रविवार 23 नवंबर 2025 की दैनिक मुरली

23-11-25 praatahmurli om shanti ''avyakt-baapdaada'' revise 31-12-07 madhuban

naye varsha mein akhanda mahaadaani, akhanda nirvighna, akhanda yogi aur sada saphaltaamoorta banna

aaj baapdaada apne saamne double sabha ko dekh rahe hain। ek to saakaar mein sammukh baithe hain aur doosre door baithe bhi dil ke sameep dikhaai de rahe hain। donon sabhaaon ki shreshtha aatmaon ke mastak mein aatma deep chamak raha hai। kitna sundar chamakta hua nazaara hai। itne sab ek sankalp, ekras sthiti mein sthit parmaatma pyaar mein lavleen ekaagra buddhi se sneh mein samaaye hue kitne pyaare lag rahe hain। aap sabhi bhi aaj vishesh naya varsha manaane ke liye pahunch gaye ho। baapdaada bhi sabhi bachchon ka umang-utsaah dekh, chamakte hue aatma deep ko dekh harshit ho rahe hain।

aaj ka din sangam ka din hai। ek varsha ki, puraane ki vidaai hai aur naye varsha ki badhaai hone vaali hai। naya varsha arthaat naya umang aur utsaah, sva parivartan ka umang hai, sarva praaptiyon ko svayan mein praapta dekh dil mein utsaah hai। duniya vaale bhi yeh utsav manaate hain, unhon ke liye ek din ka utsav hai aur aap lucky lovely bachchon ke liye sangamayug ka har din utsav hai kyonki khushi ka utsaah hai। duniya vaale to bujhe hue deepak ko jalaake varsha manaate hain aur baapdaada aur aap itne saare chaaron or ke jage hue deepkon ke saath naya varsha ka utsav manaane aaye hain। yeh to reeti rasam manaane ke liye nimitta maatra karte ho lekin aap sabhi jage hue deepak ho। apna chamakta hua deep dikhaai deta hai na! jo avinaashi deep hai।

