सोमवार 8 दिसंबर 2025 की दैनिक मुरली

08-12-2025 praatahmurli om shanti "baapdaada"' madhuban

“meethe bachche - jab tak jeena hai baap ko yaad karna hai, yaad se hi aayu badhegi, padhaai ka tanta (saar) hi hai yaad''

prashn:- tum bachchon ka ateendriy sukh gaaya hua hai, kyon?

uttar:- kyonki tum sada hi baba ki yaad mein khushiyaan manaate ho, abhi tumhaari sada hi Christmas hai। tumhein bhagwan padhaate hain, isse badi khushi aur kya hogi, yeh roz ki khushi hai isliye tumhaara hi ateendriy sukh gaaya hua hai।

geet:- nayan heen ko raah dikhaao prabhu…

om shanti। gyaan ka teesra netra dene vaala roohaani baap roohaani bachchon ko samjhaate hain। gyaan ka teesra netra sivaae baap ke koi de nahin sakta। to abhi bachchon ko gyaan ka netra mila hai। abhi baap ne samjhaaya hai ki bhakti maarga hai hi andhiyaara maarga। jaise raat mein sojhra nahin hota hai to manushya dhakke khaate hain। gaaya bhi jaata hai brahma ki raat, brahma ka din। satayug mein yeh nahin kahenge ki hamko raah bataao kyonki abhi tumko raah mil rahi hai। baap aakarke muktidhaam aur jeevanmukti dhaam ki raah bata rahe hain। abhi tum purushaartha kar rahe ho। abhi jaante ho ki baaki thoda samay hai, duniya to badalne vaali hai। yeh to geet bhi bane hue hain duniya badalne vaali hai.... parantu manushya bichaare jaante nahin hain ki duniya kab badalni hai, kaise badalni hai, kaun badlaate hain kyonki teesra netra to gyaan ka hai nahin। abhi tum bachchon ko yeh teesra netra mila hai jisse tum is srishti chakra ke aadi-madhya-ant ko jaan gaye ho। aur yahi tumhaari buddhi mein gyaan ki saccharin hai। jaise thodi-si saccharin bahut meethi hoti hai vaise yeh gyaan ke do akshar ‘manamnaabhav....' yahi sabse meethi cheez hai, bas baap ko yaad karo।

baap aate hain aur aakarke raasta bataate hain। kahaan ka raasta bataate hain? shantidham aur sukhdhaam ka। to bachchon ko khushi hoti hai। duniya nahin jaanti hai ki khushiyaan kab manaai jaati hain? khushiyaan to nai duniya mein manaai jaayengi na। yeh to bilkul common baat hai ki puraani duniya mein khushiyaan kahaan se aai? puraani duniya mein manushya traahi-traahi kar rahe hain kyonki tamopradhaan hain। tamopradhaan duniya mein khushiyaan kahaan se aai? satayug ka gyaan to koi mein bhi nahin hai, isliye bichaare yahaan khushiyaan manaate rehte hain। dekho, Christmas ki khushiyaan bhi kitni manaate hain। baba to kehte hain ki agar khushiyon ki baat poochhni ho to gop-gopiyon se (mere bachchon se) poochho kyonki baap bahut sahaj raasta bata rahe hain। grihastha vyavhaar mein rehte hue, apne dhandhedhori ka kartavya karte hue kamal phool ke samaan raho aur mujhe yaad karo। jaise aashik-maashook hote hain na, woh bhi dhandhaadhori karte ek-do ko yaad karte rehte hain। unko saakshaatkaar bhi hote hain jaise laila-majnu, heera-raanjha, vo vikaar ke liye ek-do ke aashik nahin hote hain। unka pyaar gaaya hua hai। usmein ek-do ke aashik hote hain। lekin yahaan woh baat nahin hai। yahaan to tum janma-janmaantar us maashook ke aashik hi rahe ho। woh maashook tumhaara aashik nahin hai। tum unko bulaate ho yahaan aane ke liye, he bhagwan nayan heen ko aakarke raah bataao। tumne aadhaakalpa bulaaya hai। jab duhkh jyaada hota hai to jaasti bulaate hain। jaasti duhkh mein jaasti simran karne vaale bhi hote hain। dekho, abhi kitne yaad karne vaale dher ke dher hain। gaaya hua hai na - duhkh mein simran sab karen...... jitna deri hoti jaati hai, utna tamopradhaan jyaada hote jaate hain। to tum chadh rahe ho, woh aur hi utar rahe hain kyonki jab tak vinaash ho tab tak tamopradhaanta vriddhi ko paati rehti hai। din-pratidin maaya bhi tamopradhaan, vriddhi ko paati jaati hai। is samay baap bhi sarvashaktimaan hai, to maaya bhi phir sarvashaktimaan is samay mein hai। woh bhi jabardasta hai।

