बुधवार 26 मार्च 2025 की दैनिक मुरली

26-03-2025 praatahmurli om shanti "baapdaada"' madhuban

“meethe bachche - tumne baap ka haath pakda hai, tum grihastha vyavhaar mein rehte bhi baap ko yaad karte-karte tamopradhaan se satopradhaan ban jaayenge''

prashn:- tum bachchon ke andar mein kaun sa ullaas rehna chaahiye? takhtansheen banne ki vidhi kya hai?

uttar:- sada ullaas rahe ki gyaan saagar baap humein roz gyaan ratnon ki thaaliyaan bhar-bhar kar dete hain। jitna yog mein rahenge utna buddhi kanchan hoti jaayegi। yeh avinaashi gyaan ratna hi saath mein jaate hain। takhtansheen banna hai to maat-pita ko poora-poora follow karo। unki shreemat anusaar chalo, auron ko bhi aap samaan banaao।

om shanti। roohaani bachche is samay kahaan baithe hain? kahenge roohaani baap ki university athva paathshaala mein baithe hain। buddhi mein hai ki ham roohaani baap ke aage baithe hain, woh baap hamko srishti ke aadi-madhya-ant ka raaz samjhaate hain athva bhaarat ka rise aur fall kaise hota hai, yeh bhi bataate hain। bhaarat jo paavan tha woh ab patit hai। bhaarat sirtaaj tha phir kisne jeet paai hai? raavan ne। raajaai ganva di to fall hua na। koi raaja to hai nahin। agar hoga bhi to patit hi hoga। is hi bhaarat mein sooryavanshi mahaaraaja-mahaaraani the। sooryavanshi mahaaraajaayen aur chandravanshi raajaayen the। yeh baaten ab tumhaari buddhi mein hain, duniya mein yeh baaten koi nahin jaante। tum bachche jaante ho hamaara roohaani baap hamko padha rahe hain। roohaani baap ka hamne haath pakda hai। bhal ham rehte grihastha vyavhaar mein hain parantu buddhi mein hai ki abhi ham sangamayug par khade hain। patit duniya se ham paavan duniya mein jaate hain। kaliyug hai patit yug, satayug hai paavan yug। patit manushya paavan manushyon ke aage jaakar namaste karte hain। hain to woh bhi bhaarat ke manushya। parantu woh daiveegun vaale hain। abhi tum bachche jaante ho ham bhi baap dvaara aise daiveegun dhaaran kar rahe hain। satayug mein yeh purooshaartha nahin karenge। vahaan to hai praalabdha। yahaan purooshaartha kar daiveegun dhaaran karne hain। sadaiv apni jaanch rakhni hai - ham baba ko kahaan tak yaad kar tamopradhaan se satopradhaan ban rahe hain? jitna baap ko yaad karenge utna satopradhaan banenge। baap to sadaiv satopradhaan hai। abhi bhi patit duniya, patit bhaarat hai। paavan duniya mein paavan bhaarat tha। tumhaare paas pradarshani aadi mein bhinna-bhinna prakaar ke manushya aate hain। koi kehte hain jaise bhojan zaroori hai vaise yeh vikaar bhi bhojan hai, inke bina mar jaayenge। ab aisi baat to hai nahin। sannyaasi pavitra bante hain phir mar jaate hain kya! aise-aise bolne vaale ke liye samjha jaata hai koi bahut ajaamil jaise paapi honge, jo aise-aise kehte hain। bolna chaahiye kya is bigar tum mar jaayenge jo bhojan se inki bhent karte ho! svarga mein aane vaale jo honge woh honge satopradhaan। phir peechhe sato, rajo, tamo mein aate hain na। jo peechhe aate hain un aatmaon ne nirvikaari duniya to dekhi hi nahin hai। to woh aatmaayen aise-aise kahengi ki in bigar ham rah nahin sakte। sooryavanshi jo honge unko to phauran buddhi mein aayega - yeh to satya baat hai। barobar svarga mein vikaar ka naam-nishaan nahin tha। bhinna-bhinna prakaar ke manushya, bhinna-bhinna prakaar ki baaten karte hain। tum samajhte ho kaun-kaun phool banne vaale hain? koi to kaante hi rah jaate hain। svarga ka naam hai phoolon ka bageecha। yeh hai kaanton ka jangal। kaante bhi anek prakaar ke hote hain na। abhi tum jaante ho ham phool ban rahe hain। barobar yeh lakshmi-naaraayan sada gulaab ke phool hain। inko kahenge king oph flowers। daivi flowers ka raajya hai na। zaroor unhonne bhi purooshaartha kiya hoga। padhaai se bane hain na।