to naye varsha mein har ek ne dil mein sva prati, vishwa ki aatmaon prati koi naya plan banaaya hai? 12 baje ke baad naya varsha shuru ho jaayega to is varsha ko vishesh kis roop mein manaayenge? jaise puraana varsha vidaai lega to aap sabne bhi puraane sankalp, puraane sanskaar unhon ko vidaai dene ka sankalp kiya? varsha ke saath-saath aap bhi puraane ko vidaai de naye umang-utsaah ke sankalpon ko practical mein laayenge na! to socho apne mein kya naveenta laayenge? kaun se naye umang-utsaah ki lahar phailaayenge? kaun se vishesh sankalp ka vibration phailaayenge? socha hai? kyonki aap sabhi brahman saare vishwa ki aatmaon ke liye parivartan nimitta aatmaayen ho। vishwa ke foundation ho, poorvaj ho, poojya ho। to is varsha apni shreshtha vritti dvaara kya vibration phailaayenge? jaise prakriti chaaron or kabhi garmi ka, kabhi sardi ka, kabhi bahaar ka vibration phailaati hai। to aap prakriti ke maalik prakritijeet kaun sa vibration phailaayenge? jisse aatmaon ko thode samay ke liye bhi sukh-chain ka anubhav ho। iske liye baapdaada yahi ishaara de rahe hain ki jo bhi khajaane praapta hue hain un khajaanon ko saphal karo aur saphalta swaroop bano। vishesh samay ka khajaana kabhi bhi vyartha na jaaye। ek second bhi vyartha ko kaarya mein lagaao। samay ko saphal karo, har shvaans ko saphal karo, har sankalp ko saphal karo, har shakti ko saphal karo, har gun ko saphal karo। saphaltaamoorta banne ka yeh vishesh varsha manaao kyonki saphalta aapka janma siddha adhikaar hai। us adhikaar ko apne kaarya mein lagaae saphaltaamoorta bano kyonki ab ki saphalta aapke anek janma saath rahne vaali hai। aapke samay ke saphalta ka praalabdha poora aadha-kalpa saphalta ka phal praapta hoga। ab ke samay ki saphalta ka praalabdha poora samay hi praapta hoga। shvaans ko saphal karne se bhavishya mein bhi dekho aapke shvaans ki saphalta ka parinaam bhavishya mein sabhi aatmaayen poora samay svastha rehti hain। beemaari ka naam nahin। doctors ki department hi nahin kyonki doctors kya ban jaayenge? raaja ban jaayenge na! vishwa ke maalik ban jaayenge। lekin is samay aap shvaans saphal karte ho aur sarva aatmaon ko svastha rahne ka praalabdha praapta hota hai। aise hi gyaan ka khajaana, uske phal swaroop svarga mein aapke apne raajya mein itne samajhdaar, shaktivaan ban jaate jo vahaan koi vajeer se raay lene ki aavashyakta nahin, svayan hi samajhdaar shaktivaan hote hain। shaktiyon ko saphal karte ho, uski praalabdha vahaan sab shaktiyaan vishesh dharma satta, raajya satta donon hi vishesh shaktiyaan, sattaayen vahaan praapta hongi। gunon ka khajaana saphal karte ho to uski praalabdha devta pad ka arth hi hai divyagundhaari aur saath-saath abhi last janma mein aapki jad moorti ka poojan karte hain to kya mahima karte hain? sarvagun sampanna। to is samay ki saphalta ki praalabdha svatah hi praapta ho jaati isliye check karo khajaane mile, khajaanon se sampanna hue hain lekin sva prati va vishwa prati kitna saphal kiya hai? puraane varsha ko vidaai denge to puraane varsha mein kya jama kiya hua khajaana saphal kiya, kitna kiya? yeh check karna aur aane vaale varsha mein bhi in khajaanon ko vyartha ke bajaae saphal karna hi hai। ek second bhi aur koi khajaana bhi vyartha na jaaye। pahle bataaya hai ki sangam samay ka second, second nahin hai varsha ke baraabar hai। aise nahin samajhna ek second, ek minute hi to gaya, vyartha jaana isko hi albelaapan kaha jaata hai। aap sabka lakshya hai ki brahma baap samaan sampanna aur sampoorn banna hai। to brahma baap ne sarva khajaane aadi se antim din tak saphal kiya, iska pratyaksha pramaan dekha - sampoorn pharishta ban gaya। apni pyaari daadi ko bhi dekha saphal kiya aur auron ko bhi saphal karne ka sada umang-utsaah badhaaya। to draamaanusaar vishesh vishwa seva ke alaukik part ke nimitta bani।

to is varsha, kal se har din apna chart rakhna - saphal aur vyartha… kya hua kitna hua? amritvele hi dridh sankalp karna, smriti swaroop banna ki saphalta mera janma siddha adhikaar hai। saphalta mere gale ka haar hai। saphalta swaroop hi samaan banna hai। brahma baap se pyaar hai na। to brahma baap ka sabse jyaada pyaar kisse tha? jaante ho, kisse pyaar tha? murli se। last din bhi murli ka paath miss nahin kiya। samaan banne mein yeh check karna - brahma baap ka jisse pyaar raha, brahma baap ke pyaar ka saboot hai - jisse baap ka pyaar tha usse mera pyaar svatah hi sahaj hona chaahiye। brahma baap ki aur visheshta kya rahi? sada alert, albelaapan nahin। last din bhi kitna alert roop mein apne seva ka part bajaaya। shareer kamjor hote bhi kaise alert hoke, aadhaar leke nahin baithe aur alert karke gaye। teen baaton ka mantra deke gaye। yaad hai na sabko। to jitna alert rahenge, follow karenge, albelaapan khatma hoga। albelepan ke vishesh bol baapdaada bahut sunte rehte hain। jaante ho na! agar in teen shabdon ko (niraakaari, nirvikaari aur niranhakaari) sada apne man mein revise aur realise karte chalo to automatically sahaj aur svatah samaan ban hi jaayenge। to ek baat saphal karo saphaltaamoorta bano।

baapdaada ne bachchon ki varsha ki result dekhi। kya dekha? mahaadaani bane ho, lekin akhanda mahaadaani, akhanda underline, akhanda mahaadaani, akhanda yogi, akhanda nirvighna abhi iski aavashyakta hai। kya akhanda ho sakta hai? ho sakta hai? pahli line vaale bataao ki akhanda ho sakta hai? haath uthaao agar ho sakta hai to। jo kar sakta hai, kar sakte ho? madhuban vaale bhi utha rahe hain। baapdaada madhuban vaalon ko pahle dekhta hai। madhuban se pyaar hai। shaantivan ya paandav bhavan ya jo bhi daadi ki bhujaayen hain, sabko dhyaan se dekhte hain। agar akhanda ho gaya, mansa se shakti phailaane ki seva mein busy raho, vaacha se gyaan ki seva aur karma se gundaan va gun ka sahayog dene ki seva karo।