tum bachche is samay brahma mukh vanshaavli brahman kul bhooshan ho। tumhaara hai sarvottam kul, isko kaha jaata hai oonch te oonch kul। is samay tumhaara yeh jeevan amoolya hai isliye is jeevan ki (shareer ki) sambhaal bhi karni chaahiye kyonki paanch vikaaron ke kaaran shareer ki bhi aayu to kamti hoti jaati hai na। to baba kehte hain is samay paanch vikaaron ko chhodkar yog mein raho to aayu badhti rahegi। aayu badhte-badhte bhavishya mein tumhaari aayu 150 varsha ki ho jaayegi। abhi nahin isliye baap kehte hain ki is shareer ki bhi bahut sambhaal rakhni chaahiye। nahin to kehte hain yeh shareer kaam ka nahin hai, mitti ka putla hai। abhi tum bachchon ko samajh milti hai ki jab tak jeena hai baba ko yaad karna hai। aatma baba ko yaad karti hai - kyon? varse ke liye। baap kehte hain tum apne ko aatma samajhkar baap ko yaad karo aur daivi gun dhaaran karo to tum phir aise ban jaayenge। to bachchon ko padhaai achhi tarah padhni chaahiye। padhaai mein susti aadi nahin karni chaahiye nahin to naapaas ho jaayenge। bahut kam pad paayenge। padhaai mein bhi mukhya baat yeh hai jisko tanta kaha jaata hai ki baap ko yaad karo। jab pradarshani mein ya centre par koi bhi aate hain to unko pahle-pahle yeh samjhaao ki baba ko yaad karo kyonki woh oonch te oonch hai। to oonche te oonche ko hi yaad karna chaahiye, unse kam ko thode hi yaad karna chaahiye। kehte hain oonche se ooncha bhagwan। bhagwan hi to nai duniya ki sthaapna karne vaale hain। dekho, baap bhi kehte hain nai duniya ki sthaapna main karta hoon isliye tum mujhe yaad karo to tumhaare paap kat jaayen। to yeh pakka yaad kar lo kyonki baap patit-paavan hai na। woh yahi kehte hain ki jab tum mujhe patit-paavan kehte ho to tum tamopradhaan ho, bahut patit ho, abhi tum paavan bano।

baap aakarke bachchon ko samjhaate hain ki tumhaare abhi sukh ke din aane vaale hain, duhkh ke din poore hue hain, pukaarte bhi ho - he duhkh harta, sukh daata। to jaante to ho na ki barobar satayug mein sab sukhi hi sukhi hain। to baap bachchon ko kehte hain ki sabhi shantidham aur sukhdhaam ko yaad karte raho। yeh hai sangamayug, khivaiya tumko paar le jaate hain। baaki ismen koi khivaiya ya naeeya ki baat hai nahin। yeh to mahima kar dete hain ki naeeya ko paar lagaao। ab ek ki naeeya to paar nahin lagni hai na। saare duniya ki naeeya ko paar lagaana hai। yeh saari duniya jaise ek bahut bada jahaaj hai inko paar lagaate hain। to tum bachchon ko bahut khushi manaani chaahiye kyonki tumhaare liye sadaiv khushi hai, sadaiv Christmas hai। jab se tum bachchon ko baap mila hai tumhaari Christmas sadaiv hai isliye ateendriy sukh gaaya hua hai। dekho, yeh sadaiv khush rehte hain, kyon? are behad ka baap mila hai! woh hamko padha rahe hain। to yeh roz ki khushi honi chaahiye na। behad ka baap padha rahe hain vaah! kabhi koi ne suna? geeta mein bhi bhagvaanuvaach hai ki main tumko raajayog sikhlaata hoon, jaise woh log bairistari yog, sarjanri yog sikhlaate hain, main tum roohaani bachchon ko raajayog sikhaata hoon। tum yahaan aate ho to barobar raajayog seekhne aate ho na। moonjhane ki to darkaar nahin। to raajayog seekhkar poora karna chaahiye na। bhaaganti to nahin hona chaahiye। padhna bhi hai to dhaarna bhi achhi karni hai। teacher padhaate hain dhaarna karne ke liye।

