बुधवार 23 अप्रैल 2025 की दैनिक मुरली

23-04-2025 praatahmurli om shanti "baapdaada"' madhuban

“meethe bachche - ab naatak poora hota hai, vaapis ghar jaana hai, kaliyug ant ke baad phir satayug repeat hoga, yeh raaz sabhi ko samjhaao''

prashn:- aatma part bajaate-bajaate thak gai hai, thakaavat ka mukhya kaaran kya hai?

uttar:- bahut bhakti ki, anek mandir banaaye, paisa kharcha kiya, dhakke khaate-khaate satopradhaan aatma tamopradhaan ban gai। tamopradhaan hone ke kaaran hi duhkhi hui। jab kisi baat se koi tang hota hai tab thakaavat hoti hai। abhi baap aaye hain sab thakaavat mitaane।

om shanti। roohaani baap baith bachchon ko samjhaate hain, unka naam kya hai? shiv। yahaan jo baithe hain to bachchon ko achhi reeti yaad rehna chaahiye। is drama mein jo sabka part hai, woh ab poora hota hai। naatak jab poora hone par hota hai to sabhi actors samajhte hain ki hamaara part ab poora hota hai। ab jaana hai ghar। tum bachchon ko bhi baap ne abhi samajh di hai, yeh samajh aur koi mein nahin hai। abhi tumhein baap ne samajhdaar banaaya hai। bachche, ab naatak poora hota hai, ab phir nayesir chakra shuru hona hai। nai duniya mein satayug tha। abhi puraani duniya mein yeh kaliyug ka ant hai। yeh baaten tum hi jaante ho, jinko baap mila hai। naye jo aate hain to unko bhi yeh samjhaana hai - ab naatak poora hota hai, kaliyug ant ke baad phir satayug repeat hona hai। itne sab jo hain unko vaapis jaana hai apne ghar। ab naatak poora hota hai, isse manushya samajh lete hain ki pralay hoti hai। abhi tum jaante ho puraani duniya ka vinaash kaise hota hai। bhaarat to avinaashi khanda hai, baap bhi yahaan hi aate hain। baaki aur sab khanda khalaas ho jaayenge। yeh khyaalaat aur koi ki buddhi mein aa nahin sakte। baap tum bachchon ko samjhaate hain, ab naatak poora hota hai phir repeat karna hai। aage naatak ka naam bhi tumhaari buddhi mein nahin tha। kahne maatra kehte the, yeh srishti naatak hai, jismen ham actors hain। aage jab ham kehte the to shareer ko samajhte the। ab baap kehte hain apne ko aatma samjho aur baap ko yaad karo। ab hamko vaapis ghar jaana hai, woh hai sweet hom। us niraakaari duniya mein ham aatmaayen rehti hain। yeh gyaan koi bhi manushya maatra mein nahin hai। abhi tum sangam par ho। jaante ho abhi hamko vaapis jaana hai। puraani duniya khatma ho to bhakti bhi khatma ho। pahle-pahle kaun aate hain, kaise yeh dharma nambarvaar aate hain, yeh baaten koi shaastron mein nahin hain। yeh baap nai baaten samjhaate hain। yeh aur koi samjha na sake। baap bhi ek hi baar aakar samjhaate hain। gyaan saagar baap aate hi ek baar hain jabki nai duniya ki sthaapna, puraani duniya ka vinaash karna hai। baap ki yaad ke saath yeh chakra bhi buddhi mein rehna chaahiye। ab naatak poora hota hai, ham jaate hain ghar। part bajaate-bajaate ham thak gaye hain। paisa bhi kharcha kiya, bhakti karte-karte ham satopradhaan se tamopradhaan ban gaye hain। duniya hi puraani ho gai hai। naatak puraana kahenge? nahin। naatak to kabhi puraana hota nahin। naatak to nitya naya hai। yeh chalta hi rehta hai। baaki duniya puraani hoti hai, ham actors tamopradhaan duhkhi ho jaate hain, thak jaate hain। satayug mein thode hi thakenge। koi baat mein thakne va tang hone ki baat nahin। yahaan to anek prakaar ki tangi dekhni padti hai। tum jaante ho yeh puraani duniya khatma honi hai। sambandhi aadi kuchh bhi yaad nahin aana chaahiye। ek baap ko hi yaad karna chaahiye, jisse vikarma vinaash hote hain, vikarma vinaash hone ka aur koi upaay nahin hai। geeta mein bhi manamnaabhav akshar hai। parantu arth koi samajh na sake। baap kehte hain - mujhe yaad karo aur varse ko yaad karo। tum vishwa ke vaaris arthaat maalik the। abhi tum vishwa ke vaaris ban rahe ho। to kitni khushi honi chaahiye। abhi tum kaudi se heere misal ban rahe ho। yahaan tum aaye hi ho baap se varsa lene।

