शनिवार 29 नवंबर 2025 की दैनिक मुरली

29-11-2025 praatahmurli om shanti "baapdaada"' madhuban

“meethe bachche - tum sachche-sachche raajarishi ho, tumhaara kartavya hai tapasya karna, tapasya se hi poojan laayak banenge''

prashn:- kaun-sa purushaartha sadaakaal ke liye poojne laayak bana deta hai?

uttar:- aatma ki jyoti jagaane va tamopradhaan aatma ko satopradhaan banaane ka purushaartha karo to sadaakaal ke liye poojan laayak ban jaayenge। jo abhi gaphlat karte hain woh bahut rote hain। agar purushaartha karke paas nahin hue, dharmaraaj ki sazaayen khaai to saza khaane vaale pooje nahin jaayenge। saza khaane vaale ka munh ooncha nahin ho sakta।

om shanti। roohaani bachchon prati roohaani baap samjha rahe hain। pahle-pahle to bachchon ko samjhaate hain ki apne ko aatma nishchay karo। pahle aatma hai, peechhe shareer hai। jahaan-tahaan pradarshani athva museum mein, class mein pahle-pahle yeh saavdhaani deni hai ki apne ko aatma samajh baap ko yaad karo। bachche jab baithte hain, sab dehi-abhimaani hokar nahin baithte hain। yahaan baithte bhi kahaan-kahaan khyaalaat jaate hain। satsang mein jab tak koi saadhu aadi aaye tab tak kya baith karte hain। koi na koi khyaalaat mein baithe rehte hain। phir saadhu aaya to katha aadi sunne lagte hain। baap ne samjhaaya hai - yeh sab bhakti maarga mein sunna-sunaana hai। baap samjhaate hain yeh sab hai - aartiphishiyal। inmen hai kuchh bhi nahin। deepmaala bhi aartiphishiyal manaate hain। baap ne samjhaaya hai - gyaan ka teesra netra khulna chaahiye to ghar-ghar mein sojhra ho। abhi to ghar-ghar mein andhiyaara hi hai। yeh sab baahar ka prakaash hai। tum apni jyoti jagaane bilkul shant mein baithte ho। bachche jaante hain svadharma mein rahne se paap kat jaate hain। janma-janmaantar ke paap is yaad ki yaatra se hi katte hain। aatma ki jyot bujh gai hai na। shakti ka petrol saara khatma ho gaya hai। woh phir bhar jaayega kyonki aatma pavitra ban jaati hai। kitna raat-din ka farka hai। ab lakshmi ki kitni pooja hoti hai। kai bachche likhte hain lakshmi badi ya sarasvati maa badi। lakshmi to ek hoti hai - shri naaraayan ki। agar mahaalakshmi ko poojte hain to unko 4 bhuja dikhaate hain। usmein donon aa jaate hain। vaastav mein usko lakshmi-naaraayan ki pooja kaha jaae। chaturbhuj hai na - donon ikatthe। parantu manushyon ko kuchh bhi samajh nahin hai। behad ka baap kehte hain ki sabhi besmajh ban pade hain। laukik baap kabhi saari duniya ke bachchon ko kahenge kya ki besmajh hain। abhi tum bachche jaante ho - vishwa ka baap kaun hai? khud kehte hain main sabhi aatmaon ka baap hoon। tum sab mere bachche ho। vo saadhu log to kah denge sab bhagwan hi bhagwan hain। tum jaante ho behad ka baap behad ka gyaan samjha rahe hain ham aatmaon ko। manushyon ko to deh-abhimaan rehta hai - main phalaana hoon…। shareer par jo naam pada hai, us par chalte aaye hain। ab shivbaaba to hai niraakaar, supreme soul। us aatma par naam hai shiv। aatma par naam ek hi shivbaaba ka hai। bas woh hai param aatma, paramatma, unka naam hai shiv। baaki jo bhi aatmaayen dher ki dher hain un sabke shareeron ke naam pade hue hain। shivbaaba yahaan rehta nahin hai, woh to paramdham se aate hain। shiv avatran bhi hai। abhi baap ne tumko samjhaaya hai - sabhi aatmaayen yahaan aati hain part bajaane। baap ka bhi part hai। baap to bahut bada kaam yahaan karte hain। avtaar maante hain to unki to holiday aur stamp aadi honi chaahiye। sab deshon mein holy de honi chaahiye kyonki baap to sabka sadgati daata hai na। unka janma din aur chale jaane ka din, date aadi ka bhi pata nahin pad sakta kyonki yeh to nyaara hai na isliye sirf shivraatri kah dete hain। yeh bhi tum bachche jaante ho - aadhaakalpa hai behad ka din, aadhaakalpa hai behad ki raat। raat poori hokar phir din hota hai। uske beech mein baap aate hain। yeh to accurate time hai। manushya janmate hain to municipality mein note karte hain na, phir 6 din ke baad uska naam rakhte hain, usko kehte hain - naamakran। koi chhathi kehte। bhaashaayen to bahut hain na। lakshmi ki pooja karte hain - aatishbaaji jalaate hain। tum poochh sakte ho jo lakshmi ka tyohaar aap manaate ho, yeh kab takhta par baithi? takhta par baithne ka hi coronation manaate hain, unka janma nahin manaate। lakshmi ka chitra thaali mein rakh unse dhan maangate hain। bas aur kuchh nahin। mandir mein jaakar bhal kuchh maangenge, parantu deepmaala ke din to unse sirf paisa maangenge। paisa deti thode hi hai। yeh jaisi-jaisi bhaavna hai... agar koi sachchi bhaavna se pooja karte to alpa-kaal ke liye dhan mil sakta hai। yeh hai hi alpakaal ka sukh। kahaan to sthaai sukh bhi hoga na। svarga ka to unhon ko pata hi nahin hai। yahaan svarga ki bhent mein koi khada ho nahin sakta।

