सोमवार 5 मई 2025 की दैनिक मुरली

05-05-2025 praatahmurli om shanti "baapdaada"' madhuban

“meethe bachche - sada isi nashe mein raho ki ham sangamayugi brahman hain, ham jaante hain jis baba ko sab pukaar rahe hain, woh hamaare sammukh hai''

prashn:- jin bachchon ka buddhiyog theek hoga, unhein kaun-sa saakshaatkaar hota rahega?

uttar:- satayugi nai raajdhaani mein kya-kya hoga, kaise ham school mein padhenge phir raajya chalaayenge। yeh sab saakshaatkaar jaise-jaise nazdeek aate jaayenge, hota rahega। parantu jinka buddhiyog theek hai, jo apne shantidham aur sukhdhaam ko yaad karte hain, dhandha dhori karte bhi ek baap ki yaad mein rehte hain, unhein hi yeh sab saakshaatkaar honge।

geet:- om namo shivaae …

om shanti। bhakti maarga mein aur jo bhi satsang hote hain, unmein to sab gaye honge। vahaan ya to kahenge bolo sab vaah guru ya raam ka naam bataayenge। yahaan bachchon ko kuchh kahne ki bhi jaroorat nahin rehti। ek hi baar kah diya hai, ghadi-ghadi kahne ki darkaar nahin। baap bhi ek hai, unka kehna bhi ek hi hai। kya kehte hain? bachchon maamekam yaad karo। pahle seekhkar phir aakar yahaan baithte hain। ham jis baap ke bachche hain unko yaad karna hai। yeh bhi tumne abhi brahma dvaara jaana hai ki ham sabhi aatmaon ka baap woh ek hai। duniya yeh nahin jaanti। tum jaante ho ham sab us baap ke bachche hain, unko sabhi god father kehte hain। ab father kehte hain main is saadhaaran tan mein tumko padhaane aata hoon। tum jaante ho baba inmen aaye hain, ham unke bane hain। baba hi aakar patit se paavan hone ka raasta bataate hain। yeh saara din buddhi mein rehta hai। yoon shivbaaba ki santaan to sab hain parantu tum jaante ho aur koi nahin jaante hain। tum bachche samajhte ho ham aatma hain, hamko baap ne pharmaan kiya hai ki mujhe yaad karo। main tumhaara behad ka baap hoon। sab chillaate rehte hain ki patit-paavan aao, ham patit bane hain। yeh deh nahin kehti। aatma is shareer dvaara kehti hai। 84 janma bhi aatma leti hai na। yeh buddhi mein rehna chaahiye ki ham actors hain। baba ne hamko ab trikaaldarshi banaaya hai। aadi-madhya-ant ka gyaan diya hai। baap ko hi sab bulaate hain na। abhi bhi woh kahenge, kehte rehte hain ki aao aur tum sangamayugi brahman kehte ho baba aaya hua hai। is sangamayug ko bhi tum jaante ho, yeh purushottam yug gaaya jaata hai। purushottam yug hota hi hai kaliyug ke ant aur satayug ke aadi ke beech mein। satayug mein sat purush, kaliyug mein jhoothe purush rehte hain। satayug mein jo hokar gaye hain, unhon ke chitra hain। sabse puraane te puraane yeh chitra hain, inse puraane chitra koi hote nahin। aise to bahut manushya phaaltu chitra baith banaate hain। yeh tum jaante ho kaun-kaun hokar gaye hain। jaise neeche amba ka chitra banaaya hai athva kaali ka chitra hai, to aisi bhujaaon vaali ho thode hi sakti hai। amba ko bhi do bhujaayen hongi na। manushya to jaakar haath jodte pooja karte hain। bhakti maarga mein anek prakaar ke chitra banaaye hain। manushya ke oopar hi bhinna-bhinna prakaar ki sajaavat karte hain to roop badal jaata hai। yeh chitra aadi vaastav mein koi hai nahin। yeh sab hai bhakti maarga। yahaan to manushya loole langade nikal padte hain। satayug mein aise nahin hote। satayug ko bhi tum jaante ho aadi sanaatan devi-devta dharma tha। yahaan to dress dekho har ek ki apni-apni kitni variety hai। vahaan to yatha raaja raani tatha praja hote hain। jitna nazdeek hote jaayenge to tumko apni raajdhaani ki dress aadi ka bhi saakshaatkaar hota rahega। dekhte rahenge ham aise school mein padhte hain, yeh karte hain। dekhenge bhi woh jinka buddhiyog achha hai। apne shantidham-sukhdhaam ko yaad karte hain। dhandhaadhori to karna hi hai। bhakti maarga mein bhi dhandha aadi to karte hain na। gyaan kuchh bhi nahin tha। yeh sab hai bhakti। usko kahenge bhakti ka gyaan। woh yeh gyaan de na saken ki tum vishwa ke maalik kaise banenge। abhi tum yahaan padhkar bhavishya vishwa ke maalik bante ho। tum jaante ho yeh padhaai hai hi nai duniya, amarlok ke liye। baaki koi amarnaath par shankar ne paarvati ko amraktha nahin sunaai hai। woh to shiv-shankar ko mila dete hain।