tum jaante ho jab kalaayen kam hoti hain tab phoolon ka bageecha murjha jaata hai। abhi tum bante ho garden oph flower। satayug garden hai to kaisa sundar hai phir dheere-dheere kala kam hoti jaati hai। do kala kam hui, garden murjha gaya। abhi to kaanton ka jangal ho gaya hai। abhi tum jaante ho duniya ko kuchh bhi pata nahin hai। yeh knowledge tumko mil rahi hai। yeh hai nai duniya ke liye nai knowledge। nai duniya sthaapan hoti hai। karne vaala hai baap। srishti ka rachayita baap hai। yaad bhi baap ko hi karte hain ki aakar heaven racho। sukhdhaam racho to zaroor duhkhadhaam ka vinaash hoga na। baba roz-roz samjhaate rehte hain, usko dhaaran kar phir samjhaana hai। pahle-pahle to mukhya baat samjhaani hai - hamaara baap kaun hai, jisse varsa paana hai। bhakti maarga mein bhi god father ko yaad karte hain ki hamaare duhkh haro sukh do। to tum bachchon ki buddhi mein bhi smriti rahni chaahiye। school mein students ki buddhi mein knowledge rehti hai, na ki ghar baar। student life mein dhandhe-dhori ki baat rehti nahin। study hi yaad rehti hai। yahaan to phir karma karte, grihastha vyavhaar mein rehte, baap kehte hain yeh study karo। aise nahin kehte ki sanyaasiyon ke muaaphik gharbaar chhodo। yeh hai hi raajayog। yeh pravritti maarga hai। sanyaasiyon ko bhi tum kah sakte ho ki tumhaara hai hathayog। tum gharbaar chhodte ho, yahaan woh baat nahin hai। yeh duniya hi kaisi gandi hai। kya laga pada hai! gareeb aadi kaise rahe pade hain। dekhne se hi naphrat aati hai। baahar se jo visitor aadi aate hain unhon ko to achhe-achhe sthaan dikhaate hain, gareeb aadi kaise gand mein rahe pade hain, woh thode hi dikhaate hain। yeh to hai hi narka parantu unmein bhi farka to bahut hai na। saahookaar log kahaan rehte hain, gareeb kahaan rehte hain, karmon ka hisaab hai na। satayug mein aisi gandagi ho nahin sakti। vahaan bhi pharka to rehta hai na। koi sone ke mahal banaayenge, koi chaandi ke, koi eeton ke। yahaan to kitne khanda hain। ek Europe khanda hi kitna bada hai। vahaan to sirf ham hi honge। yeh bhi buddhi mein rahe to harshitmukh avastha ho। student ki buddhi mein study hi yaad rehti hai - baap aur varsa। yeh to samjhaaya hai baaki thoda samay hai। woh to kah dete laakhon-hazaaron varsha। yahaan to baat hi 5 hazaar varsha ki hai। tum bachche samajh sakte ho abhi hamaare raajdhaani ki sthaapna ho rahi hai। baaki saari duniya khatma honi hai। yeh padhaai hai na। buddhi mein yeh yaad rahe ham student hain, hamko bhagwan padhaate hain। to bhi kitni khushi rahe। yeh kyon bhool jaata hai! maaya badi prabal hai, woh bhula deti hai। school mein sab students padh rahe hain। sabhi jaante hain ki hamko bhagwan padhaate hain, vahaan to anek prakaar ki vidya padhaai jaati hai। anek teachers hote hain। yahaan to ek hi teacher hai, ek hi study hai। baaki naayab teachers to zaroor chaahiye। school hai ek, baaki sab branches hain, padhaane vaala ek baap hai। baap aakar sabhi ko sukh dete hain। tum jaante ho - aadhaakalpa ham sukhi rahenge। to yeh bhi khushi rahni chaahiye, shivbaaba hamko padhaate hain। shivbaaba rachna rachte hi hain svarga ki। ham svarga ka maalik banne liye padhte hain। kitni khushi andar mein rahni chaahiye। woh student bhi khaate peete sab kuchh ghar ka kaam aadi karte hain। haan, koi hostel mein rehte hain ki jaasti padhaai mein dhyaan rahega। service karne ke liye bachchiyaan baahar mein rehti hain। kaise-kaise manushya aate hain। yahaan to tum kitne safe baithe ho। koi andar ghus na sake। yahaan koi ka sang nahin। patit se baat karne ki darkaar nahin। tumko koi ka munh dekhne ki bhi darkaar nahin hai। phir bhi baahar rahne vaale teekhe chale jaate hain। kaisa wonder hai, baahar rahne vaale kitnon ko padhaakar, aap samaan banaakar aur le aate hain। baba samaachaar poochhte hain - kaise patient ko le aaye ho, koi bahut kharaab patient hai to unko 7 roz bhatthi mein rakha jaata hai। yahaan koi bhi shoodra ko nahin le aana hai। yeh madhuban hai jaise ki tum braahmanon ka ek gaanv। yahaan baap tum bachchon ko baith samjhaate hain, vishwa ka maalik banaate hain। koi shoodra ko le aayenge to woh vibration kharaab karega। tum bachchon ki chalan bhi bahut royal chaahiye।

