शनिवार 29 मार्च 2025 की दैनिक मुरली

29-03-2025 praatahmurli om shanti "baapdaada"' madhuban

“meethe bachche - tumhein gyaan se achhi jaagriti aai hai, tum apne 84 janmon ko, niraakaar aur saakaar baap ko jaante ho, tumhaara bhatakna band hua''

prashn:- eeshvar ki gat mat nyaari kyon gaai hui hai?

uttar:- 1. kyonki woh aisi mat dete hain jisse tum brahman sabse nyaare ban jaate ho। tum sabki ek mat ho jaati hai, 2. eeshvar hi hai jo sabki sadgati karte hain। pujaari se poojya banaate hain isliye unki gat mat nyaari hai, jise tum bachchon ke sivaae koi samajh nahin sakta।

om shanti। tum bachche jaante ho, bachchon ki agar tabiyat theek nahin hogi to baap kahenge bhal yahaan so jaao। ismen koi harja nahin kyonki sikeeldhe bachche hain arthaat 5 hazaar varsha baad phir se aakar mile hain। kisko mile hain? behad ke baap ko। yeh bhi tum bachche jaante ho, jinko nishchay hai barobar ham behad ke baap se mile hain kyonki baap hota hi hai ek had ka aur doosra behad ka। duhkh mein sab behad ke baap ko yaad karte hain। satayug mein ek hi laukik baap ko yaad karte hain kyonki vahaan hai hi sukhdhaam। laukik baap usko kaha jaata hai jo is lok mein janma deta hai। paarlaukik baap to ek hi baar aakar tumko apna banaate hain। tum rahne vaale bhi baap ke saath amarlok mein ho - jisko parlok, paramdham kaha jaata hai। woh hai pare te pare dhaam। svarga ko pare te pare nahin kahenge। svarga narka yahaan hi hota hai। nai duniya ko svarga, puraani duniya ko narka kaha jaata hai। abhi hai patit duniya, pukaarte bhi hain - he patit-paavan aao। satayug mein aise nahin kahenge। jab se raavan raajya hota hai tab patit bante hain, unko kahenge 5 vikaaron ka raajya। satayug mein hai hi nirvikaari raajya। bhaarat ki kitni jabardasta mahima hai। parantu vikaari hone ke kaaran bhaarat ki mahima ko jaante nahin। bhaarat sampoorn nirvikaari tha, jab yeh lakshmi-naaraayan raajya karte the। abhi woh raajya nahin hai। woh raajya kahaan gaya - yeh patthar buddhiyon ko maaloom nahin। aur sabhi apne-apne dharma sthaapak ko jaante hain, ek hi bhaaratvaasi hain jo na apne dharma ko jaante, na dharma sthaapak ko jaante hain। aur dharma vaale apne dharma ko to jaante hain parantu woh phir kab sthaapan karne aayenge, yeh nahin jaante। sikkha logon ko bhi yeh pata nahin hai ki hamaara sikkha dharma pahle tha nahin। gurunaanak ne aakar sthaapan kiya to zaroor phir sukhdhaam mein nahin rahega, tab hi gurunaanak aakar phir sthaapan karenge kyonki world ki history-geography repeat hoti hai na। Christian dharma bhi nahin tha phir sthaapna hui। pahle nai duniya thi, ek dharma tha। sirf tum bhaaratvaasi hi the, ek dharma tha phir tum 84 janma lete-lete yeh bhi bhool gaye ho ki ham hi devta the। phir ham hi 84 janma lete hain tab baap kehte hain tum apne janmon ko nahin jaante ho, main batlaata hoon। aadhaakalpa raamraajya tha phir raavan raajya hua hai। pahle hai sooryavanshi gharaana phir chandravanshi gharaana raamraajya। soorya-vanshi lakshmi-naaraayan ke gharaane ka raajya tha jo sooryavanshi lakshmi-naaraayan ke gharaane ke the, so 84 janma le abhi raavan ke gharaane ke bane hain। aage punya aatmaon ke gharaane ke the, abhi paap aatmaon ke gharaane ke bane hain। 84 janma liye hain, ve to 84 laakh kah dete। ab 84 laakh ka kaun baith vichaar karenge isliye koi ka vichaar chalta hi nahin। abhi tumko baap ne samjhaaya hai, tum baap ke aage baithe ho, niraakaar baap aur saakaar baap donon hi bhaarat mein naameegraami hain। gaate bhi hain parantu baap ko jaante nahin hain, agyaan neend mein soye pade hain। gyaan se jaagriti hoti hai। roshni mein manushya kabhi dhakka nahin khaate। andhiyaare mein dhakke khaate rehte। bhaaratvaasi poojya the, ab pujaari hain। lakshmi-naaraayan poojya the na, yeh kiski pooja karenge। apna chitra banaae apni pooja to nahin karenge। yeh ho nahin sakta। tum bachche jaante ho - ham hi poojya, so phir kaise pujaari bante hain। yeh baaten aur koi samajh nahin sakte। baap hi samjhaate hain isliye kehte bhi hain eeshvar ki gat mat nyaari hai।

