बुधवार 11 फ़रवरी 2026 की दैनिक मुरली

11-02-2026 praatahmurli om shanti "baapdaada"' madhuban

“meethe bachche - sabko yahi paigaam do ki baap ka pharmaan hai - is purushottam sangamayug par pavitra bano to satayug ka varsa mil jaayega''

prashn:- kaun sa sasta sauda sabko batlaao?

uttar:- is antim janma mein baap ke direction par chal pavitra bano to 21 janmon ke liye vishwa ki baadshaahi mil jaayegi, yeh bahut sasta sauda hai। yahi sauda karna tum sabko sikhlaao। bolo, ab shivbaaba ko yaad kar pavitra bano to pavitra duniya ka maalik banenge।

om shanti। roohaani bachche jaante hain, roohaani baap samjhaate hain ki pradarshani va mele mein show dikhlaate hain ya chitron par manushyon ko samjhaate hain ki baap se ab behad ka varsa lena hai। kaun sa varsa? manushya se devta banne ka athva behad ke baap se aadhaakalpa ke liye svarga ka raajya kaise lena hai, yeh samjhaane ka hai। baap saudaagar to hai hi, unse yeh sauda karna hai। yeh to manushya jaante hain ki devi-devtaayen pavitra rehte hain। bhaarat mein jab satayug tha to devi-devta pavitra the। zaroor unhonne koi praapti ki hogi svarga ke liye। svarga ki sthaapna karne vaale baap bigar koi bhi praapti kara na sake। patit-paavan baap hi patiton ko paavan banaae paavan duniya ka raajya dene vaala hai। sauda kitna sasta dete hain। sirf kehte hain yeh tumhaara antim janma hai। jab tak main yahaan hoon, pavitra bano। main aaya hoon pavitra banaane। tum is antim janma mein paavan banne ka purushaartha karenge to paavan duniya ka varsa lenge। sauda to bada sasta hai। to baba ko vichaar aaya bachchon ko aise samjhaana chaahiye ki baap ka pharmaan hai - pavitra bano। yeh purushottam sangamayug hai, jo pavitra banne ka hai। uttam se uttam purush hain hi devtaayen। lakshmi-naaraayan ka raajya chala hai na। deity world sovereignty tumko baap se varse mein mil sakti hai। baap ki mat par yeh antim janma pavitra banenge to yeh bhi yukti batlaate hain ki yogbal se apne ko tamopradhaan se satopradhaan kaise banaao। bachchon ko kalyaan liye kharcha to karna hi hai। kharche bigar raajdhaani sthaapan nahin ho sakti। abhi lakshmi-naaraayan ki raajdhaani sthaapan ho rahi hai। bachchon ko pavitra zaroor banna hai। mansa-vaacha-karmana koi bhi ulta-sulta kaam nahin karna hai। devtaaon ko kabhi koi kharaab khyaal bhi nahin aata। mukh se aisa koi vachan nahin nikalta। woh hain hi sarvagun sampanna, sampoorn nirvikaari, maryaada purushottam…। jo hokar jaate hain unhon ki mahima gaai jaati hai। ab tum bachchon ko bhi vahi devi-devta banaane aaya hoon। to mansa-vaacha-karmana koi bhi aisa bura kaam nahin karna hai। devtaayen sampoorn nirvikaari the, yeh gun bhi tum abhi dhaaran kar sakte ho kyonki is mrityulok mein tumhaara yeh antim janma hai। patit duniya ko mrityu-lok, paavan duniya ko amarlok kaha jaata hai। abhi mrityulok ka vinaash saamne khada hai। zaroor amarpuri ki sthaapna hoti hogi। yeh vahi mahaabhaari mahaabhaarat ladaai hai, jo shaastron mein dikhaai hui hai, jisse puraani vicious world khatma hoti hai। parantu yeh gyaan koi mein hai nahin। baap kehte hain sab agyaan neend mein soye pade hain। 5 vikaaron ka nasha rehta hai। ab baap kehte hain pavitra bano। master god to banenge na। lakshmi-naaraayan ko god-goddess kehte hain arthaat god dvaara yeh varsa paaya hai। abhi to bhaarat patit hai। mansa-vaacha-karmana kartavya hi aise chalte hain। koi bhi baat pahle buddhi mein aati hai phir mukh se nikalti hai। karmana mein aane se vikarma ban jaata hai। baap kehte hain vahaan koi vikarma hota nahin। yahaan vikarma hote hain kyonki raavan raajya hai। ab baap kehte hain baaki jo aayu hai pavitra bano। pratigya karni hai, pavitra ban aur phir mere saath buddhi ka yog bhi lagaana hai, jisse tumhaare janma-janmaantar ke paap bhi kat jaayen, tab hi tum 21 janma ke liye svarga ke maalik banenge। baap offer karte hain, yeh to samjhaate rehte hain ki in dvaara baap yeh varsa dete hain। woh hai shivbaaba, yeh hai daada isliye hamesha kehte hi hain baapdaada। shivbaaba brahma daada। baap kitna sauda karte hain। mrityulok ka vinaash saamne khada hai। amarlok ki sthaapna ho rahi hai। pradarshani mela karte hi isliye hain ki bhaaratvaasiyon ka kalyaan ho। baap hi aakar bhaarat mein raamraajya banaate hain। raamraajya mein zaroor pavitra hi honge। baap kehte hain bachche kaam mahaashatru hai। in 5 vikaaron ko hi maaya kaha jaata hai। in par jeet paane se tum jagatjeet banenge। jagatjeet hain hi