रविवार 13 जुलाई 2025 की दैनिक मुरली

13-07-25 praatahmurli om shanti ''avyakt-baapdaada'' revise 03-02-06 madhuban

“parmaatma pyaar mein sampoorn pavitrata ki aisi sthiti banaao jismen vyartha ka naamnishaan na ho''

aaj baapdaada chaaron or ke apne prabhu pyaare bachchon ko dekh rahe hain। saare vishwa ke chune hue koton mein se koi is parmaatma pyaar ke adhikaari bante hain। parmaatma pyaar ne hi aap bachchon ko yahaan laaya hai। yeh parmaatma pyaar saare kalpa mein is samay hi anubhav karte ho। aur sabhi samay aatmaon ka pyaar, mahaan aatmaon ka, dharma aatmaon ka pyaar anubhav kiya lekin abhi parmaatma pyaar ke paatra ban gaye। koi aapse poochhe paramatma kahaan hai? to kya kahenge? parmaatma baap to hamaare saath hi hai। ham unke saath rehte hain। paramatma bhi hamaare bina rah nahin sakta aur ham bhi paramatma ke bina rah nahin sakte। itna pyaar anubhav kar rahe ho। falak se kahenge woh hamaare dil mein rehta aur ham unke dil mein rehte। aise anubhvi hain na! hain anubhvi? kya dil mein aata? agar ham nahin anubhvi honge to kaun hoga! baap bhi aise pyaar ke adhikaari bachchon ko dekh harshit hote hain।

parmaatma pyaar ki nishaani - jisse pyaar hota hai uske peechhe sab kurbaan karne ke liye sahaj taiyaar ho jaate hain। to aap sab bhi jo baap chaahte hain ki har ek bachcha baap samaan ban jaae, har ek ke chehre se baap pratyaksha dikhaai de, aise bane ho na? baapdaada ki dil pasanda sthiti jaante ho na! baap ke dil pasanda sthiti hai hi sampoorn pavitrata। is brahman janma ka foundation bhi sampoorn pavitrata hai। sampoorn pavitrata ki guhyata ko jaante ho? sankalp aur svapna mein bhi rinchak maatra apvitrata ka naam-nishaan na ho। baapdaada aajkal ke samay ki sameepta pramaan baar-baar attention khinchava rahe hain ki sampoorn pavitrata ke hisaab se vyartha sankalp, yeh bhi sampoornata nahin hai। to check karo vyartha sankalp chalte hain? kisi bhi prakaar ke vyartha sankalp sampoornata se door to nahin karte? jitna-jitna purushaartha mein aage badhte jaate hain, utna royal roop ke vyartha sankalp vyartha samay to samaapta nahin kar rahe hain? royal roop mein abhimaan aur apmaan vyartha sankalp ke roop mein vaar to nahin karte? agar abhimaan roop mein koi bhi parmaatma den ko apni visheshta samajhte hain to us visheshta ka bhi abhimaan neeche le aata hai। vighna roop ban jaata hai aur abhimaan bhi sookshm roop mein yahi aata, jo jaante bhi ho - meraapan aaya, mera naam, maan, shaan hona chaahiye, yeh meraapan abhimaan ka roop le leta hai। yeh vyartha sankalp bhi sampoornata se door kar lete hain kyonki baapdaada yahi chaahte hain - svamaan, na abhimaan, na apmaan। yahi kaaran bante hain vyartha sankalp aane ke।

