शुक्रवार 28 नवंबर 2025 की दैनिक मुरली

28-11-2025 praatahmurli om shanti "baapdaada"' madhuban

“meethe bachche - yeh bhool-bhulaiya ka khel hai, tum ghadi-ghadi baap ko bhool jaate ho, nishchaybuddhi bano to is khel mein phasenge nahin''

prashn:- kayaamat ke samay ko dekhte hue tum bachchon ka kartavya kya hai?

uttar:- tumhaara kartavya hai - apni padhaai mein achhi reeti lag jaana, aur baaton mein nahin jaana hai। baap tumhein naynon par bithaakar, gale ka haar banaakar saath le jaayenge। baaki to sabko apna-apna hisaab-kitaab chuktu karke jaana hi hai। baap aaye hain sabko apne saath ghar le jaane।

geet:- door desh ka rahne vaala…

om shanti। roohaani baap roohaani bachchon ko baith samjhaate hain - bhaarat khaas aur duniya aam sab vishwa mein shanti chaahte hain। ab yeh to samajhna chaahiye - zaroor vishwa ka maalik hi vishwa mein shanti sthaapan karte hain। god father ko hi pukaarna chaahiye ki aakar vishwa mein shanti phailaao। kisko pukaaren woh bhi bichaaron ko pata nahin hai। saare vishwa ki baat hai na। saare vishwa mein shanti chaahte hain। ab shanti ka dhaam to alag hai, jahaan baap aur aap aatmaayen rehti ho। yeh bhi behad ka baap hi samjhaate hain। ab is duniya mein to dher ke dher manushya hain, anek dharma hain। kehte hain - ek dharma ho jaae to shanti ho। sab dharma milkar ek to ho nahin sakte। trimoorti ki mahima bhi hai। trimoorti ke chitra bahut rakhte hain। yeh bhi jaante hain brahma dvaara sthaapna। kiski? sirf shanti ki thode hi hogi। shanti aur sukh ki sthaapna hoti hai। is bhaarat mein hi 5 hazaar varsha pahle jab inka raajya tha to zaroor baaki sab jeev aatmaayen, jeev ko chhod apne ghar gai hongi। ab chaahte hain ek dharma, ek raajya, ek bhaasha। ab tum bachche jaante ho - baap shanti, sukh, sampatti ki sthaapna kar rahe hain। ek raajya bhi zaroor yahaan hi hoga na। ek raajya ki sthaapna ho rahi hai - yeh koi nai baat nahin। anek baar ek raajya sthaapan hua hai। phir anek dharmon ki vriddhi hote-hote jhaad bada ho jaata hai phir baap ko aana padta hai। aatma hi sunti hai, padhti hai, aatma mein hi sanskaar hain। ham aatma bhinna-bhinna shareer dhaaran karti hain। bachchon ko is nishchay buddhi hone mein bhi badi mehnat lagti hai। kehte hain baba ghadi-ghadi bhool jaate hain। baap samjhaate hain - yeh khel bhool-bhulaiya ka hai। ismen tum jaise phans gaye ho, pata nahin hai ham apne ghar athva raajdhaani mein kaise jaayenge। ab baap ne samjhaaya hai aage kuchh nahin jaante the। aatma kitni pattharbuddhi ban jaati hai। pattharbuddhi aur paarasbuddhi ka bhaarat mein hi gaayan hai। pattharbuddhi raajaayen aur paarasbuddhi raajaayen yahaan hi hain। paaras-naath ka mandir bhi hai। abhi tum jaante ho ham aatmaayen kahaan se aai hain part bajaane। aage to kuchh bhi nahin jaante the। inko kehte hain kaanton ka jangal। yeh saari duniya kaanton ka jangal hain। phoolon ke bageeche ko aag lagi, aisa kabhi suna nahin hoga। hamesha jangal ko aag lagti hai। yeh bhi jangal hai, inko aag lagni hai zaroor। bhambhor ko aag lagni hai। is saari duniya ko hi bhambhor kaha jaata hai। abhi tum bachchon ne baap ko jaan liya hai। sammukh baithe ho। jo gaate the tumheen se baithoon.....। woh sab kuchh ho raha hai। bhagvaanuvaach to zaroor padhenge na। bhagvaanuvaach bachchon prati hi hoga na। tum jaante ho bhagwan padhaate hain। bhagwan kaun hai? niraakaar shiv ko hi kahenge। bhagwan shiv ki pooja bhi yahaan hoti hai। satayug mein pooja aadi nahin hoti। yaad bhi nahin karte। bhakton ko satayug ki raajdhaani ka phal milta hai। tum samajhte ho hamne sabse jaasti bhakti ki hai isliye ham hi pahle-pahle baap ke paas aaye hain। phir ham hi raajdhaani mein aayenge। to bachchon ko poora purushaartha karna chaahiye - nai duniya mein oonch pad paane। bachchon ki dil hoti hai ab ham jaldi naye ghar mein jaayen। shuru mein hi naya ghar hoga phir puraana hota jaayega। ghar mein bachchon ki vriddhi hoti jaayegi। putra, potre, par-potre woh to puraane ghar mein aayenge na। kahenge hamaare daada, par-daada ka yeh makaan hai। peechhe aane vaale bhi bahut hote hain na। jitna jor se purushaartha karenge to pahle naye ghar mein aayenge। purushaartha ki yukti baap bahut sahaj samjhaate hain। bhakti mein bhi purushaartha karte hain na। bahut bhakti karne vaalon ka naam baala hota hai। kai bhakton ki stamp bhi nikaalte hain। gyaan ki maala ka to koi ko pata nahin hai। pahle hai gyaan, peechhe hai bhakti। yeh tum bachchon ki buddhi mein hai। aadha samay hai gyaan - satayug-treta। abhi tum bachche knowledgeful bante jaate ho। teacher sadaiv full knowledge vaale hote hain। student mein nambarvaar marks uthaate hain। yeh hai behad ka teacher। tum ho behad ke student, student to nambarvaar hi paas honge। jaise kalpa pahle hue hain। baap samjhaate hain tumne hi 84 janma liye hain। 