गुरुवार 26 फ़रवरी 2026 की दैनिक मुरली

26-02-2026 praatahmurli om shanti "baapdaada"' madhuban

“meethe bachche - sukh dene vaale ek baap ko yaad karo, is thode samay mein yogbal jama karo to ant mein bahut kaam aayega''

prashn:- behad ke vairaagi bachche, tumhein kaun si smriti sada rahni chaahiye?

uttar:- yeh hamaara chhi-chhi chola hai, ise chhod vaapis ghar jaana hai - yeh smriti sada rahe। baap aur varsa yaad rahe, doosra kuchh bhi yaad na aaye। yeh hai behad ka vairaagya। karma karte yaad mein rahne ka aisa purushaartha karna hai jo paapon ka bojha sir se utar jaaye। aatma tamopradhaan se satopradhaan ban jaaye।

om shanti। baap bachchon ko roz bahut sahaj baaten samjhaate hain। yeh hai eeshvareey paathshaala। barobar geeta mein bhi kehte hain bhagvaanuvaach। bhagwan baap sabka ek hai। sab bhagwan nahin ho sakte। haan sab bachche ho sakte hain ek baap ke। yeh zaroor buddhi mein aana chaahiye ki baap svarga nai duniya ki sthaapna karne vaala hai। us baap se hamko svarga ka varsa zaroor mila hoga। bhaarat mein hi shiv jayanti gaai jaati hai। parantu shiv jayanti kaise hoti hai, yeh to baap hi aakar samjhaate hain। baap aate hain kalpa ke sangamayug par। bachchon ko phir se patit se paavan banaane arthaat varsa dene। is samay sabko raavan ka shraap hai isliye sab duhkhi hain। abhi kaliyugi puraani duniya hai। yeh hamesha yaad rakho ki ham brahma mukh vanshaavli brahman hain। jo bhi apne ko brahmaakumaar kumaari samajhte hain, unko zaroor yeh samajhna chaahiye ki kalpa-kalpa daade se brahma dvaara varsa lete hain। itne dher bachche aur koi ko ho nahin sakte। woh hai sabka baap। brahma bhi bachcha hai। sab bachchon ko varsa daade se milta hai। unka varsa hai satayug ki raajdhaani। yeh behad ka baap jab svarga ka rachayita hai to zaroor hamko svarga ki raajaai honi chaahiye। parantu yeh bhool gaye hain। hamko svarga ki baadshaahi thi। parantu niraakaar baap kaise denge, zaroor brahma dvaara denge। bhaarat mein inka raajya tha। abhi kalpa ka sangam hai। sangam par brahma hai tab to bi.ke. kahlaate hain। andhashraddha ki koi baat ho nahin sakti। adoption hai। ham brahmaakumaar kumaariyaan hain। brahma shivbaaba ka bachcha hai, hamko shivbaaba se phir se svarga ki baadshaahi mil rahi hai। pahle bhi mili thi, jisko 5 hajaar varsha hue। ham devi devta dharma ke the। pichhaadi tak vriddhi hoti rehti hai। jaise Christ aaya, Christian dharma abhi tak hai। vriddhi hoti rehti hai। ve jaante hain ki Christ dvaara ham Christian banen। aaj se 2 hajaar varsha pahle Christ aaya tha। ab vriddhi ho rahi hai। pahle-pahle satopradhaan phir rajo, tamo mein aana hai। tum satayug mein satopradhaan the phir rajo, tamo mein aaye ho। tamopradhaan srishti se phir satopradhaan zaroor hoti hai। nai duniya mein aadi sanaatan devi devta dharma tha। mukhya dharma hain chaar। tumhaara dharma aadhaakalpa chalta hai। yahaan bhi tum us dharma ke ho। lekin vikaari hone ke kaaran tum apne ko devi devta nahin kahlaate ho। tum the aadi sanaatan devi devta dharma ke parantu vaam maarga mein jaane ke kaaran tum patit bane ho, isliye apne ko hindu kah dete hain। ab tum brahman bane ho। oonche te ooncha hai shivbaaba। phir ho tum brahman। tum braahmanon ka oonche te ooncha varna hai। brahma ke bachche bane ho। parantu varsa brahma se nahin milta hai। shivbaaba brahma dvaara svarga ki sthaapna kar rahe hain। tumhaari aatma ab baap ko jaan gai hai। baap kehte hain ki mere dvaara mere ko jaanne se saare srishti chakra ke aadi madhya ant ki knowledge samajh lenge। woh gyaan mere ko hi hai। main gyaan ka saagar, aananda ka saagar, pavitrata ka saagar hoon। 21 janma tum pavitra bante ho phir vishay saagar mein pad jaate ho। abhi gyaan ka saagar baap tumko patit se paavan banaate hain। koi ganga ka paani paavan nahin bana sakta। snaan karne jaate hain parantu woh paani koi patit-paavan nahin hai। yeh nadiyaan to satayug mein bhi hain, to kaliyug mein bhi hain। paani ka farka nahin rehta। kehte bhi hain “sarva ka sadgati daata ek raam।'' vahi gyaan ka saagar patit-paavan hai।