devi-devtaayen aur koi jagatjeet ban nahin sakte। baba ne samjhaaya tha - Christian log agar aapas mein mil jaayen to saari srishti ki raajaai le sakte hain। parantu law nahin hai। yeh bombs hai hi puraani duniya ko khatma karne ke liye। kalpa-kalpa aise nai duniya se puraani, puraani se nai hoti hai। nai duniya mein hai eeshvareey raajya, jisko raamraajya kaha jaata hai। eeshvar ko na jaanne kaaran aise hi raam-raam japte rehte hain। to tum bachchon ke andar mein yeh baaten dhaaran honi chaahiye। barobar ham 84 janmon mein satopradhaan se tamopradhaan bane hain। ab phir satopradhaan zaroor banna hai। shivbaaba ka direction hai, ab us par chalenge to 21 janma ke liye pavitra duniya mein oonch pad paayenge। ab chaahe purushaartha karen ya na karen, chaahe to yaad mein rah auron ko raasta bataayen, chaahen na bataayen। pradarshaniyon dvaara bachche bahuton ko raasta bata rahe hain। apna bhi kalyaan karna hai। sauda bada sasta hai। sirf yeh antim janma pavitra rahne se, shivbaaba ki yaad mein rahne se tum tamopradhaan se satopradhaan ban jaayenge। kitna sasta sauda hai। jeevan hi palat jaata hai। aise-aise vichaar karna chaahiye। baba ke paas samaachaar aate hain। raakhi baandhane gaye to koi-koi ne kaha is samay jabki tamopradhaan duniya hai, ismen pavitra rehna - yeh to asambhav hai। un bichaaron ko pata nahin padta ki abhi sangamayug hai। baap hi pavitra banaate hain। inhon ka madadgaar parampita paramatma hai। unko yeh pata hi nahin ki yahaan bheeti bahut bhaari hai। pavitra banne se pavitra duniya ka maalik banna hota hai। baap kehte hain in maaya roopi 5 vikaaron par jeet paane se tum jagatjeet banenge। to ham kyon nahin pavitra banenge। first class sauda hai। baap kehte hain kaam mahaashatru hai। in par jeet paane se tum pavitra banenge। maaya jeet jagatjeet। yeh hai yogbal se maaya ko jeetne ki baat। parampita paramatma hi aakar roohon ko samjhaate hain ki mujhe yaad karo to khaad nikal jaayegi। tum satopradhaan duniya ke maalik ban jaayenge। baap varsa dete hain sangam par। sabse uttam purush yeh lakshmi-naaraayan the, unhon ko hi maryaada purushottam devi-devta dharma vaala kaha jaata hai। samjhaaya to bahut achhi reeti jaata hai parantu kabhi-kabhi yeh points bhool jaati hain। phir baad mein vichaar aata hai, bhaashan mein yeh-yeh points nahin samjhaai। samjhaane ki points to bahut hain। aise hota hai। vakeel log bhi koi-koi point bhool jaate hain। phir jab vo point baad mein yaad aati hain to phir ladte hain। doctor log ka bhi aisa hota hai। khyaalaat chalti hain - is beemaari ke liye yeh davaai theek hai। yahaan bhi point to dher hain। baba kehte hain aaj tumko guhya point samjhaata hoon। parantu samajhne vaale hain sab patit। kehte bhi hain - he patit-paavan..... phir kisko kaho to bigad jaayenge। eeshvar ke saamne sach kehte hain - he patit-paavan aao, aakar hamko paavan banaao। eeshvar ko bhool jaate to phir jhooth kah dete, isliye bada yukti se samjhaana hai jo sarpa bhi mare laathi bhi na toote। baap kehte hain choohe se gun uthaao। chooha kaatta aisi yukti se hai jo khoon bhi nikalta hai parantu pata bilkul nahin padta। to bachchon ki buddhi mein sab points rahni chaahiye। yog mein rahne vaalon ko samay par madad milti hai। ho sakta hai sunne vaala sunaane vaale se bhi jaasti baap ka pyaara ho। to baap khud bhi baith samjha denge। to aisa samjhaana hai jo woh samjhen pavitra banna to bahut achha hai। yeh ek janma pavitra rahne se ham 21 janma pavitra duniya ke maalik banenge। bhagvaanuvaach - yeh antim janma pavitra bano to ham guarantee karte hain, drama plan anusaar tum 21 janma ke liye varsa pa sakte ho। yeh to ham kalpa-kalpa varsa paate rehte hain। service ka jinko shauk hoga woh to samjhenge ki ham jaakar samjhaayen। bhaagna pade। baap to hai gyaan ka saagar, woh kitni gyaan ki varsha karte rehte hain। jinki aatma pavitra hai to dhaarna bhi hoti hai। apna naam baala kar dikhaate hain। pradarshani mele se pata pad sakta hai, kaun kaisi service karte hain। teachers ko jaanch karni chaahiye - kaun kaise samjhaate hain। bahut karke lakshmi-naaraayan va seedhi ke chitra par samjhaana achha hai। yogbal se phir aise lakshmi-naaraayan bante hain। lakshmi-naaraayan so aadi dev, aadi devi। chaturbhuj mein lakshmi-naaraayan donon aa jaate hain। do bhujaayen lakshmi ki, do naaraayan ki। yeh bhi bhaaratvaasi nahin jaante hain। mahaalakshmi ki 4 bhujaayen hain, iska matlab hi hai ve yugal hain। vishnu hai hi chaturbhuj।