abhi tum bachche jaante ho baba ne hamaari saari duniya se gat mat nyaari kar di hai। saari duniya mein anek mat-mataantar hain, yahaan tum braahmanon ki hai ek mat। eeshvar ki mat aur gat। gat arthaat sadgati। sadgati daata ek hi baap hai। gaate bhi hain sarva ka sadgati daata raam। parantu samajhte nahin ki raam kisko kaha jaata hai। kahenge jidhar dekho raam hi raam rehta hai, isko kaha jaata hai agyaan andhiyaara। andhiyaare mein hai duhkh, sojhre mein hai sukh। andhiyaare mein hi pukaarte hain na। bandagi karna maana baap ko bulaana, bheekh maangate hain na। devtaaon ke mandir mein jaakar bheekh maangana hua na। satayug mein bheekh maangane ki darkaar nahin। bhikhaari ko insolvent kaha jaata hai। satayug mein tum kitne solvent the, usko kaha jaata hai solvent। bhaarat abhi insolvent hai। yeh bhi koi samajhte nahin। kalpa ki aayu ulti-sulti likh dene se manushyon ka maatha hi phir gaya hai। baap bahut pyaar se baith samjhaate hain। kalpa pahle bhi bachchon ko samjhaaya tha, mujh patit-paavan baap ko yaad karo to tum paavan ban jaayenge। patit kaise bane ho, vikaaron ki khaad padi hai। sab manushya junk khaaye hue hain। ab woh junk kaise nikle? mujhe yaad karo। deh-abhimaan chhod dehi-abhimaani bano। apne ko aatma samjho। pahle tum ho aatma phir shareer lete ho। aatma to amar hai, shareer mrityu ko paata hai। satayug ko kaha jaata hai amarlok। kaliyug ko kaha jaata hai mrityulok। duniya mein yeh koi bhi nahin jaante ki amarlok tha phir mrityulok kaise bana। amarlok arthaat akaale mrityu nahin hoti। vahaan aayu bhi badi rehti hai। woh hai hi pavitra duniya।