tum jaante ho abhi ham eeshvareey family ke bane hain। pahle to eeshvar ko jaante hi nahin the। baap ne aakar ke yeh family banaai hai। baap pahle stri ko adopt karte hain phir un dvaara bachchon ko rachte hain। baba ne bhi inko adopt kiya phir in dvaara bachchon ko racha hai। yeh sab brahmaakumaar-kumaariyaan hain na। yeh naata pravritti maarga ka ho jaata hai। sannyaasiyon ka hai nivritti maarga। usmein koi mama-baba nahin kehte। yahaan tum mama-baba kehte ho। aur jo bhi satsang hain woh sab nivritti maarga ke hain, yeh ek hi baap hai jisko maat-pita kah pukaarte hain। baap baith samjhaate hain, bhaarat mein pavitra pravritti maarga tha, ab apvitra ho gaya hai। main phir se vahi pravritti maarga sthaapan karta hoon। tum jaante ho hamaara dharma bahut sukh dene vaala hai। phir ham aur puraane dharma vaalon ka sang kyon karen! tum svarga mein kitne sukhi rehte ho। heere-javaahraaton ke mahal hote hain। yahaan bhal America Russia aadi mein kitne saahookaar hain parantu svarga jaise sukh ho na sake। sone ki eeton jaise mahal to koi bana na sake। sone ke mahal hote hi hain satayug mein। yahaan sona hai hi kahaan। vahaan to har jagah heere-javaahraat lage hue honge। yahaan to heeron ka bhi kitna daam ho gaya hai। yeh sab mitti mein mil jaayenge। baba ne samjhaaya hai nai duniya mein phir sab nayi khaaniyaan bhartu ho jaayengi। abhi yeh sab khaali hoti rahengi। dikhaate hain saagar ne heere-javaahraaton ki thaaliyaan bhent ki। heere-javaahraat to vahaan tumko dher milenge। saagar ko bhi devta roop samajhte hain। tum samajhte ho baap to gyaan ka saagar hai। sada ullaas rahe ki gyaan saagar baap humein roz gyaan ratnon, javaahraaton ki thaaliyaan bharkar dete hain। baaki woh to paani ka saagar hai। baap tum bachchon ko gyaan ratna dete hain, jo tum buddhi mein bharte ho। jitna yog mein rahenge utna buddhi kanchan hoti jaayegi। yeh avinaashi gyaan ratna hi tum saath le jaate ho। baap ki yaad aur yeh knowledge hai mukhya।

tum bachchon ko andar mein bada ullaas rehna chaahiye। baap bhi gupta hai, tum bhi gupta sena ho। non violence, an-known warriors kehte hain na, phalaana bahut pahalvaan warriors hai। parantu naam-nishaan ka pata nahin hai। aise to ho nahin sakta। government ke paas ek-ek ka naam nishaan poora hota hai। unknown warriors, nonviolence yeh tumhaara naam hai। sabse pahli-pahli hinsa hai yeh vikaar, jo hi aadi-madhya-ant duhkh dete hain isliye to kehte hain - he patit-paavan, ham patiton ko aakar paavan banaao। paavan duniya mein ek bhi patit nahin ho sakta। yeh tum bachche jaante ho, abhi hi ham bhagwan ke bachche bane hain, baap se varsa lene, parantu maaya bhi kam nahin hai। maaya ka ek hi thappad aisa lagta hai jo ekdam gutter mein gira deti hai। vikaar mein jo girte hain to buddhi ekdam chat ho jaati hai। baap kitna samjhaate hain - aapas mein dehdhaari se kabhi preet nahin rakho। tumko preet rakhni hai ek baap se। koi bhi dehdhaari se pyaar nahin rakhna hai, muhabbat nahin rakhni hai। muhabbat rakhni hai unse jo deh rahit vichitra baap hai। baap kitna samjhaate rehte hain phir bhi samajhte nahin। takdeer mein nahin hai to ek-do ki deh mein phans padte hain। baba kitna samjhaate hain - tum bhi roop ho। aatma aur paramatma ka roop to ek hi hai। aatma chhoti-badi nahin hoti। aatma avinaashi hai। har ek ka drama mein part noondha hua hai। abhi kitne dher manushya hain, phir 9-10 laakh honge। satayug aadi mein kitna chhota jhaad hota hai। pralay to kabhi hoti nahin। tum jaante ho jo bhi manushya maatra hain un sabki aatmaayen mool-vatan mein rehti hain। unka bhi jhaad hai। beej daala jaata hai, unse saara jhaad nikalta hai na। pahle-pahle do patte nikalte hain। yeh bhi behad ka jhaad hai, gole par samjhaana kitna sahaj hai, vichaar karo। abhi hai kaliyug। satayug mein ek hi dharma tha। to kitne thode manushya honge। abhi kitne manushya, kitne dharma hain। itne sab jo pahle nahin the woh phir kahaan jaayenge? sabhi aatmaayen paramdham mein chali jaati hain। tumhaari buddhi mein saara gyaan hai। jaise baap gyaan ka saagar hai vaise tumko bhi banaate hain। tum padhkar yeh pad paate ho। baap svarga ka rachayita hai to svarga ka varsa bhaaratvaasiyon ko hi dete hain। baaki sabko vaapas ghar le jaate hain। baap kehte hain main aaya hoon tum bachchon ko padhaane। jitna purooshaartha karenge utna pad paayenge। jitna shreemat par chalenge utna shreshtha banenge। saara madaar purooshaartha par hai। mama-baba ke takhtansheen banna hai to poora-poora follow father mother। takhtansheen banne ke liye unki chalan anusaar chalo। auron ko bhi aapasmaan banaao। baba anek prakaar ki yuktiyaan batlaate hain। ek badge par hi tum kisko bhi achhi reeti baith samjhaao। purooshottam maas hota hai to baba kah dete chitra free de do। baba saugaat dete hain। paise haath mein aa jaayenge to zaroor samjhenge, baba ka bhi kharcha hota hai na to phir jaldi bhej denge। ghar to ek hi hai na। in translight ke chitron ki pradarshani banengi to kitne dekhne aayenge। punya ka kaam hua na। manushya ko kaante se phool, paap aatma se punya aatma banaate hain, isko vihang maarga kaha jaata hai। pradarshani mein stall lene se aate bahut hain। kharcha kam hota hai। tum yahaan aate ho baap se svarga ki raajaai khareed karne। to pradarshani mein bhi aayenge, svarga ki raajaai khareed karne। yeh hatti hai na।