84 janmon mein 84 teacher hote hain। punarjanma to zaroor lena hi hai। pahle zaroor satopradhaan duniya hoti hai phir puraani tamopradhaan duniya hoti hai। manushya bhi tamopradhaan honge na। jhaad bhi pahle naya satopradhaan hota hai। naye patte bahut achhe-achhe hote hain। yeh to behad ka jhaad hai। dher dharma hain। tumhaari buddhi ab behad taraph jaayegi। kitna bada jhaad hai। pahle-pahle aadi sanaatan devi-devta dharma hi hoga। phir variety dharma aayenge। tumne hi 84 variety janma liye hain। woh bhi avinaashi hain। tum jaante ho kalpa-kalpa 84 ka chakra ham phirte rehte hain। 84 ke chakra mein ham hi aate hain। 84 laakh janma koi manushya ki aatma nahin leti hai। woh to variety jaanvar aadi dher hain। unki koi ginti bhi nahin kar sakte। manushya ki aatma ne 84 janma liye hain। to yeh part bajaate-bajaate ekdam jaise taayarda ho gaye hain। duhkhi ban gaye hain। seedhi utarte satopradhaan se tamopradhaan ban gaye hain। baap phir tamopradhaan se satopradhaan banaate hain। baap kehte hain - main tamopradhaan shareer tamopradhaan duniya mein aaya hoon। ab saari duniya tamopradhaan hai। manushya to aise kah dete hain - saare vishwa mein shanti kaise ho। samajhte nahin ki vishwa mein shanti kab thi। baap kehte hain tumhaare ghar mein to chitra rakhe hain na। inka raajya tha - to saare vishwa mein shanti thi, unko svarga kaha jaata hai। nai duniya ko hi heaven golden ej kaha jaata hai। abhi ye puraani duniya badalni hai। woh raajdhaani sthaapan ho rahi hai। vishwa mein raajya to inka hi tha। lakshmi-naaraayan ke mandir mein bahut manushya jaate hain। yeh thode hi kiski buddhi mein hai ki yahi bhaarat ke maalik the - inke raajya mein zaroor sukh-shanti thi। 5 hajaar varsha ki baat hai - jab inka raajya tha। aadhaakalpa ke baad puraani duniya kaha jaata hai isliye dhandhe vaale svaastika rakhte hain chaupde mein। unka bhi arth hai na। woh to ganesh kah dete hain। ganesh ko phir vighna vinaashak devta samajhte hain। svaastika mein poore 4 bhaag hote hain। yeh sab hai bhaktimaarga। abhi deepaavli manaate hain, vaastav mein sachchi-sachchi deevaali yaad ki yaatra hi hai jisse aatma ki jyoti 21 janmon ke liye jag jaati hai। bahut kamaai hoti hai। tum bachchon ko bahut khushi honi chaahiye। abhi tumhaara naya khaata shuru hota hai - nai duniya ke liye। 21 janmon ke liye khaata abhi jama karna hai। ab baap bachchon ko samjhaate hain, apne ko aatma samajh sun rahe ho। aatma samajh sunenge to khushi bhi rahegi। baap hamko padhaate hain। bhagvaanuvaach bhi hai na। bhagwan to ek hi hota hai। zaroor woh aakar shareer leta hoga, tab bhagvaanuvaach kaha jaata hai। yeh bhi kisko pata nahin hai tab neti-neti karte aaye hain। kehte bhi hain woh parampita paramatma hai। phir kah dete - ham nahin jaante। kehte bhi hain shivbaaba, brahma ko bhi baba kehte hain। vishnu ko kabhi baba nahin kahenge। prajaapita to baba thahra na। tum ho bi.ke., prajaapita naam na hone se samajhte nahin hain। itne dher bi.ke. hain to zaroor prajaapita hi hoga isliye prajaapita akshar zaroor daalo। to samjhenge prajaapita to hamaara hi baap thahra। nai srishti zaroor prajaapita dvaara hi rachi jaati hai। ham aatmaayen bhaai-bhaai hain phir shareer dhaaran kar bhaai-behen ho jaate। baap ke bachche to avinaashi hain phir saakaar mein behen-bhaai chaahiye। to naam hai prajaapita brahma। parantu brahma ko koi ham yaad nahin karte। yaad laukik ko karte aur paarlaukik ko karte hain। prajaapita brahma ko koi yaad nahin karte। duhkh mein baap ka simran karte hain, brahma ka nahin। kahenge he bhagwan। he brahma nahin kahenge। sukh mein to kisi ko bhi yaad nahin karte hain। vahaan sukh hi sukh hai। yeh bhi kisko pata nahin hai। tum jaante ho is samay hain 3 baap। bhaktimaarga mein laukik aur paarlaukik baap ko yaad karte hain। satayug mein sirf laukik ko yaad karte hain। sangam par teenon ko yaad karte hain। laukik bhi hai parantu jaante hain woh hai had ka baap। unse had ka varsa milta hai। abhi hamko behad ka baap mila hai jisse behad ka varsa milta hai। yeh samajh ki baat hai। ab behad ka baap aaye hain brahma ke tan mein - ham bachchon ko behad ka sukh dene। unka banne se ham behad ka varsa paate hain। yeh jaise daade ka varsa milta hai - brahma dvaara, woh kehte hain varsa tumko main deta hoon। padhaata main hoon। gyaan mere paas hai। baaki na manushyon mein gyaan hai, na devtaaon mein। gyaan hai mere mein। jo main tum bachchon ko deta hoon। yeh hai roohaani gyaan।