pradarshani mein to roz-roz samjhaaya jaata hai। rath ko bhi dikhaaya hai। kehte hain arjun baitha tha। krishna rath chalaane vaala tha। yeh sab hain kathaayen। abhi yeh hain gyaan ki baaten। dikhaate hain gyaan amrit ka kalash lakshmi ke sir par rakha hai। vaastav mein kalash rakha hai jagat amba par, jo phir lakshmi banti hai। yeh bhi samjhaana pade। satayug mein ek dharma, ek mat ke manushya hote hain। devtaaon ki hai hi ek mat। devtaaon ko hi shri kaha jaata hai aur kisko nahin kehte। to baba ko khyaal chal raha tha ki samjhaane ke liye akshar thode ho। is antim janma mein 5 vikaaron par jeet paane se tum raamraajya ke maalik banenge। yeh to sasta sauda hai। baap aakar avinaashi gyaan ratnon ka daan dete hain। baap hai gyaan ka saagar। vahi gyaan ratna dete hain। indra sabha mein koi sabjapri, pukhraaj pari bhi hain। hain to sab madad karne vaale। javaahraat mein kisma-kisma ke hote hain na isliye 9 ratna dikhlaaye hue hain। yeh to zaroor hai jo achhi reeti padhenge to pad bhi paayenge। nambarvaar to hain na। purushaartha karne ka time hi yeh hai। yeh to bachche samajhte hain ham baap ki maala ke daane bante hain। jitna shivbaaba ko yaad karenge utna ham jaise ki yaad ki yaatra mein daudi pahante hain। paap bhi jaldi vinaash honge।