baba aakar gyaan samjhaate hain jisse tum svarga ke maalik bante ho। satayug treta mein bhakti shaastra aadi kuchh hote nahin hain। tum baap se varsa lete ho sada sukh ka। aise nahin vahaan tumko ganga snaan karna hai va koi yaatra karni hai। tumhaari yeh hai roohaani yaatra jo koi manushya sikhla nahin sakte। baap hai sab aatmaon ka baap, jismaani baap to anek hain। roohaani baap ek hai। yeh pakka-pakka yaad kar lo। baba bhi poochhte hain tumko kitne baap hain to moonjh jaate hain ki yeh kya poochhte hain? baap to sabka ek hota hai। do teen baap kaise honge। baap samjhaate hain us paramatma baap ko yaad karte ho duhkh mein। duhkh mein hamesha kehte ho he parampita paramatma hamko duhkh se chhudaao। to do baap hue na। ek jismaani baap, doosra roohaani baap। jiski mahima gaate hain tum maat-pita ham baalak tere…tumhari kripa se sukh ghanere। laukik maa baap se sukh ghanere nahin milte hain। jab duhkh hota hai to us baap ka simran karte hain। yeh baap hi aisa prashn poochhte hain, doosra to koi poochh na sake।

bhakti maarga mein tum gaate ho baba aap aayenge to ham aapke sivaae aur koi ki nahin sunenge। aur to sab duhkh dete hain, aap hi sukh dene vaale ho। to baap aakar yaad dilaate hain ki tum kya kehte the। tum jaante ho, tum hi brahmaakumaar kumaari kahlaate ho। manushya ki aisi pattharbuddhi hai jo yeh bhi nahin samajhte ki bi.ke. kya hain! mama baba kaun hain! yeh koi saadhu santa nahin hain। saadhu sannyaasi ko guru kahenge, maat-pita nahin kahenge। yeh baap to aakar daivi dharma ka raajya sthaapan karte hain। jahaan yeh lakshmi naaraayan raaja raani raajya karte the। pahle pavitra the phir apvitra bante hain। jo poojya the, ve phir 84 janma lete hain। pahle behad ke baap ka 21 janma sukh ka varsa milta hai। kumaari woh jo 21 kul ka uddhaar kare। yeh tumhaara gaayan hai। tum kumaariyaan ho, grihasthi nahin ho। bhal bade hain lekin marjeeva ban, sab baap ke bachche bachchiyaan bane ho। prajaapita brahma ke dher bachche hain aur vriddhi ko paate rahenge। phir yeh sab devta banenge। yeh shivbaaba ka yagya hai। isko kaha jaata hai raajasva yagya, svaraajya paane ka yagya। aatmaon ko baap se svarga ke raajya ka varsa milta hai। is raajasva ashvamedh gyaan yagya mein kya karna hai? shareer sahit jo kuchh hai, woh balihaar karna hai athva svaaha karna hai। is yagya se to tum phir raajya