शुक्रवार 6 फ़रवरी 2026 की दैनिक मुरली

06-02-2026 praatahmurli om shanti "baapdaada"' madhuban

“meethe bachche - abhi yeh chadhti kala ka samay hai, bhaarat gareeb se saahookaar banta hai, tum baap se satayugi baadshaahi ka varsa le lo''

prashn:- baap ka kaun sa title shreekrishna ko nahin de sakte hain?

uttar:- baap hai gareeb-nivaaj। shreekrishna ko aise nahin kahenge। woh to bahut dhanvaan hai, unke raajya mein sab saahookaar hain। baap jab aate hain to sabse gareeb bhaarat hai। bhaarat ko hi saahookaar banaate hain। tum kehte ho hamaara bhaarat svarga tha, abhi nahin hai, phir se banne vaala hai। gareeb-nivaaz baba hi bhaarat ko svarga banaate hain।

geet:- aakhir woh din aaya aaj…

om shanti। meethe-meethe roohaani bachchon ne yeh geet suna। jaise aatma gupta hai aur shareer pratyaksha hai। aatma in aankhon se dekhne mein nahin aati hai, incognito hai। hai zaroor parantu is shareer se dhaki hui hai isliye kaha jaata hai aatma gupta hai। aatma khud kehti hain main niraakaar hoon, yahaan saakaar mein aakar gupta bani hoon। aatmaon ki niraakaari duniya hai। usmein to gupta ki baat nahin। parampita paramatma bhi vahaan rehte hain। unko kaha jaata hai supreme। oonch te oonch aatma, pare te pare rahne vaala param aatma। baap kehte hain jaise tum gupta ho, mujhe bhi gupta aana pade। main garbhajel mein aata nahin hoon। mera naam ek hi shiv chala aata hai। main is tan mein aata hoon to bhi mera naam nahin badalta। inki aatma ka jo shareer hai, inka naam badalta hai। mujhe to shiv hi kehte hain - sab aatmaon ka baap। to tum aatmaayen is shareer mein gupta ho, is shareer dvaara karma karti ho। main bhi gupta hoon। to bachchon ko yeh gyaan abhi mil raha hai ki aatma is shareer se dhaki hui hai। aatma hai incognito। shareer hai cognito। main bhi hoon ashareeri। baap incognito is shareer dvaara sunaate hain। tum bhi incognito ho, shareer dvaara sunte ho। tum jaante ho baba aaya hua hai - bhaarat ko phir se gareeb se saahookaar banaane। tum kahenge hamaara bhaarat। har ek apne state ke liye kahenge - hamaara gujraat, hamaara raajasthaan। hamaara-hamaara kahne se usmein moh rehta hai। hamaara bhaarat gareeb hai। yeh sabhi maante hain parantu unhein yeh pata nahin ki hamaara bhaarat saahookaar kab tha, kaise tha। tum bachchon ko bahut nasha hai। hamaara bhaarat to bahut saahookaar tha, duhkh ki baat nahin thi। satayug mein doosra koi dharma nahin