yeh padhaai koi lambi-chaudi nahin hai sirf pavitra rehna hai। daiveegun bhi dhaaran karne hain। mukh se kabhi patthar nahin nikaalne chaahiye। patthar phenkane vaale pattharbuddhi hi banenge। ratna nikaalne vaale hi oonch pad paayenge। yeh to bahut sahaj hai। jigyaasu ko samjhaao - patit-paavan sarva ka mukti-jeevanmukti daata parampita paramatma shiv kahe - he bhaaratvaasi roohaani bachchon, raavan raajya mrityulok ke is kaliyugi antim janma mein pavitra ho rahne se aur parampita paramatma shiv ke saath buddhi yogbal ki yaatra se tamopradhaan aatmaayen satopradhaan aatma ban satopradhaan satayugi vishwa par pavitrata, sukh, shanti, sampatti sampanna maryaada purushottam daivi svaraajya pad phir se pa sakte ho, 5 hazaar varsha pahle misal। parantu hovanhaar mahaabhaari vinaash ke pahle baap hamko varsa dete hain, padhaai padhaate hain। jitna padhenge utna pad paayenge। saath to le hi jaayenge phir hamko is puraane shareer ka va is duniya ka khyaal kyon hona chaahiye। tumhaara time hai puraani duniya ko chhodne ka। aisi-aisi baaten buddhi mein manthan hoti rahen to bhi bahut achha hai। aage chal purushaartha karte-karte samay aata jaayega phir ghutka nahin aayega। dekhenge duniya bhi aakar thode time par rahi hai to buddhiyog lagaana chaahiye। service karne se madad bhi milegi। jitna kisi ko sukh ka raasta bataayenge utna khushi rahegi। purushaartha bhi chalta hai। takdeer dikhaai padti hai। baap to tadveer sikhlaate hain। koi us par lag padte hain, koi nahin lagte hain। tum jaante ho karodapti, padmapti sab aise hi khatma ho jaayenge। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) oonch pad paane ke liye mukh se sadaiv ratna nikaalne hain, patthar nahin। mansa-vaacha-karmana aise karma karne hain jo maryaada purushottam banaane vaale hon।

2) is antim janma mein pavitra banne ki pratigya karni hai। pavitra banne ki hi yukti sabko sunaani hai।

vardaan:- ever ready ban har paristhiti roopi paper mein full paas hone vaale ever happy bhav

jo ever ready hain unhon ka practical swaroop ever happy hoga। koi bhi paristhiti roopi paper va praakritik aapda dvaara aaya hua paper va koi bhi shaareerik karmabhog roopi paper aa jaaye - in sab prakaar ke papers mein full paas hone vaale ko hi ever ready kahenge। jaise samay kiske liye rookta nahin, aise kabhi koi bhi rookaavat rok na sake, maaya ke sookshm va sthool vighna ek second mein samaapta ho jaaen tab ever happy rah sakenge।

slogan:- samay par sarva shaktiyon ko kaarya mein lagaana arthaat master sarvashaktimaan banna।

ye avyakt ishaare - ekta aur vishvaas ki visheshta dvaara saphalta sampanna bano

ekta ke do aadhaar hai - ek-faith (vishvaas), doosra-lav (pyaar)। kabhi bhi ek do mein vishvaas kam na ho, ek ne kaha doosre ne maana... yahi vidhi hai ekta ke sootra mein pirone ki। dil ka aapsi sneh sameep le aata hai। jaise baap se sabka sneh hai aise parivaar se bhi dil ka sachcha sneh ho, iske liye svamaan mein rahkar sabko sammaan do।