paayenge। baap yaad dilaate hain ki bhakti maarga mein tum gaate the ki he baba, aap jab aayenge to ham balihaar jaayenge, vaari jaayenge। ab tum apne ko sab bra.ku. kumaariyaan to samajhte ho। bhal raho apne grihastha vyavhaar mein parantu paavan rehna hoga, kamal pushpa samaan। apne ko aatma samjho। ham baba ke bachche hain। tum aatmaayen ho aashik। baap kehte hain main hoon ek maashook। tum mujh maashook ko pukaarte rehte ho। tum aadhaakalpa ke aashik ho jisko parampita paramatma kaha jaata hai, woh niraakaar hai। aatma bhi niraakaar hai jo is shareer dvaara part bajaati hai। bhakti maarga mein bhi tumko part bajaana hai। bhakti hai hi raat, andhiyaare mein manushya thokren khaate hain। dvaapar se lekar tumne thokren khaai hain। is samay mahaaduhkhi ho gaye ho। ab puraani duniya ka ant hai। yeh paisa aadi sab mitti mein mil jaana hai। bhal koi karodapti hain, raaja hain, bachche paida honge to samjhega yeh dhan hamaare bachchon ke liye hai। hamaare putra, potre khaayenge। baap kehte hain kuchh bhi khaayenge nahin। yeh duniya hi khatma hone vaali hai। baaki thoda samay hai। vighna bahut padenge। aapas mein ladenge। pichhaadi mein aise ladenge jo khoon ki nadiyaan bahengi। tumhaari to koi se ladaai nahin hai। tum yogbal mein rehte ho। tum yaad mein rahenge to koi bhi tumhaare saamne bure vichaar se aayenge to unko bhayankar saakshaatkaar ho jaayega aur jhat bhaag jaayenge। tum shivbaaba ko yaad karenge aur ve bhaag jaayenge। jo pakke bachche hain, purushaartha mein rehte hain ki mera to ek shivbaaba, doosra na koi। baap samjhaate hain ki hath kaar de...bachchon ko ghar ko bhi sambhaalna hai। parantu tum aatmaayen baap ko yaad karo to paapon ka bojha bhi utar jaayega। sirf mujhe yaad karo to tum tamopradhaan se satopradhaan ban jaayenge, parantu nambarvaar purushaartha anusaar। phir tum sab yeh shareer chhodenge, baba sabhi aatmaon ko machchharon sadrishya le jaayenge। baaki saari duniya ko sajaayen khaani hain। bhaarat mein baaki thode jaakar rahenge। uske liye yeh mahaabhaarat ladaai hai। yahaan to bahut vriddhi hogi। pradarshani, projector aadi dvaara kitne sunte hain। woh praja banti jaati hai। raaja to ek hota hai baaki hoti hai praja। vazeer bhi praja ki line mein aa jaata hai। dher praja hoti hai। ek raaja ki laakhon ke andaaj mein praja hoti hai। to raaja raani ko mehnat karni pade na।