tum jaante ho roohaani baap dvaara hamko yeh pad milta hai। aise-aise vichaar saagar manthan karna chaahiye। gaayan hai man ke jeete jeet, man se haare haar... vaastav mein kehna chaahiye - maaya par jeet kyonki man ko to jeeta nahin jaata। manushya kehte hain man ki shanti kaise ho? baap kehte hain aatma kaise kahegi ki man ki shanti chaahiye। aatma to hai hi shantidham mein rahne vaali। aatma jab shareer mein aati hai tab kaarya karne lag padti hai। baap kehte hain tum ab svadharma mein tiko, apne ko aatma samjho। aatma ka svadharma hai shant। baaki shanti kahaan se dhoondhegi। is par raani ka bhi drishtaanta hai haar ka। sannyaasi drishtaanta dete hain aur phir khud jangal mein jaakar shanti dhoondhate hain। baap kehte hain ki tum aatma ka dharma hi shanti hai। shantidham tumhaara ghar hai, jahaan se part bajaane tum aate ho। shareer se phir karma karna padta hai। shareer se alag hone se sannaata ho jaata hai। aatma ne jaakar doosra shareer liya phir chinta kyon karni chaahiye। vaapis thode hi aayegi। parantu moh sataata hai। vahaan tumko moh nahin sataayega। vahaan 5 vikaar hote nahin। raavanraajya hi nahin। woh hai raamraajya। hamesha raavan raajya ho to phir manushya thak jaaen। kabhi sukh dekh na saken। abhi tum aastik bane ho aur trikaaldarshi bhi bane ho। manushya baap ko nahin jaante isliye naastik kaha jaata hai।

