रविवार 23 मार्च 2025 की दैनिक मुरली

23-03-25 praatahmurli om shanti ''avyakt-baapdaada'' revise 02-11-04 madhuban

sva-upkaari ban apkaari par bhi upkaar karo, sarva shakti, sarva gun sampanna sammaan daata bano

aaj sneh ke saagar apne chaaron or ke snehi bachchon ko dekh harshit ho rahe hain। chaahe saakaar roop mein sammukh hain, chaahe sthool roop mein door baithe hain lekin sneh, sabhi ko baap ke paas baithe hain - yeh anubhav kara raha hai। har bachche ka sneh baap ko sameep anubhav kara raha hai। aap sabhi bachche bhi baap ke sneh mein sammukh pahunche ho। baapdaada ne dekha ki har ek bachche ke dil mein baap-daada ka sneh samaaya hua hai। har ek ke dil mein “mera baba'' isi sneh ka geet baj raha hai। sneh hi is deh aur deh ke sambandh se nyaara bana raha hai। sneh hi maayaajeet bana raha hai। jahaan dil ka sneh hai vahaan maaya door se hi bhaag jaati hai। sneh ki subject mein sarva bachche paas hain। ek hai sneh, doosra hai sarvashaktivaan baap dvaara sarvashaktiyon ka khajaana।

to aaj baapdaada ek taraph to sneh ko dekh rahe hain, doosre taraph shakti sena ki shaktiyon ko dekh rahe hain। jitna sneh samaaya hua hai utna hi sarva shaktiyaan bhi samaai hui hain? baapdaada ne sabhi bachchon ko ek jaisi sarva shaktiyaan di hain, master sarvashaktivaan banaaya hai। kisko sarva shaktivaan, kisko shaktivaan nahin banaaya hai। aap sab bhi apna svamaan master sarvashaktivaan kehte ho। to baapdaada chaaron or ke bachchon se poochhte hain, ki har ek apne mein sarva shaktiyon ka anubhav karte hain? sada sarva shaktiyon par adhikaar hai? sarva shaktiyaan baapdaada ka varsa hai, to apne varse par adhikaar hai? hai adhikaar? teachers bolo, adhikaar hai? soch ke bolna। paandav adhikaar hai? sada hai ya kabhi-kabhi hai? jis samay jis shakti ki aavashyakta hai to aap shakti sena ke order se woh shakti haazir ho jaati hai? samay par ji hazoor haazir karti hai? socho, dekho, adhikaari order kare aur shakti ji hazoor haazir kahe, jis bhi shakti ka aahvaan karo, jaisa samay, jaisi paristhiti vaise shakti kaarya mein laga sako। aise adhikaari aatmaayen bane ho? kyonki baap ne varsa diya aur varse ko aapne apna banaaya, apna banaaya hai na! to apne par adhikaar hota hai। jis samay jis vidhi se aavashyakta ho, us samay kaarya mein lag jaae। maano samaane ke shakti ki aapko aavashyakta hai aur order karte ho samaane ki shakti ko, to aapka order maan ji haazir ho jaati hai? ho jaati hai to kaandh hilaao, haath hilaao। kabhi-kabhi hoti hai ya sada hoti hai? samaane ki shakti haazir hoti hai lekin 10 baari sama liya aur 11 ven baari thoda neeche oopar hota hai? sada aur sahaj haazir ho jaae, samay beetne ke baad nahin aave, karne to yeh chaahte the lekin ho gaya, yeh aisa nahin ho। isko kaha jaata hai sarva shaktiyon ke adhikaari। yeh adhikaar baapdaada ne to sabko diya hai, lekin dekhne mein aata hai ki sada adhikaari banne mein nambarvaar ho jaate hain। sada aur sahaj ho, natural ho, nature ho, uski vidhi hai, jaise baap ko hajoor bhi kaha jaata hai, kehte hain hazoor haazir hai। haazir hazoor kehte hain। to jo bachcha hazoor ki har shreemat par haazir hazoor kar chalta hai uske aage sarva shaktiyaan bhi hazoor haazir karti hain। har aagya mein ji haazir, har kadam mein ji haazir। agar har shreemat mein ji haazir nahin hai to har shakti bhi har samay haazir hazoor nahin kar sakti hai। agar kabhi-kabhi baap ki shreemat va aagya ka paalan karte hain, to shaktiyaan bhi aapka kabhi-kabhi haazir hone ka order paalan karti hain। us samay adhikaari ke bajaae adheen ban jaate hain। to baapdaada ne yeh result check ki, to kya dekha? nambarvaar hain। sabhi number one nahin hain, nambarvaar hain aur sada sahaj nahin hain। kabhi-kabhi sahaj ho jaate, kabhi thoda mushkil shakti emerge hoti hai।

