रविवार 4 मई 2025 की दैनिक मुरली

04-05-25 praatahmurli om shanti ''avyakt-baapdaada'' revise 20-02-2005 madhuban

'dil se mera baba kaho aur sarva avinaashi khajaanon ke maalik ban bephikra baadshaah bano"

aaj bhaagya vidhaata baapdaada apne sarva bachchon ke mastak beech bhaagya ki rekhaayen dekh rahe hain। har ek bachche ke mastak mein chamakte hue divya sitaare ki rekha dikhaai de rahi hai। har ek ke naynon mein sneh aur shakti ki rekha dekh rahe hain। mukh mein shreshtha madhur vaani ki rekha dekh rahe hain। hothon par meethe muskaan ki rekha chamak rahi hai। dil mein dilaaraam ke sneh mein lavleen ki rekha dekh rahe hain। haathon mein sada sarva khajaanon ke sampannata ki rekha dekh rahe hain। paanv mein har kadam mein padam ki rekha dekh rahe hain। aisa shreshtha bhaagya saare kalpa mein kisi ka nahin hota, jo aap bachchon ko is sangamayug mein bhaagya praapta hua hai। aisa apna bhaagya anubhav karte ho? itne shreshtha bhaagya ka roohaani nasha anubhav karte ho? dil mein svatah geet bajta hai - vaah mera bhaagya! yeh sangamayug ka bhaagya avinaashi bhaagya ho jaata। kyon? avinaashi baap dvaara avinaashi bhaagya praapta hua hai। lekin praapta is sangam par hi hota hai। is sangamayug par hi anubhooti karte ho, yeh vishesh sangamayug ki praapti ati shreshtha hai। to aise shreshtha bhaagya ka anubhav sada emerge rehta hai ya kabhi merge, kabhi emerge rehta hai? aur purushaartha kya kiya? itne bade bhaagya ki praapti ke liye purushaartha kitna sahaj hua। sirf dil se jaana, maana aur apna banaaya “mera baba''। dil se pahchaana, main baba ka, baba mera। mera maanna aur adhikaari ban jaana। adhikaar bhi kitna bada hai! socho, koi poochhe kya-kya mila hai? to kya kahenge? jo paana tha woh pa liya। apraapta nahin koi vastu parmaatma khajaane mein। aise praapti swaroop ka anubhav kar liya va kar rahe hain? bhavishya ki baat alag hai, is sangamayug ka hi praapti swaroop ka anubhav hai। agar sangamayug par anubhav nahin kiya to bhavishya mein bhi nahin ho sakta। kyon? bhavishya praalabdha hai lekin praalabdha is purushaartha ke shreshtha karma se banti hai। aise nahin ki last mein anubhav swaroop banenge। sangamayug ke bahutkaal ka yeh anubhav hai। jeevanmukta ka vishesh anubhav ab ka hai। bephikra baadshaah banne ka anubhav ab hai। to sabhi bephikra baadshaah ho ki phikar hai? jo bephikra baadshaah bane hain woh haath uthaao। ban gaye hain ki ban rahe hain? ban gaye hain na! kya phikar hai? jab daata ke bachche ban gaye to phikar kya rah gaya? mera baba maana aur phikar ki anek tokriyon ka bojh utar gaya। bojh hai kya? hai? prakriti ka khel bhi dekhte ho, maaya ka khel bhi dekhte ho lekin bephikra baadshaah hokar, saakshi hokar khel dekhte ho। duniya vaale to darte hain, pata nahin kya hoga! aapko dar hai? darte ho? nishchay aur nishchit hai jo hoga woh achhe te achha hoga। kyon? trikaaldarshi ban har drishya ko dekhte ho। aaj kya hai, kal kya hone vaala hai, isko achhi tarah se jaan gaye ho, knowledgeful ho na! sangam ke baad kya hona hai, aap sabke aage spashta hai na! nav yug aana hi hai। duniya vaale kahenge, aayega? question hai aayega? aur aap kya kehte hain? aaya hi pada hai isliye kya hoga, question nahin hai। pata hai - svarna yug aana hi hai। raat ke baad ab sangam prabhaat hai, amritvela hai, amritvele ke baad din aana hi hai। nishchay jisko bhi hoga woh nishchint, koi chinta nahin hogi, bephikar। vishwa rachta dvaara rachna ki spashta knowledge mil gai hai।

baapdaada dekh rahe hain sabhi bachche sneh ke, sahayog ke aur samparka ke pyaar mein bandhe hue apne ghar mein pahunch gaye hain। baapdaada sabhi snehi bachchon ko, sahayogi bachchon ko, samparka vaale bachchon ko apne adhikaar lene ke liye apne ghar mein pahunchne ki mubaarak de rahe hain। mubaarak ho, mubaarak ho। baapdaada ka pyaar bachchon se jyaada hai va bachchon ka baapdaada se jyaada hai? kiska hai? aapka ya baap ka? baap kehte bachchon ka jyaada hai। dekho, bachchon ka pyaar hai tab to kahaan-kahaan se pahunch gaye hain na! kitne deshon se aaye hain? (50 deshon se) 50 deshon se aaye hain। lekin sabse door se door kaun aaya hai? America vaale door se aaye hain? aap bhi door se aaye hain lekin baapdaada to paramdham se aaya hai। uski bhent mein America kya hai! America door hai ya paramdham door hai? sabse doordeshi baapdaada hai। bachche yaad karte aur baap haazir ho jaate hain।