abhi tum bachche jaante ho yeh shaastra aadi jo past ho chuke hain, yeh sab hai bhakti maarga। abhi tum ho gyaan maarga mein। baap tum bachchon ko kitna pyaar se naynon par bithaakar le jaate hain। gale ka haar banaae sabko le jaata hoon। pukaarte bhi sab hain। jo kaam chita par baith kaale ho gaye hain unko gyaan chita par bithaae, hisaab-kitaab chuktu karaae vaapis le jaate hain। ab tumhaara kaam hai padhne se, aur baaton mein kyon jaana chaahiye। kaise marenge, kya hoga...... in baaton mein ham kyon jaayen। yeh to kayaamat ka samay hai, sab hisaab-kitaab chuktu kar vaapis chale jaayenge। yeh behad ke drama ka raaz tum bachchon ki buddhi mein hai, aur koi nahin jaante। bachche jaante hain ham baba ke paas kalpa-kalpa aate hain, behad ka varsa lene। ham jeev ki aatmaayen hain। baba ne bhi deh mein aakar pravesh kiya hai। baap kehte hain main saadhaaran tan mein aata hoon, inko bhi baith samjhaata hoon ki tum apne janmon ko nahin jaante ho। aur koi aise kah na sake ki bachchon, dehi-abhimaani bano, baap ko yaad karo। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) yaad ki yaatra mein rahkar sachchi-sachchi deepaavli roj manaani hai। apna naya khaata 21 janmon ke liye jama karna hai।

2) drama ke raaz ko buddhi mein rakh padhaai ke sivaae aur kisi bhi baat mein nahin jaana hai। sab hisaab-kitaab chuktu karne hain।

vardaan:- roohaaniyat ki sthiti dvaara vyartha baaton ka stock khatma karne vaale khushi ke khajaane se sampanna bhav

roohaaniyat ki sthiti dvaara vyartha baaton ke stock ko samaapta karo, nahin to ek do ke avgunon ka varnan karte beemaari ke jarmas vaayumandal mein phailaate rahenge, isse vaataavran powerful nahin banega। aapke paas anek bhaavon se anek aatmaayen aayengi lekin aapki taraph se shubh bhaavna ki baaten hi le jaaen। yeh tab hoga jab svayan ke paas khushi ki baaton ka stock jama hoga। yadi dil mein kisi ke prati koi vyartha baaten hogi to jahaan baaten hain vahaan baap nahin, paap hai।

slogan:- smriti ka switch on ho to mood oph ho nahin sakti।

avyakt ishaare - ashareeri va videhi sthiti ka abhyaas badhaao

jitna jo busy hai, utna hi usko beech-beech mein yeh abhyaas karna zaroori hai, phir seva mein jo kabhi-kabhi thakaavat hoti hai, kabhi kuchh na kuchh aapas mein halchal ho jaati hai, woh nahin hoga। ek second mein nyaare hone ka abhyaas hoga to koi bhi baat hui ek second mein apne abhyaas se in baaton se door ho jaayenge। socha aur hua। yuddha nahin karni padegi।