baap kehte hain is gyaan se tumko bahut sukh milega, isliye achhi reeti padhkar, purooshaartha karke full paas hona chaahiye। baap hi baith apna aur rachna ke aadi-madhya-ant ka parichay dete hain, aur koi de na sake। ab baap dvaara tum trikaaldarshi bante ho। baap kehte hain main jo hoon, jaisa hoon, mujhe yathaartha reeti koi nahin jaante। tumhaare mein bhi nambarvaar hain। agar yathaartha reeti jaante to kabhi chhodte nahin। yeh hai padhaai। bhagwan baith padhaate hain। kehte hain main tumhaara obedient servant hoon। baap aur teacher donon obedient servant hote hain। drama mein hamaara part hi aisa hai phir sabko saath le jaaoonga। shreemat par chal paas with honour hona chaahiye। padhaai to bahut sahaj hai। sabse boodha to yeh padhaane vaala hai। shivbaaba kehte hain main boodha nahin। aatma kabhi boodhi nahin hoti। baaki patthar buddhi banti hai। meri to hai hi paarasbuddhi, tab to tumko paarasbuddhi banaane aata hoon। kalpa-kalpa aata hoon। anginat baar tumko padhaata hoon phir bhi bhool jaayenge। satayug mein is gyaan ki darkaar hi nahin rehti। kitna achhi reeti baap samjhaate hain। aise baap ko phir phaarakti de dete hain isliye kaha jaata hai mahaan moorkha dekhna ho to yahaan dekho। aisa baap jisse svarga ka varsa milta hai, unko bhi chhod dete hain। baap kehte hain tum meri mat par chalenge to amarlok mein vishwa ke mahaaraaja-mahaaraani banenge। yeh hai mrityulok। bachche jaante hain ham so poojya devi-devta the। abhi ham kya ban gaye hain? patit bhikhaari। ab phir ham so prince banne vaale hain। sabka ekras purooshaartha to ho na sake। koi toot padte hain, koi traitor ban padte hain। aise traitors bhi bahut hain unse baat bhi nahin karni chaahiye। sivaae gyaan ki baaton ke aur kuchh poochhen to samjho shaitaani hai। sang taare kusang bore। jo gyaan mein hoshiyaar baba ke dil par chadhe hue hain, unka sang karo। woh tumko gyaan ki meethi-meethi baaten sunaayenge। achha।

meethe-meethe sikeeldhe serviceable, vaphaadaar, pharmaanbardaar bachchon ko maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) jo deh rahit vichitra hai, us baap se muhabbat rakhni hai। kisi dehdhaari ke naam-roop mein buddhi nahin phansaani hai। maaya ka thappad na lage, yeh sambhaal karni hai।

2) jo gyaan ki baaton ke sivaae doosra kuchh bhi sunaae uska sang nahin karna hai। full paas hone ka purooshaartha karna hai। kaanton ko phool banaane ki seva karni hai।

vardaan:- “ek baap doosra na koi'' is smriti se bandhanmukta, yogayukta bhav

ab ghar jaane ka samay hai isliye bandhanmukta aur yogayukta bano। bandhanmukta arthaat loose dress, tight nahin। order mila aur second mein gaya। aise bandhanmukta, yogayukta sthiti ka vardaan praapta karne ke liye sada yeh vaayda smriti mein rahe ki “ek baap doosra na koi।'' kyonki ghar jaane ke liye va satayugi raajya mein aane ke liye is puraane shareer ko chhodna padega। to check karo aise ever ready bane hain ya abhi tak kuchh rassiyaan bandhi hui hai? yeh puraana chola tight to nahin hai?

slogan:- vyartha sankalp roopi extra bhojan nahin karo to motepan ki beemaariyon se bach jaayenge।

avyakt ishaare - satyata aur sabhyata roopi culture ko apnaao

baap ko sabse badhiya cheez lagti hai - sachchaai, isliye bhakti mein bhi kehte hain god is truth। sabse pyaari cheez sachchaai hai kyonki jismen sachchaai hoti hai usmein saphaai rehti hai, woh clean aur clear rehta hai। to sachchaai ki visheshta kabhi nahin chhodna। satyata ki shakti ek lift ka kaam karti hai।