baapdaada har bachche ko double maalikpan ke nishchay aur nashe mein dekhne chaahte hain। double maalikpan kya hai? ek to baap ke khajaanon ke maalik aur doosra svaraajya ke maalik। donon hi maalikpan kyonki sabhi baalak bhi ho aur maalik bhi ho। lekin baapdaada ne dekha baalak to sabhi hain hi kyonki sabhi kehte hain mera baba। to mera baba arthaat baalak hain hi। lekin baalak ke saath donon prakaar ke maalik। to maalikpan mein nambarvaar ho jaate hain। main baalak so maalik bhi hoon। varse ka khajaana praapta hai isliye baalakpan ka nishchay aur nasha rehta hai lekin maalikpan ka practical mein nishchay ka nasha usmein nambarvaar ho jaate hain। svaraajya adhikaari maalik, ismen vishesh vighna daalta hai man। man ke maalik ban kabhi bhi man ke parvash nahin ho। kehte hain svaraajya adhikaari hain, to svaraajya adhikaari arthaat raaja hain, jaise brahma baap ne har roz checking kar man ke maalik ban vishwa ke maalik ka adhikaar praapta kar liya। aise yeh man buddhi raaja ke hisaab se to matri hain, yeh vyartha sankalp bhi man mein utpanna hote hain, to man vyartha sankalp ke vash kar deta hai। agar order se nahin chalaate to man chanchal banne ke kaaran parvash kar leta hai। to check karo। vaise bhi man ko ghoda kehte hain, kyonki chanchal hai na! aur aapke paas shreemat ka lagaam hai। agar shreemat ka lagaam thoda bhi dheela hota hai to man chanchal ban jaata hai। kyon lagaam dheela hota? kyonki kahaan na kahaan sidescene dekhne mein lag jaate hain। aur lagaam dheela hota to man ko chance milta hai। to main baalak so maalik hoon, is smriti mein sada raho। check karo khajaane ka bhi maalik to svaraajya ka bhi maalik, double maalik hoon? agar maalikpan kam hota hai to kamjor sanskaar emerge ho jaate hain। aur sanskaar ko kya kehte ho? mera sanskaar aisa hai, meri nature aisi hai, lekin kya yeh mera hai? kahne mein to aise hi kehte ho, mera sanskaar। yeh mera hai? mera sanskaar kehna right hai? right hai? mera hai ya raavan ki jaaydaad hai? kamjor sanskaar raavan ki jaaydaad hai, usko mera kaise kah sakte hain। mera sanskaar kaun sa hai? jo baap ka sanskaar woh mera sanskaar। to baap ka sanskaar kaun sa hai? vishwa kalyaan। shubh bhaavna, shubh kaamna। to koi bhi kamjor sanskaar ko mera sanskaar kehna hi wrong hai। aur mera sanskaar agar maano dil mein bithaaya hai, ashuddha cheez dil mein bitha di hai। meri cheez se to pyaar hota hai na! to mera samajhne se apne dil mein jagah de di hai iseelie kai baar bachchon ko bahut yuddha karni padti hai kyonki ashubh aur shubh donon ko dil mein bitha diya hai to donon kya karenge? yuddha hi to karenge! jab yeh sankalp mein aata hai, vaani mein bhi aata hai - mera sanskaar। to check karo yeh ashubh sanskaar mera sanskaar nahin hai। to sanskaar parivartan karna pade।

baapdaada har ek bachche ko padam-padamguna bhaagyavaan chalan aur chehre mein dekhne chaahte hain। kai bachche kehte hain bhaagyavaan to bane hain lekin chalte-phirte bhaagya emerge ho, woh merge ho jaata hai aur baapdaada har samay, har bachche ke mastak mein bhaagya ka sitaara chamakta hua dekhne chaahte hain। koi bhi aapko dekhe to chehre se, chalan se bhaagyavaan dikhaai de tab aap bachchon dvaara baap ki pratyakshata hogi kyonki vartamaan samay majority anubhav karne chaahte hain, jaise aajkal ki science pratyaksha roop mein dikhaati hai na! anubhav karaati hai na! garam ka bhi anubhav karaati hai, thandaai ka bhi anubhav karaati hai to silence ki shakti se bhi anubhav karne chaahte hain। jitna-jitna svayan anubhav mein rahenge to auron ko bhi anubhav kara sakenge। baapdaada ne ishaara diya hi hai ki abhi combined seva karo। sirf aavaaj se nahin, lekin aavaaj ke saath anubhvi moorta ban anubhav karaane ki bhi seva karo। koi na koi shanti ka anubhav, khushi ka anubhav, aatmik pyaar ka anubhav…, anubhav aisi cheez hai jo ek baari bhi anubhav hua to chhod nahin sakte hain। suni hui cheez bhool sakti hai lekin anubhav ki cheez bhoolti nahin hai। woh anubhav karaane vaale ke sameep laati hai।