baapdaada har ek bachche ko baap samaan dekhne chaahte hain। nambarvaar nahin dekhne chaahte hain aur aap sabhi ka lakshya bhi hai baap samaan banne ka। samaan banne ka lakshya hai va nambarvaar banne ka lakshya hai? agar poochhenge to sab kahenge samaan banna hai। to check karo - ek sarva shaktiyaan hain? sarva par underline karo। sarva gun hain? baap samaan sthiti hai? kabhi svayan ki sthiti, kabhi koi par-sthiti vijay to nahin praapta kar leti? par sthiti agar vijay praapta kar leti hai to uska kaaran jaante ho na? sthiti kamjor hai tab paristhiti vaar kar sakti hai। sada sva sthiti vijayi rahe, uska saadhan hai - sada svamaan aur sammaan ka balance। svamaandhaari aatma svatah hi sammaan dene vaala daata hai। vaastav mein kisi ko bhi sammaan dena, dena nahin hai, sammaan dena maan lena hai। sammaan dene vaala sabke dil mein maanneey svatah hi ban jaata hai। brahma baap ko dekha - aadi dev hote hue, drama ki first aatma hote hue sada bachchon ko sammaan diya। apne se bhi jyaada bachchon ka maan aatmaon dvaara dilaaya isliye har ek bachche ke dil mein brahma baap maanneey banen। to maan diya ya maan liya? sammaan dena arthaat doosre ke dil mein dil ke sneh ka beej bona। vishwa ke aage bhi vishwa kalyaankaari aatma hai, yeh tab anubhav karte jab aatmaon ko sneh se sammaan dete ho।

to baapdaada ne vartamaan samay mein aavashyakta dekhi sammaan ek do ko dene ki। sammaan dene vaala hi vidhaata aatma dikhaai deti hai। sammaan dene vaale hi baapdaada ki shreemat (shubh bhaavna, shubh kaamna) maanne vaale aagyaakaari bachche hain। sammaan dena hi eeshvareey parivaar ka dil ka pyaar hai। sammaan vaala svamaan mein sahaj hi sthit ho sakta hai। kyon? jin aatmaon ko sammaan deta hai un aatmaon dvaara jo duaayen dil ki milti hain, woh duaaon ka bhandaar svamaan sahaj aur svatah hi yaad dilaata hai isliye baapdaada chaaron or ke bachchon ko vishesh underline kara rahe hain - sammaan daata bano।

baapdaada ke paas jo bhi bachcha jaisa bhi aaya, kamjor aaya, sanskaar ke vash aaya, paapon ka bojh leke aaya, kade sanskaar lekar aaya, baapdaada ne har bachche ko kis nazar se dekha! mera sikeeldha laadla bachcha hai, eeshvareey parivaar ka bachcha hai। to sammaan diya aur aap svamaandhaari ban gaye। to follow father। agar sahaj sarva gun sampanna banna chaahte ho to sammaan daata bano। samjha! sahaj hai na? sahaj hai ya mushkil hai? teachers kya samajhti hain, sahaj hai? koi ko dena sahaj hai, koi ko mushkil hai ya sabhi ko dena sahaj hai? aapka title hai - sarva upkaari। apkaar karne vaale par bhi upkaar karne vaale। to check karo - sarva upkaari drishti, vritti, smriti rehti hai? doosre par upkaar karna, svayan par hi upkaar karna hai। to kya karna hai? sammaan dena hai na! alag-alag baaton mein dhaarna karne ke liye jo mehnat karte ho, usse chhoot jaayenge kyonki baapdaada dekh rahe hain, ki samay ki gati teevra ho rahi hai। samay intazaar kar raha hai, to aap sabhi ko intazaam karna hai। samay ka intajaar samaapta karna hai। kya intazaam karna hai? apne sampoornata aur samaanta ki gati teevra karni hai। kar rahe hain nahin, teevragti ko check karo - teevragti hai?