abhi baap bachchon se kya chaahte hain? poochhte hain na - baap kya chaahte hain? to baapdaada yahi meethe-meethe bachchon se chaahte hain ki ek-ek bachcha svaraajya adhikaari raaja ho। sabhi raaja ho? svaraajya hai? sva par raajya to hai na! jo samajhte hain svaraajya adhikaari raaja bana hoon, woh haath uthaao। bahut achha। baapdaada ko bachchon ko dekhkar pyaar aata ki 63 janma bahut mehnat ki hai, duhkh-ashaanti se door hone ki। to baap yahi chaahte hain ki har bachcha abhi svaraajya adhikaari bane। man-buddhi-sanskaar ka maalik bane, raaja bane। jab chaahe, jahaan chaahe, jaise chaahe vaise man-buddhi-sanskaar ko parivartan kar sake। tension free life ka anubhav sada emerge ho। baapdaada dekhte hain kabhi merge bhi ho jaata hai। sochte hain yeh nahin karna hai, yeh right hai, yeh wrong hai, lekin sochte hain swaroop mein nahin laate hain। sochna maana merge rehna, swaroop mein laana arthaat emerge hona। samay ke liye to nahin intajaar kar rahe ho na! kabhi-kabhi karte hain। roohrihaan karte hain na to kai bachche kehte hain, samay aane par theek ho jaayenge। samay to aapki rachna hai। aap to master rachta ho na! to master rachta, rachna ke aadhaar par nahin chalte। samay ko samaapti ke nazdeek aap master rachta ko laana hai।

ek second mein man ke maalik ban man ko order kar sakte ho? kar sakte ho? man ko ekaagra kar sakte ho? fullstop laga sakte ho ki lagaayenge fullstop aur lag jaayega question mark? kyon, kya, kaise yeh kya, woh kya, aashcharya ki maatra bhi nahin। fullstop, second mein point ban jaao। aur koi mehnat nahin hai, ek shabd sirf abhyaas mein laao “point''। point swaroop banna hai, vesta ko point lagaani hai aur mahaavaakya jo sunte ho us point par manan karna hai, aur koi bhi takleeph nahin hai। point yaad rakho, point lagaao, point ban jaao। yeh abhyaas saare din mein beech-beech mein karo, kitne bhi busy ho lekin yeh trial karo ek second mein point ban sakte ho? ek second mein point laga sakte ho? jab yeh abhyaas baar-baar ka hoga tab hi aane vaale antim samay mein full points le sakenge। paas with honour ban jaayenge। yahi parmaatma padhaai hai, yahi parmaatma paalna hai।

to jo bhi aaye hain, chaahe pahli baari aane vaale hain, jo pahli baari milan manaane ke liye aaye hain woh haath uthaao। bahut aaye hain। welcome। jaise abhi pahle baari aaye ho na, to pahla number bhi lena। chance hai, aap sochenge ham to abhi-abhi pahle baari aaye hain, hamaare se pahle vaale to bahut hain lekin drama mein yeh chance rakha hua hai ki last so fast aur fast se first ho sakte ho। chance hai aur chance lene vaalon ko baapdaada chancellor kehte hain। to chancellor bano। banna hai chancellor? chancellor banna hai? jo samajhte hain chancellor banenge, woh haath uthaao। chancellor banenge? vaah! mubaarak ho। baapdaada ne dekha yahaan to jo bhi aaye hain woh sab haath utha rahe hain, majority utha rahe hain, mubaarak ho, mubaarak ho। baapdaada ne aap sabhi aane vaale meethe-meethe, pyaare-pyaare bachchon ko vishesh yaad kiya hai, kyon yaad kiya? (aaj sabha mein desh-videsh ke bahut se vi.aai.Ps baithe hain) kyon nimantran diya? pata hai? dekho, nimantran to bahuton ko mila lekin aane vaale aap pahunch gaye ho। kyon baapdaada ne yaad kiya? kyonki baapdaada jaante hain ki jo bhi aaye hain woh snehi, sahayogi se sahajyogi banne vaali quality hai। agar himmat rakhenge to aap sahaj yogi ban auron ko bhi sahaj yog ka messenger ban message de sakte ho। message dena arthaat godly messenger banna। aatmaon ko duhkh, ashaanti se chhudaana। phir bhi aapke hi bhaai-bahinen hai na! to apne bhaai va bahnon ko godly message dena arthaat mukta karna। iski duaayen bahut milti hain। kisi bhi aatma ko duhkh, ashaanti se chhudaane ki duaayen bahut milti hain aur duaayen milne se ateendriy sukh aantarik khushi ki feeling bahut aati hai। kyon? kyonki khushi baanti na to khushi baantane se khushi badhti hai। sabhi khush ho? vishesh baapdaada mehmaanon se nahin, adhikaariyon se poochhte hain। apne ko mehmaan nahin samajhna, adhikaari hain। to sabhi khush hain? haan aap aane vaalon se poochhte hain, kahne mein aata hai mehmaan lekin mehmaan nahin ho, mahaan ban mahaan banaane vaale ho। to poochho khush hain? khush hain to haath hilaao। sabhi khush hain, abhi jaakarke kya karenge? khushi baantenge na! sabko khoob khushi baantana। jitni baantenge utni badhegi, theek hai। achha - khoob taali bajaao। (sabhi ne khoob taaliyaan bajaai) jaise abhi taali bajaai, aise sada khushi ki taaliyaan automatic bajti rahen। achha।