tha। ek hi devi-devta dharma tha, yeh kisko pata nahin hai। yeh jo world ki history-geography hai yeh koi nahin jaante। abhi tum achhi reeti samajhte ho, hamaara bhaarat bahut saahookaar tha। abhi bahut gareeb hai। ab phir baap aaye hain saahookaar banaane। bhaarat satayug mein bahut saahookaar tha jabki devi-devtaaon ka raajya tha phir woh raajya kahaan chala gaya। yeh koi nahin jaante। rishi-muni aadi bhi kehte the ham rachta aur rachna ko nahin jaante hain। baap kehte hain satayug mein bhi devi-devtaaon ko rachta aur rachna ke aadi-madhya-ant ka gyaan nahin tha। agar unhon ko bhi gyaan ho ki ham seedhi utarte kaliyug mein chale jaayenge to baadshaahi ka sukh bhi na rahe, chinta lag jaae। abhi tumko chinta lagi hui hai ham satopradhaan the phir ham satopradhaan kaise banen! ham aatmaayen jo niraakaari duniya mein rehti thi, vahaan se phir kaise sukhdhaam mein aaye yeh bhi gyaan hai। ham abhi chadhti kala mein hain। yeh 84 janmon ki seedhi hai। drama anusaar har ek actor nambarvaar apne-apne samay par aakar part bajaayenge। ab tum bachche jaante ho gareeb-nivaaz kisko kaha jaata hai, yeh duniya nahin jaanti। geet mein bhi suna - aakhir woh din aaya aaj, jis din ka raasta takte the....., sab bhakta। bhagwan kab aakar ham bhakton ko is bhakti maarga se chhudaae sadgati mein le jaayenge - yeh abhi samjha hai। baba phir se aa gaya hai is shareer mein। shiv jayanti bhi manaate hain to zaroor aate hain। aise bhi nahin kahenge main shreekrishna ke tan mein aata hoon। nahin। baap kehte hain shreekrishna ki aatma ne 84 janma liye hain। unke bahut janmon ke ant ka yeh antim janma hai। jo pahle number mein tha woh ab ant mein hai tat-tvam। main to aata hoon saadhaaran tan mein। tumko aakar batlaata hoon - tumne kaise 84 janma bhoge hain। sardaar log bhi samajhte hain ekoankaar parampita paramatma baap hai। woh barobar manushya se devta banaane vaala hai। to kyon nahin ham bhi devta banen। jo devta bane honge woh ekdam chatak padenge। devi-devta dharma ka to ek bhi apne ko samajhte nahin। aur dharmon ki history bahut chhoti hai। koi ki 500 varsha ki, koi ki 1250 varsha ki। tumhaari history hai 5 hazaar varsha ki। devta dharma vaale hi svarga mein aayenge। aur dharma to aate hi baad mein hain। devta dharma vaale bhi ab aur dharmon mein convert ho gaye hain drama anusaar। phir bhi aise convert ho jaayenge। phir apne-apne dharma mein lautkar aayenge।