baaki sneh se naye-naye bachche bhi pahunche hain, baapdaada naye-naye bachchon ko dekh khush hote hain। jo pahle baari aaye hain woh haath uthaao। bahut hain। bhale padhaare baap ke ghar mein, apne ghar mein, mubaarak ho। achha।

seva ka tarna karnaatak ka hai:- karnaatak vaale utho। seva ke golden chance ki mubaarak ho। dekho pahla number liya hai to pahla number hi rehna hai na! purushaartha mein, vijayi banne mein sabmen pahla number lene vaale। doosra number nahin lena, pahla number। hai himmat! himmat hai? to himmat aapki aur hajaar guna madad baap ki। achha chance liya hai। apne punya ka khaata bahut-bahut jama kar liya। achha karnaatak ne mega programme kiya hai? nahin kiya hai, kyon? kyon nahin kiya? karnaatak ko sabmen pahla number lena chaahiye। (Bangalore mein karenge) achha, jinhonne bhi bada programme kiya hai woh utho। kitne programme ho gaye hain? (8-10 ho chuke hain) to baapdaada bade programme ki badi mubaarak de rahe hain। zone kitne hain! har ek zone ko bada programme karna chaahiye kyonki aapke shahar mein ulhana dene vaale ulhana nahin denge। bade programme mein aap advertise bhi badi karte ho na, chaahe media dvaara, chaahe poster, hoarding aadi bhinna-bhinna saadhan apnaate ho to ulhana kam ho jaayega। baapdaada ko yeh seva pasanda hai lekin… lekin hai। programme to bade kiye uski to mubaarak hai hi lekin har programme se kam se kam 108 ki maala to taiyaar honi chaahiye। woh kahaan hui hai? kam se kam 108, jyaada mein jyaada 16 hajaar। lekin itni jo energy lagaai, itna sampatti lagaai, uski result kam se kam 108 to taiyaar hon। sabki address to aapke paas rahni chaahiye। bade programme mein jo bhi laane vaale hain, unhon ke paas unka parichay to rehta hi hai to unhon ko phir se sameep laana chaahiye। aise nahin ki hamne kar liya, lekin jo bhi kaarya kiya jaata hai uska phal to nikalna chaahiye na। to har ek bade programme karne vaalon ko yeh result baapdaada ko deni hai। chaahe bhinna-bhinna centre par jaayen, kis shahar ka bhi ho vahaan jaae, lekin result nikalni chaahiye। theek hai na, ho to sakta hai na! thoda attention denge to nikal aayenge, 108 to kuchh bhi nahin hain। lekin result baapdaada dekhne chaahte hain, kam se kam student to banen। sahayog mein aage aaven, kaun-kaun kitne nikaalte hain, woh baapdaada is season mein result dekhne chaahte hain। theek hai na? paandav theek hai? to dekhenge number one kaun hai? kitne bhi nikaalo, nikaalo zaroor। kya hai, programme ho jaate hain lekin aage ka samparka woh thoda attention kam ho jaata hai aur nikaalna koi mushkil nahin hai। baaki baapdaada bachchon ki himmat dekh khush hai। samjha। achha।

achha - abhi sabhi ek second mein, ek second ek minute nahin, ek second mein “main pharishta so devta hoon'' - yeh mansa drill second mein anubhav karo। aisi drill din mein ek second mein baar-baar karo। jaise shaareerik drill shareer ko shaktishaali banaati, vaise yeh man ki drill man ko shaktishaali banaane vaali hai। main pharishta hoon, is puraani duniya, puraani deh, puraane deh ke sanskaar se nyaari pharishta aatma hoon। achha!