har ek ki apni-apni buddhi hoti hai - kiski uttam, kiski madhyam, kiski kanishta। to apne se poochhna chaahiye ki main uttam hoon, madhyam hoon ya kanishta hoon? apne ko aapehi parakhna chaahiye ki main aise oonche te ooncha imtahaan paas karke oonch pad paane ke laayak hoon? main service karta hoon? baap kehte hain - bachche, serviceable bano, baba ko follow karo kyonki main bhi to service karta hoon na। aaya hi hoon service karne ke liye aur roz-roz service karta hoon kyonki rath bhi to liya hai na। rath bhi mazboot, achha hai aur service to inki sadaiv hai। baapdaada to inke rath mein sadaiv hai। bhale inka shareer beemaar pad jaaye, main to baitha hoon na। to main inke andar mein baith karke likhta bhi hoon, agar yeh mukh se nahin bhi bol sake to main likh sakta hoon। murli nahin miss hoti hai। jab tak baith sake, likh saken, to main murli bhi bajaata hoon, bachchon ko likhkarke bhej deta hoon kyonki serviceable hoon na। to baap aakarke samjhaate hain ki tum apne ko aatma samajh karke nishchaybuddhi hokarke service mein lag jaao। baap ki service, on god fatherly service। jaise woh likhte hain on his maijisti service। to tum kya kahenge? yeh maijisti se bhi oonchi service hai kyonki maijisti (mahaaraaja) banaate hain। yeh bhi tum samajh sakte ho ki barobar ham world ka maalik bante hain।

tum bachchon mein jo achhi reeti purushaartha karte hain unko hi mahaaveer kaha jaata hai। to yeh jaanch karni hoti hai ki kaun mahaaveer hain jo baba ke direction par chalte hain। baap samjhaate hain ki bachche apne ko aatma samjho, bhaai-bhaai ko dekho। baap apne ko bhaaiyon ka baap samajhte hain aur bhaaiyon ko hi dekhte hain। sabhi ko to nahin dekhenge। yeh to gyaan hai ki shareer bigar to koi sun na sake, bol na sake। tum to jaante ho na ki main bhi yahaan shareer mein aaya hoon। mainne yeh shareer loan liya hua hai। shareer to sabko hai, shareer ke saath hi aatma yahaan padh rahi hai। to abhi aatmaon ko samajhna chaahiye ki baba hamko padha rahe hain। baba ki baithak kahaan hai? akaal takhta par। baba ne samjhaaya hai ki har ek aatma akaal moorta hai, woh kabhi vinaash nahin hoti hai, kabhi bhi jalti, katti, doobti nahin hai। chhoti-badi nahin hoti hai। shareer chhota-bada hota hai। to duniya mein jo bhi manushya maatra hain, unmein jo aatmaayen hain unka takhta yeh bhrakuti hai। shareer bhinna-bhinna hain। kiska akaal takhta purush ka, kiska stri ka, kiska bachche ka। to jab bhi kisse baat karo to yahi samjho ki ham aatma hain, apne bhaai se baat karte hain। baap ka paigaam dete hain ki shivbaaba ko yaad karo to yeh jo junk lagi hui hai woh nikal jaaye। jaise sone mein alloy padti hai to value kam hoti hai to tumhaari bhi value kam ho gai hai। abhi bilkul hi value les ho gaye hain। isko devaala bhi kaha jaata hai। bhaarat kitna dhanvaan tha, abhi karja uthaate rehte hain। vinaash mein to sabka paisa khatma ho jaayega। dene vaale, lene vaale sabhi khatma ho jaayenge baaki jo avinaashi gyaan ratna lene vaale hain woh phir aakar apna bhaagya lenge। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) ‘baap ko follow kar baba ke samaan serviceable banna hai। apne ko aapehi parakhna hai ki main oonche se ooncha imtahaan paas karke oonch pad paane ke laayak hoon?

2) ‘baba ke direction par chalkar mahaaveer banna hai, jaise baba aatmaon ko dekhte hain, aatmaon ko padhaate hain, aise aatma bhaai-bhaai ko dekhkar baat karni hai।

vardaan:- shreshthata ke aadhaar par sameepta dvaara kalpa ki shreshtha praalabdha banaane vaale vishesh paartadhaari bhav

is marjeeva jeevan mein shreshthata ka aadhaar do baaten hain-1-sada paropkaari rehna। 2-baal brahmachaari rehna। jo bachche in donon baaton mein aadi se ant tak akhanda rahe hain, kisi bhi prakaar ki pavitrata arthaat svachchhata baar-baar khandit nahin hui hai tatha vishwa ke prati aur brahman parivaar ke prati jo sada upkaari hain aise vishesh paartadhaari baap-daada ke sada sameep rehte hain aur unki praalabdha saare kalpa ke liye shreshtha ban jaati hai।

slogan:- sankalp vyartha hain to doosre sab khajaane bhi vyartha ho jaate hain।

avyakt ishaare - ab sampanna va karmaateet banne ki dhun lagaao

karmaateet sthiti ka anubhav karne ke liye gyaan sunne sunaane ke saath ab brahma baap samaan nyaare ashareeri banne ke abhyaas par vishesh attention do। jaise brahma baap ne saakaar jeevan mein karmaateet hone ke pahle nyaare aur pyaare rahne ke abhyaas ka pratyaksha anubhav karaaya। seva ko va koi karma ko chhoda nahin lekin nyaare ho last din bhi bachchon ki seva samaapta ki, aise follow father karo।