baap samjhaate hain - bachche, tum to vishwa ke maalik the। tum bhi samajhte ho baba svarga ki sthaapna karne vaala hai to ham kyon nahin svarga mein honge, baap se ham varsa zaroor lenge - to isse siddha hota hai yeh hamaare dharma ka hai। jo nahin hoga woh aayega hi nahin। kahenge paraaye dharma mein kyon jaayen। tum bachche jaante ho satayug nai duniya mein devtaaon ko bahut sukh the, sone ke mahal the। somnaath ke mandir mein kitna sona tha। aisa koi doosra dharma hota hi nahin। somnaath mandir jaisa itna bhaari mandir koi hoga nahin। bahut heere-javaahraat the। buddha aadi ke koi heere-javaahraaton ke mahal thode hi honge। tum bachchon ko jis baap ne itna oonch banaaya hai unki tumne kitni ijjat rakhi hai! ijjat rakhi jaati hai na। samajhte hain achha karma karke gaye hain। abhi tum jaante ho sabse achhe karma patit-paavan baap hi karke jaate hain। tumhaari aatma kehti hai sabse uttam se uttam seva behad ka baap aakar karte hain। hamko rank se raav, beggar se prince bana dete hain। jo bhaarat ko svarga banaate hain, unki abhi ijjat koi nahin rakhte। tum jaante ho oonch te oonch mandir gaaya hua hai jisko loot gaye। lakshmi-naaraayan ke mandir ko kabhi koi ne loota nahin hai। somnaath ke mandir ko loota hai। bhakti maarga mein bhi bahut dhanvaan hote hain। raajaaon mein bhi nambarvaar hote hain na। jo oonch martabe vaale hote hain to chhote martabe vaale unhon ki ijjat rakhte hain। darbaar mein bhi nambarvaar baithte hain। baba to anubhvi hai na। yahaan ki darbaar hai patit raajaaon ki। paavan raajaaon ki darbaar kaisi hogi। jabki unhon ke paas itna dhan hai to unhon ke ghar bhi itne achhe honge। abhi tum jaante ho baap hamko padha rahe hain, svarga ki sthaapna kara rahe hain। ham mahaaraani-mahaaraaja svarga ke bante hain phir ham girte-girte bhakta banenge to pahle-pahle shivbaaba ke pujaari banenge। jisne svarga ka maalik banaaya unki hi pooja karenge। woh hamko bahut saahookaar banaate hain। abhi bhaarat kitna gareeb hai, jo jameen 500 roopaye mein li thi uski value aaj 5 hazaar se bhi adhik ho gai hai। yeh sab hain artificial daam। vahaan to dharti ka moolya hota nahin, jisko jitna chaahiye le leve। dher ki dher jameen padi hogi। meethi nadiyon par tumhaare mahal honge। manushya bahut thode honge। prakriti daasi hogi। phal-phool bahut achhe milte rehte hain। abhi to kitni mehnat karni padti hai to bhi anna nahin milta। manushya bahut bhookh pyaas mein marte hain। to geet sunne se tumhaare romaanch khade ho jaane chaahiye। baap ko gareeb-nivaaz kehte hain। gareeb-nivaaz ka arth samjha na! kisko saahookaar banaate hain? zaroor jahaan aayega unko saahookaar banaayega na। tum bachche jaante ho - hamko paavan se patit banne mein 5 hazaar varsha lagte hain। abhi phir phat se baba patit se paavan banaate hain। oonch te oonch banaate hain, ek second mein jeevanmukti mil jaati hai। kehte hain baba ham aapka hoon। baap kehte bachche, tum vishwa ka maalik ho। bachcha paida hua aur vaaris bana। kitni khushi hoti hai। bachchi ko dekh chehra utar jaata। yahaan to sabhi aatmaayen bachche hain। abhi pata pada hai ki ham 5 hazaar varsha pahle svarga ke maalik the। baba ne aisa banaaya tha। shivjayanti bhi manaate hain parantu yeh nahin jaante ki woh kab aaya tha। lakshmi-naaraayan ka raajya tha, yeh bhi koi nahin jaante। jayanti manaate sirf ling ke bade-bade mandir banaate hain। parantu woh kaise aaya, kya aakar kiya, kuchh bhi nahin jaante, isko kaha jaata hai blind faith, andhashraddha। unko yeh pata hi nahin hai ki hamaara dharma kaun sa hai, kab sthaapan hua। aur dharma vaalon ko pata hai, buddha kab aaya, tithi taareekh bhi hai। shivbaaba ki, lakshmi-naaraayan ki koi tithi taareekh nahin hai। 5 hazaar varsha ki baat ko laakhon varsha likh diya hai। laakhon varsha ki baat kisko yaad aa sakegi? bhaarat mein devi-devta dharma kab tha, yeh samajhte nahin hain। laakhon varsha ke hisaab se to bhaarat ki aabaadi sabse badi honi chaahiye। bhaarat ki jameen bhi sabse badi honi chaahiye। laakhon varsha mein kitne manushya paida hote, beshumaar manushya ho jaayen। itne to hain nahin, aur hi kamti ho gaye hain, yeh sab baaten baap baith samjhaate hain। manushya sunte hain to kehte hain yeh baaten to kabhi nahin suni, na koi shaastra mein padhi। yeh wonderful baaten hain।

