, woh pahchaan to tum bachchon ko de raha hoon। ab tum bachchon ko us baap ki nirantar yaad mein rehna hai tab hi sarva paapon se mukta honge arthaat amarlok mein jaayenge, ab is jaanne ko hi jaani-jaananhaar kehte hain। achha। om shanti।

avyakt ishaare - satyata aur sabhyata roopi culture ko apnaao

kabhi bhi sabhyata ko chhod karke satyata ko siddha nahin karna। sabhyata ki nishaani hai nirmaanta। yeh nirmaanta nirmaan ka kaarya sahaj karti hai। jab tak nirmaan nahin bane tab tak nirmaan nahin kar sakte। gyaan ki shakti shanti aur prem hai। agyaan ki shakti krodh ko bahut achhi tarah se sanskaar bana liya hai aur use bhi karte rehte ho phir maaphi bhi lete rehte ho। aise ab har gun ko, har gyaan ki baat ko sanskaar roop mein banaao to sabhyata aati jaayegi।