tum raajarishi ho। rishi pavitra ko kaha jaata hai। tumko pavitra kisne banaaya? unko banaate hain shankaraachaarya, tumko bana rahe hain shivaachaarya। yeh koi padha hua nahin hai। in dvaara tumko shivbaaba aakar padhaate hain। shankaraachaarya ne to garbha se janma liya, koi oopar se avatrit nahin hua। baap to inmen pravesh karte hain, aate hain, jaate hain, maalik hain, jismen chaahe unmein ja sakte hain। baba ne samjhaaya hai koi ka kalyaan karne arth main pravesh kar leta hoon। aata to patit tan mein hi hoon na। bahuton ka kalyaan karta hoon। bachchon ko samjhaaya hai - maaya bhi kam nahin hai। kabhi-kabhi dhyaan mein maaya pravesh kar ulta-sulta bulvaati rehti hai isliye bachchon ko bahut sambhaal karni hai। kaiyon mein jab maaya pravesh kar leti hai to kehte hain main shiv hoon, phalaana hoon। maaya badi shaitaan hai। samajhdaar bachche achhi reeti samajh jaayenge ki yeh kiska pravesh hai। shareer to unka mukrar yeh hai na। phir doosre ka ham sunen hi kyon! agar sunte ho to baba se poochho yeh baat right hai va nahin? baap jhat samjha denge। kai braahmaniyaan bhi in baaton ko samajh nahin sakti ki yeh kya hai। koi mein to aisi praveshta hoti hai jo chamaat bhi maar dete, gaaliyaan bhi dene lag padte। ab baap thode hi gaali denge। in baaton ko bhi kai bachche samajh nahin sakte। first class bachche bhi kahaan-kahaan bhool jaate hain। sab baaten poochhni chaahiye kyonki bahuton mein maaya pravesh kar leti hai। phir dhyaan mein jaakar kya-kya bolte rehte hain। ismen bhi bada sambhaalna chaahiye। baap ko poora samaachaar dena chaahiye। phalaane mein mama aati hai, phalaane mein baba aate hain - in sab baaton ko chhod baap ka ek hi farmaan hai ki maamekam yaad karo। baap ko aur srishti chakra ko yaad karo। rachayita aur rachna ka simran karne vaale ki shakla sadaiv harshit rahegi। bahut hain jinka simran hota nahin hai। karma-bandhan bada bhaari hai। vivek kehta hai - jabki behad ka baap mila hai, kehte hain mujhe yaad karo to phir kyon na ham yaad karen। kuchh bhi hota hai to baap se poochho। baap samjhaayenge karmabhog to abhi raha hua hai na। karmaateet avastha ho jaayegi to phir tum sadaiv harshit rahenge। tab tak kuchh na kuchh hota hai। yeh bhi jaante ho mirooa maut malooka shikaar। vinaash hona hai। tum pharishte bante ho। baaki thode din is duniya mein ho phir tum bachchon ko yeh sthoolavtan bhaasega nahin। sookshm vatan aur mool vatan bhaasega। sookshmavtanvaasiyon ko kaha jaata hai pharishte। woh bahut thoda samay bante ho jabki tum karmaateet avastha ko paate ho। sookshm vatan mein haddi maans hota nahin। haddi maans nahin to baaki kya raha? sirf sookshm shareer hota hai! aise nahin ki niraakaar ban jaate hain। nahin, sookshm aakaar rehta hai। vahaan ki bhaasha movie chalti hai। aatma aavaaz se pare hai। usko kaha jaata hai subtle world। sookshm aavaaz hota hai। yahaan hai talkie। phir movie phir hai silence। yahaan talk chalti hai। yeh drama ka bana banaaya part hai। vahaan hai silence। woh movie aur yeh hai talkie। in teen lokon ko bhi yaad karne vaale koi virle honge। baap samjhaate hain - bachche, sajaaon se chhootne ke liye kam se kam 8 ghanta karmayogi ban karma karo, 8 ghanta aaraam karo aur 8 ghanta baap ko yaad karo। isi practice se tum paavan ban jaayenge। neend karte ho, woh koi baap ki yaad nahin hai। aise bhi koi na samjhe ki baba ke to ham bachche hain na phir yaad kya karen। nahin, baap to kehte hain mujhe vahaan yaad karo। apne ko aatma samajh mujhe yaad karo। jab tak yogbal se tum pavitra na bano tab tak ghar mein bhi tum ja nahin sakte। nahin to phir sajaayen khaakar jaana hoga। sookshm vatan mool vatan mein bhi jaana hai phir aana hai svarga mein। baba ne samjhaaya hai aage chal akhbaaron mein bhi padega, abhi to bahut time hai। itni saari raajdhaani sthaapan hoti hai। south, north, east, vesta bhaarat ka kitna hai। ab akhbaaron dvaara hi aavaaz niklega। baap kehte hain mujhe yaad karo to tumhaare paap kat jaayenge। bulaate bhi hain - he patit-paavan, liberator hamko duhkh se chhudaao। bachche jaante hain drama plan anusaar vinaash bhi hona hai। is ladaai ke baad phir shanti hi shanti hogi, sukhdhaam ho jaayega। saari uthal paathal ho jaayegi। satayug mein hota hi hai ek dharma। kaliyug mein hain anek dharma। yeh to koi bhi samajh sakte hain। sabse pahle aadi sanaatan devi-devta dharma tha, jab sooryavanshi the to chandravanshi nahin the phir chandravanshi hote hain। peechhe yeh devi-devta dharma praayahlop ho jaata hai। peechhe phir aur dharma vaale aate hain। woh bhi jab tak unhon ki sanstha vriddhi ko paaye tab tak maaloom thode hi padta hai। abhi tum bachche srishti ke aadi-madhya-ant ko jaante ho। tumse poochhenge seedhi mein sirf bhaaratvaasiyon ko kyon dikhaaya hai? bolo, yeh khel hai bhaarat par। aadhaakalpa hai unhon ka part, baaki dvaapar, kaliyug mein anya sab dharma aate hain। gole mein yeh saari knowledge hai। gola to bada first class hai। satayug-treta mein hai shreshthaachaari duniya। dvaapar-kaliyug hai bhrashtaachaari duniya। abhi tum sangam par ho। yeh gyaan ki baaten hain। yeh 4 yugon ka chakra kaise phirta hai - yeh kisko pata nahin hai। satayug mein in lakshmi-naaraayan ka raajya hota hai। inhon ko bhi yeh thode hi pata rehta ki satayug ke baad phir treta hona hai, treta ke baad phir dvaapar kaliyug aana hai। yahaan bhi manushyon ko bilkul pata nahin। bhal kehte hain parantu kaise chakra phirta hai, yeh koi nahin jaante isliye baba ne samjhaaya hai - saara geeta par jor rakho। sachchi geeta sunne se svargavaasi bante hain। yahaan shivbaaba khud sunaate hain, vahaan manushya padhte hain। geeta bhi sabse pahle tum padhte ho। bhakti mein bhi pahle-pahle to tum jaate ho na। shiv ke pujaari pahle tum bante ho। tumko pahle-pahle pooja karni hoti hai avyabhichaari, ek shivbaaba ki। somnaath mandir aur kiski taakat thode hi hai banaane ki। board par kitne prakaar ki baaten likh sakte hain। yeh bhi likh sakte hain bhaaratvaasi sachchi geeta sunne se sachkhanda ke maalik bante hain।