baap kehte - sab kuchh karte nirantar mujhe yaad karo। jaise aashik-maashook hote hain, unhon ka jismaani lav rehta hai। tum bachche is samay aashik ho। tumhaara maashook aaya hua hai। tumko padha raha hai। padhte-padhte tum devta ban jaayenge। yaad se vikarma vinaash honge aur tum sadaiv nirogi bhi banenge। phir 84 ke chakra ko bhi yaad rakhna hai। satayug mein itne janma, treta mein itne janma। ham devi devta dharma vaalon ne poore 84 ka chakra lagaaya hai। aage chalkar tum bahut vriddhi ko paayenge। tumhaare centres hajaaron ki andaaj mein ho jaayenge। gali-gali mein samjhaate rahenge ki sirf baap ko aur varse ko yaad karo। ab chalo ghar vaapis। yeh to chhi-chhi chola hai। yeh hai behad ka vairaagya। sannyaasi to sirf had ka gharbaar chhod dete hain। woh hain hathayogi। woh raajayog sikhla nahin sakte। kehte hain - yeh bhakti bhi anaadi hai। baap kehte hain yeh bhakti to dvaapar se shuru hoti hai। 84 paudhiyaan utri ab tum tamopradhaan bane ho। tum so devi devta the। Christian kahenge ham so Christian the। tum jaante ho ham satayug mein the। baap ne devi devta dharma sthaapan kiya। yeh jo lakshmi-naaraayan the woh ab brahman bane hain। satayug mein ek raaja raani the, ek bhaasha thi। yeh bhi bachchon ne saakshaatkaar kiya hai। tum ho sab aadi sanaatan dharma ke। tum hi 84 janma lete ho। woh jo kehte aatma nirlep hai va eeshvar sarvavyaapi hai, yeh wrong hai। sabmen aatma hai, phir kaise kehte ho hamaare mein paramatma hai। phir to sab fathers ho gaye। kitne tamopradhaan ban gaye hain। aage jo sunte the woh maan lete the। ab baap aakar satya sunaate hain। tumko gyaan ka teesra netra dete hain jisse tum srishti ke aadi madhya ant ko jaante ho। amar-katha bhi yeh hai। baaki sookshm vatan mein katha aadi hai nahin। yeh sab bhakti maarga ka sapling hai। tum amraktha sun rahe ho, amar banne ke liye। vahaan tum khushi se ek shareer chhod doosra jaakar lenge। yahaan to koi marta hai to rote peette hain। vahaan beemaari aadi hoti nahin। sadaiv ever healthy rehte hain। aayu bhi badi hoti hai। vahaan patitapna hota nahin। ab yeh pakka kar lena hai ki hamne 84 ka chakra poora kiya hai। ab baba hamko lene aaya hai। paavan banne ki yuktiyaan bhi tumko bataate hain। sirf mujh baap ko aur varse ko yaad karo। satayug mein 16 kala sampoorn phir kala kam hoti jaati hai। ab tumhaare mein koi kala nahin rahi hai। baap hi duhkh se chhudaakar sukh mein le jaate hain isliye liberator kaha jaata hai। sabko apne saath le jaate hain। tumhaare guru tumko saath thode hi le jaate hain। vo guru chala jaata hai to chela gaddi par baithta hai phir chelon mein bahut gadbad ho jaati hai। aapas mein gaddi ke liye lad padte hain। baap kehte hain main tum aatmaon ko saath le jaaoonga। tum sampoorn nahin banenge to sajaayen khaayenge aur pad bhrashta hoga। yahaan raajdhaani sthaapan ho rahi hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) yaad ka aisa abhyaas karna hai jo bure vichaar vaale saamne aate hi parivartan ho jaaen। mera to ek shivbaaba, doosra na koi... is purushaartha mein rehna hai।

2) svaraajya paane ke liye shareer sahit jo kuchh bhi hai, woh balihaar jaana hai। jab is roodra yagya mein sab kuchh svaaha karenge tab raajya pad milega।

vardaan:- sahan shakti ki visheshta dvaara doosre ke sanskaaron ko parivartan karne vaale dridh sankalpadhaari bhav

jaise brahma baap ne gyaani aur agyaani aatmaon dvaara insult sahan kar use parivartan kiya to follow father karo, iske liye apne sankalpon mein sirf dridhta ko dhaaran karo। yeh nahin socho ki kahaan tak hoga। sirf thoda pahle lagta hai kaise hoga, kahaan tak sahan karenge। lekin agar aapke liye koi kuchh bolta bhi hai to aap chup raho, sahan kar lo to woh bhi badal jaayega। sirf dilshikasta nahin bano।

slogan:- sangam par sahan kar lena, jhuk jaana, yahi sabse badi mahaanta hai।

ye avyakt ishaare - ekta aur vishvaas ki visheshta dvaara saphalta sampanna bano

baapdaada chaahte hain ki bachchon ki pahle saathiyon mein, seva mein, vaayumandal mein ekta ho, phir ek bal ek bharosa, ekmat ho tab seva mein saphalta milegi। jaise naariyal todkar, ribbon kaatkar udghaatan karte ho, aise ekmat, ekbal, ek bharosa aur ekta ki ribbon kaato aur phir sarva ke santushtata, prasannata ka naariyal todo। yeh paani dharni mein daalo phir dekho saphalta kitni hoti hai।