abhi tum bachchon ki buddhi mein saare chakra ki knowledge hai। yeh bahut janmon ke ant ke ant mein ab patit aatma hai, jo satopradhaan tha so ab tamopradhaan hai phir satopradhaan banna hai। tum aatmaon ko ab shiksha mil rahi hai। aatma kaanon dvaara sunti hai to shareer jhoolta hai kyonki aatma sunti hai na। barobar ham aatmaayen 84 janma leti hain। 84 janma mein 84 maa-baap zaroor mile honge। yeh bhi hisaab hai na। buddhi mein aata hai ham 84 janma lete hain phir kam janma vaale bhi honge। aise thode hi sab 84 janma lenge। baap baith samjhaate hain shaastron mein kya-kya likh diya hai। tumhaare liye to phir bhi 84 janma kehte, mere liye to anginat, beshumaar janma kah dete hain। kan-kan mein patthar-bhittar mein thok diya hai। bas jidhar dekhta hoon tu hi tu। krishna hi krishna hai। mathura, vrindaavan mein aise kehte rehte hain। krishna hi sarvavyaapi hai। raadhe panthi vaale phir kahenge raadhe hi raadhe। tum bhi raadhe, ham bhi raadhe।

to ek baap hi barobar gareeb-nivaaz hai। bhaarat jo sabse saahookaar tha, abhi sabse gareeb bana hai isliye mujhe bhaarat mein hi aana pade। yeh bana-banaaya drama hai, ismen jara bhi farka nahin ho sakta। drama jo shoot hua woh hoobhu repeat hoga, ismen paai ka bhi farka nahin ho sakta। drama ka bhi pata hona chaahiye। drama maana drama। woh hote hain had ke drama, yeh hai behad ka drama। is behad ke drama ke aadi-madhya-ant ko koi nahin jaante। to gareeb-nivaaz niraakaar bhagwan ko hi maanenge, shreekrishna ko nahin maanenge। shreekrishna to dhanvaan satayug ka prince bante hain। bhagwan ko to apna shareer hai nahin। woh aakar tum bachchon ko dhanvaan banaate hain, tumko raajayog ki shiksha dete hain। padhaai se barrister aadi bankar phir kamaai karte hain। baap bhi tumko abhi padhaate hain। tum bhavishya mein nar se naaraayan bante ho। tumhaara janma to hoga na। aise to nahin svarga koi samudra se nikal aayega। shreekrishna ne bhi janma liya na। kansapuri aadi to us samay thi nahin। shreekrishna ka kitna naam gaaya jaata hai। unke baap ka gaayan hi nahin। unka baap kahaan hai? zaroor shreekrishna kisi ka bachcha hoga na। shreekrishna jab janma lete hain tab thode bahut patit bhi rehte hain। jab woh bilkul khatma ho jaate hain tab woh gaddi par baithte hain। apna raajya le lete hain, tab se hi unka sanvat shuru hota hai। lakshmi-naaraayan se hi sanvat shuru hota hai। tum poora hisaab likhte ho। inka raajya itna samay, phir inka itna samay, to manushya samjhenge - yeh kalpa ki aayu badi ho nahin sakti। 5 hazaar varsha ka poora hisaab hai। tum bachchon ki buddhi mein aata hai na। ham kal svarga ke maalik the। baap ne banaaya tha tab to unki ham shiv jayanti mana rahe hain। tum sabko jaante ho। Christ, guroonaanak aadi phir kab aayenge, yeh tumko knowledge hai। world ki history-geography hoobhu repeat hoti hai। yeh padhaai kitni sahaj hai। tum svarga ko jaante ho, barobar bhaarat svarga tha। bhaarat avinaashi khanda hai। bhaarat jaisi mahima aur koi ki ho nahin sakti। sabko patit se paavan banaane vaala ek hi baap hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) drama ke aadi-madhya-ant ka gyaan buddhi mein rakhte hue sab chintaayen chhod deni hain। ek satopradhaan banne ki chinta rakhni hai।

2) gareeb nivaaz baba bhaarat ko gareeb se saahookaar banaane aaya hai, unka poora-poora madadgaar banna hai। apni nai duniya ko yaad kar sada khushi mein rehna hai।

vardaan:- dil mein sada ek raam ko basaakar sachchi seva karne vaale maayaajeet, vijayi bhav

hanoomaan ki visheshta dikhaate hain ki woh sada sevaadhaari, mahaaveer tha, isliye khud nahin jala lekin poonchh dvaara lanka jala di। to yahaan bhi jo sada sevaadhaari hain vahi maaya ke adhikaar ko khatma kar sakte hain। jo sevaadhaari nahin woh maaya ke raajya ko jala nahin sakte। hanoomaan ke dil mein sada ek raam basta tha, to baap ke sivaae aur koi dil mein na ho, apne deh ki smriti bhi na ho tab maayaajeet, vijayi banenge।

slogan:- jaise aatma aur shareer combined hai aise aap baap ke saath combined raho।

ye avyakt ishaare - ekta aur vishvaas ki visheshta dvaara saphalta sampanna bano

sangathan mein har ek ki visheshta ko dekhna, visheshta hi grahan karna aur kamjoriyon ko mitaane ka prayatna karna - yahi vidhi hai, ekta ka sangathan majboot karne ki। jaise aap sabka uthna, bolna, chalna ek jaisa hai ya sabki ek jaisi baaten, ek hi gati, ek hi reeti, ek hi neeti hai, aise hi sanskaar bhi samaan dikhaai den। bhinnata hote bhi ek do mein vishvaas rakh sabke vichaaron ko satkaar do, yahi ekta ka aadhaar hai।