baapdaada sada teachers ko kehte hain, teachers arthaat jiske features se future dikhaai de। aisi teachers ho na! aapko dekhkar svarga ke sukh ki feeling aaye। shanti ki anubhooti ho। chalte-phirte pharishte dikhaai den। aisi teachers ho na! achha hai, chaahe pravritti mein rahne vaale hain, chaahe seva ke nimitta bane hue hain lekin sabhi baapdaada samaan banne vaale nishchaybuddhi vijayi hain। achha।

chaaron or ke chaahe saakaar roop mein saamne hain, chaahe door baithe bhi dil ke nazdeek hain, aise sada shreshtha bhaagyavaan aatmaon ko, sada nimitta ban nirmaan ka kaarya saphal karne vaale vishesh aatmaon ko, sada baap ke samaan banne ke umang-utsaah mein aage badhne vaale himmatvaan bachchon ko, sada har kadam mein padmon ki kamaai jama karne vaale bahut-bahut world mein padamguna dhanvaan, bharpoor aatmaon ko baapdaada ka yaadapyaar aur namaste।

double videshi nimitta badi bahinon se:- achha service ka saboot de rahe hain। isse hi aavaaj phailega। anubhav sunaane se auron ka bhi anubhav badhta hai। to baapdaada khush hai, foreign ki seva mein nimitta banne vaale achhe umang-utsaah se seva mein busy rehte hain। gaye desh se hain lekin videsh vaalon ki seva aise hi nimitta banke kar rahe hain jaise vahaan ke hi hain। apnepan ki bhaasna dete ho। aur sab taraph ke hain। ek taraph ke nahin hain, london ke ya America ke nahin, behad sevaadhaari hain। jimmevaari to vishwa ki hai na। to baapdaada mubaarak de rahe hain। kar rahe ho, aage aur achhe te achhe udte aur udaate rahenge। achha।

personal mulaakaat:- sabhi holi aur happy hans ho। hans ka kaam kya hota hai? hans mein nirnay shakti bahut hoti hai। to aap bhi holi happy hans vyartha ko samaapta karne vaale aur samartha ban samartha banaane vaale ho। sabhi ever happy? ever-ever happy। abhi kabhi duhkh ko aane nahin dena। duhkh ko divorce de diya, tabhi to doosron ka duhkh nivaaran karenge na! to sukhi rehna hai aur sukh dena hai। yeh kaam karenge na! yahaan se jo sukh mila hai woh jama rakhna। kabhi bhi kuchh bhi ho na - baba, meetha baba, duhkh le lo, apne paas nahin rakhna। kharaab cheez rakhi jaati hai kya? to duhkh kharaab hai na! to duhkh nikaal do, sukhi raho। to yeh hai sukhi group aur sukhdaai group। chalte-phirte sukh dete raho। kitna aapko duaayen milengi। to yeh group blessing ke paatra hai। to sabhi khush hai na! abhi muskaraao। bas muskaraate rehna। khushi mein naacho। achha।

vardaan:- yaad aur seva ke balance dvaara chadhti kala ka anubhav karne vaale raajya adhikaari bhav

yaad aur seva ka balance hai to har kadam mein chadhti kala ka anubhav karte rahenge। har sankalp mein seva ho to vyartha se chhoot jaayenge। seva jeevan ka ek ang ban jaae, jaise shareer mein sab ang zaroori hain vaise brahman jeevan ka vishesh ang seva hai। bahut seva ka chance milna, sthaan milna, sang milna yeh bhi bhaagya ki nishaani hai। aise seva ka golden chance lene vaale hi raajya adhikaari bante hain।

slogan:- parmaatma pyaar ki paalna ka swaroop hai - sahajyogi jeevan।

avyakt ishaare - roohaani royalty aur purity ki personality dhaaran karo

pavitrata aap braahmanon ka sabse bade se bada shrangaar hai, sampoorn pavitrata aapke jeevan ki sabse bade se badi property hai, royalty aur personality hai, ise dhaaran kar ever ready bano to prakriti apna kaam shuru kare। purity ki personality se sampanna royal aatmaon ko sabhyata ki devi kaha jaata hai।