tum jaante ho aadhaakalpa hai gyaan, aadhaakalpa hai bhakti। phir hota hai vairaagya। samjhaaya jaata hai - yeh puraani chhi-chhi duniya hai isliye phir nai duniya zaroor chaahiye। nai duniya vaikuntha ko kehte hain, usko heaven, paradise kaha jaata hai। is drama mein paartadhaari bhi avinaashi hain। tum bachchon ko maaloom pada hai ki ham aatma part kaise bajaati hain। baba ne samjhaaya hai - kisko bhi pradarshani aadi dikhaana hai to pahle-pahle yeh em object samjhaani hai। second mein jeevanmukti kaise milti hai - janma-maran mein to zaroor aana hi hai। tum seedhi par bahut achhi reeti samjha sakte ho। raavanraajya mein hi bhakti shuru hoti hai। satayug mein bhakti ka naam-nishaan nahin hota। gyaan aur bhakti donon alag-alag hain na। abhi tumko is puraani duniya se vairaagya hai। tum jaante ho yeh puraani duniya ab khatma honi hai। baap sadaiv bachchon ke sukhdaai hi hote hain। bachchon ke liye hi baap kitna maatha maarte hain। bachche ke liye hi gurooon ke paas jaate hain, saadhuon ke paas jaate hain - kaise bhi karke bachcha ho kyonki samajhte hain bachcha hoga to unko milkiyat dekar jaayenge। bachcha ho to unko ham vaaris banaayen। to baap kabhi bachchon ko duhkh thode hi denge। impossible hai। tum maat-pita kahkar kitni radiyaan maarte rehte hain। to bachchon ka roohaani baap sabko sukh ka hi raasta bataate hain। sukh dene vaala ek hi baap hai। duhkh harta sukh karta ek roohaani baap hai। yeh vinaash bhi sukh ke liye hi hai। nahin to mukti-jeevanmukti kaise paayenge? parantu yeh bhi koi samjhenge thode hi। yahaan to yeh hain gareeb, ablaayen, jo apne ko aatma nishchay kar sakti। baaki bade logon ko deh ka abhimaan itna kada pakka ho gaya hai jo baat mat poochho। baba baar-baar samjhaate hain - tum raajarishi ho। rishi hamesha tapasya karte hain। woh to brahm ko, tatva ko yaad karte hain ya koi kaali aadi ko bhi yaad karte honge। bahut sannyaasi bhi hain jo kaali ki pooja karte hain। maa kaali kah pukaarte hain। baap kehte hain - is samay sab vikaari hain। kaam chita par baith sab kaale hue hain। maa, baap, bachche sab kaale hain। yeh behad ki baat hai। satayug mein kaale hote nahin, sab hain gore। phir kabhi saanvare bante hain। yeh tum bachchon ko baap ne samjhaaya hai। thoda-thoda patit hote-hote ant mein bilkul hi kaale ho jaate hain। baap kehte hain raavan ne kaam chita par chadhaae bilkul kaala bana diya hai। ab phir tumko gyaan chita par chadhaata hoon। aatma ko hi pavitra banaana hota hai। ab patit-paavan baap aakar paavan banne ki yukti bataate hain। paani kya yukti bataayenge। parantu tum kisko samjhaao to koton mein koi hi samajhkar oonch pad paate hain। abhi tum baap se apna varsa lene aaye ho - 21 janmon ke liye। tum aage chalkar bahut saakshaatkaar karenge। tumko apni padhaai ka sab pata padega। jo abhi gaphlat karte hain phir bahut royenge। sazaayen bhi to bahut hoti hain na। phir pad bhi bhrashta ho jaata hai। munh ooncha kar nahin sakenge isliye baap kehte hain - meethe-meethe bachchon, purushaartha