sabhi poochhte hain ki abhi aage ke liye kya naveenta karen? to baapdaada ne dekha service to sabhi umang-utsaah se kar rahe ho, har ek varga bhi kar raha hai। aaj bhi bahut varga ikatthe hue hai na! mega programme bhi kar liya, sandesh to de diya, apna ulhana nikaal liya, iski mubaarak ho। lekin ab tak yeh aavaaj nahin phaila hai ki yeh parmaatma gyaan hai। brahmaakumaariyaan kaarya achha kar rahi hain, brahmaakumaariyon ka gyaan bahut achha hai lekin yahi parmaatma gyaan hai, parmaatma kaarya chal raha hai yeh aavaaj phaile। meditation course bhi karaate ho, aatma ka paramatma se connection bhi jodte ho lekin ab parmaatma kaarya svayan paramatma kara raha hai, yeh bahut kam anubhav karte hain। aatma aur dhaarnaayen yeh pratyaksha ho raha hai, achha kaarya kar rahe hain, achha bolte hain, achha sikhaate hain, yahaan tak theek hai। knowledge achhi hai itna bhi kehte hain lekin parmaatma knowledge hai... yeh aavaaj baap ke najdeek laayega aur jitna baap ke najdeek aayenge utna anubhav svatah hi karte rahenge। to aisa plan banaao aur bhaashnon mein aisa kuchh jauhar bharo, jisse paramatma ke najdeek aa jaayen। divyagunon ki dhaarna ismen attention gaya hai, aatma ka gyaan dete hain, paramatma ka gyaan dete hain, yeh kehte hain lekin paramatma aa chuka hai, parmaatma kaarya svayan paramatma chala raha hai, yeh pratyakshata chumbak ki tarah sameep laayegi। aap log bhi sameep tab aaye jab samjha baap mila hai, baap se milna hai। snehi majority bante hain, woh kya samajhke? kaarya bahut achha hai। jo kaarya brahmaakumaariyaan kar rahi hain, woh kaarya koi kar nahin sakta, parivartan karaati hain। lekin paramatma bol raha hai, paramatma se varsa lena hai, itna najdeek nahin aate kyonki abhi jo pahle samajhte nahin the ki brahmaakumaariyaan kya karti hain, kya inhon ki knowledge hai, woh samajhne lage hain। lekin parmaatma pratyakshata, agar samajh jaaen ki paramatma ka gyaan hai to ruk sakte hain kya! jaise aap bhaagkar aa gaye ho na, aise bhaagenge। to abhi aisa plan banaao, aise bhaashan taiyaar karo, aise parmaatma anubhooti ke practical saboot bano tabhi baap ki pratyakshata practical mein dikhaai degi। abhi ‘achha hai' - yahaan tak pahunche hain, ‘achha banna hai', woh lahar parmaatma pyaar ki anubhooti se hogi। to anubhvi moorta ban anubhav karaao। abhi double maalikpan ki smriti se samartha ban samartha banaao। achha।

seva ka tarna panjaab zone ka hai:- haath hilaao। achha hai jis bhi zone ko tarna milta hai woh khuli dil se aa jaate hain। (panjaab zone se 4000 aaye hain) baapdaada ko bhi khushi hoti hai ki har ek zone seva ka chance achha le lete hain। panjaab ko sabhi common reeti se sher kehte hain, panjaab sher aur baapdaada kehte hain sher arthaat vijayi। to sada panjaab vaalon ko apne mastak ke beech vijay ka tilak anubhav karna hai। vijay ka tilak mila hua hai। yeh sada smriti rahe ham hi kalpa kalpa ke vijayi hain। the, hain aur kalpa-kalpa banenge। achha hai। panjaab bhi vaaris quality ko baap ke aage laane ka programme bana rahe hain na! abhi baapdaada ke aage vaaris quality laai nahin hai। snehi quality laai hai, sabhi zone ne snehi sahayogi quality laai hai lekin vaaris quality nahin laaye hain। taiyaari kar rahe hain na! sab prakaar ke chaahiye na! vaaris bhi chaahiye, snehi bhi chaahiye, sahayogi bhi chaahiye, mike bhi chaahiye, might bhi chaahiye। sab prakaar ke chaahiye। achha hai, centre mein vriddhi to ho rahi hai। har ek umang-utsaah se seva mein vriddhi kar bhi rahe hain, abhi dekhenge ki kis zone mein yeh pratyaksha hota hai - paramatma aa chuka hai। baap ko pratyaksha kaun sa zone karta hai, woh baapdaada dekh rahe hain। foreign karega? foreign bhi kar sakta hai। panjaab number le lo। le lo achha hai। sab aapko sahayog denge। bahut samay se prayatna kar rahe hain - ‘yahi hai, yahi hai, yahi hai'.. yeh aavaaj phailaane ka। abhi hai - ‘yeh bhi hain', yahi hai nahin hai। to panjaab kya karega? yeh aavaaj aa jaaye - yahi hai, yahi hai...। teachers theek hai? kab tak karenge? is saal mein karenge? naya saal shuru hua hai na! to naye saal mein koi naveenta honi chaahiye na! ‘yeh bhi hai'- yeh to bahut sun liya। jaise aapke man mein bas baba, baba, baba svatah yaad rehta hai, aise unke mukh se nikle ‘hamaara baba aa gaya।' woh bhi kahe ‘mera baba', ‘ mera baba'- yeh aavaaj chaaron konon se nikle, lekin shurooaat to ek kone se hogi na। to panjaab kamaal karega? kyon nahin karenge! karna hi hai। bahut achha। in advance mubaarak ho। achha।