aajkal chaahe agyaani aatmaayen hain, chaahe brahman aatmaayen hain sabhi ko gun ka daan, gunon ka sahayog dena aavashyak hai। agar svayan sahaj simple roop mein sample banke rahe to automatic doosre ko aapke gunmoorta ka sahayog svatah hi milega। aajkal brahman aatmaayen bhi sample dekhne chaahti hain, sunne nahin chaahti hain। aapas mein bhi kya kehte ho? kaun bana hai? to pratyaksha roop mein gunmoorta dekhne chaahte hain। to karma se vishesh gunon ka sahayog, gunon ka daan dene ki aavashyakta hai। sunne koi nahin chaahta, dekhne chaahta hai। to abhi yeh vishesh dhyaan mein rakhna ki mujhe gyaan se, vaacha se to seva karte hi rehte ho aur karte hi rehna hai, chhodna nahin hai lekin abhi mansa aur karma, mansa dvaara vibration phailaao। sakaash phailaao। vibration va sakaash door baithe bhi pahuncha sakte ho। shubh bhaavna, shubh kaamna dvaara kisi bhi aatma ko mansa seva dvaara vibration va sakaash de sakte ho। to abhi is varsha ek mansa shaktiyon ka vibration, shaktiyon dvaara sakaash aur karma dvaara gun ka sahayog va agyaani aatmaon ko gundaan do।

naye varsha mein gift bhi dete ho na। to is varsha svayan gunmoorta ban gunon ki gift dena। gunon ki toli khilaate ho na। milte ho to toli khilaate ho na। toli khilaane mein khush ho jaate hain na। koi aatmaayen, bhaaganti bhi toli ko yaad karte hain। aur baaten bhool jaate hain lekin toli yaad aati hai। to is varsha kaun si toli khilaayenge? gunon ki toli khilaana। gunon ki picnic karna kyonki baap samaan samay ki sameepta pramaan aur daadi ke ishaare pramaan samay ki sampannata achaanak kabhi bhi hona sambhav hai isliye baap samaan banna hai va daadi ko pyaar ka return dena hai to jo aavashyakta hai - mansa aur karma dvaara sahayogi banne ki, koi kaisa bhi hai yeh nahin socho, yeh banen to main banoon। number one banna hai to kabhi yeh nahin sochna ki yeh bane to banoon। pahla number to banne vaala ban jaayega, phir aapka number to doosra ho jaayega। kya aap doosra number banne chaahte hain ki pahla number banne chaahte hain? vaise agar kisko kaho aap doosra number le lo to lenge? sabhi yahi kahenge pahla number lena hai। to pahla nimitta banna hai। doosre ko nimitta kyon banaate ho, apne ko nimitta banaao na। brahma baap ne kya kaha? har baat mein khud nimitta banke nimitta banaaya। he arjun ban part bajaaya। mujhe nimitta banna hai। mujhe karna hai। doosra karega, mujhe dekhke aur karenge, aur ko dekh main karoonga, nahin। mujhe dekh aur karenge। yeh brahma baap ka pahla paath hai। to suna kya karna hai? saphalta moorta, saphal saphalta moorta, akhanda daani, maaya ko aane ki himmat hi nahin hogi। jab akhanda mahaadaani ban jaayenge, nirantar sevaadhaari rahenge, busy rahenge, man buddhi sevaadhaari rahega to maaya kahaan aayegi। to abhi is varsha kya banna hai? sabka ek aavaaj dil se nikle, yeh baapdaada chaahta hai, woh kya? no problem, complete। problem nahin lekin complete banna hi hai। dridh nishchaybuddhi, vijaymaala ke najdeek manka banna hi hai। theek hai na! banna hai na! madhuban vaale banna hai! no complain? no complain। himmat rakhne vaale haath uthaao। no problem। vaah! mubaarak ho, mubaarak ho, mubaarak ho।