aage chal tumko bahut saakshaatkaar hote rahenge - vahaan kya-kya hoga। jaanvar bhi kaise achhe-achhe honge। sab achhi cheejen hongi। satayug ki koi cheez yahaan ho na sake। vahaan phir yahaan ki cheez ho na sake। tumhaari buddhi mein hai ham svarga ke liye imtahaan paas kar rahe hain। jitna padhenge aur phir padhaayenge। teacher ban auron ko raasta bataate hain। sab teachers hain। sabko teach karna hai। pahle-pahle to baap ki pahchaan de batlaana hai ki baap se yeh varsa milta hai। geeta baap ne sunaai hai। yeh prajaapita brahma hai to brahman bhi yahaan chaahiye। brahma bhi shivbaaba se padhte rehte hain। tum abhi padhte ho vishnupuri mein jaane ke liye। yeh hai tumhaara alaukik ghar। laukik, paarlaukik aur phir alaukik। nai baat hai na। bhakti maarga mein kabhi brahma ko yaad nahin karte। brahma baba kisko kahne aata nahin। shivbaaba ko yaad karte hain ki duhkh se chhudaao। woh hai paarlaukik baap, yeh phir hai alaukik। inko tum sookshm vatan mein bhi dekhte ho। phir yahaan bhi dekhte ho। laukik baap to yahaan dekhne mein aata hai, paarlaukik baap to parlok mein hi dekh sakte। yeh phir hai alaukik wonderful baap। is alaukik baap ko samajhne mein hi moonjhate hain। shivbaaba ke liye to kahenge niraakaar hai। tum kahenge woh bindi hai। woh karke akhanda jyoti va brahm kah dete hain। anek mat hain। tumhaari to ek hi mat hai। ek dvaara baap ne mat dena shuru ki phir vriddhi kitni hoti hai। to tum bachchon ki buddhi mein yeh rehna chaahiye - hamko shivbaaba padha rahe hain। patit se paavan bana rahe hain। raavan raajya mein zaroor patit tamopradhaan banna hi hai। naam hi hai patit duniya। sab duhkhi bhi hain tab to baap ko yaad karte hain ki baba hamaare duhkh door kar hamko sukh do। sab bachchon ka baap ek hi hai। woh to sabko sukh denge na। nai duniya mein to sukh hi sukh hai। baaki sab shantidham mein rehte hain। yeh buddhi mein rehna chaahiye - abhi ham jaayenge shanti-dhaam। jitna najdeek aate jaayenge to aaj ki duniya kya hai, kal ki duniya kya hogi, sab dekhte rahenge। svarga ki baadshaahi najdeek dekhte rahenge। to bachchon ko mukhya baat samjhaate hain - buddhi mein yeh yaad rahe ki ham school mein baithe hain। shivbaaba is rath par savaar ho aaye hain hamko padhaane। yeh bhaageerath hai। baap aayenge bhi zaroor ek baar। bhaageerath ka naam kya hai, yeh bhi kisko pata nahin hai।