abhi baap tum bachchon ko samjha rahe hain, yeh bhi sunte hain। baap bigar srishti ke aadi-madhya-ant ka raaz kaun samjha sakenge। yeh koi saadhu-santa aadi nahin hai। jaise tum grihastha vyavhaar mein rehte the, vaise yeh bhi। dress aadi sab vahi hai। jaise ghar mein maa baap bachche hote hain, farka kuchh nahin hai। baap is rath par savaar ho aate hain bachchon ke paas। yeh bhaagyashaali rath gaaya jaata hai। kabhi bail par savaari bhi dikhaate hain। manushyon ne ulta samajh liya hai। mandir mein kabhi bail ho sakta hai kya? shri krishna to hai prince, woh thode hi bail par baithenge। bhakti maarga mein manushya bahut moonjhe hue hain। manushyon ko hai bhakti maarga ka nasha। tumko hai gyaan maarga ka nasha। tum kehte ho is sangam par baba hamko padha rahe hain। tum ho is duniya mein parantu buddhi se jaante ho ham brahman sangamayug par hain। baaki sab manushya kaliyug mein hain। yeh anubhav ki baaten hain। buddhi kehti hai ham kaliyug se ab nikal aaye hain। baba aaya hua hai। yeh puraani duniya hi badalne vaali hai। yeh tumhaari buddhi mein hai, aur koi nahin jaante। bhal ek hi ghar mein rahne vaale hain, ek hi parivaar ke hain, usmein bhi baap kahega ham sangamayugi hain, bachcha kahega nahin, ham kaliyug mein hain। wonder hai na। bachche jaante hain - hamaari padhaai poori hogi to vinaash hoga। vinaash hona zaroori hai। tumhaare mein bhi koi jaante hain, agar yeh samjhen duniya vinaash honi hai to nai duniya ke liye taiyaari mein lag jaaen। bag-baggage taiyaar kar len। baaki thoda samay hai, baba ke to ban jaayen। bhookh marenge to bhi pahle baba phir bachche। yeh to baba ka bhandaara hai। tum shivbaaba ke bhandaare se khaate ho। brahman bhojan banaate hain isliye brahma bhojan kaha jaata hai। jo pavitra brahman hain, yaad mein rahkar banaate hain, sivaae braahmanon ke shivbaaba ki yaad mein koi rah nahin sakte। woh brahman thode hi shivbaaba ki yaad mein rehte hain। shivbaaba ka bhandaara yeh hai, jahaan brahman bhojan banaate hain। brahman yog mein rehte hain। pavitra to hain hi। baaki hai yog ki baat। ismen hi mehnat lagti hai। gapoda chal na sake। aise koi kah na sake ki main sampoorn yog mein hoon va 80 percent yog mein hoon। koi bhi kah na sake। gyaan bhi chaahiye। tum bachchon mein yogi woh hai jo apni drishti se hi kisi ko shant kar de। yeh bhi taakat hai। ekdam sannaata ho jaayega, jab tum ashareeri ban jaate ho phir baap ki yaad mein rehte ho to yahi sachchi yaad hai। phir se yeh practice karni hai। jaise tum yahaan yaad mein baithte ho, yeh practice karaai jaati hai। phir bhi sab koi yaad mein rehte nahin hain। kahaan-kahaan buddhi bhaagti rehti hai। to woh phir nuksaan kar lete hain। yahaan sandali par bithaana unko chaahiye jo samjhen ham drill teacher hain। baap ki yaad mein saamne baithe hain। buddhiyog aur koi taraph na jaaye। sannaata ho jaayega। tum ashareeri ban jaate ho aur baap ki yaad mein rehte ho। yeh hai sachchi yaad। sanyaasi bhi shanti mein baithte hain, woh kiski yaad mein rehte hain? woh koi real yaad nahin। koi ko phaayda nahin de sakenge। woh srishti ko shant nahin kar sakte। baap ko jaante hi nahin। brahm ko hi bhagwan samajhte rehte। woh to hai nahin। abhi tumko shreemat milti hai - maamekam yaad karo। tum jaante ho ham 84 janma lete hain। har janma mein thodi-thodi kala kam hoti jaati hai। jaise chandrama ki kala kam hoti jaati hai। dekhne se itna maaloom thode hi padta hai। abhi koi bhi sampoorn nahin bana hai। aage chal tumko saakshaatkaar honge। aatma kitni chhoti hai। unka bhi saakshaatkaar ho sakta hai। nahin to bachchiyaan kaise bataati hain ki inmen light kam hai, inmen jaasti hai। divyadrishti se hi aatma ko dekhti hain। yeh bhi sabhi drama mein noondh hai। mere haath mein kuchh nahin hai। drama mujh se karaate hain, yeh sab drama anusaar chalta rehta hai। bhog aadi yeh sab drama mein noondh hai। second by second act hota hai।