dekho, nishchay ka pratyaksha pramaan hai roohaani nasha। agar roohaani nasha nahin to nishchay bhi nahin hai। full nishchay nahin hai, thoda bahut hai। to nasha rakho kya badi baat hai! kitne kalpa aap hi baap samaan bane hain, yaad hai? anginat baar bane ho। to yeh nasha rakho ham hi bane hain, ham hi hain aur ham hi baar-baar bante rahenge। yeh nasha sada hi karma mein dikhaai de। sankalp mein nahin, bol mein nahin, lekin karma mein, karma ka arth hai chalan mein, chehre mein dikhaai de। to homework mil gaya। mila na? ab dekhenge nambarvaar mein aate ho ya number one mein aate ho। achha।

baapdaada ke paas card, patra, email, yaad-pyaar computer dvaara bhi bahut aaye hain aur baapdaada door baithe diltakhtansheen bachchon ko, har ek ko naam sahit visheshta sahit yaadapyaar aur dil ki duaayen sammukh emerge kar de rahe hain। baapdaada jaante hain ki pyaar to sabko rehta hi hai aur baapdaada sada amritvele vishesh brahman aatmaon ko yaadapyaar ka respond vishesh karta hai। iseelie card bhi achhe-achhe banaaye hain, woh yahaan (stage par) rakhte hain lekin baapdaada ke paas to vatan mein pahle pahunchte hain। achha।

chaaron or ke chamakte hue aatma-deep bachchon ko, sada saphal karne vaale saphalta swaroop bachchon ko, sada akhanda mahaadaani, akhanda nirvighna, akhanda gyaan aur yogayukta, sada ek hi samay mein teen seva karne vaale mansa vibration dvaara vaayumandal dvaara, vaacha vaani dvaara, chalan aur chehre va karma dvaara, teenon seva ek hi samay ikattha ho tab aapka prabhaav achha kahne vaale nahin, lekin achha banne vaalon ke oopar padega। to aise anubhvi moorta dvaara anubhav karaane vaale bachchon ko baapdaada ka naye varsha ke liye padam padamguna yaadapyaar, duaayen aur dil ka takhta sada takhtansheen banaane vaala hai, isliye chaaron or ke bachchon ko jo sammukh hain, va door baithe diltakhta par hain, sabhi ko naam aur visheshta sahit yaadapyaar aur namaste।

achha - jo pahli baar aaye hain woh uthkar khade ho jaao। haath hilaao। dekho aadha class pahle baari ka aaya hai। peechhe vaale haath hilaao। dikhaai de raha hai T.vi. mein। bahut hain। achha pahle vaari aane vaalon ko baapdaada ki bahut-bahut dil se mubaarak bhi hai, aur dil ka yaadapyaar bhi hai। jaise abhi aaye ho, to abhi ke aane vaalon ko baapdaada ka vardaan hai - “amar bhav''।

vardaan:- glaani karne vaale ko bhi gunmaala pahnaane vaale ishta dev, mahaan aatma bhav

jaise aajkal aap vishesh aatmaon ka svaagat karte samay koi gale mein sthool maala daalte hain to aap daalne vaale ke gale mein return kar dete ho, aise glaani karne vaale ko bhi aap gunmaala pahnaao to woh svatah hi aapko gunmaala return karenge kyonki glaani karne vaale ko gunmaala pahnaana arthaat janma-janma ke liye bhakta nishchit kar dena hai। yeh dena hi anek baar ka lena ho jaata hai। yahi visheshta ishta dev, mahaan aatma bana deti hai।

slogan:- apni mansa vritti sada achhi powerful banaao to kharaab bhi achha ho jaayega।

avyakt ishaare - ashareeri va videhi sthiti ka abhyaas badhaao

kitna bhi kaarya ki chaaron or ki kheenchaataan ho, buddhi seva ke kaarya mein ati busy ho - aise time par ashareeri banne ka abhyaas karke dekho। yathaartha seva ka kabhi bandhan nahin hota hai kyonki yog yukta, yuktiyukta sevaadhaari sada seva karte bhi upraam rehte hain। aise nahin ki seva jyaada hai isliye ashareeri nahin ban sakte। yaad rakho meri seva nahin baap ne di hai to nirbandhan rahenge।