chaaron or ke ati snehi, sada sneh ke saagar mein lavleen aatmaon ko, sada sarva shaktiyon ke adhikaari shreshtha aatmaon ko, sada baap samaan banne vaale baap ke pyaare aatmaon ko, sada svamaan mein rahne vaali har aatma ko sammaan dene vaali, sarva ke maanneey banne vaali aatmaon ko, sada sarva upkaari aatmaon ko baapdaada ka dil ka yaadapyaar aur dil ki duaayen sveekaar ho। aur saath-saath vishwa ke maalik aatmaon ko namaste।

daadi ji se:- sammaan dene mein number one paas hain। achha hai, sab daadiyon se madhuban ki raunak hai। (sabha se) in sabhi ko daadiyon se raunak achhi lagti hai na। jaise daadiyon ki raunak se madhuban mein raunak ho jaati hai, aise aap sabhi daadi nahin, deediyaan aur daade to ho। to sabhi deediyaan aur sabhi daadaayen, sabhi ko yeh sochna hai, karna hai, jahaan bhi rehte ho us sthaan mein raunak ho। jaise daadiyon se raunak hai, vaise har sthaan mein raunak ho kyonki daadi ke peechhe deediyaan to ho na, kam nahin ho। daade bhi hain, deediyaan bhi hain। to kisi bhi centre par rookhaapan nahin hona chaahiye, raunak honi chaahiye। aap ek-ek vishwa mein raunak karne vaali aatmaayen ho। to jis bhi sthaan par ho woh raunak ka sthaan nazar aave। theek hai na? kyonki duniya mein had ki raunak hai aur aap ek ek se behad ki raunak hai। svayan khushi, shanti aur ateendriy sukh ki raunak mein honge to sthaan bhi raunak mein aa jaayega kyonki sthiti se sthaan mein vaayumandal phailta hai। to sabhi ko check karna hai ki jahaan ham rehte hain, vahaan raunak hai? udaasi to nahin hai? sab khushi mein naach rahe hain? aise hai na! aap daadiyon ka to yahi kaam hai na! follow deediyaan aur daadaayen। achha।

sabhi taraph se jo bhi snehi bachche baapdaada ko dil mein yaad kar rahe hain va patra, email dvaara yaad bheji hai, un chaaron or ke bachchon ko baapdaada door nahin dekh rahe hain lekin dil takhta par dekh rahe hain। sabse sameep dil hai। to baapdaada dil se yaad bhejne vaalon ko aur yaad bheji nahin lekin yaad mein hain, un sabko bhi dil takhta nasheen dekh rahe hain। respond de rahe hain। door baithe bhi number one teevra purushaarthi bhav।

vardaan:- albelepan ki neend ko talaak dene vaale nidraajeet, chakravarti bhav

saakshaatkaar moorta ban bhakton ko saakshaatkaar karaane ke liye athva chakravarti banne ke liye nidraajeet bano। jab vinaashkaal bhoolta hai tab albelepan ki neend aati hai। bhakton ki pukaar suno, dukhi aatmaon ke dukh ki pukaar suno, pyaasi aatmaon ke praarthana ki aavaaj suno to kabhi bhi albelepan ki neend nahin aayegi। to ab sada jaagti jyot ban albelepan ki neend ko talaak do aur saakshaatkaar moorta bano।

slogan:- tan-man-dhan, man-vaani-karma - kisi bhi prakaar se baap ke kartavya mein sahayogi bano to sahajyogi ban jaayenge।

avyakt ishaare - satyata aur sabhyata roopi culture ko apnaao

jaise baap ko “god is truth'' kehte hain, satyata hi baap ko priy hai। sachche dil par saaheb raazi hai। to dil takhtansheen serviceable bachchon ke sambandh-samparka mein, har sankalp aur bol mein sachchaai aur saphaai dikhaai degi। unka har sankalp, har vachan sat hoga।