sabhi taraph ke sarva roohaani gulaab bachchon ko sada baap ke ati pyaare aur dehbhaan se ati nyaare, baapdaada ke dil ke dulaare bachchon ko, sada ek baap, ekaagra man aur ekras sthiti mein sthit rahne vaale bachchon ko, chaaron or ke bhinna-bhinna samay par bhinna-bhinna sthaan mein rehte bhi science ke saadhnon se madhuban mein pahunchne vaale, sammukh dekhne vaale, sabhi laadle, sikeeldhe, kalpa-kalpa ke parmaatma pyaar ke paatra adhikaari bachchon ko baapdaada ka yaadapyaar aur dil ki duaayen, padam-padam guna sveekaar ho aur saath mein double maalik bachchon ko baapdaada ki namaste।

daadi ji se:- madhuban ka hero actor hai, sada zero yaad hai। shareer bhale nahin chalta, thoda dheere-dheere chalta lekin sabhi ka pyaar aur duaayen chala rahi hain। baap ki to hain hi lekin sabhi ki hain। sabhi daadi ko bahut pyaar karte ho na! dekho sabhi yahi kehte hain ki daadiyaan chaahiye, daadiyaan chaahiye, daadiyaan chaahiye...। to daadiyon ki visheshta kya hai? daadiyon ki visheshta hai baap ki shreemat par har kadam uthaana। man ko bhi baap ki yaad aur seva mein samarpan karna। aap sabhi bhi aise hi kar rahe ho na! man ko samarpan karo। baapdaada ne dekha hai, man badi kamaal karke dikhaata hai। kamaal kya karta hai? chanchalta karta hai। man ekaagra ho jaae, jaise jhanda oopar karte ho na, aise man ka jhanda shiv baba, shivbaaba mein ekaagra ho jaae। aa raha hai, samay sameep aa raha hai। kabhi-kabhi baapdaada bachchon ke sankalp bahut achhe-achhe sunte hain। sabka lakshya bahut achha hai। achha। dekho haal ki shobha kitni achhi hai। maala lagti hai na! aur maala ke beech mein manke baithe hain। achha। om shanti।

vardaan:- silence ki shakti dvaara second mein mukti aur jeevanmukta ka anubhav karaane vaale vishesh aatma bhav

vishesh aatmaon ki last visheshta hai - ki second mein kisi bhi aatma ko mukti aur jeevanmukti ke anubhvi bana denge। sirf raasta nahin bataayenge lekin ek second mein shanti ka va ateendriy sukh ka anubhav karaayenge। jeevanmukti ka anubhav hai sukh aur mukti ka anubhav hai shanti। to jo bhi saamne aaye woh second mein iska anubhav kare - jab aisi speed hogi tab science ke oopar silence ki vijay dekhte hue sabke mukh se vaah-vaah ka aavaaj niklega aur pratyakshata ka drishya saamne aayega।

slogan:- baap ke har pharmaan par svayan ko kurbaan karne vaale sachche parvaane bano।

avyakt ishaare - sankalpon ki shakti jama kar shreshtha seva ke nimitta bano

abhi jaise vaacha se direction dena padta hai, aise shreshtha sankalp se saari kaarobaar chal sakti hai। science vaale neeche prithvi se oopar tak direction lete rehte hain, to kya aap shreshtha sankalp ki shakti se saari kaarobaar nahin chala sakte ho! jaise bol karke baat ko spashta karte hain, vaise aage chal kar sankalp se saari kaarobaar chalegi, iske liye shreshtha sankalpon ka stock jama karo।