abhi tum bachche jaante ho ham sachchi geeta sunkar svargavaasi ban rahe hain। jis samay tum samjhaate ho to kehte hain - haan, barobar theek hai, baahar gaye khalaas। vahaan ki vahaan rahi। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) rachayita aur rachna ka gyaan simran kar sada harshit rehna hai। yaad ki yaatra se apne puraane sab karmabandhan kaat karmaateet avastha banaani hai।

2) dhyaan deedaar mein maaya ki bahut praveshta hoti hai, isliye sambhaal karni hai, baap ko samaachaar de raay leni hai, koi bhi bhool nahin karni hai।

vardaan:- apni shubh bhaavna dvaara nirbal aatmaon mein bal bharne vaale sada shakti swaroop bhav

sevaadhaari bachchon ki vishesh seva hai - svayan shakti swaroop rehna aur sarva ko shakti swaroop banaana arthaat nirbal aatmaon mein bal bharna, iske liye sada shubh bhaavna aur shreshtha kaamna swaroop bano। shubh bhaavna ka arth yeh nahin ki kisi mein bhaavna rakhte-rakhte uske bhaavvaan ho jaao। yeh galti nahin karna। shubh bhaavna bhi behad ki ho। ek ke prati vishesh bhaavna bhi nuksaankaarak hai isliye behad mein sthit ho nirbal aatmaon ko apni praapta hui shaktiyon ke aadhaar se shakti swaroop banaao।

slogan:- alankaar brahman jeevan ka shrringaar hain - isliye alankaari bano deh ahankaari nahin।

avyakt ishaare - satyata aur sabhyata roopi culture ko apnaao

kai bachche kehte hain vaise krodh nahin aata hai, lekin koi jhooth bolta hai to krodh aa jaata hai। usne jhooth bola, aapne krodh se bola to donon mein right kaun? kai chaturaai se kehte hain ki ham krodh nahin karte hain, hamaara aavaaj hi bada hai, aavaaj hi aisa tej hai lekin jab science ke saadhnon se aavaaj ko kam aur jyaada kar sakte hain to kya silence ki power se apne aavaaj ki gati ko dheemi ya tej nahin kar sakte ho?