yahaan tum bachche jab baap ke sammukh baithte ho to buddhi mein yaad rahe ki baba aaya hua hai - hamko srishti chakra ka raaz bata rahe hain। abhi naatak poora hota hai, ab hamko jaana hai। yeh buddhi mein rakhna kitna sahaj hai parantu yeh bhi yaad kar nahin sakte। abhi chakra poora hota hai, ab hamko jaana hai phir nai duniya mein aakar part bajaana hai, phir hamaare baad phalaane-phalaane aayenge। tum jaante ho yeh chakra saara kaise phirta hai। duniya vriddhi ko kaise paati hai। nai se puraani phir puraani se nai hoti hai। vinaash ke liye taiyaariyaan bhi dekh rahe ho। natural calamities bhi honi hai। itne bombs banaakar rakhe hain to kaam mein to aane hain na। bombs se hi itna kaam hoga jo phir manushyon ke ladaai ki darkaar nahin rahegi। lashkar ko phir chhodte jaayenge। bombs phenkate jaayenge। phir itne sab manushya naukri se chhoot jaayenge to bhookh marenge na। yeh sab hone ka hai। phir sipaahi aadi kya karenge। earthquake hoti rahegi, bombs girte rahenge। ek-do ko maarte rahenge। khoone-naahek khel to hona hai na। to yahaan jab aakar baithte ho to in baaton mein raman karna chaahiye। shantidham, sukhdhaam ko yaad karte raho। dil se poochho hamko kya yaad padta hai। agar baap ki yaad nahin hai to zaroor buddhi kahaan bhatakti hai। vikarma bhi vinaash nahin honge, pad bhi kam ho jaayega। achha, baap ki yaad nahin thaharti to chakra ka simran karo to bhi khushi chadhe। parantu shreemat par nahin chalte, service nahin karte to baapdaada ki dil par bhi nahin chadh sakte। service nahin karte to bahuton ko tang karte rehte hain। koi to bahuton ko aapasmaan banaae aur baap ke paas le aate hain। to baba dekhkar khush hote hain। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) sada harshit rahne ke liye buddhi mein padhaai aur padhaane vaale baap ki yaad rahe। khaate peete sab kaam karte padhaai par poora dhyaan dena hai।

2) baapdaada ki dil par chadhne ke liye shreemat par bahuton ko aap samaan banaane ki service karni hai। kisi ko bhi tang nahin karna hai।

vardaan:- ashareeri pan ke injection dvaara man ko control karne vaale ekaagrachitta bhav

jaise aajkal agar koi control mein nahin aata hai, bahut tang karta hai, uchhalta hai ya paagal ho jaata hai to unko aisa injection laga dete hain jo woh shant ho jaae। aise agar sankalp shakti aapke control mein nahin aati to ashreereepan ka injection laga do। phir sankalp shakti vyartha nahin uchhlegi। sahaj ekaagrachit ho jaayenge। lekin yadi buddhi ki lagaam baap ko dekar phir le lete ho to man vyartha ki mehnat mein daal deta hai। ab vyartha ki mehnat se chhoot jaao।

slogan:- apne poorvaz swaroop ko smriti mein rakh sarva aatmaon par raham karo।

avyakt ishaare - “combined roop ki smriti se sada vijayi bano''

jaise shareer aur aatma donon combined hokar karma kar rahi hain, aise karma aur yog donon combined hon। karma karte yaad na bhoole aur yaad mein rehte karma na bhoole kyonki aapka title hi hai karmayogi। karma karte yaad mein rahne vaale sada nyaare aur pyaare honge, halke honge। knowledgeful ke saath-saath powerful stage par raho। knowledgeful aur powerful yeh donon stage combined hon tab sthaapna ka kaarya teevragti se hoga।