abhi baap shiksha dete hain ki paavan kaise banna hai। baap ko yaad karna hai। kitni chhoti aatma hai jo patit bani hai phir paavan banni hai। wonderful baat hai na। kudrat kehte hain na। baap se tum sab kudarti baaten sunte ho। sabse kudarti baat hai - aatma aur paramatma ki, jo koi nahin jaante hain। rishi muni aadi koi bhi nahin jaante। itni chhoti aatma hi pattharbuddhi phir paaras-buddhi banti hai। buddhi mein yahi chintan chalta rahe ki ham aatma pattharbuddhi bani thi, ab phir baap ko yaad kar paarasbuddhi ban rahi hain। laukik reeti to baap bhi bada phir teacher guru bhi bade milte hain। yeh to ek hi bindi baap bhi hai, teacher bhi hai, guru bhi hai। saara kalpa dehdhaari ko yaad kiya hai। ab baap kehte hain - maamekam yaad karo। tumhaari buddhi ko kitna maheen banaate hain। vishwa ka maalik banna - koi kam baat hai kya! yeh bhi koi khyaal nahin karte ki yeh lakshmi-naaraayan satayug ke maalik kaise banen। tum bhi nambarvaar purushaartha anusaar jaante ho। naya koi in baaton ko samajh na sake। pahle mote roop se samjha phir maheenta se samjhaaya jaata hai। baap hai bindi, woh phir itna bada-bada ling roop bana dete hain। manushyon ke bhi bahut bade-bade chitra banaate hain। parantu aise hai nahin। manushyon ke shareer to yahi hote hain। bhakti maarga mein kya-kya baith banaaya hai। manushya kitna moonjhe hue hain। baap kehte hain jo past ho gaya woh phir hoga। abhi tum baap ki shreemat par chalo। inko bhi baba ne shreemat di, saakshaatkaar karaaya na। tumko ham baadshaahi deta hoon, ab is service mein lag jaao। apna varsa lene ka purushaartha karo। yeh sab chhod do। to yeh bhi nimitta bana। sab to aise nimitta nahin bante hain, jinko nasha chadha to aakar baith gaye। hamko to raajaai milti hai। phir yeh paai paise kya karenge। to ab baap bachchon ko purushaartha karaate hain, raajdhaani sthaapan ho rahi hai, kehte bhi hain ham lakshmi-naaraayan se kam nahin banenge। to shreemat par chalkar dikhaao। choon chaan mat karo। baba ne thode hi kaha - baal bachchon ka kya haal hoga। accident mein achaanak koi mar jaate hain to koi bhookha rehta hai kya। koi na koi mitra-sambandhi aadi dete hain khaane ke liye। yahaan dekho baba puraani jhopdi mein rehte hain। tum bachche aakar mahlon mein rehte ho। baap kahenge bachche achhi reeti rahen, khaayen, piyen। jo kuchh bhi nahin le aaye hain unko bhi sab kuchh achhi reeti milta hai। is baba se bhi achhi reeti rehte hain। shivbaaba kehte hain ham to hain hi ramta yogi। koi ka bhi kalyaan karne ja sakta hoon। jo gyaani bachche hain woh kabhi saakshaatkaar aadi ki baaton mein khush nahin honge। sivaae yog ke aur kuchh bhi nahin। in saakshaatkaar ki baaton mein khush nahin hona। achha।

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) yog ki aisi sthiti banaani hai jo drishti se hi kisi ko shant kar den। ekdam sannaata ho jaae। iske liye ashareeri banne ka abhyaas karna hai।

2) gyaan ke sachche nashe mein rahne ke liye yaad rahe ki ham sangamayugi hain, ab yeh puraani duniya badalne vaali hai, ham apne ghar ja rahe hain। shreemat par sada chalte rehna hai, choon chaan nahin karni hai।

vardaan:- parmaatma milan dvaara roohrihaan ka sahi response praapta vaale baap samaan bahuroopi bhav

jaise baap bahuroopi hai - second mein niraakaar se aakaari vastra dhaaran kar lete hain, aise aap bhi is mitti ki dress ko chhod aakaari pharishta dress, chamkeeli dress pahan lo to sahaj milan bhi hoga aur ruhrihaan ka clear response samajh mein aa jaayega kyonki yeh dress puraani duniya ki vritti aur vibration se, maaya ke water ya fire se proof hai। ismen maaya intarphirayar nahin kar sakti।

slogan:- dridhta asambhav se bhi sambhav kara deti hai।

avyakt ishaare - roohaani royalty aur purity ki personality dhaaran karo

brahmaakumaar ka arth hi hai - sada purity ki personality aur royalty mein rehna। yahi purity ki personality vishwa ki aatmaon ko apni taraph aakarshit karegi, aur yahi purity ki royalty dharmaraajpuri mein royalty dene se chhudaayegi। isi royalty ke anusaar bhavishya royal family mein aa sakenge। jaise shareer ki personality deh-bhaan mein laati hai, aise purity ki personality dehi-abhimaani banaae baap ke sameep laati hai।