kar paas ho jaao, jo kuchh bhi saza nahin khaani pade tab poojan laayak bhi banenge। saza khaai to phir thode hi pooje jaayenge। tum bachchon ko purushaartha bahut karna chaahiye। apni aatma ki jyoti jagaani hai। abhi aatma tamopradhaan bani hai, unko hi satopradhaan banaana hai। aatma hai hi bindi। ek sitaara hai। unka aur koi naam rakh nahin sakte। bachchon ko samjhaaya hai unka saakshaatkaar hua hai। svaami vivekaanand aur raamkrishna paramhans ka batlaate hain। usne dekha unse kuchh light nikli so to aatma hi nikalti hai। usne samjha woh mere mein sama gai। ab aatma koi aakar sama thode hi sakti hai। woh to jaakar doosra shareer leti hai। pichhaadi mein tum bahut dekhenge। naam aur roop se nyaari koi cheez hoti nahin। aakaash polaar hai, unka bhi naam hai। ab yeh to bachche samajhte hain, kalpa-kalpa sthaapna jo hoti aai hai woh honi hi hai। ham brahman nambarvaar purushaartha karte rehte hain। jo-jo second gujarta hai usko drama hi kaha jaata hai। saari duniya ka chakra phirta rehta hai। yeh 5 hajaar varsha ka chakra, joon misal phirta rehta hai। tik-tik hoti rehti hai, abhi tum meethe-meethe bachchon ko sirf baap ko hi yaad karna hai। chalte-phirte kaam karte baap ko yaad karne mein hi kalyaan hai। phir maaya chamaat laga degi। tum ho brahman, bhramri misal keede ko aapasmaan brahman banaana hai। woh bhramri ka to ek drishtaanta hai। tum ho sachche-sachche brahman। braahmanon ko hi phir devta banna hai isliye tumhaara yeh hai purushottam banne ke liye sangamayug। yahaan tum aate hi ho purushottam banne ke liye। pahle brahman zaroor banna pade। braahmanon ki choti hai na। tum braahmanon ko samjha sakte ho। bolo, tum braahmanon ka to kul hai, braahmanon ki raajdhaani nahin hai। tumhaara yeh kul kisne sthaapan kiya? tumhaara bada kaun hai? phir tum jab samjhaayenge to bahut khush honge। braahmanon ko maan dete hain kyonki woh shaastra aadi sunaate hain। pahle raakhi baandhane ke liye bhi brahman jaate the। aajkal to bachchiyaan jaati hain। tumko to raakhi unko baandhani hai jo pavitrata ki pratigya karen। pratigya zaroor karni pade। bhaarat ko phir se paavan banaane liye ham yeh pratigya karte hain। tum bhi paavan bano, auron ko bhi paavan banaao। aur kiski taakat nahin jo aise kah sake। tum jaante ho yeh antim janma paavan banne se ham paavan duniya ke maalik bante hain। tumhaara dhandha hi yeh hai। aise manushya koi hote hi nahin। tumko jaakar yeh kasam uthvaana hai। baap kehte hain kaam mahaashatru hai, is par vijay paani hai। is par jeet paane se hi tum jagatjeet banenge। in lakshmi-naaraayan ne zaroor aage janma mein purushaartha kiya hai tab to aisa bane hain na। abhi tum bata sakte ho - kis karma se inko yeh pad mila, ismen moonjhane ki to koi baat hi nahin। tumko koi is deepmaala aadi ki khushi nahin hai। tumko to khushi hai - ham baap ke bane hain, unse varsa paate hain। bhakti maarga mein manushya kitna kharcha karte hain। kitne nuksaan bhi ho jaate hain। aag lag jaati hai। parantu samajhte nahin।

tum jaante ho abhi ham phir se apne naye ghar jaane vaale hain। chakra phir hoobhu repeat hoga na। yeh behad ki film hai। behad ka slide hai। behad baap ke bane hain to kaapaari khushi honi chaahiye। ham baap se svarga ka varsa zaroor lenge। baap kehte hain purushaartha se jo chaahiye so lo। purushaartha tumko zaroor karna hai। purushaartha se hi tum oonch ban sakte ho। yeh baba (boodha) itna oonch ban sakte hain to tum kyon nahin ban sakte ho। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) jaise baap sada bachchon ke prati sukhdaai hai, aise sukhdaai banna hai। sabko mukti-jeevanmukti ka raasta bataana hai।

2) dehi-abhimaani banne ki tapasya karni hai। is puraani chhi-chhi duniya se behad ka vairaagi banna hai।

vardaan:- har ek ki visheshta ko smriti mein rakhte hue faithful ban ekmat sangathan banaane vaale sarva ke shubhchintak bhav

drama anusaar har ek ko koi na koi visheshta avashya praapta hai, us visheshta ko kaarya mein lagaao tatha auron ki visheshta ko dekho। ek do mein faithful raho to unki baaton ka bhaav badal jaayega। jab har ek ki visheshta ko dekhenge to anek hote bhi ek dikhaai denge। ekmat sangathan ho jaayega। koi kiske glaani ki baat sunaaye to use teka dene ke bajaae sunaane vaale ka roop parivartan kar do, tab kahenge shubhchintak।

slogan:- shreshtha sankalp ka khajaana hi shreshtha praalabdha va brahman jeevan ka aadhaar hai।

avyakt ishaare - ashareeri va videhi sthiti ka abhyaas badhaao

agar second mein videhi banne ka abhyaas nahin hoga to last ghadi bhi yuddha mein hi jaayegi aur jis baat mein kamjor honge, chaahe svabhaav mein, chaahe sambandh mein aane mein, chaahe sankalp shakti mein, vritti mein, vaayumandal ke prabhaav mein, jis baat mein kamjor honge, usi roop mein jaanboojhkar bhi maaya last paper legi iseelie videhi banne ka abhyaas bahut zaroori hai।